الغول والعنقاء والخل الوفي !
خانونـي الخـلان والدنيـا قسـت
ما عاد به يا غربتـي خـل ٍ وفـي
(اقلوبهم ) لاعذب مشاعرهم نسـت
وأشواقهم تذبل / تمـوت وتختفـي
ذيك المشاعر كيف جفـت ويبسـت
وانا من أشواقـي اولـع وانطفـي
وذيك الشفاه اللي بالاشواق همست
.كيف بممات الحب راحت تحتفـي !
على ضريح الحب مـرت وجلسـت
مذبـوح بيديهـا وعيـت تكتفـي
في دَمْه داست / استحمت وارجست
.واسقت قلوب ٍ في غرضها قد يفي !
ذيك القلوب اللي من الغدر اكتسـت
محـال اخليهـا تلطـخ معطـفـي
لني وطهر الحـب مركبنـا رسـت
على سؤال ٍ حار في جوفـي خفـي
في غربة ارواح ٍ من الغدر احتست
بالله وين القاك يالصـدر الدفـي ؟
والمستحيل ولو ظنوني وسوسـت
الغول والعنقـاء والخـل الوفـي !
|