مين فيكم هلالى؟
مفتتح:
مغموسة يا طعم الهزيمة
بالعلقم المسموم
لم تنفع حكاوي الزناتي خليفة في شيل الهموم
واليأس جوه القلوب احلو له النوم
مغموسة يا طعم الهزيمة بالعلقم المسموم
(1)
طول عمرنا نحكي الحكاوي
ونقول غناوي ….!!!
نغزل الغنوة من جوه ضلمة الكلمة
نلونها بلون وردي
نبتدي بيه الحكاوي
تلقى الغنا ساحر
يوهمك انه مداوي
مع إن ده كله محال
ما أصلنا نحب الخيال
محبوسة يا عقولنا
مقفول عليكي
ومصدية الأقفال
علي كل ركن فيكي
قصة ومية موال
محبوسة يا عقولنا
وسط الحكاوي والغناوي
يتغسل بيها العقول
وتضيع معاها الأصول
ويا الحلول
وتتوه مراكبنا
ويضيع معاها الولاد
وف شدة الكرب لا نشوف عنترة ولا شداد
الكل صار عبلة ولبس توب الحداد !!!!!!!
***************
(2)
الكون سكون
والليل فارد له مِيت دراع
والنوم معشش ف العيون
والجفون متسبلة
والإيدين متخدلة
كأنها في حالة وداع
والضلمة تهوى اللي ضاع
تمسك إيديه
وتحركه جوه الضياع
تلقى العقول متبدلة
مش عارفة إيه المسالة
كل اللي بيها
إنها خايفة الطوفان
والرعب عارف سكته
جوه القلوب
ضاع الأمان
ضاع الأمان
(3)
المركبة تاهت في وسط الريح
بتجرفها شمال ويمين
بتتخبط وتتلخبط كما الأسد الجريح
وتتكسر عواميدها مع أول هبوب للريح
وكل شمع انطفى واتكسروا المصابيح
وراح زمان الحكمة والديك الفصيح
والناس دي واقفة ف قلبها
الخوف هزمها وذلها
و لا شفت واحد مد إيده وشدها لبر الأمان
ولا شفت واحد زعق بصوته
وقالنا لازم تعيش … لنموت كمان
الصوت خرس والصمت ساد
واتلجموا زي الحصان
ملعون …… ملعون
يا اللي ما تعرف سكتك ساعة الهوان
************ (4)
شراع المركبة مكسور
يا مين يصلحوا ف النور
من غير غنا وزعيق
ولا ناس تقول من هنا ح نصلحه
ولا ناس تقول من هنا ح نعيد
كلنا وسط الحكاوي
نعمل نفسنا أبو زيد
ونهاتي وسط القوم واللي نقوله نعيد
ونعيش ع الوهم اللي قاتلنا
مسجِدنَا …. مخلينا في عصر عبيد
مبدل كل أحلامنا
شددنا لبير ما لوش أخر
نبدد كل أحلامنا ونتـاخر !!!
نلاقي الغنوة تتكلم
ضحكت عليكو ف الآخر
وتتألم الم ساخر
يا مين يجيبلي من وسط الحكاوي
أبو زيد وهلالي يمدنا بالعون
ويمسح دمعة المحزون
ويشيل غبار الليالي
ويغزلي م الشمس توب
ويرفع شراع المركبة عالي
يزعق بصوت الأسد
ينادي الهلالي اتولد
يا رب ألفين مدد
وتعدي مركبنا
يا رب ألفين مدد
وتعدي مركبنا
|