((12))
[..مراهقه ام ماذا..]
وعد
كان النوم بغرفة جدتي مرعب صحيت نص الليل نمت وقت طويل وانا
جيعانه نزلت تحت الكل نايم والبيت ظلام ..
ماحد اهتم فيني ولاصحاني يمكن حتى نسوا اني عايشه معهم .. كيفهم
اهم شي انا اللحين اعيش لنفسي وبس هم
ماهتموا فيني ليش اهتم فيهم بس نورا عشانها صغيره الباقين قلعتهم ..
سخنت حليب واخذت معه شابورا
وانا اكل كنت افكر لازم اتغـير ..بكون حلوه ومرتبه وأحلى من شهد
حتى ..هي تزوجت عشانها حلوه انا بصير حلوه وانيقه
وبروح عند امي وهي تزوجني
وارتااح من الغبيات خواتي ومن بنات المدرسه ومن الروحه للمدرسه
..
بس خلصت رحت للغرفة مشاعل باخذ الاستشوار حق الشعر اللي عندها
واسوي شعري
وانا افتش لقيت عندها اغراض مره حلوه وجلست اخذ منها .. ياءالله
الاسكارف هذا يجنن وبيليق على مريولي ...
استشورت شعـري ورجعت انام ..
الصباح قمت بحماس
وجلست ارتب شعري وكل مره اسويه حركه .. لين دخلت علي هند
معصبه
هند:يالله تحركي انتي مو مداومه بعد
وعد :أوف اوف اوف انتي من مسلطك علي ادوام اموت انام مالك شغل
طسي عني
ولاكأنها موجوده لفيـــت على المرايه ..خلاص بترك شعري كذا
وين القلوس اللي اخذته من ميشو
انتبهت له وبجنبه الأسكارف ايه صح مالبسته
اخذته وربطته على قدام لا مو حلو على جنب احلى ..ايوه كذا احلى
هند:انتي يالخبله وش تسوين رايح للعزيمه حضرتك
وعد:اصلاً حنا مانروح للعزايم بعدين للمره المليون اقولك بذا الحلقه
مالك شغل فينــــي انا حرررره اسوي اللي اريد ..
ولفيت احط من القلوس كان اورنج مره حلوو
ايه كذا زين ماحست الدنيا ..
اخذت الكحل القلم جيت احط منه لا وش ذا ازرق اووف احس شكله نكته
علي
هند :لا انتي مو بصاحيه وربي مو صاحيه وعد وش فيك جني متلبسك
وخرت القلم عن عيني لأحوس الدنيا
وعد :انتي ورى ماتطسين ترى كذا ماراح اداوم حتى بكره اطلعي عني
ومالك شغل فيني...
حطيت شي خفيف بالكحل اشوى ماطلع يضحك ..
ولفيت اخذ عبايتي والشنطه اللي ماشفت وش فيها من كتب ..
يوووه ملحوق على الدراسه اهم شي الكشخه
اول مانزلت انصدموا فيني شوق ونوف بس طنشتهم اهم شي ضحى
ماشافتني الباقي كيفهم ..
جلسوا يتحرطمون علي بس ماعطيتهم وجه ..
لبست عباتي وطلعت عند الباب يبون يتهاوشون بالشارع انا جاهزه ..
مارتحت لين وصلنا المدرسه فصخت عبايتي وحطيتها بالشنطه ورحت
اتمشى احس الكل يطالعني عادي ...
كأنهم متعودين علي .. احس فيه شي خطأ مو من عادت بنات
مدرستنا يخلون الواحد بحاله ..
لما دخلنا الفصل بعد الطابور وجيت اجلس بطاولتي قالت لي وحده خبله
من الفصل فيها بلاهة العالم كله ..
:لاتجلسين هنا هذي طاولة الجنيه بنت مبارك ..
قلت بصوت ناعم اقلد شهد ..
وعد :بايخه
صرخت الخبله
:وععععععد مسويه عملية تجميل
قلت لها وانا احرك راسي بدلع
وعد :ياربي يسمعون بعمليات التجميل قراوه
:بنات شوفوا وعد وش مسويه
الحقيره جلسوا البنات يناظرون فيني ويتغامزون ويضحكون بس ماهموني
الغيره تسوي أكثـر..
كل معلمه تدخل فصلنا تستغرب من شكلي يعني كل الناس تغير ليش
ركزوا علي اوف منهم .
رحت للمخبأ السر حق خواتي وانا حاسه بيسوون لي شي
يوم وصلتهم لقيت مشترين لهم فطور وماجابوا لي
وعد :ليش ماشتريتوا لي
هند :لاعقلتي نشتريلك
وعد :يعني مو كفايه اللي تسوونه بالبيت حتى هنا تخليتو عني ..
طلعت من عندهم مقهــــوره ودي احرق فيهم ذولا مو خوات عدوات ..
الحصه الأخيره هاوشتني المعلمه عشان ماكملت دفتري وقالت لي اكمل
دفتري اللحين واجيبه لها اليوم
بس كان ناقصني دروس كثيره وانا بطيئه بالكتابه جلست اكتب واكتب
ودق الجرس وانا لسى ماخلصت صرت اكتب بسرعه
والبنت اللي اخذت دفترها اكمل منه قالت بتطلع واخلي دفتري معها ..
مر ربع ساعه بعد مادق الجرس وانا اكتب لوحدي
بالفصل حسيت الدور الثاني هدؤ ماحس فيه احد برى ابدن كان المكان
صار مهجور بسرعه جمعت اغراضي وطلعت اركض
وانا شايله شنطتي
اللي اول ماطلعت مع باب الفصل طاحت وطلعت كل اغراضي منها نزلت
اجمعهم بسرعه بسرعه وانا اسمع اصوات العلب
واكياس الشيبس والمناديل وهي تحركها الهوء يخوف حسيت اني بفيلم
رعب
قفلت شنطتي عشان ماتطيح منها الاغراض مره ثانيه ونزلت اركض مع
الدرج طلعت بوجهي معلمتنااا حسيت قلبي بيوقف ..
:وعد وش تسوين فوق للحين
وعد :كنت اكمل الدفتر
:كان خليته لبكره انتي مع الباص
وعد :ايوه
:الباص خلاص راح ..روحي لغرفة المعلمات انتظريني بتأكد من
الفصول فوق واجي ادبر احد يوصلك ..
كنت بسحب عليها واطلع مشي بس وانا اتصور الشوارع الفاضيه وعيال
الأبتدائي المزعجين يحذفوني
قلت لا خلني اجلس انتظرها احسن..
رجعت بعد فتره وانا خلاص جاني النوم .. ولاوحده من المعلمات او
الادريات رضت توصلني اخر شي قالت لي انها
بتوصلني لأن المناوبه اصلاً عليها..
لبست العبايه وسويت لثمه مثل شهد ..اول مره اتلثم واطلع بس متعوده
العب بالبيت واسويها
هزت راسها المعلمه وكأن مو عاجبهـا ..
طلعنا وسألتها يوم شفت رجال بالسياره اللي رايحه لها
وعد :ابله هذا مو سايق
:لا مو سايق أخوي ..
لاا ياويلي ضحى بتهاوشني لو درت راكبه مع رجال
وعد :لااا مابي استحي خلاص بروح مشي
:اقول امشي بس ماني فاضيه لحياك ..
اووف وقفت عند الباب ماودي اركب بس يوم نادتني بعصبيه ركبت
ورقعت الباب احسن يستاهلون
اخو الأبله :هيي بشويش على باب السياره هيوف انا مو فاضي اوصلك
عشان اكد على خلق الله..
كان شكل اخوها يضحك بجد يضحك لابس قميص بيت وشماغ برتقالي
لافه مثل الخليجين ..
مادري كذا تلقائي رديت ..
وعد :طيب اوف من زين السياره ..
سمعت الابله تقوله بصوت واطي
الأبله :انت اسكت فضحتنا ..
بس هو خبل ماعليه بس يتكلم بصوت مرتفع
اخو الابله :من هالخبله اللي مركبتها ..
وعد :انت الخبل شف وش لابس
حسيت الابله معصبه ومتفشله وندمانه انها وصلتني تستاهل ليش تخليني
اكمل الدفتر
:وعد خير ان شاءالله هذا اللي ربوك اهلك عليه ..
اخو الأبله :هذي اللي تبغاني **** خيرها بس ذولي ****
مايعرفون يربون بناتهم مايدرون ان البنت
اذا ماكسرت خشمها ماتعدل ..
اووووف قهرني همجي مرره احس الأبله وهي اخته وكبيره مايحترمها
واحد قليل حيا
وعد:اووص ياهمجي بتكسر وتظرب انت داخل حلبة مصارعه ..
ياكرهك
الابله :وعد خلاص ولا الكلام هذا بيوصل لأهلك ..
جلس يسب ويهاوس وانا منرعبه حسيت قلبي بيوقف الله ياخذه هذا وش
ركبني معه
ماصدقت اوصل بيتنا نزلت بسرعه حتى ماقفلت باب السياره ودخلت مع
باب بيتنا اشوى كان مفتوح ...
استقبلتني نوف اللي جلست تصرخ علي عشاني فشلتها بحركاتي بس
طنشتها
اللحين رايحات وتاركتني بالمدرسه ولهم عين يكلموني ..
رحت عند ضحى وجلست اشتكي عليهم يارب يمكن ترجع مثل قبل
وتهاوشهم ..
ضحى :خواتك الكبار ومعهم حق باللي قالوه والمفروض انتي تطيعينهم
مالك احد غيرهم وهم يبغون مصلحتك المدرسه
مو للكشخه والوناسه
المدرسه صرح علم ..
وعد :بس حنا عندنا مكان نروح له غير المدرسه عشان اكشخ فيه طبعاً
لا ..!!اجل تحملـوا تصرفاتي ..
وقمت من عندها متنرفزه ..
((13))
[..أمنيات..]
ملاك
ضحكتني تصرفات وعد مادري وش فيهم خواتي معصبات منها وربي
حركاتها تنكت بجد البنت بدت تراهق ..
بس من ناحيه ثانيه هم بعد معذورين ..لو انا معها بالمدرسه بتفشل من
حركاتها يعني كذا فجاه حست نفسها تبغى تكشخ ..ولا الكحل والروج
بجد ماهو لايق عليها صايره نكته فيهم ملامحها مره طفوليه ماتليق عليها
هالحركات..
ولا المشيه اللي طايح فيها تهز خصرها وهي تمشي .. شي قسم شي
..!!..لو سارا هنا ماتركتها بحالها من التقليد..
من جد الفراغ يسوي بلاوي ولا أنا من متى اركز وش تسوي وعد الخبله
..الله يصلحها بس..
فديت نوره مو مسليني بالبيت غيرها هي وكلماتها اللي مضيعه الطريق
..
ولا لو جينا لباقي خواتي احس نيران شابه بينهم ابتداء بوعد ونوف حتى
ضحى
كلن مو محتمل الثاني والوحده منهم اعصابها كبريت
وانا مو مهتمه وماني قادره حتى اتصنع الأهتمام .. وجود سارا
بجنبي كان يكمل روحي
اللحين احس روحي ناقصه ماعرف اهتم بأحد النصف اللي اهتم عشانه
مكانة فارغ ..
وللأسف مو راضيه بوضعـي ابغى اتغير ودي بشي يملء حياتي ..
دراسه مالي خلق .. مابغى اتمشكل مع احد ولا ابغى اكون طالبة
وهوشات ومعلمات ومديره وكلن بيكبر راسه علي ..
ودي اتوظف بس وش الشهاده اللي بتوظف فيها ابغى اكون غير احس
بالأستقلال ..
بشوف المجتمع مليت من الناس والمستوى اللي انا عايشه فيه ومليت من
نفسي بعد ..
سارا وعايشه حياتها واذا بغت تتسلى اتصلت هي عندها حياتها مألومها
بس انا محتاجه يكون لي حياه ..
محتاجه يكون لي هدف اعيش عشانه ..
وقدامي اخطأ كثيره وتجارب فاشله اكثر.. لخواتي ولي ماراح
امربنفس اللي مروا فيه ابغى اختار شي وانجح فيه
مباشره مابغى اجرب الفشل لأني مو متحمله خساره جديده ..
يتبــــــع ....
|