((6))
<<..ورجعت للمدرسه..>>
مـــــــلاك
حزنت على وعــد صغيــره وعنـدها أحــلام وأماني وأكيد نفسها بأشياء كثيره بس محرومــه منها مع أنها مو كثير تطلب اشياء ويمكــن هذي اول مره أشوفها تطلب شـي وتصر عليه بهالطريقه لكن الحق كل الحق معها هي صغيـره وماكان مطلـوب منها تحمل هالعيشه و هي كانت أكبر من عمـرها وتحملتها بدون تأفف لكن الانســان كم بيتحمــل مصيره يمل ..
بهالحضه قررت قــراار والله يساعدني ويسهل لي امري عشــان أقدر احققه والله ثم والله ثم والله لوتسهــــل لي هالأمر ماتردد عن قبوله فالسبيل أن خواتي الصغار يعيشــون حيـاه مرتاحـــه ..
مرينا على مطـعم للوجبات الخفيفه وأخذنا لنا وجبات أكلناها بالسياره وسفر يلف فينا بالشــوارع لين خلاص دخنا ورجعنا للبيت ... شفتوا طلعاتنا كيف مثل وجيهنا بس نعمــه غيرنا ماعنـده سياره يركبها مع اني مأدري من هالغير بس متأكــده ان فيه وأحسـاسي يقولي بكره تشوفين ..
وجاء بكــــــره بس مو بكره المقصود لابكـره السبت كنت نايمــه وصحيت على زعيق وعــــــد ..
وعــد :ملوك وليخليك أصحـي بالسـرعه اسمعي وش بقولك ملااااااكي بليزززززززز ..
ياربي هالمزعجه وش تبي على هالصبح والله لوتمـوت ماني صاحيه عشــانها ..
وعد :ياررربي ملاك والله يسلمك أصحــي أذا ماصحيتي يمكـن أمــووت ..
موتي أحد قاضبك وأنقلبت على الجهــه الثانيه على أمل أني ارتاح من صوتهــا ...
وعــد :ملاااااااااك والله أنك نذله اصحــــــي يمل الماااااااحي ..
يااااربي كيف أبين لها اني نايمــه ومأسمعها أوووووف خاطري أقوم والفها بالطراق ..
وعــد :ملاااااااااااااااااااااااااااااك يارررربي وش أسوي بعمــري أووووووف ملااااك ولعنـه اصحي ...
وبدت تسحب المخـده من تحـت راسـي ..
وبهالحضه فقدت كل ذرة صبر فينــي ...
وجلست بحركه سريعه وأنا أصرخ بوجهــا ..
ملاك :وش تبين يمــــل الحمــى ..
وعــد :يعني صاحيه ياحماره ورى ماتردين علي ألعن أبو الخباثه اللي فيك تشوفيني محتاجه لك لهدرجـه وماتردين ...
ملااك :اخلصي علي وش تبين بالرجـع أناام ..
وعــد :تعالي معي للمـدرسه ..
ملاك :أي أنتي وش قاعـده تخرفين أنا ماصدقت أفصل من المدرسه تبغيـن ترجعيني لها ..
وعــــد :ملاااااااك بليز أسمعيني انا بروح اختبر وضروري أحد يجي معي عشـان أنا بس بختبر وأطلع ..
ملاك :لاااماهو ضروري ولا الأيام اللي طافت كنتي تختبرين لحالك وش حيث اليوم ..
وعــد :اليوم لأن خطتي محتاجه يكـون معي احد ..
مـلاك :لاتقولين تبغيني عشـان أغششك لاعيـوني أنا دجــه ..
وعــد :ماراح تغششيني من دماغك بعطيك المجلـه اللي بتغششيني منها ..
ملاك :خبله أنتي كيف اغششك من المجـله ..
وعـد :اوووووف أمسكـي المجله هذي شوفيها وأنا بروح ألبس مريولي اوكي لاتأخرين بالسـرعه ألبسي عبـاتك ..
أخذت المجلــه اللي رمتها على الأرض وجلست أقلب فيهــــا .. وشوفوا وش لقيت فيها صدق هالبنت داهيــه كانت ملصقـه من داخــــل الكتاب ماهـوكله لابس اللي تحتاجه بالأختبــار وباقي المجله كماهـي .. وفهمت وش الملطـوب منـي .. اووف الله يعنـي على القرف مأدري كيف بدخل المـدرسه مره ثانيــه ..
لبست عباتي بالسـرعه وأخذت لي شنطه حطيت فيها المجلـه ونزلت تحـت ...
ولقيت وعـد لابسه مـريولها وجالست تشـرب شــي ومغمضه عيونها ... صرخت فيها ..
ملاك :وعد يالخبله وش تشـربين ..
عفست وجها وكنها قرفانه ..
وعـد :عصير ليمـون ..
ملاك :وجـع ليش تشـربينه موتقولين بطنك يوجعك لاشربتيــه ..
وعـدبألم :عز الطلـب عشـان يوضح علي المـرض ..
مـلاك :والحكمه ..
وعـد :عشان يخلونك تجلسين معي لأني لوماكنت مريضه ماراح يدخلـونك معـي ونكون ماسوينا شــي ...
ملاك :الله يعينك بتذبحيـن نفسك عشان حاجـه ماتسوى راس مالها دراسه ..
وعـد :الدراسه مهمه ماتسمعين ضحـى وش تقول ذيك المـره عن أهمية الشهاده ..
بعــد نص ساعه بغـرفة المـشرفه كنا أنا ووعــد والمشــرفه .. ههههههههههههه الصراحه مت ضحك بداخلـي شكـل كل اللي سوته وعــد بيروح مع الريح بسبب غلاسة هالمشرفه الله يعينهم عليها ..
كنت جالسه بمكـان بعيـد عن وعــد وحاطـه رجل على رجل وأقلب فالمجلـه ..
مر نص الوقت وأنا أشوف وعــد ماحلت شي وزياده شكل بطنها صدق يألمها كله من عصير الليمـون اللي شربته الصراحه بديت أشفق عليها .. بس جاء الفرج يوم دق تلفون المشرفه وكانت المديره وشكلها تبغاها .. أول ماطلعت طرت عند وعــد وبديت اغششها وأنا فاتـحه أذوني على الأخر عشان أسمــع صوت جزمتها لرجعت ..
وعــد :ملاك بطني يوجعني حلي بدالي ...
ملاك :هييييييي خبله أنتي كيف تبني أحل بدالك وأنا من ثلاث سنوات مامسكـت القلم تغبيــن أحوسك بالســرعه حلي ... والسؤال الثالث حله مرره طويل خليه على جنب اذا خلصتي بالسرعه نرجــع له ..
وأنا أملي ووعـــد الأجابه ومنحنيه على الطاوله قدامها سمـعت الباب وراي ينفتح وجمـد الدم بعروقي لاياربي وش هالوهقــــه لفيت على المــشرفه وأنا أدور لي مخرج لهالورطــه ... وأنصدمت يوم شفت من اللي سبب لي هالرعب ...
ملاك :ضحــى ........!!!
ضحــى :وش فيك اخترعتي أيه ضحــى .. سمعت أن وعــد مريضه وجيت أشوفها وأستغربت يوم دريت ان أحد جااي معها ..
الحمـدالله شكلها مانتبهي للي كنا نسويه.. وقلت عشـان مأشككها فيني ...
ملاك :زيني أنك جيتي شوفي وعــد مافهمت السؤال هذا وش المطـلوب منه ..
وأنطلت عليها الحيله وبالطبيعتها العمليه جلست تشرح لوعد السؤال بالتفصيل ..
وأنا رجعت للمكاني وكملت تقليب بالمجله بس بحرص أخاف ضحـى تكشفني ترى هذي عيونها ماشاءالله تشـوف حتى الي ورى الجدران .. خلصت ضحــى من وعــد وجلست على مكتب المشـرفه ومأدري وش قاعده تســوي على الكمبيوتر ...
ملاك :اقول ضحــى ..
ضحـى :هلا ..
ملاك :غريبه كيف واثقين فيك ومخلينك تجلسين عند وعــد وهي تختبر ..
ردت علي وعيونها على الكمبيوتر ..
ضحى :روحي أسأليهم ..
لا الأخت شكلها أبد مومعي بس والله التغليس عليها شــي وهي بهالحاله مندمجـه بالشغل ..
ملاك :اقول ضحى ..
ضحى :قولي ..
ملاك :وش نسوي غدى اليوم ..
ضحــى :سوي اللي تبين ...
ياحليلها بتسكتني عنها بس صبرها علي ماشافت شي ...
ملاك :انا عطشانه ابي ماء ..
ضحـى :اطلعي لساحه تلقين برادت أشربي منها ..
بلل عليها ترد علي وعينها مانزلتها عن الشاشه .. يالله فرصه بطلع اشم هــوء واشرب مااي ..
طلعت من غرفة الأشراف وجلست أفتر على المـدرسه وتذكـرت شي مريت على الأداره ..
طقيت على الباب ودخلت كان فيه أبله عطــوف المـديره وكذا معلمــه وكم وحـده شكلهم اداريات .. ياحليلهم شكل عنـدهم اجتماع ...
ملاك :سلام ...
الموجـودين :وعليكم السـلام ..
ملاك :وش أخبارك أبله عط ... عواطف ..
يؤ وش هالوهقه كنت بقول معيارتها قدامها صدق أني مخفه ...
أبله عطــوف جلست تمقل فيني وزينة بنظارتها على خشمها ..
ابله عطوف :أعرف هالصوت وهالشبهه موغريبه علي ...
رديت عليها وأنا أنفخ لبانه وأفقعها ..
ملاك :افااااااااااا ماعرفتيني أنا ملاك مبـــــــارك ...
خيبه وش فيها ذي لوقايله لها شيطـون بن أبليس ماتنرفزت كذا ...
أبله عطوف :والخيبه وش تبيــــــن ...
الخيبه تخيبك يالحمــاره ..
ملاك :افاا أبله تعامليني كذا وأنا جايه أسلم عليك وماجيت للمـدرسه الاعشـان أشوفك ..
ياحلوي قدرت أحرجها وبعــد الأستقبال السيء اللي أستقبلتني فيه رحبت فيني وجلست تسأل وش مســويه ومن هالسوالف وأنا جلست انصب عليها وسـألتني ليش جايه خبرتها عن وعــد وجها تغير وعرفت انها مقهــوره من وعد وجلست تشكى منها وأنا طبعاً سويت نفســي الكبيره العاقله ووعدتها اعدلها وعـــد وهي مبسوطـه تحسبني أتكلم من صدقي موجالسه أتريق عليها صدق مخفــه ..
وبالأخيــر وودعتها ورحت لوعد اللي لقيتها خالصه ورجعنا للبيت ....
|