يامرحبـا يابـا العيـون النواعيـس
يامن خفوقـي مـن محلـه سلبتـه
لاجيت من قلبي طردت الوساويـس
وقربّـت اناساتـه وبعـدّت كبـتـه
يصير لك روضٍ خضر مابعد ديـس
تـوّه دبـق عقـب الهماليـل نبتـه
وان غبت عن عيني جرالي تواعيس
من طول وقتٍ يااريش العين غبتـه
في غيبتك ياما اعترضلي عواكيـس
وياما الهوى من حرّ مابـي شجبتـه
وياما خشيت اكون ضمن المفاليـس
وياما ويامـا معـك حظـي ندبتـه
ذكرت ظلم العامريـه علـى قيـس
وماجاب قيس مـن التوجّـاد جبتـه
ولولايه اخشى من كلام الجواسيـس
من يـوم قلبـي بالمظاليـل صبتـه
لافرج عن اللي في عيوني محابيـس
واكشف عن اللي في ضلوعي حجبته
اسمك على حيد الضلوع المقاويـس
كنك براس اصبعـك الايمـن كتبتـه
|