تجــين..؟؟
.
.


تجين نشاور أهداب السحاب اللي جلس يرتاح
....... وش أحلا لون فص الشمس وإلا لون وجناتك

تجـين نعـلّم التوت المشي ونـزخـرف التفاح
......>. ونشـرح بالكـرز والثلج كيف تسيل ضحكاتك

تجـين نجدّل خيوط الشعاع ونكسـر المصباح
....... ونشـعل في حنـايا العمر نور زهور خطواتك

تجـين نقـفّـل أبـواب الفـراق ونبلع المفتاح
.......... بعد مانسـترد اللي من أحلام الوصل فـاتك

تجـين نحـارب الدنيـا ومن فيها بدون سلاح
......... أنا بالحب وإنتي بالجـمال وسـحـر نظـراتك

تجـين بفالنا الطيب نقوّم حظنا لو طاح
......... ونربـط في جناحين الأمل شـرطان هقواتك

تجـين نغمض عـيون القلوب ونتبع الأرواح
......... وأراهن شـمسـك أني لأزور أبعـد مـداراتك

تجـين نصارح القمرى بنور ظلالك الوضـاح
........ ونكشـف للسـحاب ان البروق اسـباب لفتاتك

تجين نسـابق أنـوار الفنـار لنظـرة الملاح
............ ونكتب للـسـفر مافـيك لـّذه غـير آهـاتك

تجين أبدل الباقي بعـمري عـمرك اللي راح
......... وأكـون أول حـبيب ٍ في نهـايـاته بدايـاتك

تجين نعد كم نجم ٍ تعثر في سناك وطاح
............ وكم بـدر ٍ تمـنى لو قبـالـه مثل تقـفـاتك

وتجين نشاور أهداب السحاب اللي عجز يرتاح
....... يحسب الصبح نور الشمس وهو ظلال وجناتك





لحن الندى المجنون


أفـا .. قل غيرها ياليل .. متى مات السهر مغبون
..................متى روّح مسا البارح وجا باكر وأنا واعي

حلفت أرقص النرجس على لحن الندى المجنون
.....................حلفت أطبّع القمرى على كيفي وبأطباعي

جنوني سري الشايع وعقلي جرحي المدفون
...................ذكرتك أو تناسيتك سوى دامك من أتباعي

بدايه مالها معنى , نهايه مالها مضمون
.....................تعبت أشقلب الدنيا وأعدل فيني أوضاعي

نسيت أقول لأيامي ( على هامان يافرعون)
...................نسيت أوقف الغربه وأدورها على أصباعي

هلابك دامني مثلك .. كسير وميّت ومطعون
................تعال اسكن معي صمتي ولا تنشد عن أوجاعي

تعبت أقول أنا أعمى وغيري له ثمان عيون
.......................كفا لا تنبش بجرح ٍ يقرّب لوية ذراعي

حبيبي والشقا حاصل ولا تسأل شقا وشلون
................عذاب إن عشت في قربك وموتي فلـّة شراعي

نعم قد قلتلك بأبقا معك واللي يكون يكون
.........................وشفني قدها ماقلت لك يابعد مرباعي

نبت مثل الشجر جرحي.. غدا كلي ورق وغصون
....................عرفت إنه سخيف اللي يحاول ياصل إقناعي

أجل وشلون أبنسى الجرح وفهد عافت يعيش بدون
............................حرام الوقت يكتبنا قصايد مالهاداعي

وأنا يوم الشليل اللي جمعنا علقته سنون
.......................كتبتك حلم لا جاني دريت إني معك واعي