مدى وهي مستانسه انها حققت المهمه :اعرفهم اكثر مماتعرفينهم هذولا عليهم توصيه من الزعيم
هنا رؤى حست انه انكب عليها مويه بارد من الصدمه كل شي توقعته الا ان معاذ يوصل لها بهاليوم وبهالطريقه
رؤى وعيونها غرقت من الدموع:هم بخييير؟
مدى حست انها ماشيه تمام في خطه معاذ وقالت بخبث:هم بخير تبين تشوفينهم؟
رؤى حست بالخوف على اخوانها قبل نفسها معاذ عرف كيف يمسكها من يدها اللي تعورها وبقلب قوي:لا
انصدمت مدى من ردها :متاكده؟
رؤى وهي خلاص حاسه ان الدنيا قدامها نقطه حاسه بالضيق اللي يكبت على نفسها:ايه
ومشت تبي تروح بس وقفها اللي خايفه منه
مدى :اذا تبينهم يتمون بخير فردي الساعه 12 على الرقم اللي بيجيك
رؤى ماقدرت تتكلم او ترد باي شي :ومن يقدر ياذيهم
مدى:انتي عارفه ان الزعيم اذا عصب مايعرف امه
رؤى وهي تتذكر كل لحظه عاشتها تحت سلطته وقسوته كل كف وكل همسه صحيح حسسها بالامان بلحظات ولكن كل الباقي عذاب وذل لها اخوانها مالهم ذنب معاذ يبيها هي مايبي اخوانها يعذبهم علشانها وهي هنا مبسوطه يضربهم لانها هربت من عنده وماكملت معه شي هو يبيه
ردت وهي تحس قلبها ينزف:وش يبي مني بالضبط؟؟
فرحت مدى انها بتحصل على رضى معاذ اللي تعشقه وهو ماعشق ولاحب غير رؤى كانت مدى تكره رؤى وتحقد عليها لانه مايعطيها وجهه والسبب هي :تردين على الرقم بالوقت اللي قلته وتعرفين ساعتها
رؤى ودموعها على خدودها:طيب بس ..
مدى:وشو؟
رؤى:اخواني ابي اشوفهم الله يخليك؟
مدى هنا ضعفت بس بسرعه بدلت نظره الرحمه الى الانتقام والقسوه:انتظري الرد من المكالمه ووقتها بتعرفين اذا بتشوفينهم او لا.
مسكت مدى وجهه رؤى :اسمعي انتي حلوه وتجننين بس جمالك ماسوى لك شي غير انه وداك بدواهي منتي قدها ؟
رؤى قعدت على الارض ماهي قادره تتحمل اكثر نقطه ضعفها عرفها معاذ ومستغلها بشكل صح
راحت مدى تاركه وراها رؤى اللي حست ان لحظه موتها قربت حاسه بكل معاني الذل والخوف وكانت تلوم امها وابوها انهم تركوها وماسالوا عنها ولا دوروها كانت تبي تصبر نفسها بعتابها وهي اول وحده عارفه انها هي وهم ما لهم ذنب باللي صار وان الله كاتب لها كذا من قبل تنوجد على هالدنيا اللي ماذاقت فيها غير الخوف والتعب الدايم
وقفت وهي تبي تفكر بشي يحميها من معاذ فكرت على طول في منقذها دايم فواز فكرت انه هو الوحيد اللي يعرف قصتها وهو الوحيد اللي بيساعدها بس خوفها عليه ان معاذ ياذيه استبعدت من تفكيرها انها تلجا له او تقوله على شي
جاها مسج وفتحته ويدها ترجف(هاي ياحلوه لاتنسين 12 ان مادقيت ورديتي اوعدك 12ودقيقتين مقطه تعذيب فجوره وخالد عندك ايه نسيت اقولك شي الحيوان اللي عندك ان درى بشي اوعدك انه اخر مره تسمعين صوته فيها زوجك معاذ)
كان متعمد يكتب لها هالكلمه
معاذ في نفسه(هين يارؤى هين انا تهربين مني وتروحين وتسكنين عند واحد غريب وتطلعين معه بعد والله لاخليك تندمين على الساعه اللي هربتي فيها من عندي )
في بيت ابو خالد (اللي ربى رؤى)
كان مرمي على الارض والقوارير(الغراش) من حوله رفع نفسه بثقل وهو يحاول يتذكر اللي صار
(ايه كنت انا وابو راشد هنا ونشرب بعدين نمت ايه صح وتذكر اللي خلاه يشرب فوق العاده السبب اللي خلاه يشرب لين فقد وعيه هو صحيح يشرب ولكن قليل بس اللي صار امس كفيل بانه يخليه يشرب اكثر واكثر
تذكر كل كلمه من ابو راشد صديقه اللي سحبه لهالطريق )
ابوراشد:ابو خالد عندي لك صفقه اجباريه
ابو خالد باستغراب:صفقه واجباريه؟
ابو راشد:بما اني اجيب لك المزاج لعندك وحقه اخذ منك الربع بس مو لسواد عيونك
ابو خالد:اجل
ابو راشد بخبث:ابيك تجيب بنتك لي؟
ابو خالد بصدمه:بنتي؟.
ابو راشد:ايه رؤى بنتك وخلال هالاسبوع والا ...
ابوخالد:والا ايش ؟
ابو راشد:والا قوول لعيالك وللمشروب باي للابد لانك بتخيس بالسجن ؟
ابوخالد ضحك بشكل هستيري:يالاخ نسيت ان حنا اصحاب واللي يجري علي يمر عليك قبلي؟
ابوراشد بابتسامه واثقه قام وشغل الدفي دي وانصدم ابو خالد باللي يشوفه
ابوراشد:تدري وش اللي كنت ابيك توصله ذاك اليوم للرجال (كان يعرض له مقطع من شهرين تقريبا وهو يوصل كرتون لواحد من اصحاب ابو راشد وطبعا ماكان كرتون خالي كان فيه مخدرات بس ابو خالد كان يحسبه امانه زي ماقال له ابو راشد)
ابو خالد بصدمه:وشو؟
ابو راشد:7كيلو حشيش صافي يعني اعدام وضحك
ابوخالد:خسيس
ابو راشد بحاله سكر:اششش لالا مايصير تقول كذا بعدين اصير زعلان ومو كويس ازعل
واناالحين رايح ومثل هاليوم ابي بنتك هنا تستناني فاهم
راح وقفل باب البيت بقوه تارك وراه ابو خالد في صدمه (ماوفيت لوعدي لك يالغاليه وعدتك احافظ على رؤى والحين هذا اللي سويته طردتها مع اخوانها من البيت ولاأدري وينهم والحين بوديها لواحد واطي بيدي الثنتين بيدي)
قعد يبكي كانه طفل وينادي ام خالد ويعاتبها ليه تركته وتركت عيالها
في المزرعه
رجعت رؤى للبنات وهم يتعشون ووجهها مقلوب لاحظت دلال عليها:يمه رؤى فيك شي؟
رؤى كانت بعالم ثاني ماهي حاسه بشي ولا حاسه باحد مشت بدون وعي مهي عارفه ليه ولوين؟
قعدت برى بروحها جنب المسبح من الجهه الخلفيه حطت راسها بثقل على رجولها ضمت نفسها
وخلت دموعها تنزل براحه على خدودها الناعمه
صارت الساعه 12 حست رؤى بالجوال يدق رفعت راسها تشوف الرقم لقت انه رقم غريب
وقف الدم بعروقها من الخوف وبدت ترجف مهي عارفه وش تتصرف فيه
ردت بكل خوف على اخوانها ردت وهي مقرره تنفذ اللي يبيه معاذ بدون تردد ردت وهي ناويه تحافظ على اخوانها زي ماحافظت امهم عليها ردت وهي تبي ترد جزء من اللي سوته لها ام خالد وبعد لحظات تكلمت:الو
معاذ مايدري وش الاحساس اللي راوده من سمع صوتها راحت ملامح القسوه والانتقام من وجهه لتجي الابتسامه :هلا وغلا برؤى
رؤى بدت دموعها اللي وقفت من ثواني بدت تنزل من جديد حست انها انتهت الى هنا وخلاص انتهت حياتها معد بقى لها شي حست انها حتى نفسها فقدتها
معاذ ماعجبه صمتها وبحده:رؤى اتكلم انا؟
رؤى بصوت مبحوح:هلا معاذ
معاذ بدون مراعاه حتى للتعب بصوتها:هلافيك كيفك؟
رؤى:بخير
معاذ:هذا المهم انا دقيت اقولك شي لا ماقوله الا ابلغك فيه يعني بالاصح ماشاورك؟
رؤى :وشو؟
معاذ بضحكه:بعد3ايام تجين هنا عندي ؟
رؤى بحده :وشو؟
معاذ:اللي سمعتيه انا ماتركتك هناك 3ايام زود لسواد عيونك لا حبيبتي اصحي وافهميني ابيك تنفذين اللي اقولك عليه والا اخوانك انسيهم والله لأنفيهم ولاتقدرين توصلينهم لو تلفين الكره الارضيه ما تلاقين لهم شعره .
رؤى وهي تبكي:اهم بخير
معاذ:تبين تشوفينهم؟
رؤى:ايه
معاذ:اهم عندي جبرت ابوك ياخذهم من خالك وقلت له ان امي بتهتم فيهم واذا تبين تشوفينهم نفذي اللي بقولك عليه بالحرف وتعالي اقعدي معهم مو بس تشوفينهم ؟
رؤى :وش تبي؟
معاذ:ابي مليون ريال
رؤى بصدمه:مليون من وين اجيبهم ؟
معاذ:لاتقاطعيني الحيوان اللي عندك كاش يعني جيبه مليان فلوس وانا بساعده يصرف فلوسه
رؤى بغضب:اولا هو مو حيوان ثانيا نجوم السماء اقرب لك انت مجنون تبيني اسرق؟
معاذ باستهزاء:لا لا مقدر عالحب تدافعين عنه بعد(وبعصبيه خوفت رؤى) انا ماأخيرك لان هذا اللي بتسوينه برضاك او بدون؟
رؤى بصوت مقهور :انت حقير
معاذ ضحك ضحكه عاليه وكمل:تو تو حقير ترى حسابك ثقل معي
رؤى:................
معاذ:اسرقي سوي اللي تبين المهم المليون يكون عندي مفهوم يالله باي وموعدنا بعد3ايام بدق عليك زي هالوقت سلام ياحلو
سكر معاذ وهي وقفت بثقه:مستحيل يافواز اسوي اللي قاله مستحيل
راحت لهديه فواز لها اغلى واروع هديه حلم حققه لها فواز خيلها تشكي له ركبت خيلها بعد ماتدربت عليه كثير وركضت فيه كانت تسابق الريح ولاول مره تكون بهالسرعه تبي تفرغ اللي داخلها كان ودها انه يوديها مكان بعيد
مكان مافيه معاذ مكان يكون فجر وخالد مرتاحين فيه مكان يبقى معها فواز فيه
الساعه 1الفجر
كان داخل المزرعه يبي ياخذ البنات ودلال لان الوقت تاخر قرر يروح يتطمن عالخيل قبل ودق على دلال وقالهم يجهزون شافها من بعيد ماكانت حاسه باحد كان يراقب كل تصرف اول مره يشوفها على طبيعتها بدون حجاب كانت ملاك على حصانه من شعرها البني الحريري اللي يلعب فيه الهواء البارد مع تفصيل جسمها المنحوت وبياض وصفاء بشرتها كان حاس انه يحلم معقول هاذي رؤى البنت اللي ملكت قلبه باحساسها بس والحين بروعتها وبرائتها وكل شي فيها
نزل راسه حاس انه غلط انه يناظرها لانه بدون علمها بس اللي فكر فيه ان هاذي مو من طبيعه رؤى اكيد فيها شي وشي كبير يخليها تركض بهالشكل بالخيل وبدون حجاب
رجعت للإسطبل الصغير ورجعت حصانها اللي تعلق فيها مرره ولايسمح لاحد يركبه غيرها مسحت دموعها حست انها ارتاحت شوي بعد البكاء اللي بكته وبعد ماشكت لخيلها اللي ماقدرت ولابتقدر تتكلم وتشكي الا له طلعت وسكرت باب الاسطبل وراها
:رؤى
التفتت للصوت اللي تعتبره امل تعتبره كل شي لها الشخص اللي يمثل لها السعاده
رفعت حجابها بسرعه اللي كان على كتفها لانها كانت خايفه يكون احد عند الخيل لفت عليه وهي مرتبكه كيف فواز يشوفها بالهلبس اللي مبين تفاصيل جسمها بس اللي صدمها حركته بانه معطيها ظهره ويطالع لبعيد :هلا
فواز:وش تسوين هنا مو المفروض بالحفله
رؤى بربكه:جيت اتطمن على الخيل قبل لانروح
فواز:ادخلي الدنيا برد وقولي لهم اني انتظرهم بالسياره
رؤى :ان شاء الله
مشى للجهه ثانيه علشان تقدر تروح من دون مايحرجها
دخلت البيت وبلغت دلال وساره بان فواز وصل وقالهم يطلعون
ساره:وينك اختفيتي البنات كانوا يبون يودعونك
دلال:اكيد عند خيلك صح؟
رؤى بابتسامه:ايه
دلال:يالله يابنات لانتاخر على فواز
راحوا يجمعون اغراضهم علشان يروحون
فواز بعد ماتطمن عالخيل وهو راجه لسيارته انتبه للجوال اللي على طرف المسبح راح واخذه وكان فيه مسج
استغرب لان رؤى ماتعرف احد كان الفضول بيذبحه بس خاف رؤى تزعل بس بدون مايدري ضغط على فتح الرساله توهق وكان بيقول لرؤى انه فتحه بالغلط بس ماقرى بس جذبه الرقم انه مو مسجل قرى المسج(نسيت اقول للحلوه فجر وخالد يسلمون عليك كثير هههههههههههههههههه زوجك معاذ)>>مسج من معاذ يضغط على رؤى فيه
انصدم من المسج وعرف انه من معاذ من اسلوبه ولانه كاتب زوجك معاذ فتح المكالمات ولقى ان له مكالمه الساعه 12 ضلت 8دقايق
بدى الشك يدخل براسه وهو يسال نفسه(رؤى معقوله تكلم معاذ لازم افهم منها )
ركبوا السياره كان الوضع هدوء دلال جنب فواز وساره ورؤى بالمقاعد الخلفيه
كان السكوت هو الجو العام فتح المسجل وكان الصوت هادي
كانت نهايه اغنيه وبدت اغنيه ثانيه من سمعها فواز رفع عالصوت
نسيني الدنيا نسيني العالم
دوبني حبيبي وسبني أقلك أحلى كلام
لو الف الدنيا لو الف العالم
مش ممكن زي غرامك إنت ألاقي غرام
لو أقلك إني بحبك الحب شوية عليك
لو ثانية أنا ببعد عنك برجع مشتاق لعينيك
ضمني خليك ويايا دوبني ودوب في هوايا
تعالى نعيش أجمل أيام
كان أجمل يوم في حياتي يوم ما قبلتك يا حياتي
مقدرتش أتحملمن غير ما أفكر لحظة
لقتني بدوب في هواك
خدتني من كل الناس عشت فأجمل إحساس
ونسيت يا حبيبي الدنيا معاك
لو أقلك إني بحبك الحب شوية عليك
لو ثانية أنا ببعد عنك برجع مشتاق لعنيك
ضمني خليك ويايا دوبني ودوب في هوايا
تعالى نعيش أجمل أيام
لو أقلك
أنا شايلك جوة عينيا والدنيا دي شاهدة عليا
أنا جنبك وبحبك مش ممكن أقدر يا حبيبي فيوم أنساك
بتمنى العمر يطول وأفضل أحبك على طول
دنا ياما حلمت أكون وياك
لو أقلك
تعالى نعيش أجمل أيام.
كان يقصد كل كلمه فيها
دلال:اوه وش هالرومنسيه
فواز استحى من كلام عمته وبانت غمزاته:اه ياعمه الحب عذاب
دلال :الله الله يافواز كل ذا يطلع منك طلعت تحب
فواز تكلم بكل حالميه يبي رؤى تحس فيه:اعشق كل شي فيها بس ليتها تحس علي بس
دلال:مقدر انا منهي خلني اقول لها عن حالتك الصعبه
فواز:خلها تحس فيني مابي احد يقولها...
رؤى كانت عارفه ان هالكلام موجهه لها وخاصه الاغنيه لمن رفع عالصوت رفع نظره للمرايه وعدلها على جهتها ونزل عيونه بسرعه وكانه تنبيه لها
اما ساره حست بالنار داخلها وتكلمت بحقد:من سعيده الحظ اعرفها
فواز:ايه تعرفينها بس مو حيييل
ساره كانت متامله يقول انها هي المقصوده او يلمح لها الفتت على رؤى اللي كانت منزله راسها وفواز يبتسم الغيره دبت فيها والحقد والانتقام انرسم بعيونها لرؤى
دلال:والله ان امها داعيه لها بليله القدر
ضحك فواز:ترى بصير مغرور
دلال:يحق لك
وقف فواز عند البيت وتعمد يدق من جواله على جوال رؤى حتى تبقى تدوره
دلال:يمه رؤى وين جوالك يدق؟
رؤى وهي تدور بالشنطه:مدري
نزلوا ساره ودلال وهي بقت تدور الجوال مد لها فواز يده بالجوال
اخذته بحياء:اسفه نسيته عند المسبح و..
فوازيقاطعها :آسف فتحت مسج بالغلط وانتظر منك تبرير له بما اني اعتبر نفسي مسوؤل عنك
ماقدرت تقول ولا كلمه وهي تقرا المسج (وش اقول اقول معاذ يبيني اسرقكم اسرق الناس اللي اهتموا فيني وحموني منك وفتحوا بيتهم لي )
بعد فتره صمت وبصوت كله الم وهي تحاول تاخذ نفس:فواز اذا تغليني انسى اللي قريت
نزلت بسرعه من السياره وهي تبغى تختلي بنفسها تبي تفكر كيف تنقذ اخوانها ونفسها من معاذ(اه يامعاذ والله حرام عليك ارحمني خلااااااااص)كانت تصرخ بداخلها تحس قلبها ينزف بس مين اللي بيداريك ياقلبي
وصلت غرفتها رمت نفسها على السرير بكت بألم بكت بإحساس القهر حست انها مسجون يودونه للمشنقه وهو مظلوم بكت مع انها عارفه ان دموعها ماراح تطفي النار اللي داخلها تركت دموعها تنزل براحه
حست انها عاجزه تواسي نفسها زي كل مره او توقف دموعها اللي حفرت لها طريق على خدودها
اما فواز بالسياره مانزل انصدم من كلامها والالم والنبره اللي بصوتها وتاكد وقتها انه فيها شي وشي قوي كلامها اكد له هالشي ان رؤى تتعرض لتهديد من معاذ وساكته حس باحساس غريب انقبض قلبه حس انه بيفارقها قريب بعد هالافكار ونزل وهو مصمم ماينام الا لمن يعرف معاذ وش قال لها وش يبي منها؟؟؟
دخل البيت وسلم على امه وباس راسها :السلام عليكم
ام عبدالله بجفاف:وعليكم السلام
فواز باستغراب:غريبه يالغاليه سهرانه للحين؟!
ام عبدالله بعصبيه:فواز تكلم رؤى من بنته؟
وقف كان احد اعطاه كف كانت امه هي الوحيده اللي مايبيها تعرف عن رؤى شي لانه متاكد بانها بتطردها من البيت
فواز تكلم ببرود:شلون يعني من بنته؟
ام عبدالله مدت له الظرف اللي بيدها :تفضل شوف بنت الناس المحترمه اللي فتحت لهم بيتي شف اخت صديقك.
اخذ الظرف كان فيه صور لرؤى عند باب بيت ابو خالد معها خالد وفجر وابو خالد وصور لها مع الاولاد وهي تبي تركب سياره معاذ المحمله اطفال صدمه فوق مايتحملها كل شي يتحمله الا ان رؤى تطلع من حياته وبهالطريقه
ام عبدالله بصراخ:هذا الظرف وصلني ووحده كلمتني وقالت لي عن كل شي رؤى ياستاذ هاربه من اهلها وهي من الشارع يعني عايشه بالشارع (وكملت وهي تشوف صدمه فواز) يعني بنت شوارع
صدمه خوف من فقدان الحبيب خوف من جرح مشاعر من عشق من دق لها قلبه
من استعد ان يضحي بكل شي لاجلها
فواز بانكسار:تكفين يمه اسمعيني بس ابي افه...
قاطعته امه بحده:مابي اسمع شي ولاافهم شي كل اللي ابيه بيت يخلي من بنت الشوارع اكيد لاعبه عليك ولا ساحرتك ولا انت يافواز عمرك ماتحب الغلط
فواز كل ماقالت بنت شوارع يحس بسكين تجرح قلبه وتدميه
تكلم بجديه:ان طلعت رؤى من البيت اعرفي اني طالع معها
وترك امه وصعد غرفته تاركها بصدمتها :وش مسويه بنت ابليس بولدي عمره ماعاندي ولا وقف بوجهي والحين معاندني علشانها انا اوريها
طلعت غرفه رؤى ودقت الباب بطريقه خرعت رؤى فزت من الخوف ومسحت دموعها واخذت حجاب الصلاه اللي كان جنبها وحطته على راسها وفتحت الباب بخوف:خالتي فيكم شي؟
رمت ام عبدالله الظرف بوجهه رؤى:لاعاد تمثلين دور المحترمه تفضلي يانسه يامحترمه
قعدت حست اطرافها معد تشيلها سحبت الظرف بهدوء من الارض وفتحت الظرف وكانت الضربه القاضيه
على رؤى ارفعت عينها لام عبدالله وكانها تنتظر لحظه موتها
ام عبدالله :تفضلي من غير مط...
:ام عبدالله
لفت عالصوت :ابوعبدالله تدري ان..
ابوعبدالله:يقاطعها وبحده:خلاص
ام عبدالله طالعت في ابوعبدالله بصدمه وهو كمل كلامه:نجلاء خلاص نتفاهم بكره عالموضوع خلي رؤى ترتاح الحين
ام عبدالله:مالبنات الشوراع قعده في بيتي.
كانت كلمه قاسيه على رؤى قلبها الرقيق معد يتحمل شي زياده جرح ام عبدالله كبييير نزلت دمعه حاره على خدها دمعه عتب على اهلها اللي خلوها دمعه كره لمعاذ دمعه صدمه صعب من كان حضن دافي لها يجرحها
ابوعبدالله مسك يد ام عبدالله:نجلاء تعالي معي
واخذها لغرفتهم باخر الدور الثاني وقبل مايروح نزل لمستوى رؤى اللي قاعده عالارض بكل صدمه وتكلم بحنان فقدته من سنين حنان الاب الصدر الدافي اللي تحتمي فيه كل بنت من كل شي يعكر حياتها حضن ابوها مسح على راسها:خلاص يبه لاتبكين ارتاحي الحين والصباح يحلها ربك قومي ادعي ربك يفرج همك ويساعدك قومي يبه
هزت راسها من بين شهقاتها ودموعها تنزل بسرعه من دون ماتعبر على خدها
راح ابو عبدالله وهي على وضعها عند باب غرفتها ماكان لها سند الا دموعها (من بقى معي غيرك لاتتركيني)
في غرفه ابو عبدالله
ام عبدالله:انت عارف من قبل؟
ابو عبدالله:يانجلاء الله يهديك صلي عالنبي واقعدي خلني افهمك
ام عبدالله وهي تقعد:اللهم صلي وسلم عليه
ام عبدالله:بس مهما كان بتطلع من بيتي
ابو عبدالله تنهد:اول اسمعيني بعدين قرري
وقالها كل شي يعرفه
فواز كان رايح غرفة رؤى يبي يشوف امه قالت لها شي ويبي يفهم سالفه المسج
انصدم من شكل رؤى اللي قاعده على الارض عن الباب ومنزله راسها
قرب منها بصوت حست حنان الدنيا فيه وبهمس:رؤى ليه قاعده هنا
كان ودها تضمه ودها تبكي على صدره ودها لو تقدر تقوله عن اللي في قلبها
رؤى وهي ماهي قادره تتنفس هي مريضه وللحين صدرها تعبان بصوت مبحوح:مافيني شي
فواز قعد عالارض وصار بمستوى رؤى:رؤى ارفعي راسك وفهميني
رفعت راسها شاف دموعها على خدودها
فواز كانت دموعها عذابه:رؤى ان لي خاطر عندك تكلمي وقولي وش صاير؟
رؤى والنار اللي بقلبها تحرقها خوفها عليه منعها تقوله او تبرر له الرساله وتكلمت ببرود عكس النار اللي بداخلها وهي تمسح دموعها:ولا شي
ام عبدالله بعد مافهمت من ابوعبدالله حبت تعتذر من رؤى وراحت لها غرفتها وسمعت فواز يتكلم وصوته من الممر اللي فيه غرفه رؤى
فواز انقهر من برودها وكذبها عليه وبحده:رؤى انا مو بزر تكذبين علي تكلمي معاذ وش يبي منك
تعلقت عيونها بعينه وصار يتامل عيونها فواز بداخله(عيونها تحكي الكثير فيها زحمه كلام وش سر هالالم والعذاب وش سر هالحزن وهالنظره)ضل يطالع عيونها يبي يفهم مايدري هي ثانيه دقيقه ساعه ضاع بعيونها الرماديه كانت تاسره وتكلم بهمس:رؤى
رؤى نزلت دمعه كانت واقفه في عينها حست مافيه قدامها الا الضباب ماهي قادره تركز ابتسمت ومال جسمها مثل الورقه الذابله حست مافيه حولها الا السواد وبعدها انقطع تفكيرها
كانت يد فواز قريبه منها مسكها قبل تطيح على الارض سندها وهو يصرخ رؤى
كانت ام عبدالله رايحه لغرفتها تبيهم يتكلمون على راحتهم وسمعت صراخ فواز وهو يحاول يصحي رؤى
رجعت ركض وشافت رؤى ذابله بين ايد فواز
رفع نظره لامه:يمه
ام عبدالله ماتحملت منظرها حطت راس رؤى بحضنها وصارت تحاول تصحيها ضربت خدها بخفيف
ام عبدالله بخوف:فواز جيب عطر كولنيا أي شي
فواز :هاه ايه دخل غرفته رؤى واخذ عطر من على التسريحه
اخذته ام عبدالله وصارت تحاول تصحيها بدون فايده
ام عبدالله:تيكـــا تيكا
جت تيكا:نعم ماما
ام عبدالله وهي ترفع راس رؤى:بسرعه جيبي عباتها
ولفت على فواز :وانت بعدك هنا روح شغل السياره بسرعه
راح فواز ركض شغل السياره وقربها لباب البيت نزل يسند رؤى مع امه
ركبها ورى مع امه وطار فيها عالمستشفى
فواز وحاس ان دموعه بتخونه :يمه وش صار لها
ام عبدالله بصوت مخنوق:انا السبب
فواز بصدمه:قلتي لها شي
نزلت ام عبدالله راسها
زاد فواز من سرعته يبي يبرد اللي بخاطره وصل عالطورائ وقالهم يجيبون نقاله وبسرعه اخذوها ودخلوها
فواز:اذا صار فيها شي ماراح اسامح نفسي
ام عبدالله ماتدري تطمن نفسها ولا ولدها :اذكر الله ان شاء خير
دق جوالها وكان ابوعبدالله:هاه بشري؟
ام عبدالله بصوت هامس:للحين ماصار شي بس يطلع الدكتور بكلمك
قفلت من ابو عبدالله وهي تشوف ولدها رايح جاي في الممر ماهو قادر يقعد وام عبدالله تراقبه وفي بالها(معقوله تحبها يافواز)
انفتح الباب بعد مرور ربع ساعه وطلع الدكتور وراح لها فواز ركض:بشر يادكتور فيها شي
الدكتور:انتو اهل المريضه رؤى
فواز:ايه
الدكتور ممكن تتفضل معي للمكتب
راح فواز وقعد وعيونه كلها لهفه يبي من الدكتور يقول هي بخير ومافيها شي وخذها معك:وش فيها؟
الدكتور: هي متعرضه لانهيار عصبي قوي يبي لها مده لمن ترجع لطبيعتها بس مع العلاج والراحه ان شاء الله تتحسن وتصير احسن من اول
فواز بصدمه:انهيار
الدكتور:الحمد لله جت على كذا الظاهر تلقت خبر زعلها او شي قوي اثر عليها اتمنى تبعدونها عن الزعل قدر المستطاع والراحه التامه والف سلامه عليها
فواز:شكرا دكتور بس اقدر اشوفها؟
الدكتور:تقدر بس ياليت ماتطولون وهي بتظل عندنا فتره لمن تهدى اعصابها
فواز راح لامه بالممر اللي مواجه لغرفه رؤى
ام عبدالله :هاه بشر يمه
فواز :انهيار عصبي
ام عبدالله: انهيار لاحول ولاقوه الا بالله طيب يمه نقدر نشوفها
فواز :ايه
راحت ام عبدالله وفواز كان وراها:هاه يمه وين رايح
فواز:يمه تكفين ابي اتطمن عليها
تنهدت :مايصير يمه ماإنت محرم لها
فواز برجاء:تكفين يمه غطيها بس ابي اتطمن
حنت على ولدها :خلاص انتظر هنا دقيقه بعدين ادخل
دخلت ام عبدالله لقت رؤى نايمه بسلام ملامحها كلها براءه وجهها ذابل واصفر قربت من عندها وباست راسها اسفه يمه انا اللي ضغطت عليك وحملتك ذنب مانتي قادره عليه عدلت حجابها على راسها ودخل فواز
كان خاطره يمسك يدها ويبوس راسها ويهمس في اذنها ويقولها سلامه عمرك ليته فيني ولا فيك
راقب شكلها جهاز النبضات عليها والاكسجين بحكم الالتهاب اللي برئتها وللحين ماطابت منه والمغذي بيدها الصغيره
عوره قلبه كيف يشوف حبيبه قلبه بالهالحاله
مسكت ام عبدالله يده:يالله يمه بكره نرجع لها
فواز:يمه تظل بروحها
ام عبدالله:هي نايمه الحين وماراح تصحى الا بكره واوعدك بكره من الصبح انا عندها
طلع فواز وهي حاس ان طلع جسد بدون روح
(حطيت قلبي وروحي عندك يدارونك لمن ارجع لك)
مشى بهدوء وصل للبيت نزلت امه :يمه منت نازل
فواز:لا يمه برجع بعد صلاه الفجر لاتحاتين
ام عبدالله طالعت بساعتها:بس باقي عالصلاه ساعه
فواز:عندي شغله اخلصها واجي
ام عبدالله :الله يحفظك وانتبه يمه لاتسرع
فواز :حاضر
حرك سيارته والدنيا ضيقه بوجهه قرر يروح البحر اكثر مكان يفهمه ويرتاح فيه
وقف قدام الشاطئ والموج ثاير تنهد يبي الضيقه اللي فيه تروح
وقام ماهو قادر يتحمل رجع للمستشفى وقعد بالكراسي اللي قبال الغرفه
وحط راسه بين كفوفه ويفكر بموقف رؤى اذا صحت وكيف بتكون حالتها مصيرها بحياته وشو؟
اذن الفجر راح فواز للمسجد اللي بالمستشفى توضئ وصلى وبعد الصلاه قعد اخذ قران يبي يهدي نفسه من وسواس الشيطان اللي خلت الافكار تروح وتجي بباله
بعد ماخلص توه طالع من المسجد الساعه 7الصباح لقى محل الورد توه يفتح اخذ باقه كبيره وروعه قليله عليها
وماحط معها كرت حتى محد يشوفه قرر يرسل مسج اذا جابت امه جوالها
اخذ الباقه وكان ناوي يدخلها لها مع انه عارف انها بتظل نايمه للساعه 9 من الابره
انصدم بان الغرفه عندها حركه ممرضات مو طبيعيه عجل بخطوته وصل عند الباب وكان فيه دكتوره واقفه
فواز بخوف:وش فيها
الدكتوره الحين هي كويسه بس كان فيه مشكله في النفس
فواز:بدخل عندها
الدكتوره: بس هي نايمه مابتحس باحد
فواز:يطالع بالباقه اللي بيده:بس بعطيها هاذي
الدكتوره:اها طب من اول قول انها حبيبتك وعاوز تروح لها قبل اهلها وضحكت
ابتسم فواز بخجل:ممكن ادخل
الدكتوره:اكيد وانا حاساعدك كل شي في طريق الحب بساعدك فيه وضحكت
فواز في باله(شكلها غرقانه لشوشتها ومحد عطاها وجهه وضحك في نفسه)
فواز:شكرا
دق الباب بهدوء كانت نايمه مثل الملائكه حط الباقه عالطاوله قبالها
ابتسم وطلع لانه مو من حقه يدخل ويشوفها بس قلبه ماطاوع عقله ودخل
راح للشركه وكلم امه بالطريق وقالها تروح لرؤى
دخل على ابوه المكتب:صباح الورد يالغالي
ابوعبدالله:هلا يبه فواز وينك يابوك امك ماخلتني انام تحاتيك
فواز وهو يبوس راس ابوه:ابد بس تعبت رؤى ووديتها انا وامي المستشفى وعقب ماووصلت امي للبيت رحت المزرعه ونمت هناك وهذا انا جيت
ابوعبدالله:شخبار رؤى الحين؟
فواز بضيق:الحمد لله
ابوعبدالله:يبه والله ماني راضي على حالها شف كيف تذبل عندنا بدون مانقدر نسوي شي انا قررت مع نفسي اكون مسوؤل عنها بعد رب العباد يابوك البنت مسكينه والدنيا مو راحمتها
فواز:انا افكر بشي الحين بس بما اني اجازه عندي فكره
ابوعبدالله :قول وشي
فواز:بروح عند عمي سعد وخالتي ندى رؤى مره تحب و ترتاح مع خالتي ندى
يومين ونرجع علشان رؤى تغير جو المفروض رايحين من زمان بس الحفله حقت ساره اخرتنا وش رايك
ابوعبدالله:وانا ماعندي مشكله بس انا اللي باخذها مع امك نروح نغير جو
فواز:لا يبه انا بوديها
ابوعبدالله:بصفتك وشو لا انا اللي بروح وباخذ امك معنا
فواز:فرضا مرضت ماكون موجود يعني؟
ابو عبدالله ضحك على ولده:اوله يافواز كل ذا تحبها
فواز بضحكه:مثل ماتحب امي انا احبها
ابوعبدالله:اجل انت ميت فيها
فواز:اوه اوه وينك ياأم عبدالله تسمعين
ابوعبدالله:يالله يابوك عندي اجتماع الحين وانت كمل اجازتك واستانس واحجز لنا انا وامك ورؤى بكره
فواز وفي باله فكره:من عيوني الا اقول ليه مانروح كلنا مع عمتي دلال وعبدالله يضل بالشركه
ابوعبدالله:والله لو يسمعك عبدالله بعدين ماتقدر تصبر يومين عن رؤى قولها من الاخير
فواز ضحك ضحكه عاليه ودخل عليها عبدالله
عبدالله:اوه اوه اخوي فواز يضحك وش السبب ياترى
ابوعبدالله:فواز اقول ليه تضحك؟
فواز:لا لا خلها له مفاجاه
ابو عبدالله:الا مفاجعه
فواز+ابوعبدالله:ههههههههههههههههههههههههههه
عبدالله يمثل الزعل:ايه يبه اصلا انت تحب فواز اكثر
ابوعبدالله:الله يخليكم لي ماعندي غيركم بالهدنيا بس بنروح الرياض نغير جو يومين
عبدالله:الله وناسه طيب حجزتوا
فواز:ومن قال انك بتروح انت بتقعد بالشركه
عبدالله يتخصر:لا والله
ابوعبدالله:ايه انت 6شهور بدون شغل لازم نمرنك شوي
عبدالله:ماتسوى علي وكل هال6شهور قضيتها بالمستشفى وبعدين لي شهرين مكروف كرف الحمير وساكت
ابوعبدالله:بتقنعني انك ماحللت شوراع لندن ولا نسيت سوزي
فواز:اوله سوزي ان ماعلمت نواف يعلم اخته هالمسكينه عليك ماكون فواز
عبدالله:لا لا وش سوزي اصلا تقابلت معها بالصدفه وكرجل عربي شهم ساعدتها بمشكله وبعدين انا كنت اطلع من المستشفى (وهو يغمز لابوه)افضي لك الجو مع نجول
ابوعبدالله:اقول اطلع لاصك راسك بالملف يالله وراي اجتماع وقام
عبدالله وهو يضحك:يحليله ابوي يستحي
فواز:اكيد دامك ولده
عبدالله مسك شعر فواز: ان مانتفت خيوط الحرير هاذي وخليتها اسلاك ماكون عبود
فواز بحركه متدرب عليها فك نفسه وصار مكتف عبد الله وماسك يده وراه يعني مايقدر يتحرك
فواز:اشوف نتفته
عبدالله:فكني لايشوفونا الموظفين يالمسواك ويقولون امحق مدير تنفيذي وامحق نائب
فواز:فكه وراح لباب وهو يضحك:لاوصيك بالشركه باااي
وطلع وراح لشركه الطيران بنفسه انه بيسافر مع رؤى وحجر له مع رؤى وابوه وامه وعمته دلال وبناتها وتاكد الحجر اليوم بالليل بعد المغرب
راح البيت واخذ له شور ولبس ثوب اسود وتحته قميص ابيض حوافه بربري وتسبح بعطره مثل عادته وطلع كان شكله خقق
لبس شماغه الابيض وشوز اسود لامع وطلع لقى عمته دلال بالصاله اللي بالدور الثاني
فواز:السلام عليكم
دلال:هلا والله وش هالزين
فواز نط من ورى لمن قعد بالكنبه:احم طول عمري كذا
دلال:اوله وش هالرضى والبسطه جعلها دوم
فواز:ايه ترىاليوم بعد المغرب بنسافر كلنا ماعدا عبود
دلال:وين؟
فواز:للرياض نغير جو ورؤى ترتاح نفسيتها شوي يومين ونرجع
دلال:أي والله وانت الصادق الله يجزاك الجنه على هالفكره
فواز:اوكيه انا بروح اجيب امي من المستشفى وبطلع رؤى على مسوليتي
دلال:لا فواز خلها ترتاح توها للحين تعبانه
فواز:راحتها هنا والمستشفى بيخليها تفكر اكثر وتتعب اكثر يالله بالاذن
|