تغيب عني ضيقـة البـال وتعـود
ويجيلهـا بيـن الضمايـر إزحامـي



ولا رد ضيق البال للبـال ياكـود
اللي لهـم تعكيـر جـوي غرامـي



يأهل العقول اللي تراقل مع النـود
أقـل مابـه لايـقـل إحتـرامـي



أنا ترا ماني على الصمـت محـدود
وبند المجامل شاطبـه مـن نظامـي



تردني حشمة اهل الطيـب والجـود
والا لساني مثـل حـد الحسامـي



البارح همومي بـلا سابـق وعـود
قامت تـوارد مثـل ورد الحيامـي



وكل الحصيل اللي بالأعماق موجود
من ضيق وأحزان وكسر وإنحطامـي



ضيقة صدر ضلع إنكسر كسرة العود
صرخة قهر صدمة عمر جرح دامـي



دقة خطر تحمل خبر كنـز مفقـود
رجفة زعل خيبة أمـل وإنصدامـي



ياحيرتـي كنـي تقيّـدت بقيـود
لا جالها بيـن الضلـوع إلتمامـي



ماأصير محسودٍ ولو كنـت محسـود
أصير أحسد اللي يعيـش بسلامـي



وياحيرتي في حسبة النقص والـزود
لا عكروا جواً صفـى بالعسامـي



إليا مسكت الصمت ماخوذ مجحود
وإن قلت ثوّرت الفشق في حزامـي



الأوله قلنا خطـاء غيـر مقصـود
والثانيـه للطيبـيـن الحشـامـي



والثالثه لاجـات بثبـات وشهـود
وش يحكم القاضي لكف الحرامي؟؟؟



يا سعود لو ماأخشى من الناس منقود
لخلـي الرايـم تعـاف الريـامـي



لكن بسامح وأترك البـاب مـردود
من خاطري ماودي أجرح صيامـي



ويكفيك عن قول ٍ مطوّل ومسرود
زبده.. وأنا بعطيك زبـدة كلامـي



ودك ضماك يـورّدك قبـر ولحـود
ولا تخدعك لمعة سـراب المضامـي