منتديات قصايد ليل - عرض مشاركة واحدة

07-17-2011

ترف:الحين عرفتي كل شي..قوليلي شنو اسوي؟
ام لينة:مدري شنو اقول لك بس انتي غلطانه من اول
ترف بستغراب:انا؟
ام لينة:أي..لانك من اول ماواجهتيته وماعطيتيه فرصة يشرح لك
ترف:معاك حق..بس انا وقتها كنت مو شايفة شي قدامي وكنت اظن اني انخدعت فيه وانه كان طول الوقت يلعب علي
ام لينة:وهاذا الي يحس فيه الحين..يحس انك خدعتيه وماكنتي تحبينه..هو بعد غلط نفس غلطتك وماعطاك فرصة تبررين له موقفك او تشرحين له
ترف:يعني اقول له؟
ام لينة:لازم وانا بساعدك
ترف:لا مابي
ام لينة:ليه؟
ترف:كرامتي ماتسمح لي اروح له بعد الي قاله عني
ام لنية:كانت لحظة غضب وصدقيني اكيد هدى الحين
ترف وقفت:انا ماراح اروح له لو شنو اذا هو يبيني يعرف وين يلقاني
ام لينة:لاتصيرين عنيدة يابنت
ترف:مو عنيدة...بعدين انتي امي شلون ترضين علي المهانة
ام لينة:ومين قال لك ان بكذا راح تنهانين
ترف:خلاص ماما غيري الموضوع
ام لينة:على راحتك
ترف وهي ترفع سماعة التلفون:طيب انا بدق على ليزا عشان تجيب عبايتي وعبايتك عشان نطلع اوكي

حطت السماعة على اذنها بعد ما ضربت ارقامه..انتظرت الرد بس امها بدت تكح وخافت عليها..ماتدري ليه حست انها بتفقدها وهاذا الي ماتبيه.. بعد مالقت احد تجلس معه وتفضفض له ويعطيها الحنان الي طول عمرها فاقدته يروح منها..مستحيل...حطت السماعة على الطاولة وراحت لها...

ترف:بسم الله عليك شفيك؟
ام لينة وهي تبتسم:لا..كح كح..عادي.كح كح
ترف بخوف:طيب ليه تكحين كذا..اوديك المستشفى؟
ام لينة:لا عادي بس انا مزكمة شوي تعرفين شتى وبرد

ترف ارتاحت شوي من كلام امها طبيعي يمرض الانسان بالشتى...

ترف بهدوء:اوكي

راحت للسامعه..مسكينة ليزا صار لها ساعه على التلفون...

*********************

طلعت من مبنى الجامعه وعلى وجهها ابتسامة جذابة وجمبها صديقتها مرام...
سحر شافت سيارة وليد الي قاعد ياشر لها....

سحر بدلع:اوكي مرام اشوفك بكرة
مرام وعيونها ماطاحت من وليد وسيارته:اوكي

مشت سحر وهي ميته ضحك على شكل مرام...اكيد الحين بتموت من الغيرة...
دخلت للسيارة وشافت مرام واقفة وفاهية..ضحكت بدلع..

وليد ابتسم على ضحكتها:شفيك؟
سحر:هههه لا..ولاشي(باسته من خده)كيفك حبيبي؟
وليد مسك خده الي باسته سحر وهو مستغرب حركتها(قال بهدوء):تمام
سحر ضحكت على شكله:هههههه شفيك؟
وليد:ها...لا..ولاشي
سحر:طيب اتحرك ليه واقف؟
وليد انتبه لنفسه:أي..صح
سحر:هههههههههههه

شغل السيارة وراح..

مرام وقفت مصدومة هي تعرف ان سحر جريئة وتكلم وتطلع مع شباب بس عمرها ماتوقعت جرئتها توصل لين انها تخلي خويها ياخذها من قدام باب الجامعه لا وتبوسه بعد...

************************

كان جالس بمكتبه ويقرا اوراق مناقصة جديدة لما دخل عليه السكرتير..

السكرتير:استاذ زياد
زياد رفع راسه:نعم
السكرتير:طال عمرك في شخص يبي يشوفك
زياد:مين؟

دخلت وحدة للمكتب..وحدة زياد يعرفها عدل ومستحيل ينسى ملامحها..

زياد وقف:انتي؟
بتول ببتسامة شيطانية:شخبارك زياد؟
زياد:شتبين جاية هنا؟

السكرتير حس ان الجو متوتر وان ماله لزمه هنا قرر ان ينسحب...
اول ماطلع السكرتير راح زياد لها ووقف قدامها..

زياد بعصبية:خير؟
بتول وهي تجلس:على الاقل قول لي اتفضلي..انت ليش مو ذرب زي ابوك؟
زياد باستغراب:ابوي؟
بتول:ايوه..ابوك ليه ماتعرف ان انا وابوك بينا بزنس
زياد:أي بزنس هاذا الي بينك وبين ابوي
بتول:شراكة
زياد بستهزاء:شراكة وانتي ماعندك الا قمل ثيابك(ضحك بستهزاء)
بتول وقفت بعصبية:عن الغلط...لاتنسى انك كنت بتحفي عشان اناظر فيك بس
زياد وهو يتوجه لكرسيه:ههههههههههه انا..انا احفي عشان وحدة (قال وهو ياشر عليها بستهزاء)مثلك..اخاف تقصدين احد ثاني بس

بتول مسكت اعصابها ماتبي تنفعل اكثر من كذا عشان ماتخرب خطتها...
جلست على الكرسي مرة ثانية...

بتول بهدوء:زياد شفيك علي (قالت ببراءة مصطنعة)انا شنو سويت لك عشان تعاملني كذا؟
زياد ناظرها بصدمة:شنو سويتي؟...قولي شنو ماسويتي..دمرتيني من قبل والحين فرقتيني عن ترف ودمرتيني ودمرتيها..حتى سامي ماسلم منك...انتي شنو تبين بالضبط...ليه تسوين كذا؟

قامت من كرسيها وراحت لعنده ووقفت قدامه...

بتول:لاني احبك ومابيك تكون لغيري
زياد:تحبيني؟...انتي تحبين
بتول:صدقني يازياد عمري ماحبيت احد غيرك
زياد:والي يحب يدمر الي يحبه؟
بتول:انا ماسويت فيك شي..كل شي سويته في هاذي الي اسمها ترف وصديقك سامي
زياد:وانا احب ترف
بتول حطت يدها على كتفه:انت تحبني انا انت تدري وانا ادري لا تحاول تكابر
زياد بعدها عنه:انتي صفحة وطويتها من حياتي ولا يمكن ارجع لها
بتول:لا زياد لا تقول كذا
زياد توجه للباب وفتحه:شرفتينا

بتول راحت لعنده وسكرت الباب...

قالت وهي تلعب بكم الثوب من فوق:شدعوة زياد..نسيت ايام بيروت..ايام الدراسة لما كنا نروح للجبل ونلعب بالثلج..والصور..معقولة نسيت كل هاذا

زياد بلع ريقه من التوتر وهو يحس بحراره بكل جسمه من قربها وريحة عطرها الجذابة الي مالية المكان..

زياد بهدوء:انا قلبي ماعاد لك.قلبي ملك لترف وبس

بعدت عنه بعصبية...

بتول بصراخ:انا ابي اعرف انت وش لاقي بهترف هاذي...جمال وعندي دلع وعندي..حتى الحب قولي وش لقيت فيها مو عندي؟
زياد:عمرك ماراح تفهمين
بتول:اوكي خذني على قد عقلي وفهمني
زياد:انا اقول لك احب ترف تقولين وش لاقي فيها..تدرين وش لقيت فيها احسن منك
بتول:شنو؟
زياد:مو الجمال او الدلع على قولتك الي يجذبوني.. لو كانت ملكة جمال مايهمني انا الي يهمني الجوهر يا بتول..انا لقيت بترف اشياء كثيرة مو موجودة فيك
بتول:عشان كذا تركتني؟عشان وحدة تافههة مافيها زود وتقول لي الجوهر..بلا جوهر بلا زفت
زياد:احترمي نفسك وبعدين انا ماتركتك عشان ترف
بتول:اجل عشان ايش انشاء الله؟
زياد:انتي الي ضيعتيني من يدك..ولا نسيتي
بتول قربت منه:زياد تكفى وربي كانت غلطة...(قالت بهدوء)انا احبك
زياد:بسك كذب عاد تراني طفشت منك..اطلعي من حياتي خلاص
بتول:ادري ان هالكلام من ورى قلبك..ولا انت ودك تشوفني قدامك كل يوم
زياد:انتي الظاهر ماتفهمين...خلاص روحي ياشيخة ليه ترخصين نفسك لواحد مايبيك
بتول:لا تبيني
زياد بقلة صبر:استغفر الله..بتول افهميني..اذكر لما كنا ببيروت انتي بنفسك الي انهيتي علاقتنا ولا انا غلطان
بتول:اعتبرها طيش..هبال...اي شي
زياد:هاذي مالها الا اسم واحد..خيانة
بتول ابتسمت بتوتر:لا تكبر السالفة شدعوة خيانة
زياد:اجل شنو تسمين اني اشوفك مع صديقي ب... ولا ماله داعي ولما واجهتك بالسالفة..تذكرين وش قلتي لي...قلتي لي احبه صح ولا لا
بتول:وقتها كنت.....
زياد فتح الباب:مابي اسمع شي...مع السلامة

بتول طالعته بعصبية مافي فايدة مهما سوت ماراح ينفع..بس وين بيروح وراه وراه لين تدفعه الثمن...طلعت من المكتب بكل عصبية..وقفها صوت زياد...

زياد:بتول

لفت عليه وهي مبتسمة...

بتول:كنت عارفة انك....

سكتت لما شافته راح للمكتب واخذ شنطتها ومدها لها...

زياد بستهزاء:لا تضيعين شنطتك كفاية عليك ضيعتي عذريتك

سحبت الشنطة بقوة وقالت وهي متنرفزة..

بتول:بتندم صدقني بتندم
زياد ببرود:اكثر من كذا...ما اظن

طالعته بحقد وتوجهت للاصنصير والعصبية باينة عليها...

زياد بصوت عالي:مع السلامة

بتول طنشته ودخلت الاصنصير...
اول ماسكر باب الاصنصير..سكر باب مكتبه بكل قوة...صار يمشي بالمكتب وهو مقهور..اي شي قدامه يرميه بدون تفكير..اوراق..ملفات.اقلام..اي شي وبس اهم شي يطلع قهره من هالحقيرة بتول...

***************************

سحر:يوووه وليد شلون تبيني اشوفها..يعني اذا شفتها شنو بقول لها خوية ولدك؟
وليد:لا قولي لها حبيبة ولدك وزوجة المسقبل

سحر ابتسمت...

وليد:ها ايش قلتي؟
سحر:اوكي
وليد:شرايك اليوم
سحر:اليوم؟
وليد:أي شنو وراك
سحر:ممم..مدري عندي اختبار بعد بكرة
وليد:يووه سحر يعني شنو بتسوين بالشهادة(قال بخبث)مردك لي
سحر ابتسمت:اوكي
وليد:يعني خلاص

سحر هزت راسها بالموافقة...

وليد ابتسم:فديتك والله سحورة
سحر:وليد شنو سحورة انا سوسو
وليد:سوري فديتك يا احلى سوسو

**********************

وصلو للبيت...

ابرار وهي تطالع القصر باعجاب:واااو اسيل بيتكم يهبل..اي بيت الا قصر
اسيل:بلاك ماشفتي قصر عمي
ابرار طالعتها:احلى من قصركم؟
اسيل:قصرنا على قولتك مايجي اصغر ملحق عنده
ابرار:شدعوة اذا كذا اصغر ملحق اجل القصر شنو كبره
اسيل بحسرة:خليني ساكته بس..امشي معي

دخلو للقصر وكان فاضي كالعادة كل واحد لاهي بنفسه...

ابرار:وين اهلك؟
اسيل:مدري تلقين كل واحد طالع ولا بغرفته مدري عنهم
ابرار:طيب وين نجلس؟
اسيل:تعالي غرفتي احسن
ابرار:اوكي

اتجهو للاصنصير لانه اسرع وهم مالهم خلق يركبون الدرج ويتعبون..
وصلو لجناح اسيل الي كان لونه سماوي واصفر...

ابرار:واااو غرفتك حلوة
اسيل:اشفيك انتي كنك متخرعة كل ماشفتي شي قلتي واو هاذا وانتو ساكنين بفيلا
ابرار:أي بس فيلتنا ماتجي ربع قصركم
اسيل:اذكري الله لا يطيح علينا البيت
ابرار:هههههههه لاتخافين عيوني باردة
اسيل:اجلسي بس

ابرار جلست على الكنب الي بغرفة اسيل وقعدت تطالع الغرفة بتمعن وشافت العود...

ابرار طالعت اسيل:تعرفين تعزفين على العود؟
اسيل:يووه عود وقيتار وبيانو وكل الي تبينه
ابرار:ماشاء الله يعني متعددة المواهب
اسيل:عليك نور
ابرار:مين علمك كل هاذا؟
اسيل طالعت يدينها الي بحضنها وقالت بالم:لما كنت صغيرة كنت دايم اجلس مع ابوي وكان هو يعزف وانا اسمع ولما كبرت صرت احب اعزف احب الات الموسيقية بكل انواعها..ولما كنا نروح لبيروت كنت اروح لمعهد الموسيقى واتعلم...كبرت وكبر حب العزف معاي
ابرار:طيب انا بس اشوف عندك العود والقيتار
اسيل رفعت راسها:تبين تشوفين الباقي؟
ابرار:ياليت
اسيل قامت وسحبت ابرار من يدها:تعالي

راحت ابرار مع اسيل لغرفة الموسيقى الي بجناحها وشافت هناك انواع كثيرة من الات..ماصدقت نفسها وهي تشوف معشوقها قدامها..

تقدمت للقانون الي بالغرفة وابتسمت..

ابرار:معليه اجرب
اسيل:اكيد

((ابرار))

جلست على اقرب كرسي لعند القانون وبديت اعزف..حسيت الروح ردت لي اول ما عزفت عليه وسمعت صوت اوتاره والحانه..طول عمري وانا احب القانون كان هو صديقي الوحيد لما كنت صغيرة..اشكي له همومي وابوح له عن مشاعري..كان عندي واحد في بيتنا بس لما تركني بسام انهرت وكسرته ومن يومها ماشريت واحد ثاني..واليوم لما شفته عند اسيل حسيت بفرحة مو طبيعية..جد اشتقت له...

خلصت العزف واسيل تقدمت لها وهي تصفق...

اسيل:والله برافو ماتوقعتك تعرفين تعزفين على القانون
ابرار وهي تبتسم:مشكورة..طيب انتي اعزفي عليه سمعيني عزفك شوي
اسيل:للاسف شفتي كل هالات اعرف اعزف عليهم كلهم الا هالعلة معلق معي..احسهه صعب
ابرار:ههههههه مو مشكلة اعلمك
اسيل:جد يلا

جلسو مع بعض يعزفون ويغنون ارتاحو حق بعض مرة وكانهم يعرفون بعض من سنيني مو من كم شهر.. كل وحدة حكت للثانية عن الي بداخلها وماخبت شي...
ابرار قالت لها كل شي عن بسام وعن محمد..واسيل قالت لها عن خواتها وعن امها وابوها حتى عن عمها...ارتاحو لبعض بشكل ما يتصوره احد...

**********************

باليل...
كانو زياد وسامي جالسين بالشاليهات حق زياد والجو كان بارد ...جالسين حول النار والبحر قدامهم...كانت القعدة خيااال تحت نور القمر...

سامي:جد حقيرة وربي لو هي قدامي كان حذفتها بالنار الحين
زياد:هههههههه
سامي:جد مقهور منها عمري ما انسى حركتها البايخة بس ما اخليها وانا سامي ولد امي وابوي
زياد:اقول لايكثر مسويلي فيها(وهو يقلد طريقته)ما اخليها وانا سامي ولد امي وابوي..ياحبيبي هاذي حية عقرب ماينفع معاها هالكلام
سامي:يعني بتسكت لها؟
زياد:لا طبعا
سامي:اجل وش بتسوي؟
زياد:بعد ما ادري
سامي:تبي رايي
زياد وهو يشرب الكوفي:قول
سامي:ارسل لها احد يذبحها ولا يشوه وجهها
زياد غص بالكوفي:كح كح هههههههههههه
سامي:ههههه ليش تضحك؟
زياد:ههههههههه عليك تفكير هههههههه جد مجرم
سامي:هههههههه شسوي مقهور منها
زياد:بس بس غير السافة الحين تطب علينا
سامي:وانت الصادق..بس شنو تتوقع البزنس الي بينها وبين ابوك؟
زياد:ولاشي هاذي وحدة نصابة مسوية هالفلم ومخترعة سالفة البزنس عشان تجي تشوفني وبس
سامي:ياهووو مقدر على الواثق
زياد:ههههههههههه انطم بس
سامي طالعه وقال بستهبال:كانك سبينتي
زياد:احلف بس..اشرب الكوفي بس لا يبرد

*********************

خلصت من اللبس ورن جوالها...ابتسمت وهي تشوف رقمه...

سحر:هلا حياتي
وليد:جاهزة قلبي؟
سحر:أي بس باقي البس عبايتي واجيك
وليد بخبث:بتركبين معي طبعا
سحر:هههههههه لا
وليد:ليه؟
سحر:بروح مع السواق وانت الحقني كفاية ركبت معك الصبح مرتين بعد
وليد:بل عادتهم
سحر:ههههههههه لا بس اذكرك يعني
وليد:طيب حبيبتي اخليك تجهزين
سحر:وليد
وليد:عيون وقلب وروح وحيات وليد انتي..امري
سحر:ههههههههه مايامر عليك عدو بس كنت بسالك مين بيجي غير امك؟
وليد:امي واختي بس
سحر:انت عندك خوات؟
وليد:وحدة بس اسمها هاجر
سحر:عاشت الاسامي..اكيد حلوة مثل اخوها
وليد:مو احلى منك يا عمري..انتي قمرهم كلهم مااظن وحدة تجي ربع جمالك
سحر:ههههههههه خلاص ترى استحي
وليد:فدييت الي يستحي
سحر:هم معاك الحين؟
وليد:أي
سحر باحراج:وانت تكلمني كذا قدامهم؟
وليد:وش فيها يعني حبيبتي واغازلها فيها شي
سحر صار وجهها احمر قالت بدلع :وليييد خلاااص
وليد:ههههههه تامرين امر..اخليك الحين تتجهزين اوكي
سحر:اوكي باي

سكرت الخط وحطت الجوال على قلبها الي يدق لكل كلمة يقولها وكل همسة ينطقها بشفايفه..تحبه بكل مافيها ماقد حبت شخص غيره ولا راح تحب..ماتتخيل كيف كانت حياتها تافهة بدونه..من يوم ماحبته حياتها كلها تغيرت..كل الي تتمناه انها ماتنحرم منه ابد وانه يبقى قدام عينها طول العمر...

**************************

بالحديقة كانت ترف تلعب بالقطوة مع امها..صارت طول وقتها تجلس مع امها ماتبي تفارقها ولا لحظة..تبي تحفظ كل شي فيها ماتبي تفقد الحنان الي تحس فيه بكل لحظة تقعد فيها مع امها...

ترف:هههههههه شفيك ترى ماراح تاكلك
ام لينة بخوف:لا بعديها عني ما احب القطاوة
ترف رفعت القطوة وباستها:حرام عليك وربي تجنن
ام لينة:يع بلا قرف شلون تبوسينها كذا؟
ترف:ههههههههه طيب عشان خاطري شيليها شوي
ام لينة:لا مستحيل
ترف:ياخوافة ههههههههههه

انفتح الباب وطلعت سحر..طالعت فيهم كيف مبسوطين تتمنى لو تقدر تفرح مثلهم وتجلس معهم...ابعدت هالافكار من راسها وكملت طريقها للباب..
وقفها صوت امها..

ام لينة:سحر
سحر وقفت وقالت بدون اتطالع فيها:خير
ام لينة:وين بتروحين؟
سحر لفت عليها:طالهة عندك مانع
ام لينة:وين؟
سحر:ليه تسالين؟
ام لينة:ايش ليه اسال من حقي اعرف وين رايحة ومن وين جاية
سحر تكتفت:وباي حق تسالين؟
ترف:ماما سحر ماتحب احد يسالها وين رايحة ومن وين جاية..خليها على كيفها
ام لينة:لامو على كيفها..انا امها ولازم اعرف اجل بنت تطلع من البيت الساعة 8 قوليلي متى بترجع بالله
سحر:بروح المطعم اوكي
ام لينة:ومتى بترجعين؟
سحر بدون نفس:مدري
ام لينة:قبل الساعة 10 تكونين بالبيت
سحر تخصرت:نعم؟
ام لينة بحدة:نعم الله عليك
سحر بنرفزة:اوكي

حطت الحجاب على راسها وطلعت...

ترف طالعت بامها كيف خلت سحر تطيع اوامرها وسحر معروف انها عنيدة ومستحيل تسمع كلام احد..ابتسمت لما شافت امها تطالعها وبعدت نظراتها عنها...

**********************

اول ماركبت السيارة ابتسمت وهي تتذكر امها كيف كانت معصبة واكيد كانت خايفة عليها لانها طالعه بوقت متاخر بالنسبة لبنت ولوحدها...حلو يكون عندك احد يخاف عليك ويسالك وين رايحة ووين جاية واذا تاخرتي يخاف عليك..هاذا الشي الي طول عمرها كانت محرومة منه حتى لينة ماكانت تسالها وين رايحة ومن وين جاية عشان لا تضايقها..بس هي كانت محتاجة لهاذا الشي مع ان كل صديقاتها كانو يحسدونها على الحرية الي معطتها لها لينة ودايم كانو يشتكون من اهلهم لانهم مايخلونهم يطلعون ويدخلون على راحتهم..حمدت ربها انه رجع لها امها تحس انها فرحانة لانها معهم بالبيت ولو انها ماتبين هاذا الشي بس على الاقل تحس فيه...

*************************

ابرار وهي تطالع الساعة الي معقلة بغرفة اسيل:يوووه تاخر الوقت
اسيل:أي تاخر تو الناس
ابرار:من متى وانا عندك طولت..احس اني مصختها يمكن اهلك يبغونك وانا معطلتك عنهم
اسيل:استريحي بس..خلك معي تكفين
ابرار:مرة جاية ان شاء الله
اسيل:طيب نامي هنا..دقي على اهلك وقولي لهم
ابرار:لا مدري شلون... خليها مرة ثانية
اسيل بياس:على راحتك
ابرار وهي توقف:اقول اسيل
اسيل:هلا
ابرار:ابي اشوف امك
اسيل:عاد وين تلقينها الحين
ابرار:معليه بطريقنا اذا شفناها كان بها ماشفناها اجل مرة ثانية
اسيل:اوكي

طلعو من الجناح وراحو للاصنصير...

اسيل:تدرين عاد انا قاهرني هالبسام هاذا صحيح انه حلو بس اخلاقه زفت
ابرار:لا عاد يمكن يكون صادق
اسيل طالعت فيها بستغراب:وانتي هبلة تصدقينه...ليكون بتصدقينه؟
ابرار بسرعة:لا لا..بس اقول يعني الظليمة شينة
اسيل:اقول امشي بس وصلنا

مشت ابرار مع اسيل وهي سرحانة ببسام وبلي صار بينهم..ماتدري تصدق قلبها الي يبيه ويحبه ولا تصدق عقلها الي مستحيل يصدقه ويرضى انه يرجع له...

طلعو للحديقو لقو ترف وامها هناك...

اسيل:شفتي حضك الحلو
ابرار انتبهت لها:ها؟
اسيل:اقول شكلك انتي منسمة اليوم..اقول لك شوفي امي هناك مع ترف
ابرار:والله يلا نسلم عليهم

راحو لجهت ترف وام لينة..

اسيل بصراخ:ندووي ترووف
ابرار:اسيل شلون تنادين امك كذا؟
اسيل:عادي امي فري
ترف:هي انتي شنو ندوي قولي ماما
اسيل:اقول انطمي انتي يالماصخة(وهي تقلد طريقة ترف بالكلام)ماما..الناس يقولون يمى
ترف:هاذا انتي تعرفين تقولينها ليه تقولين ندوي؟
اسيل وهي تحط اصبعها على راسها:كيفي
ترف:لا مو بكيفك
ام لينة طالعت ابرار..مدت لها يدها وهي مبتسمة:شخبارك؟

ابرار ابسمت شكلها حبوبة..في ناس كذا اول ماتشوفهم يدخلون قلبك وناس اول ماتشوفهم ماترتاح لهم...

ابرار مدت يدها:الحمد الله وانتي خالتي شخبارك؟
ام لينة ابتسمت:بخير دامك بخير
ابرار:تسليمن خالتي
اسيل:اقووول مسوية فيها ام السنع
ابرار:شفيك انتي لازم احترم الي اكبر مني(طالعت ام لينة وابتسمت) صح خالتي
ام لينة:هههههه صح
اسيل:ابرار تعالي شوي ابغاك
ابرار راحت معاها:شفيك؟
اسيل:انتي بتروحين البيت ولا عند محمد؟
ابرار:مدري يمكن اروح لمحمد شوي لانه بيطلع اليوم
اسيل ضربت راسها:أي صح نسيت
ابرار:عاد انا السنعه مانسيت
اسيل:اقول تلايطي
ابرار:بتجين معي؟
اسيل:طيب لحظة اجيب عبايتي
ابرار:ماراح تستاذنين من امك؟
اسيل:يوووه ليه بعد؟
ابرار:شنو ليه بعد مو امك هاذي
اسيل:طيب طيب لا تسندريني

راحت لامها ووقفت قدامها...

اسيل:ندوي
ترف:انتي ماتفهمين
ام لينة:هلا اسيل وش تبين؟
اسيل:شفتي السناعة شلون...بطلع مع ابرار
ام لينة:وين؟
اسيل:بروح اوصلها تدرين يعني مايصير بنت تروح لحالها مع السواق بهاذا الوقت عيب لازم معاها محرم
ترف:ايوه قلتيلي محرم
اسيل خزتها:جب انتي
ام لينة:معاكحق روحي وصليها
ترف:من صجك تصدقينها هاذي نصابة
اسيل:شتبين انتي

تركتها وراحت تجيب عبايتها وراحت معاها ابرار...

ترف:لا تصدقينها انتي ماتعرفينها كثري اكيد وراها سالفة
ام لينة:ادري عنها خليها على كيفها
ترف:بعدين قولو ليه بناتنا يضيعون من دلعكم الزايد..اذا صاعت اسيل اكثر من ماهي صايعة طبعا لا تلومينها اعرفي انه من دلعك انتي ولينة
ام لينة:ههههههههه شفيك معصبة؟
ترف:مو معصبة بس مقهورة كلهم يطلعون الا انا جالسة هنا من بدت الاجازة ماتهنيت فيها ولا طلعت طلعة عدلة
ام لينة:ولا تزعلين بكرة نطلع
ترف بحماس:جد؟
ام لينة ابتسمت:أي جد
ترف:وين؟
ام لينة:أي مكان تبينه
ترف ضمتها:الله يخليك لي
ام لينة ابتسمت:كح كح
ترف رفعت راسها:شفيك ماما؟
ام لينة:كح كح طولنا برة وانا تعبانة كح كح
ترف:صح انتي تعبانة والجو بارد..يلا ندخل

ساعدت امها عشان تقوم ودخلو لداخل البيت...

**********************

سارة:انا قلت لك ابي جناح مو غرفة عادية
بسام:كل هاذا ومو عاجبك
سارة:أي مو عاجبني
بسام:اقول احمدي ربك انا دفعت لك ثمن الغرفة لجل العشرة بس ولا انا مو مجبور ادفع لك لاني مطلقك
سارة:انا ابي الجناح حق ولدك عشان يرتاح مو عشاني
بسام:تستهبلين انتي ولدي ماكمل اسبوع بالله وش دراه اذا قعد في جناح ولا بغرفة عادية على قولتك
سارة:اوف وش ذا البخل الي عليك
بسام:انا مو بخيل وبعدين انتي مين عشان اكلف نفسي عشانك
سارة:ام عيالك
بسام:وطلقيتي وكان يوم اسود لما خذتك
سارة:وع يعني انا الي كنت ميته عليك

بسام طلع من الغرفة وهو معصب دايم تنرفزه يعني فوق ماانها مطلقة وهو مكلف نفسه ودافع لها تقعد وتتشرط...
شاف ابرار جايه ومعها اسيل ابتسم لما التقت عيونهم ببعض..هي الشخص الوحيد الي يقدر يطلعه من همه..حتى لو ما تكلم معاها بس اهم شي يشوفها...

ابرار توترت ودق قلبها لما شافته يبتسم..

ابرار بصوت واطي:اسيل شوفيه يبتسم بالذمه مايهبل
اسيل طالعتها بقرف:انقلعي عني لا اشوتك
ابرار:يوووه شفيك علي؟
اسيل بانفعال:فوق كل الي سواه لك تقولين(وهي تقلدها) شوفيه يبتسم بالذمه مايهبل..وخير ياطير يبتسم يعني مين الي قاعد يبتسم (طالعتها وشافتها تبتسم) (اسيل بحدة)..لا تبتسمين
ابرار طالعتها:ليه؟
اسيل:هاذي الي بتذبحني
ابرار كشرت:كذا زين؟
اسيل:أي

ابرار مدت بوزها زي الاطفال ومشت معاها لغرفة محمد..وعيونها ماطاحت عن عيون بسام...

بسام((ههههههه يالبي عليها تجنن))

اسيل طالعت بسام بنظرات حقد خلته ينزل عينه من على ابرار...

اسيل:ايوه كذا اوكي

ابرار دزتها عشان تسكت...

اسيل:يووه زين لا تدفين
ابرار بصوت واطي:اسييل..خلااص
اسيل:طيب طيب

دخلو الغرفة وبسام ظل واقف ويضحك عليهم..يشبهون بعض نفس الخبال والهبال...

**********************

لينة:يعني عادي لو جيت الحين؟
فيصل:اكيد هاذي الساعة المباركة الي تجين فيها عندنا
لينة:طيب خلاص اسال امك وردعلي
فيصل:امي موافقة وتبي تشوفك اليوم قبل بكرة
لينة:امك بس؟
فيصل:امي مشتاقة لك وولدها مشتاق لك اكثر
لينة ابتسمت:طيب اجل نص ساعة واكون عندكم
فيصل:انتظرك

سكرت من فيصل وطالعت نفسها بالمراية...

لينة:انا من صجي بروح..فشلة ايش بتقول عني امه ماصدقت قالي تعالي الا جيت على طول..اوف..اروح اسال امي يمكن تساعدني

وقفت عند الباب..

لينة:لا انا بعد شنو اقول لها..بروح ازور ام حبيبي ما يصير بعد

قعدت على الكرسي الهزاز بغرفتها..صارت تلعب بشعرها وتفكر..

لينة:يوه عاد انا قلت له بجي مايصير اكشت فيه بعد

سحبت عبايتها من الدرج ونزلت بالاصنصير...

لقت امها وترف بالصالة..ابتسمت على اشكالهم وان ترف اندمجت مع امها وتعودت عليها...حطت عبايتها على الطاولة وراحت لعندهم...

لينة ببتسامة:مساء الخير
الكل:مساء النور
لينة وهي تبوس راس امها:شخبارك يمى؟
ام لينة:بخير دامك بخير
ترف:ياسلام وانا ليه ماتسلمين علي
لينة ابتسمت..قربت لها وشدت خدودها بقوة:انتي قمرهم كلهم
ترف:ااي عورتيني
لينة باستها من خدها:شخبار الحلو اليوم؟
ترف لزقت بامها:بخير دام ماما جمبي
ام لينة:تسلمين
لينة:الله يخليكم لبعض..بس انا يعني خلاص راحت علي
ترف راحت لها وضمتها:ولو انتي ليون حبيبة قلبي
لينة:هههههه فديتك والله...روحي لماما بعدين تزعل
ام لينة:لا شدعوة
ترف رجعت لامها:اصلا ماما ما تقدر تزعل مني لانها تحبني(طالعت امها ببراءة)صح ماما؟
ام لينة ابتسمت على براءتها:صح
لينة بتردد:يمى
ام لينة:هلا
لينة بنفس التردد:مم..معليه اطلع شوي
ترف بصراخ:لاا مايصير كذا وربي ظلم
ام لينة:وين بتروحين؟
لينة:بروح للمستشفى عند وحدة من صديقاتي

حست بالندم لانها كذبت على امها بس شتسوي هاذا الحل الوحيد عشان تشوف فيصل...

ام لينة:بتتاخرين؟
لينة:لا ساعة بس او اقل
ام لينة:طيب روحي بس لا تتاخرين
لينة ابتسمت وباست راس امها:ان شاء الله

اول ما طلعت لينة ترف ناظرت امها بعصبية..

ترف:ماما مايصير كذا الحين كلهم راحو وانا لحالي بالبيت
ام لينة:وانا وين رحت؟
ترف:انتي بقلبي بس انا ابي اطلع
ام لينة:طيب قلت لك بكرة
ترف بياس:طيب

جلست تطالع التلفزيون وهي منقهرة كل وحدة من خواتها طلعت وهي ظلت بالبيت...وام لينة كل شوي تطالعها وتضحك عليها واضح انها منقهرة...