ابسئـلـك بالله مـاهـزك الـشـوق
ولاجاك مثل اللي مـن الهـم جانـي
قلبي غدى كنـه للأحـزان صنـدق
من الحـزن ياخـذ جميـع المعانـي
والهم يلعبـي علـى كـل طـاروق
ومشيدن لـه فـوق صـدري مبانـي
نـوب علـي يغيـب ونـوب افـوق
والذكـريـات تمـرنـي بالثـوانـي
عـزالله ان القلـب مافيـه معـلـوق
مايشتكـي فرقـا رهيـف الثمـانـي
كتمت سـري مـادرا عنـه مخلـوق
لو كنت احس الموت بيـن المحانـي
حاولت اكابر واطـرد الهـم واروق
وفي كل ماسويـت قلبـي عصانـي
النوم من عيني لـه ليـال مسـروق
كـن السهـر دور علـي ولقـانـي
وانا لو ان الجفن يشكي على المـوق
اسري على صوت الغـلا لا دعانـي
قلبي على صوتك ولقيـاك محـروق
مدخلـك بالله لا تحـطـم كيـانـي
منته على قلبي من النـاس مسبـوق
اجلس بـامان وقـول هـذا مكانـي
القلب مالـه غيـر مغليـه معشـوق
واعاهـدك مايدخلـه شخـص ثانـي
لكن انا ماني علـى الجنـب مفهـوق
من خلقتي ما اركض ورى اللي جفاني
صحيح انا مخطي ولك عندي حقـوق
بـس الظـروف اردهـا وتعصانـي
دامك تعرف السـر ياكامـل الـذوق
وش فيك صاير ضدي انت وزمانـي
علمتـك وعلمتنـي علـم مـوثـوق
يـوم البواخـر راسيـه بالمـوانـي
لكن قـدرك عالـي ومرتفـع فـوق
لك منزلـة نجمـة سهيـل اليمانـي
وانا على الميثاق والعهـد مـا ابـوق
وانت من سلالـه عريـب المجانـي
كل المشاعر يمـك تسوقنـي سـوق
ليت الزعـل ماقـام عنـك يحدانـي
وان كان قلبك يالغـلا هـزه الشـوق
اعرف ترى ماجاك بالوقـت جانـي