(نادمـــيني)
نادميني كلهـا ساعـة و أغيـب
ما بقى غير الموادع يـا حبيـب
سلّي الخفّاق عـن هـم الزمـان
و اجلي من العين نزّات السريب
طالت أيامي و أنا فـوق الشّـداد
الذلول تسير و الراكب غريـب
درهمت بي في عجـاج القايلـه
و الثرى من حدرها جاله لهيـب
كل خفٍ يرسـم بدربـي حـذر
لاهل ركبٍ ما بعد طبّ الشعيـب
يفهم اللي يفهم و يجهـل كثيـر
و المراجل دربها دايـم صعيـب
يا كبر غلطـات جهّـال الحيـاة
ضيّعوا بعيدهم و أخطوا القريـب
يا بعد فرق الليـال مـن النهـار
و يا بعد فرق الغرير من اللبيـب
بعضهم يزمّ بـه كثـر الهـدوم
و إن تحدّث طاح من عين الرقيب
كل رجـلٍ يستـره قـل الكـلام
و اللسـان يجمّلـه و إلا يعيـب
نادميني .. وقتي الباقـي قصيـر
و المسي بعيونك جروحي تطيب
فرّغي قلبي و فكري من عنـاي
يا شعاعٍ بالعمـر قبـل المغيـب
ومضةٍ في ليل في دهـرٍ ظلـوم
تبعث الآمال في وقـتٍ عجيـب
السؤال يغيب من قبـل الجـواب
نادميني .. كلها ساعة و أغيـب
|