منتديات قصايد ليل - عرض مشاركة واحدة

07-16-2011

بعد حفلة نوره الكل كان مستانس لان صدق كانت الحفله روعه
وأكثر وحده كانت طايره من الفرح هي أكيد نوره
لانها انخطبت من الانسان اللي كانت معجبه فيه من أول يوم شافته

وفي يوم الثاني كانت الريم قاعده تقص أظافرها في الصاله ومعاها فهد اللي كان قاعد على الغنفه ومنزل راسه وماسك ايدينه وكان صدق حزين
شافته الريم وحست ان اخوها في شي وانه متضايق

الريم وهي صاده لفهد : فهد اخوي شو فيك ؟
فهد اللي كان منزل راسه رفع راسه وشاف الريم وتنهد : ااااااااااااااااه يالريم
الريم : بسم الله عليك من الآااااااااه يا اخوي ... شو فيك ليش زعلان
فهد ونبرة صوته كلها حزن : اقول الريم شو أخبار ساره من مده ما أعرف عنها ؟
الريم : والله ساره الحمد لله تمام بخير
فهد : اقول الريم ساره ما قالت شي عن سالفتي
الريم : أي سالفه يا اخوي
فهد : أي سالفه بعد غير سالفتي
الريم : قصدك يا اخوي سالفة طلبك لساره وطلب زواجك منها
فهد : هيه طبعا
الريم : ما رمستني عن هالسالفه
فهد راح عند الريم وقعد عندها: اقول يا الريم
الريم : هلا يا اخوي
فهد: اتصلي في ساره وقوليها اذا هي فكرت بالزواج مني
الريم : ان شاء الله يا اخوي بتصل فيها بس ( بتردد) واذا رفضت ؟
فهد وقف من مكانه وعصب : اذا رفضت قوليلها والله وأنا على قد تهديدي اذا رفضت قوليلها انها راح تنحرم من اغلى ناسها اللي هم امها وخالد والله لأخلي حياتهم عذاب مثل ما حولت حياتي الى عذاب
الريم شافت عصبية اخوها وخافت عليه : فهد شو فيك اخوي توك هادي ..أنا ما قلت هي بتقول جذي ..اقول اذا قالت
فهد : اذا قالت قوليلها هالكلام
الريم : يعني يا فهد حتى لو تزوجتها بيكون حب من طرف واحد
فهد : ما يهمني اذا هي ما تحبني اهم شي انها تكون لي وملكي ويمكن يوم من الايام اخليها تحبني
الريم : والله ماعرف شو اقولك يا فهد بس فالك طيب الحين بتصل فيها
فهد : اوكي يالريم اتصلي فيها الله يخيلج وانا الحين بروح غرفتي وردي علي اذا كلمتيها اوكي
الريم : ان شاء الله يا خوي انت روح ارتاح
فهد بنبرة ضيق: راحتي ويا ساره .. ما بشوف الراحه الا وياها
الريم : ساكته

راح فهد غرفته

أما الريم راحت اتصلت في ساره

ساره كانت يالسه في الكرسي الهزاز وسرحانه ورن موبايلها وشلت الموبايل

ساره : الو
الريم : هلا بربيعتي وحبيبتي ساره
ساره ابتسمت ابتسامه رقيقه : هلا فيج يالريم يا الغاليه
الريم : شو قاعده تسوين يا ساره؟
ساره : ما قاعده اسوي شي ...ملانه
الريم : أقول ساره بقولج شي بس لا تضايقين
ساره : خير يالريم شو فيج
الريم : خير بويهج ..( بارتباك ) ابي اقولج شو سويتي عن سالفة فهد
ساره رفعت حاجبها وعصبت : أي سالفه ؟
الريم : طلب فهد الزواج منج
ساره : الريم فهد اللي طلب منج الاتصال صح ؟
الريم بتردد : هيه
ساره : شو قالج فهد يالريم ؟
الريم : فهد قالي اتصلي في ساره وقوليلها اذا هي موافقه انها تزوجني ولا لاء؟
ساره بغضب: والله هو يعرف اني ما اباه
الريم : هي يعرف بس فهد يموت فيج ويعرف ان الحب من طرف واحد وهو راضي بهالشي
ساره : واذا قلت اني ما ابيه وما ابي اتزوجه ؟
الريم : الصراحه يا ساره هو قالي اذا ساره رفضت قوليلها اني راح أحول حياتها الي جحيم واللي بتأذون أكثر شي هم (خافت الريم تقول وسكتت)
ساره بعصبيه : هم منو ؟
الريم تبلع ريجها : هم امج وخالد ..اغلى ناسج

ساره يوم سمعت امها وخالد حست ان شوي وبيغمى عليها

ساره بعصبيه والدموع بعيونها: وليش يعذبهم هم مالهم خص ..هذا فهد ليش جذي يسوي فيه (صاحت ساره بالحيل )
الريم : ساره فديج لا تصيحين
ساره : كيف ما تبيني اصيح يالريم اخوج معذبني يباني اتزوجه بغصب .. واذا ما تزوجته يبى يعذب اغلى ما املك اللي هم امي وخالد
الريم : يمكن هو قال هالكلام لانه معصب
ساره والدموع بعيونها : والله فهد يسويها ..لين الحين أتذكر يوم كان يبى يذبح خالد عند البحر ..
الريم ماتعرف كيف تهدي ساره : بس يا ساره لا تسوين في عمرج جذي
ساره بعصبيه شديده: والله يالريم اذا تزوجت فهد راح اخليه يتعذب اكثر والله لحول حياته الى جحيم راح يعرف ساره منو مثل ما هو بيحرمني من حب خالد راح اخليه يتعذب وبتشوفين وهو اللي بيطلب الانفصال بعدين
الريم مستغربه أول مره تشوف ساره تهدد لان ساره انسانه خلوقه وطيبه : ساره شو قصدج
ساره وهي تمسح دموعها : بتعرفين قصدي عدل مع الايام .. بس الحين كيف اواجه خالد وامه كيف كيف؟
الريم : شو رايج يا ساره نروح اليوم بيتهم وأول شي نتفاهم ويا نوره وبعدين ويا خالد
ساره : الله يعيني من خالد والله اذا عرف خالد اني بتزونج فهد واني رضيت فيه اكيد بيكرهني هو بيتوقع اني احب فهد وو مايعرف اني يمكن اتزوج من فهد بس بدافع الشفقه ولاني اخاف على خالد وعلى امي
الريم : الله كريم ..والله بيسهل علينا ..الحين يا ساره بخليج والمغرب تقريبا بنروح بيت خالتج اوكي
ساره والدموع بعيونها : الله يعيني على هاليوم
الريم: توكلي على الله
ساره بحقد : عمري ماراح اسامح فهد
الريم زعلانه من كلام ساره لان مهما كان هذا اخوها الوحيد بس تعرف ان ساره من حقها تعصب : اوكي ساره يالله مع السلامه
ساره بحزن: مع السلامه

صكت ساره من عند الريم وهي منهاره وحزينه
لان اليوم آخر يوم بقصتها وحبها مع خالد والسبب طبعا فهد

أما سالم فكان محتار هل يتزوج من هند لان يبى يفتك من حشرة امه
ولأن سالم يبى يلعب ويستانس ويغازل على كيف كيفه
وكان وياه ربيعه جاسم وهم كانو بالمطعم قاعدين يتغدون وجاسم مندمج بالأكل
أما سالم كان يفكر بسالفته

شاف جاسم سالم واستغرب من سكوته: بلاك سالم .. شو تفكر فيه
سالم رفع راسه وتم يشوف جاسم : ما بلاي شي .. بس قاعد أفكر
جاسم : شو تفكر فيه ؟
سالم : عن سالفتي ويا هند
جاسم : ليش شو صار
سالم : تعرف ان امي تباني اتزوج لاني البكر يعني اكبر عيالها وانا اعترف اني مب صغير عمري الحين 26 فهي دوم تلح علي بالزواج والاستقرار
جاسم : زين وشو المشكله
سالم : المشكله اني ما ابي اتزوج عشان ابي العب واستانس
جاسم وهو يفكر: ممممممممممممممممم ..زين اتزوج مثل ما قلت لك قبل (يفكر) شو اسمها
سالم : قصدك هند
جاسم : هيه هيه هند اتزوجها واستانس مثل ما تقول انها على نياتها وينقص عليها بسرعه ما شي يا سالم الا هالطريقه
سالم : هيه تراني افكر من الصبح بهالحل ..وافكر اني اتصل في هند عشان احدد اليوم االلي ايي واخطبها
جاسم وهو يضحك : يا سلام ..بتطلع معرس يعني
سالم : أي معرس .. هالزواج ما اعتبره زواج صدقي .. لاني ما اخترت الانسانه اللي حبيتها .. يعني لعب
جاسم : يالله الله كريم .. عيل اتصل فيها ..واكيد البنت بطير من الفرحه مسكينه بتتوقع انك تحبها ما تعرف ان هالزواج لعبه بالنسبه لك
سالم بخبث: ههههههههههههههههه طبعا لعبه

سالم كان تفكيره كله باللعب وياالبنات مب الزواج
عشان جذي فكر بالساذجه هند
وهند طبعا ساذجه لانها صغيره وبعدها بسن المراهقه

في بتكم نوره
كان الكل متيمع عشان الغده

كانت الام تجهز الاكل ونوره وياها
اما هند قاعده تنتظر الغدى ومعاها خالد
بعد ما الكل اتيمع على الطاوله الطعام

الام : يالله سمو باسم الله وكلو
هند وخالد ونوره : باسم الله
هند : اقول يمه
الام : خير يمه
هند : وين ابوي ابد ما نشوفه ولا تقولون عندي ابو
الام : ابوج تعرفينه كله مسافر ..لانه رجل اعمال ومصدر رزقه بهالسفر
نوره : بس ملل والله كله مسافر ..انتي ما تملين يا امي ان ريلج ما يكون عندج
الام : لا يا امي لاني اعرف ان هذا شغله وما اقدر اسوي شي وبعدين ابوكم ايي كل شهرين مره
خالد : وين يا امي يتم بس اسبوع ويروح
الام : بعد احسن من ولا شي
خالد : ولا اخاف ( يبتسم ) متزوج من هناك وانتي خبر خير
الام ترفع حاجبها : وي باسم الله على ريلي .. لا تفاول يا خالد
نوره وخالد وهند : ههههههههههههههههههههههه
نوره : وي خافت على ريلها
الام : طبعا اخاف عليه .. وانتي يا بنتي يوم بتزوجين بعد بتخافين على ريلج

نوره ويها احمر وسكتت

هند : ويييييييييييييييييييي شوفو ويهه نوره استوى احمر
خالد (يضحك) : ههههههههههههههه بلا ويهج تقولون عصير طماطه؟
هند : ههههههههههههههههههههههه
نوره معصبه : ايه عاد بسكم لا تحطون علي
خالد : زين زين خلاص ما بنزعلج مب عشان شي ..بس لانج بعد 3 اشهر ان شاء الله بتزوجين يا احلى اخت
هند تشوف اخوها من طرف عينها : ايه لو سمحت بلا غلط
خالد يصد لهند :ليش في شو غلطت يا انسه هند
هند تلعب في شعرها : لانك قلت انها احلى اخت .. وهالكلام غلط لاني انا احلى وحده فيكم ..وجمالي ورقتي محد يقدر ينافسهم
خالد : يالله يالله ..منو انتي احلانا .. لا غلطانه انتي صدق حليوه بس مب احلى من نوره
نوره مغمضه عيونها وبدلع : احم احم ..عندي محامي
هند انقهرت : لا حبيبي انا احلاكم اصلا زين
خالد : والله اتمنى يا هند ايي واحد ويخلصج من هالغرورو والكبرياء اللي عندج
هند : بالعكس بيزيدني حلا وغرور..لانه فخور انه اتزوج وحده مثلي
خالد : بنشوف
الام : بسكم ..انتو داشين حرب
نوره : هي والله اكثر اثنين يتضاربون هم هند وخالد
خالد : هاي اختج شايفه عمرها على فاضي
الام : زين يمكن تاكلون وانتو ساكتين
هند : انا بسكت عنك يا خالد لاني يوعانه
خالد : هئ هئ قصدج ما عندج رمسه

هند صاده صوب ثاني ومنقهره وساكته

نوره : خالد بسك عاد .. اسكت عنها
خالد : بسكت خلاص