,,اليوم اللي بعده..
,,,بغرفة أسيــــل...
,,,الساعه 6 المغرب...
كانت منى جالسه على كرسي الكمدينه وضامه يدها اليسار على بطنها وحاطه يدها اليمين على فمها ودموعها تنزل على خدودها غصبن عنها..
ولطيفة جالسه عالسرير ووجها أحمر وضامه بين إيدينها الثنتين أسيل اللي كانت منهاره تبكي وترتجف بطريقه غريبه وتتأوه..
لطيفة:يابنيتي بس حرام كذا تخرب حياتكم من غير سبب..
أسيل: مادري..مادري.. بس اللي أعرفه شي واحد إني ما أبيه.. مابيــــــــــه
طلقوني منه طلقــــــــــوني..
لطيفة: يابنيتي مابعد خلصتوا شهر واشلون تطلبين الطلاق؟؟
وبعدين الولد مسكين متعذب وتعبان وبيموت وترجعين طبيعيه مثل أول معه..
أسيل: جده تكفين ياجده تكفيــــــن..
إذا تحبيني لاترجعوني عنده .. تكفيـــن..
لطيفة: أسيل أناجدتك.. لاتخبين علي..
قوليلي..قد سار بينكم شي موبزين ... ولاقد شفتيه يشرب ولايتعاطى شي..
ولااعترف لك بشي.. ولاضايقك بشي.. ولامد يده..
أسيل:هذا اللي ذابحني..
إنه فحياته ماضايقني أو عاملني معامله سيئه..
بالعكس..يدور خاطري ويعاملني أحسن معامله..
بس ياجده غصبن عني.. غصبن عني..
موطايقته.. أحس إني لاشفته.. كني شايفه جني..
وإذا قرب مني أحس بجسمي زي نغزات الدبابيس.. وإحس الدنيا سوداء بعيني..
,,بعد ماقالت أسيل هالكلام.. طالعت لطيفه بمنى ورجعت طالعت بأسيل وقالتلها:
خلاص يا بنيتي.. إنتي الحين نامي وريحي..
وانشالله مايسير إلا كل خير..
أسيل وهي تطالع بجدتها برجاء:ها ياجده..بتطلقوني..خلاص بتطلقوني..
تكفين ياجده تكفييين..
لطيفه وقلبها بيتقطع:خلاص يا أسيل ..خلاص..إرتاحي وموبصاير إلا اللي تبينه..
,,وغطت لطيفه أسيل اللي حضنت مخدتها وتمددت على السرير..
لطيفه وهي تقوم: منى.. نادي عبدالرحمن وتعالي إنتي وياه غرفتي أبيكم..
,,,,
,,,,
,,بغرفة لطيفه..
بعد مادخل عبدالرحمن وزوجته وجلسوا قبال لطيفه..
لطيفه: شوف ياعبدالرحمن..
الحاله اللي أسيل فيها.. ماتفسر إلا بشي واحد..
أسيل فيها عيون قويه.. فرقت بينها وبين زوجها..
منى وهي مي مستوعبه: عيـــــن؟؟ لامومعقول..
لطيفه: وليه مومعقول.. العين حق..
والرسول عليه الصلاة والسلام قال(نصف قبوركم من عيونكم)
ولاتنسون يوم زواجها البنت وشطلعت.. ملكة جمال..
والكل يوم شافها يتهول من جمالها وزينها.. والعيشه اللي بتعيشها..
وأسيل من يوم هي بزر وهي عايشه عيشة ملوك..
وتزوجت واحد كل بنات الناس يتمنونه..
وكل هذا وتقولين يامنى مومعقول..
البنت ماتشكي من شي بجسمها صحتها سليمه ويوم قعدت معنا هاليومين استردت عافيتها وسارت تاكل وتسولف وتضحك..
وبس تجي سيرة رجلها تختبص وتتكدر..
عبدالرحمن بألم: طب شالسواه يمه.؟؟
لطيفه: من بكره ناخذها ونوديها عند شيخ يقرأ عليها..
ويشوف البنت وشفيها بالضبط..
إن وديناها عند الشيخ وقال إنه مافيها شي ..اعرفوا إن بنتكم تتدلع..
لكن إن وديناها وشافها وقال البنت فيها شي..
خلاص نستمر نوديها عند الشيخ إلين الله يكتبلها الشفاء..
عبدالرحمن:إنا لله .. لاحول ولاقوة إلا بالله..
لطيفه: وضروري زوجها يدري..
**
**
**
,,اليوم اللي بعده..
,,بغرفة أسماء..
,,باب الغرفه يدق..
أسماء: ميــــن؟؟
رهف: أنا رهف..
أسماء: تعالي عمه رهف .. ادخلي..
رهف: لايكون ازعجتك؟؟
أسماء: لاوالله.. بالعكس طفشانه..
أسيل راحت مع جدتي وأبوي... مادري وين راحوا..
وفيصل جالس مع عمي ميشو وعمي تركي ...
وعمتي دينا وعمتي إيمان جالسين مع أمي.. في غرفة الجلوس.. وسوالفهم عن الحمل والولاده..
طفشت وطلعت غرفتي وقعدت عالنت..
رهف: أسماء حبيبي ممكن طلب..
أسماء: إنتي تامرين يارهف؟؟
رهف:شوفي أسماء.. تعرفين أغنية عبدالمجيد.. حقك علي؟؟
أسماء: ياقدمك ياعمه..
رهف وهي تضحك: داريه إنها قديمه..تعرفين كلماتها..
أسماء: لاوالله ماعرفها كلها..
رهف: طب شوفي أبيك تحملينها من النت.. أوكي..
أسماء وهي موفاهمه شي:أوكي..
رهف: وخذي صور مشاري هذي..
أسماء وهي تمسك الصور: طيب..
رهف: أبيك تدخلينها عالبور بوينت وتسوين فيها حركات..
أسماء: حركااات؟؟
رهف: شوفي أسماء حبيبي أبيك تحطين كل صوره من صور مشاري بشريحه وبعدين تحطين خلفيات غير أو مثلآ تدخلين صورغير... يعني تحطين قلوب ولاقمر ولاأوراق ورود وشجر.. ولا شلال..وتدخلينها على الصور..
يعني تبدعين بكل صوره.. وبعدين تحطين أغنية عبدالمجيد هذي تشتغل طول الوقت بالعرض كله.. وطول ما الصور تنعرض أبيك تعرضين كلمات الأغنية بشكل كتابي تدخل بالشرائح بطريقه حلوه..
بعدين إحفظيه في سيدي وعطينياه..
أسماء: ليه تبين تسوين ندوه عن مشاري؟؟
رهف وهي تضحك:أسماء أي ندوه..
أسماء: أنا أدري عنك؟؟وشوله كل هالشغل..
رهف:بصراحه مشاري سمعني هالأغنيه.. وهالمره من جد حسيتها غير..
وأبي هالسي دي أهديه لمشاري..
ها أسومتي تسوينه لي..
أسماء: أمممم أفكر..
رهف: لاأسماء تكفين..طلبتـــــــك..
أسماء: البلشه إني ما أقدر أرفضلك طلب..
خلاص تعاليني اليوم الساعه 12 الليل.. تلقينه جاهز..
شغلته سهله ما يبيلها...
رهف: ياعمري يا أسماء.. خلاص الساعه 12 بجيك وأشوف إبداعات أناملك الذهبيه..
,,,,
,,,,
,,في غرفة الجلوس..
جوال منى يدق..
منى بقلق: هلاعبدالرحمن..
عبدالرحمن:منى.. تعالي لحالك الحوش بسرعه..ونادي فيصل معك بس..
منى:طيب..
,,دقت منى على جوال فيصل وخذته وراحوا بسرعه للحوش وقعدوا على كراسي الحديقه وشوي ولاسيارة عبدالرحمن تدخل حوش البيت وتوقف..وينزل منها عبدالرحمن وهومتضايق.. ويروح يفتح باب السيارة الخلفي..
أول ماشافتهم منى نطت بسرعه هي وفيصل وراحوا عند السياره..
لما فتح عبدالرحمن باب السياره كانت لطيفه جالسه وأسيل نايمه بحضنها ووجهها أحمر وفمها شبه مفتوح..
أول ماشافت منى الوضع خافت وقالت:
بنتـــــي..
فيصل بخوف: أسيـــــل..
عبدالرحمن وهو يحاول يتماسك: أووصصصصص..
ولاكلمة.. لاحد يسمع حسكم.. مانادينك إنتي وولدك عشان تصرخون..
فيصل: يبه أسيل اشفيها..
لطيفه وصوتها تعبان: ياولدي تعال عاون أبوك وشيل إختك..
,,شال فيصل أسيل من جهه.. وعبدالرحمن من جهه وطلعوها فوق غرفتها ونوموها على سريرها..
,,فيصل بعد ماحط أسيل عالسرير وهويتنفس بصعوبه: يبه أسيل اشفيها..
منى ويدها ماشالتها من على قلبها: عبدالرحمن البنت وشفيها..
لطيفه: تعالوا غرفتي .. خلنا نطلع من عند البنت لانزعجها..
منى: اول شي تكلموا أسيل اشفيها؟؟
فيصل وهويهدي أمه: يمه تعالي نروح مع جدتي غرفتها ونعرف كل شي..
,,,
,,,
في غرفة لطيفه..
منى: عمه.. عبدالرحمن تكلموا أسيل اشفيها؟؟
عبدالرحمن: وشفيها.. وش اللي مافيها..
بس جلست عالكنبه.. وقرى عليها الشيخ..
صابتها حالة بكاء شديده.. وبعدين جلست تصرخ وتتأوه إلين أغمى عليها..
منى وهي تبكي: ياويلي على بنتي..
لطيفه: وبعد ماقامت من إغماءتها جلس الشيخ يحاول فيها ويقولها.. إنتي شفتي أحد معين يوم أغمى عليك..
ماردت عليه ومستمره تبكي.. آخر شي الشيخ قالنا نستمر نجي نقرى عليها عنده..
وانتي وابوها تقرون عليها بالبيت..
وعطانا مويه مقري فيها... وزيت..
ونصحنا.. نخليها تبتعد هالأيام عن زوجها..
فيصل وهومقهور على أخته: حسبي الله على هالناس..
مايربحون أحد.. نتكلف ونعزم ونوجب ونقدر.. وآخر شي حتى الله مايذكرونه لاشافوا شي عجبهم..
منى وهي تبكي:ياربي شالسواااه..
لطيفه: سواة الله أبرك.. إحنا نسوي اللي نصحنا به الشيخ..
ونخلي زوجها على بينه.. والخيره فيما اختاره الله..
عبدالرحمن بلهجة عتاب: كله منك.. الظاهر لاإنتي ولاأمي..نبهتوها تقرا على نفسها يوم زواجها.. وهذي النتيجه..
منى وهي تبكي:والله ياعبدالرحمن إني قاريه عليها بنفسي.. بس مادري..مادري..
لطيفه: هذا مو وقت لوم.. خلاص هذا قدر الله ولا اعتراض على حكمه..
,,,,,
,,,,,
في غرفة أسمــاء..
,,الساعه 12,30 الليل..
رهف: الله يا أسمـــــــاء... تسلم إيديك..
أسماء: عجبك يارهف؟؟
رهف: يجنن.. الله يعطيك العافيه..
بس لو تزيدين شي بسيط..
أسماء: وش أزيد؟؟
رهف:أبيك تزيدين شريحه بالأخير.. وتحطين فيها..كلمه أخيره..
وبس هااه بخلي هالسي دي أمانه عندك إلين أولد وأجيب لمشاري هديه وأحط هالسي دي مع هالهديه..
أسماء: هيه إنتي يا الدلخه..
ترى الزوج إذا ولدت زوجته هو اللي يجيب لها هديه موب هي اللي تجيبله..
رهف وهي تضحك:داريه..
بس مشاري لو أهديه كنوز الدنيا ماتعبر له عن حبي..
أسماء وهي تكبس عيونها:مايمديني على هالحب..
يللاه إخلصي قوليلي كلمتك الأخيره عشان أزينه قدامك..
***
****
*****
[[بعد مرور أسبوع]]
(في بيت أبوصالح..)
أثير: أبرار.. لاتسيرين غبيه.. قولي لصالح..يمكن ينتهي الموضوع..
ترى زواجك بعد يومين يا أبرار..
أبرار وهي تتكلم بطرقه غريبه:لاتقولين زواجك.. قولي دفنك..
أثير وهي تبكي:أبراار.. اشفيك انتي..
بس سرحانه...ومفهيه .. هيــــه.. صحصحي...
يا أبرار.. طب كلمي فراس.. كلميه..
كل يوم يدق عالثابت يدورك يبي يكلمك وانتي تصرفينه..
ليه ماتحاولين تفهمينه الموضوع.. ليـــــه..
أبرار: مايهمني..
أثير: وش اللي مايهمك... والفضيحه... وسمعتنا..
أبرار وعيونها مليانه دموع وتناظر لأثير بكل حقد: إيه قوليها من أول إنتي خايفه على سمعتك ومستقبلك.. موخايفه علي..
أثير: كذا يا أبرار.. كذا...
هذي آخرتها.. طول الوقت منشغل بالي وأفكر فيك.. وشايله همك..
لا آكل ولاأشرب ولاأذاكر زي الناس.. وآخرشي تقوليلي هالحكي..
أبرار: خلاص تعبت..
التفكير ذبحني.. والوساوس قيدتني..
أحس تفكيري إنشل... أنا بتزوج بفراس واللي يسير .. يسير..
مافي يدي حيله.. خلاااااص..
,,وتقوم أبرار وتدخل الحمام.. وتخلي أثير منهاره عالسرير..ومستغربه من حالة البرود واللا مبالاه اللي سارت فيها إختها,..
***
****
*****
(في بيت أم عبدالرحمن...)
,,في غرفة منى..
,,,الساعه 11,30 الليل..
رهف وهي مصدومه: لامومعقوول..
منى وهي تبكي: شسوي يارهف ..شسوي..
أحس نفسي بموت من الحسره على بنتي..
رهف ودموعها تنزل: لاحول ولاقوة إلا بالله..
لاتجيبين سيرة الموت يامنى بسم الله عليك..إنشالله حالتها بتتحسن وتطيب..
منى: إشلون حالتها تتحسن وتطيب..
كل يوم البنت حالتها أسوأ من اليوم اللي قبله..
وزوجها هالضعيف المسكين ساكت وصابر.. أهله بغوا يزورونها ..لكنه هوتعذرهم وصرفهم..
وأخذ إجازه من دوامه عشان يكون معها.. ويتابع حالتها..
وياليت هالشي يحنن قلبها..
أمس معاذ جى عندنا وهو ميت على شوفتها..جلس يترجانا إنه يشوفها..
واحنا كلنا عارفين إنه لوتشوفه بيسير شي ماحد يتمناه..
أخذني أبوها بالصاله وقالي يامنى روحي ناديها وقوليلها أبوك يبيك بالمجلس..
ولاتقولينلها إن معاذ موجود..
طلعت عندها فوق وقلتلها نفس الكلام اللي قاله عبدالرحمن..
تخيلي يارهف..[بكاء منى يزداد]..نزلت وهي ماعندها علم بوجوده.. بس شافته صرخت وطاحت على وجهها وأغمى عليها..
رهف وهي تبكي:حسبي الله ونعم الوكيــل ..
مادري هالناس.. وشيضرهم لاقالوا ماشالله وذكروا الله...
منى: شوفي يارهف..
أنا ماهمني زواج أسيل يستمر.. وتتحسن علاقتها بمعاذ..
أنا يهمني شي واحد.. بنتي تقوم سليمه وترجع مثل أول ..
رهف: منى اذكري الله واهدي..
منى: وش أهدأ.. وش أهدأ يارهف البنت سايره مثل الصوماليين..
نحيفه بتنقسم من وسطها من كثر النحف.. ووجهها أصفر..
حتى عيونها ماسارت تفتحهم زي الناس..
وياهي في حالة كآبه وحزن.. أو حالة ضحك وهستيريا..
رهف أنا مابي بنتي تفقد عقلها.. أنا أبيها ترجع سليمه مثل أول..
والزواج قسمه ونصيب..
وترى هالحاله اللي هي فيها ما أثرت عليها وبس.. مأثره علينا كلنا..
أبوها وفيصل وأسماء... ومعاذ اللي مايمر يوم إلا وهو يكلمني بكل رجاء على أمل إنه يسمع إنه في تحسن بسيط بحالة أسيل..
وهذي أسابيع تمر وأسيل على حالها..
,,طالعت رهف بحزن لمنى وحضنتها بين إيدينها..
وحاولت فيها تهديها...إلين هدت..
وبعدين نزلت للدور الأرضي بكل ألم وقهر على حال أسيل ودخلت لغرفة مشاري الجديده..
,,,,,
,,,,,
بغرفة مشاري..
مشاري بعتب: يا رهف وين رحتي وخليتيني..
رهف وهي تحاول تخبي: معليش يامشاري..طلعت فوق غرفتنا وانشغلت ارتب أغراض فيها شوي..
مشاري وهويمسك يد رهف:والله اشتقت لغرفتنا اللي فوق..
رهف وهي تبتسم: بس للغرفه..
مشاري وهو يغمز: وللمغامرات اللي تسير بالغرفه..
,,,,,رهف تضحك...
مشاري: بس انشالله لافكيت هالجبس ورجعت أمشي... أول شي أسويه أشيل كل شي موجود بالغرفه.. ولا أخلي إلا السريسر..
رهف وهي تبتسم: لاواللـــه..
مشاري: بشيل هالكنبه اللي إنتي مستقويه فيها..
وحتى الزوليات الصغار بشيلهم.. وحتى كرسي الكمدينه بشيله..
رهف: وليــه هذا كله؟؟
مشاري: عشان مايسير في مجال تنامين لحالك..
رهف: لحظه..لحظه.. نسيت إنه في بيبي في الطريق؟؟
ويبيله هالبيبي سرير لحاله..
مشاري: إي والله ذكرتيني..
بس تصدقين عندي حل فظيـــــع..
رهف: عرفت وشو حلك ينام بالوسط صح..
مشاري وهويقلد طريقة رهف بالحكي: لآء ختــأ.. [قصده خطأ]
رهف وهي تضحك: أجل وشو حلك..
مشاري: لاخلصتي الأربعين.. إحذفيه عند أمي..
يسير ينام ويقوم عندها..
إلين يكبر ويسير عمره أربع سنين ونجهز له غرفه لحاله..
رهف: حلوه ذي..
إحنا نجيب بزارين ونبلش خلق الله فيهم.. لاوالله ولدي ماينام بعيد عني شبر..
مشاري وهو يغمض عيونه: بشرك الله بالخير..
,,ابتسمت رهف من طريقة حكي مشاري ومزحه معها..
لكنها تذكرت وضع أسيل ومشكلتها.. ورجعت تنهدت ونزلت راسها تحت..
مشاري: رهف.. إشفيك؟؟
رهف: هااه.. ولاشي حبيبي..
مشاري: الظاهر إني ثقلت عليك يارهف..
إنتي ماقصرتي استحملتيني بمافيه الكفايه من يوم ماطلعت من المستشفى..
رهف: إخس عليك.. إنت تثقل علي..
إنت روحي يا مشاري.. أحد يتضايق من روحه..
مشاري: طب ليش مهمومه.. وعيونك حزينه..
رهف: لاني مهمومه ولاشي..
[وتمد رهف يدها وتلعب بشعر مشاري وبعدين قالت]
مشاري إشرايك تتسبح..
مشاري: لاتقولين شعرك مدهن..خليني بحالي..
مع هالجبس وهالغرز..سرت أكره شي إسمه تسبيح ومويه..
رهف: مشاري تكفى والله شعرك مدهن..
وبعدين ياخي صدق إنك دلوع.. من يوم سارلك الحادث إذا جيت تتسبح ..
أنا أدخل معك ورجلي على رجلك.. ولامره جت مويه عالجبس ولا تأذيت..
مشاري: دامك مصممه كيفك إنتي حره..
أنا إشعلي كل التعب عليك.. إنتي اللي بتشيلين وتحطين وتسبحين..
رهف:مو مشكله..
بس إسمع كل ملابسك وشورتاتك اللي هنا خفيفه..بطلع فوق أجيبلك بجامه ثقيله عشان ماتبرد من المكيف بعد التسبيحه..
مشاري: خلاص أنا استناك..
,,,وتطلع رهف غرفتها فوق عشان تجيب لمشاري بجامته..
وعلى دخلتها كان جوالها يدق..
لما شافت رهف الرقم إنصدمت وقالت بنفسها مو معقول..
رهف: ألـــو..
أثير: ألـــو.. رهف..
رهف بلهفه:هلا أثير.. هلا حبيبتي..
,,بس سمعت أثير صوت رهف ماقدرت تستحمل وجلست تصيح..
رهف:أثير حبيبتي كيفك..
أثير وهي تحاول تبطل بكي: حمدالله زينه..
إنتي كيفك.. بشري ولدتي؟؟
رهف: أنا زينه وللحين ماولدت..
,,تبلع ريقها بألم,,, هااه بشري كيف العروس..
أثير بمراره: طيبه ماعليها..
رهف: هامستعدين للزواج..
أثير بدون نفس: عادي..
رهف: الله يوفقها عقبالك يا أثير..
,,,أثير ماترد وساكته..
رهف: أثير في شي.. أنا ملاحظه صوتك متغير ومو زين..
,,هنا أثير ماقدرت تمسك نفسها وانهارت تبكي..
رهف بخوف: أثيـــــر..إشفيك تبكين؟؟
تكلمي إشفيك.. أبوي سايرله شي.. أمي منيره فيها شي..
أثيـــــــر وقفتي قلبي تكلمي..
أثير بحزن: رهف شقولك.. شقـــــولك؟؟
رهف: أثير تكفين ارحميني وتكلمي.. وشصاير ليه تبكين؟؟
,, بعد صمت دام شهور حست أثير إنها موقادره تكتم فنفسها أكثر من كذا وقالت لرهف كل شي..
رهف وهي مصدومه: أثير.. إنتي تتكلمين من جد؟؟
أثير: وهذا كلام ينمزح فيه يارهف..
رهف: وبكره الزواج جايه تقوليلي هالكلام...ليه ماقلتي من قبل؟؟
أثير: شقولك أقولك عن سوااد الوجه..
رهف: أثير.. ليه ماتكلمتي وقلتيلي من قبل ..
كان أنا كلمت صالح وفهمته.. ومنعنا هالزواج إنه يتم..
أثير: رهف تبين تقولين لصالح ... عشان يذبح أبرار ويذبح نفسه بعدها..
رهف وهي تحط يدها على خدها بكل صدمه: الله يصلحك يا أبرار الله يصلحك..
ياما نصحتها بس مافاد..
أثير:أنا لوماقلتلك وفضفضتلك كنت بموت..
تكفين يا رهف تكفين إدعي إن الله يستر.. إدعي إن الموضوع ينتهي على خير..
رهف بلحظة يأس: على خيـــر؟؟
أثير بلهجة خوف: رهف.. أنا الحين بقفل أسمع أمي تناديني..
بقفل قبل ماتشوفني وتسويلي سالفه..
رهف: أثير كلميني بعد زواج أبرار.. وطمنيني..
,,أثير ماردت وسكرت السماعه..
,,,,رمت رهف الجوال عالسرير وحطت راسها بين إيدينها وهي مصدومه وحاسه راسها بينفجر..
رهف: ياربي اشهالمصايب... اشهالمصايب..
وشهاليوم الزفت...
جاني خبر مرض أسيل.. والحين خبر مصيبة أبرار..
يا الله ليش يسير فيهم كذا.. ليـــــه..
,, وجلست رهف تبكي وتبكي.. وبعدين تذكرت مشاري إنه يستناها عشان تساعده إنه يتسبح..
وقامت بسرعه وغسلت وجهها وخذت لمشاري بجامه ونزلت تحت بسرعه..
,,,
,,,
,,بغرفة مشاري..
مشاري: تأخــــرتي..
رهف وهي تكابر: معليش يامشاري..
,,,مدت يدها رهف وحطتها حولين خصر مشاري ,,,
رهف: يللاه قوم..
,,وقف مشاري وتسند على عكازاته الثنتين.. بعد ما أخذ فترة عشان يتدرب على المشي على هالعكازات,,,
ودخل مشاري الحمام مع رهف وتسبح بمساعدة رهف..
وطول الوقت وهوملاحظ الكآبه والحزن على وجه رهف..
,,بعد ماخلص مشاري تسبيح.. وقف على عكازاته عشان يطلع من الحمام..
ورهف كانت واقفه وراه وماسكه بيدها ملابسه اللي كانت عليه..
لكن للأسف مشاري وهو يمشي إختل توازنه وزلق وكان يبي يطيح على جنب لكن رهف بسرعه مسكته بين إيدينها ولحقت عليه قبل لايطيح..
رهف: مشـــاري بسم الله عليك..
مشاري وهويرجع يقوم على عكازاته ويطالع لرهف بكل قهر:
رهف.. إشفيك انهبلتي..
رهف وهي مستغربه: إشفيك عصبت.. وشسويت؟؟
مشاري:الحين تبين تلحقين علي قبل ما أطيح تقومين تسنديني بكرشتك.. نسيتي إنك حامل وهاللي داخلك إنسان..
رهف وهي تتنفس بسرعه: أجل تبيني أخليك تطيح..
مشاري: الله لايردني... أجل تذبحين عمرك وولدك عشاني..
رهف وهي تفتح باب الحمام: ماصار إلا الخير..الحين إنت إطلع والبس بجامتك..
إلين أجهزلك أدويتك عشان تشربها..
,,,وطلعت رهف وتركت مشاري يمشي بهدوء وهو مقهور من رهف إشلون مستهينه بصحتها وصحة الولد.. ومستعده تسوي أي شي عشانه حتى لوهالشي يضرها.. وبنفس الوقت مستغرب من نفسية رهف وضيقة الصدر اللي مسيطره عليها.. وسرحانها والحزن اللي مغطي وجهها...
,,,,,
,,,,,
***
***
,,,بغرفة مشاري الساعه 1 الظهر..
,,فتح عيونه مشاري بتثاقل والتفت حاولينه ومالقى جنبه إلا أمه..
لطيفه: صح النوم ياولدي..
مشاري وهو يفرك رقبته:...هلا يمه..
لطيفه: يللاه قوم وأنا أمك غسل وتوظى عشان تصلي وتجي تفطر..
أساعدك؟؟
مشاري: لايمه ارتاحي ... وين رهف؟؟
لطيفه:قامت من الساعه 11 وقعدت معي..وشكلها تعبانه وطلعت تريح فوق شوي..
مشاري وهويتذكر طيحته عليها: الله يهديها..
لطيفه: الظاهر إنه ضايق صدرها..لأنه اليوم زواج إختها..
مشاري: بتروحين يمه؟؟
لطيفه:لاوالله ياولدي..مالي نفس.. إنت تعبان.. وأسيـــ... [وتسكت لطيفه وتتذكر إن مشاري مايدري عن حالة أسيل]
مشاري: وإيش يمه.. أسيل إشفيها؟؟
لطيفه:أسيل...آآآ أسيل مافيها شي..
بس لامارح أروح ولامكان.. وإنت يللاه قوم عشان تصلي وأجيبلك فطورك..
,,,وتقوم لطيفه للمطبخ ومشاري يناظر فيها باستغراب..
بعد كذا قام مشاري وراح توضى وصلى وبعد ماخلص جلس على طرف السرير..
أخذ جواله ودق على أعز أصدقائه..
طارق:هلا والله..
مشاري: هلاطارق كيفك حبيبي؟؟
طارق:بخير يالغالي.. إنت بشرني عنك؟؟
مشاري: والله الحمدالله.. ياخي وينك إنت وعزام ماعد تنشافون..
طارق:مشاري الله يهديك تونا قبل أمس عندك..وبعدين ياخي فشله كل يومين واحنا عندك..
مشاري:ياطارق وشهالحكي.. إنتم إخواني..
طارق: الله يحفظك يامشاري ويخليك لنا..
مشاري:طارق عندك رقم الشيخ هذاك اللي يفسر الأحلام؟؟
طارق: أي واحد؟؟
مشاري: هذاك اللي دقينا عليه واحنا بالجامعه عشان يفسر حلم عزام..
طارق: آآآه.... إيه إيه عندي..
مشاري:الله لا يهينك إرسله لي أبيه..
طارق:خلاص برسله لك بطاقة أعمال..ليه تبي يفسرلك حلم..
مشاري:حمدالله أكيد..أجل يغنيلي..
طارق: أقول مشاري يا إبني..قولي حلمك وأنا أفسرلك..
مشاري:طارق إخلــــص..
طارق:إنا لله ماينمزح معك.. خلاص برسله لك الحين..
,,أنهى مشاري المكالمه وسرح وهو يناظر في الأرض..
مشاري: يا الله...ياترى إشتفسير هالحلم..هذي ثاني مره أحلم فيه..
معقول تفسيره شين.. الحلم أصلآ يخوف وشكل رهف في الحلم موزين..
لايكون في شي موزين بهالبنيه.. وأنا ما أدري..
لازم أفسره اليوم قبل بكره..لازم..
,,دخلت لطيفه وجابت فطور مشاري وأثناء ماهو ياكل وصلت بطاقة الأعمال..
وبعد ما أنهى مشاري فطوره قال:
يمه خلاص الحمدالله..
لطيفه وهي تشيل الصينيه: تبيني أصحيلك رهف..
مشاري:لاخليها ترتاح وإذا بغيتها بدق على جوالها وأناديها..
,,بعدماطلعت لطيفه فتح مشاري جواله وعلى طول دق على الرقم ومن حسن حظه إنه الشيخ رد عليه وماصرف كعادة الشيوخ اللي يفسرون الأحلام..
مشاري:السلام عليكم..
الشيخ: عليكم السلام..
مشاري:ياشيخ الله يجزاك خير أنا حلمت حلم.. وأبيك تفسرلياه..
الشيخ:من حسن حظك إني اليوم عندي إجازه من شغلي ومرتاح بالبيت..
تفضل ياولدي..قول حلمك..
مشاري:ياشيخ هذي ثاني مره أحلم فيها نفس الحلم..
والحلم هو إن زوجتي وجهها تعبان وشايله على ظهرها خيشتين.. كل خيشه أكبر من الثانيه وباين على هالخيشتين إنهم ثقيلات بالمره..
وجيت عندها وقلتلها خليني أساعدك..قالتلي لأ..ما أقدر..
وبعدين قلتلها طب نزليهم وخليهم عالأرض مولازم تشيلينهم..قالتلي..لأ..ما أقدرأنزلهم..
الشيخ:إيــــــه.. أجل هالحلم تكرر مرتين..
مشاري:إيه ياشيخ..
الشيخ:طب يوم حلمت هالحلم علاقتك مع زوجتك كويسه..
مشاري:أول مره حلمت بهالحلم..كانت علاقتي فيها سيئه..كنت ماأكلمها..
لكن ثاني مره ..عادي علاقتي فيها من أحسن مايكون..
الشيخ: لاحول ولاقوة إلا بالله..طيب علاقتها مع أهلها..
مشاري: بصراحه ياشيخ أهلها مقاطعينها..
الشيخ:لاحول ولاقوة إلا بالله..
مشاري:بس هي مالها ذنب..هم اللي غلطانين عليها وقاطعوها..
الشيخ:بسألك بصراحه وجاوبني ياولدي..إنت تحبها؟؟
,,مشاري دنق وغمض عيونه بألم وتنهد وقال: مادري..
الشيخ: إشلون ماتدري..أنت تحبها؟؟
مشاري: اللي أعرفه إني ما أستغني عنها ووجودها قدام عيني ضروري..
الشيخ:شوف ياولدي..
زوجتك إنسانه كامله بجميع المقاييس.. وإنسانه كفؤ وقد المسؤوليه..
والخيشتين اللي على ظهرها.. أول خيشه هي أنـت..
مشاري باستغراب: أنــــا؟؟
الشيخ: وثاني خيشه أهلها..
هي تحبكم وتقدركم ومخلصه لكم.. وماشافت منكم ياهالطرفين أي مقابل..واللي باين بالحلم إنكم مكافئينها بالجحود والقسوه..
ومسببين لها ألم وحزن في حياتها...
بس موقادره تكرهكم او تتركم والدليل إنها مي راضيه تستغني عنكم وتشيلكم من على ظهرها أو تنزلكم عالأرض..
,,سكت مشاري وهومتنح وعاقد حواجبه وعيونه مليانه دموع..
الشيخ: شوف ياولدي..أنا فسرتلك حلمك واللي علي سويته..
لكني أبي أريح ضميري وأذكرك بتقوى الله ومخافته في زوجتك..
مهما كان هي ضعيفه ومحتاجتك..وتحبك.. فلاتكون في حياتها مجرد حزن وألم..
مشاري وهويالله يالله يحكي: يعطيك العافيه ياشيخ ماقصرت..
الشيخ:الله يعافيك..
,,وأنهى مشاري المكالمه وهومصدوم وكاره نفسه..
مشاري: أنا مسببلك يارهف ألم.. أناجاحد وقاسي؟؟؟
كل ملامح التعب وكل هالثقل اللي على ظهرك أنا سببه؟؟
ياربي والله إني أجاهد عشان أريحك يارهف وما أضايقك..
يارب سامحني..على كل اللي سويته برهف..يارب سامحنـــــــي..
,,شوي ولارهف تفتح الباب بهدوء وتناظر لمشاري وتبتسم..
رهف: الســــــلام عليكم..
مشاري وصوته مبحوح: عليكم السلام..
,,ويأشر مشاري بيده جنبه وتجي رهف تجلس بهدوء..
رهف وهي مبتسمه: كيفك؟؟
مشاري وعيونه مانزلت عن عيون رهف: أنا زين..
,,ويحط يده على بطن رهف ويقول: لكن إنتي وجهك تعبان.. الظاهر مهبل فيك هالولد..
رهف:يعني..بس أحس بتقلصات خفيفه..
مشاري: تبين أمي توديك المستشفى؟؟
رهف: لالالا..مايحتاج.. كالعاده بتخف وتروح..
مشاري:رهف..قررت قرار وأبيك تعطيني رايك؟؟
رهف:وشو قرارك؟؟
مشاري: إذا ولدتي إنشالله وقمتي بالسلامه..
أباخذك إنتي والبيبي ونسافر شهر عسل..
رهف:ههههههه حلوه ذي شهر عسل.. مشاري ترى خلاص بنخلص سنه واحنا متزوجين.. بعدين نسيت شهر العسل اللي بجده..
مشاري وهومكشر: بالله تسمين هذاك شهر عسل..
كله مهاوشات.. وطول الوقت أنا عالنت وانتي نايمه..
رهف:لاواللـــــه.. الحين أنا اللي سرت نايمه.. لو إنت معطيني وجه كان مارحت نمت..
,,,,مشاري يضحك..
رهف: بس ولو يا مشاري.. يمكن ماتصدقني..
والله إنها أحلى أيام مرت علي بحياتي.. لأنها جمعتني فيك..
,,ناظر مشاري برهف وقال:
سبحان اللي يغير ولايتغير..من يصدق إحساسي هذيك الأيام يتغير وينقلب 360 درجه.. لهالإحساس اللي لك بقلبي الحين..
رهف: وأنا من هذيك الأيام إلى آخر يوم بعمري وأنا إحساسي لك مايتغير ولايتبدل..
بالعكس إنت سرت كل أحاسيسي ومشاعري وسرت دنيتي كلها..
مشاري: طيب يللاه إختاري.. وين تبين تسافرين؟؟
رهف: أممممممم..جده..
مشاري بعصبيه: ما أقول إلا ياليت هالجبس اللي بفخذي بيدي..
رهف وهي تضحك: ليــــه؟؟
مشاري: عشان أرقعك على خشمك..
من جدك إنتي.. تبينا نروح جده..
رهف:هههههههه خلاص إنت كيفك إختار اللي تبي وين مارحت أنا معك..
مشاري:إشرايك نروح بلجيكا.. وبعدين نروح على أسبانيا..
تكون أسيل هي وزوجها هناك...نزورهم ونقعد معهم يومين وبعدها نكمل رحلتنا وين مابغينا..
,,ابتسمت رهف بألم وعورها قلبها لما ذكر مشاري إسم أسيل وقالت بنفسها:
إنشالله الله يشفيها وترجع مع زوجها يارب..
مشاري: ها اشقلتي؟؟
رهف:إنت بالأول فك هالجبس..
وخلني أولد.. ولاقمنا إحنا ثنيناتنا بالسلامه يسير خير..
***
****