يالله يا مـن لـه العربـان يرجـون
ياحي يا والي علـى العـال والـدونْ
يا عالما سـري ومـا كـان مكنـونْ
يا مخرج المـا مـن سحـاب ثقّـال
يا خالـق الكونيـن يـا حـي باقـي
يا اللي خلقت العرش سبعـا طباقـي
فيه القمر والشمـس تشعـق شعـاق
والنجـم ثاقـب فـي ليـال طــول
يا من خلقت لما على مـزن سبّـاح
يسيـر مـن دارالــى دار نـفّـاح
مالـه جنـاح الا تمشيـه الاريــاح
فـوح العوالـي والصّبـا والشمـال
يا من خلقت الارض واجريت الانهـار
خلقتهـا وانـت علـى الامـر قـدارْ
واخرجت منها رزق من كـل الاثمـار
كرامـة للعبـد مـن كــل حــال
يا من خلقت آدم من الطيـن واحيـاه
بنيت جسمـه ليـن سويـت مبنـاه
وزرعت روحه بيـن دمّـه ولحمـاه
جلّيـت فـي قدرتـك يـا ذا الجـلال
وخلقت حوّا حالْ مـن جسـم حالـه
خلقتهـا واخرجتهـا مـن شمـالـه
وجعلتهـا زوجـة وحللتـهـا لــه
جمعـت مـا بيناتـهـم بالـحـلال
واخرجت منهم ناس خلقٍ بعد خلـق
ذريتهم في الارض من غرب الى شرق
الاصل واحد والنسـب بينهـم فـرق
والكل عـن شرعـه ودربـه بسـالِ
يا اللي خلقت الحوت في بحر ظلمات
محبوس في الغبة وله رزق ما فـات
من حيث ما يمسي ومن حيث ما بات
يلقـى نصيبـه جـوف مــاءٍ زلالِ
يـا رازق الاوحـاش فـارضٍ خليّـه
لا مــال يغنيـهـا ولا مملـكـيّـه
ولا درت بالـرزق فـي ايـات نيّـه
رزقتهـا وانتـه علـى الكـل والـي
هذا ويا راكب على وسـق منسـوب
حرّ ليا ما حثّـه الصـوت مرعـوب
يشدي لصقر خيل الصيد في الجـوب
لـم جنحاتـه والضَّـرَم بالعـجـالِ
والا يشـادي مركبـا هبـه الـفـوجْ
مدوا شراعه وانعدل مـا مشـى روجْ
ماتاه في الغبـة ولا صكـه المـوج
اسرع مـن البـرّاق فـي الاعتـدالِ
حـرٍّ منـسّـب وافـيـات عــدوده
تسعة جـدود اللـي حسبنـا جـدوده
مربـاه خـد يرتعـي فـي نـفـوده
دونه ( عتيبـة ) مفْرقيـن السّـلالِ
مشعل حسن كا لقوس في عود خلاَّن
مـذرَّجَ الاحقـاف مفتـول سيـقـان
ولـه وروك كنهـا الـواح بيـبـان
مكبوس زابر من حيا الصيـف كالـي
نابي المتن فجَّ النحر شـف عشنـاق
لا هو بصلفـوقٍ ولا هـو بمصفـاق
وليا طـرح راسـه كمـا راس زرَّاق
دايـم وركَّابـه عـن الهـم خـالـي
فوقه شـداد مثـل صقـر القرابيـس
شرا عقيلي شاغلينـه هـل العيـس
فضة ملبَّس قيمته ( يـوز سكّيـس )
ولو كان ( بكّي يوز ) ماهـو بغالـي
والخُرْج فوقه شغـل راعـي معانـي
فيه القصب والجوخ والريش حانـي
واشغال حطوهـا لـه شغـل ثانـي
يسْوا ميـه واثنعـش فضـة ريـال
والميركـة شغلـت بـدار السـعـادة
تنشر علـى الامتَـان مقعـد شـداده
تزهـى ويزهاهـا الرسـن والقـلادة
وحزام فضـه مثـل طـوق الهـلالِ
تسري من الطائف عشا مقـدم الليـل
عطها القديـرة والمناحيـت والسيـل
تاصل بها مكة علـى بـدوة سهيـل
قـدّام مطـلاع النـجـوم التـوالـي
بيِّتْ ونوِّمْ واعقله بالمـرس خمـس
حيثه جفول ومحتذر ما يبـا اللمـس
خله مكانه لين تبـدي لـه الشمـس
وانصا الملوك اهل الكـرم والنوالـي
والختم صلى الله على ساكـن الشـام
عـد الشجـاري والثمـاري والايـام
وعداد ما خطـوا حـروف بالاقـلام
علـى النبـي طـه بهـيّ الجـمـالِ
|