ماريّة فينـي مـن الوقـت منهـاش,,,
ماريّة فينـي مـن الوقـت منهـاش
وجوا ضميري شـي ينهـش نهاشـه
ينهش وهشش ماانبنى داخل الجـاش
ويقرش قريش المعتجل فـي قراشـه
جوا ضميري له وشيـش وخرفـاش
سـوى بريضـان الضمايـر لباشـه
لانيـب درويـش ولانيـب قـراش
وبالـزوم الشيـن محـلا بـلاشـه
اللي يجي من ماش يمشي على ماش
وراع المعـاش الله يكثـر معـاشـه
وكل علـى مـاراد للـرزق يعتـاش
وعمر كتبه الله علـى العبـد عاشـه
ومن لاطمع للعز والجـود ماعـاش
ماعـاش لـو انـه وزيـر وباشـه
مما جرى راسي مشـوش ومنـداش
ممـا جـرا بالوقـت فيـه اندواشـه
وياشوش راسي شوشة الجمس لاشاش
في يـد منهـو لايـع الفقـر ناشـه
حده زمان الفقـر عالفقـر وانحـاش
ولاشاف من جـور الليالـي بشاشـه
هواه في جمـس وبنـدق ورشـاش
ويعطي عضام اللـي يحـده دشاشـه
وقت يجي صادق ومليـون غشـاش
والصـادق المضيـوم محـد بداشـه
الشين مـردوده علـى لحيـة الاش
حيثه لهـا لاجـت يفـرش فراشـه
ولا عزيـز النفـس للعـز شـواش
يرخص لعكفـان الشـوارب كباشـه
نوب تجي بالدين واحيـان بالكـاش
ونوب يجي وسط الامـور انعراشـه
السم لـه حـاوي وللشـوك منقـاش
واللي يحـوش العـز باليـد حاشـه
احد يحوش السمر والاخـر قحـاش
كـل مـن الدنيـا يقحـوش قحاشـه
والله على روض ينغـوش تنغـواش
راع الدبش وسطـه يضيـع دباشـه
يطيش عشبه طيشة المـوج لاطـاش
واطش به خافـق يطشّـش طشاشـه
والجو شاتي وابتدى الوبـل برشـاش
وصارت علينا من كرمهـا غباشـه