*يوم السبت*
في كلية الحاسب الآلي/
كانت جوري جالسه مع بنات من قاعتها..صارت تجلس معهم من يوم تركت ساره و شلتها..جت صديقه لهم من قسم ثاني..
منى: صباح الخير
الكل: صباح النور
منى توريهم الشوكلاته اللي معها: شوفوا هدية الخطبه
ندى: انخطبتي؟؟
منى: لا هاذي لما اللي معنا في القسم كانت تقولنا لو أخذت اللي في بالها بتوزع على القسم كله هدية الخطبه..والله و طلعت قول و فعل و اخذته
منى: مين اخذت؟
ندى: ولد جيرانهم..اظن اسمه مازن..شوفي هي طابعه حرفه و حرفها
منى: يا عيني على الحركات
كملوا سوالفهم البنات..اللي ما عرفوا إن لما تعرف جوري..و إن هالخطيب هو نفسه أخو ساره اللي ترك جوري..استأذنت منهم و قامت..تمشي و هي تفكر..(كانت تبيه؟ كانت تحبه؟)
و تذكرت إنها تغيرت معاملتها معها من بعد خطبتها لمازن..كانت بالغصب تكلمها..و ببرود ترد عليها و تتعامل معها..لين جاء ذاك اليوم اللي وقفت معها فيه..و هي استغربت منها هالوقفه..و كانت ظانه إنها فاهمتها كل هالمده خطأ..(دامها كانت تكرهني لهالسبب ليه وقفت معي؟)
تذكرت كيف اقنعتها تكلم فهد..و كيف اصرت إنها ما تقول لأهلها شي..خاصه مازن..فجأه طرى في بالها اللي قالته لها ياسمين..المسجات اللي جت لمازن تشككه فيها..(ما أحد كان يعرف إن فهد بيجي ذاك اليوم غيرها!...و مازن مو من عادته يمر بدون ما يتصل؟ يعني هو كان جاي يتأكد من المسج اللي وصل له؟؟)
انصدمت باللي وصل له تفكيرها..(لاااا مو معقول تكون..هي..هي اللي..)
حست بصدمه و قهر..حست بالظلم و الخيانه..(حرام عليك يا لما! حرام لو كنتي سويتي اللي أنا افكر فيه!! حسبي الله و نعم الوكيل فيك)
سكتت لأنها ما تبي تكبر السالفه..تدري لو قالت لياسمين أو أي أحد اللي عرفته..ماراح يسكت..(حرام علي افضحها..حتى لو كانت السبب بفضيحتي..بس أهلها ما يستاهلون..أمها التعبانه ما تستاهل..فوضت أمري لله..حسبي الله و نعم الوكيل)
في كلية ادارة الأعمال/
مشت مرام للكافتيريا و شافت نوال من بعيد و هي مبتسمه لها..ابتسمت و هي توصل عندها..
مرام: وش عندك على هالإبتسامه؟!
نوال: اجلسي و أنتي تعرفين..و تدعين لي
مرام تجلس: وش عندك؟ فرحينا معك
نوال: لا الفرح كله لك..بس أنا أقبل بهديه بسيطه تقديرا لأفكاري
مرام بحماس: وش عندك؟
نوال: أول قولي لي تعرفين رقم فيصل؟
مرام بإستغراب: لا بس أقدر آخذه من جوال أمي
نوال بخبث: خلاص ارسليه لي اليوم
مرام: ليه؟
نوال: أبدا بس فاعلة خير بترسله هالمسج
و مدت جوالها لمرام..اللي قرت المسج اللي مكتوب فيه..[اللي تفكر فيه صح..و أسيل تحبك للحين مثل ما أنت تحبها..أنا متأكده إنكم تتمنون ترجعون لبعض بس خايفين من أهلكم بس الحب اللي بينكم يسوى تضحون عشانه..لا تترك أسيل تتزوج واحد ما يبيها..عذرا على رسالتي بس حبيت اساعدكم لأني متأكده من مشاعركم اتجاه بعض..ارجوك لا تدق على هالرقم أنا بس حبيت اساعد أسيل لأنها ما تهون علي]
خلصت مرام و التفتت على نوال..
مرام: بترسلينه؟
نوال: ايه
مرام بشك: بس......
نوال تقاطعها: بس ايش؟ بيفكر إنها وحده من صديقات أسيل بتخدمها..أو بيفكر إنها من قريباتها أو حتى رغد أو هي....صدقيني ماراح يهتم بالمصدر قد ما راح يهتم بالكلام اللي بيريحه
مرام: من جوالك؟
نوال: ايه
مرام: ولو طلع الرقم؟
نوال: لو إني ما أتوقع..بس ساعتها بنقول إنها سهى سرقت الجوال بتختبره..أو تتخلص منه..لا تخافين أنا اتصرف
مرام بحيره: بس أنتي صديقتي مو صديقة سهى بيشكون فيني؟
نوال: لا تخافين لو حسيت بأي شي اسوي أي مشكله مفتعله معك و اتصادق مع سهى و نورطها..بس أنا متأكده إنه ماراح يهتم إلا باللي موجود داخل المسج و تشوفين...و مهما يصير ماراح يجيب طاري هالمسج
اقتنعت مرام..و ارتاحت للفكره..
في سيارة فارس/
كان يفكر في جوري..من ملكة ياسمين وهو يفكر..يبي يتقدم لجوري بس متردد..ما يدري هالشي ممكن يصلح اللي بينهم..و يرجعهم لبعض..أو بيرفضونه..بسبب اللي سواه سيف..(و هي بتوافق أو لا؟...أخاف تظن إني تقدمت لها بس عشان نعوض لهم عن اللي سواه سيف..معقول تفكر كذا؟)
قرر ينتظر أيام..يشوف وش بيصير بعد ملكة ياسمين..يمكن الأمور بينهم تتصلح..أو هو بنفسه بيكلم أم العنود و خاله..و يخطبها منهم..
في بيت أم عمر=الساعه العاشره صباحا/
طلع عمر من غرفته بيروح للمصنع..من أيام..من يوم قال لها تختار..وهو دائما عصبي..ما يجلس في البيت و ما يجلس مع أحد..الكل بعد عنه و لا يتشجع يكلمه..كان من كلمه يتنرفز و يعصب..ينتظر قرارها..و خايف منه..
نزل و شاف أمه..
عمر: صباح الخير
أم عمر: صباح النور..ما دريت؟
عمر: عن ايش؟
أم عمر: جدة مساهير توفت
عمر انصدم: ......
أم عمر: ارجعوا لبيتهم أمس لا تنسى تمر تعزيهم
عمر: ان شاء الله
طلع وهو مو مستوعب اللي سمعه..كان ينتظر قرارها..يبي يرتاح مهما كان..بس اللي صار بيأخر هالشي..و بيعيش أيام أطول بعذابه..
راح لبيتهم و طق الباب..لأنه شاف سيارة راشد فيه و عرف انه ماراح للمدرسه..لحظات و فتح له راشد بملامح حزينه..سلم عليه و عزاه..و دخل يسلم على خالته..و عليها..مع إنه تمنى ما يشوفها..تكون نايمه..أو ماتبي تطلع له..أي شي..بس ما يشوفها وهو مو عارف إن كانت بتكون له أو لغيره..بتختاره هو أو غيره..
لكنه أول ما دخل الصاله شافها..تقدم منها و عيونها تطالعه بنظره غريبه..مد لها يده..
عمر: عظم الله أجرك
مساهير تنزل عيونها: أجرنا و أجرك
انتبه ليده اللي للحين ماسكه يدها..و فكها بسرعه..
راشد: ارتاح يا عمر بأنادي لك أمي
راح راشد..و عمر واقف يطالعها..يبي يتكلم..بس أول مره ما يدري وش يقول..و هي كانت واقفه و عيونها في الارض..ما يدري ما تبي تشوفه..أو ماتبي يشوف الدمع بعيونها..أول ما دخلت أمها تركتهم و راحت..
في بيت أم سامي=المغرب/
دقت على فيصل..من أيام و هي اللي تدق عليه..وهو ما عمره دق..ما تدري هي اللي تستعجل و تدق قبله..أو هو ما يفكر يدق عليها حتى لو ما دقت..لها يومين ما كلمته..تبيه يفقدها..تتمنى هو يدق يسأل وينها..لكنه ما دق..و هي ما قدرت تصبر و دقت..
سهى: مرحبا
فيصل ببرود: هلا سهى
سهى: زين للحين تذكر اسمي؟
فيصل: ليه هالكلام؟
سهى بعتب: يعني مو عارف..لو ما دقيت اسأل عنك كان جلست أيام ما كلمتني
فيصل: أمس مكلمك!
سهى بحزن: أمس! أنت لك يومين ما سمعت صوتي يا فيصل..اللي آخذ عقلك
فيصل يتنهد: معليش يا سهى أنا مشغول هاليومين في الجامعه و مو رايق..بعد الامتحانات نتكلم
سهى بخوف: ما تبي أكلمك إلا بعد الامتحانات!!
فيصل: مو قصدي كذا..بس ما أبيك تشرهين علي..و تلوميني على تقصيري..انتبهي لدراستك احسن
سهى: ان شاء الله يا فيصل..(يا ليت هذا اللي شاغلك يا فيصل)
في بيت أبونادر/
كان فيصل في غرفته من بعد ما سكر من سهى..من أيام وهو يفكر بالمسج اللي جاه..مين معقول يكون ارسله..و الأهم الكلام اللي فيه صدق أو لا..لكن إحساسه كان يقول إنه صدق..
و قرر ينفذ اللي يفكر فيه..يدري إن اللي بيقوله صعب..بس الأصعب إنه يبعد عنها..هي تحبه..أكيد تحبه..و بتوافق ترجع له..و نادر ما يبيها..يعني ماراح يتضايق لو تركها..و بعد ما كلم سهى تأكد إنه خلاص ما يبيها..إنها ما تعني له أي شي..و كل تفكيره معها هي..مع أسيل..(سامحيني يا أسيل..سامحيني و أنا بأعوضك عن كل شي...بس مستحيل اتركك..ما أقدر اشوفك لغيري..و أنا عارف إنك تحبيني..و أنا أحبك)
قرر بعد الا متحانات اللي بتبدأ الأسبوع الجاي يكلم أمه..و نادر..وهو متأكد إن نادر ماراح يتمسك فيها..لأنه يعرف بحبهم لبعض..و بيقنع أسيل توافق..بيترجاها لين توافق..لازم توافق..و ترجع حياته مثل ما كانت..
انتظــروا...في النـزف القــادم
قلوووب تلتقــي،،قلوووب تنتظــر،،قلوووب تفتــرق
|