منتديات قصايد ليل - عرض مشاركة واحدة

07-05-2011

توقع انها تطلع و تدخل مع الباب..لكنها نطت على طول ورا..وهو يضحك عليها..التفت لها..

نادر: كل هذا خوف تنزلين!

فصخ الجاكيت اللي لابسه..و مده لها..

نادر بحنان: على الأقل تغطي هذا

اخذته أسيل..اللي أول ما دخلت السياره و حست بالدفا بدت تنعس..تمددت و تغطت فيه و نامت..شمت ريحة عطره..

أسيل بهمس: حلوه ريحة العطر

طالعها نادر و ابتسم..ما يدري هي حاسه باللي تقوله..أو النوم بدأ يأثر عليها..صار يتأملها..ملامحها الحلوه..شعرها اللي طايح على وجهها..

أسيل و هي مغمضه: لا تطالعني عشان أقدر أنام

نادر تفاجأ: مين قال إني اطالعك؟

أسيل: احس

نادر: خلاص أنا رايح نامي براحتك

أسيل تفتح عيونها: لااااا

نادر يتنهد: ليه؟

أسيل: خايفه

نادر: وش تخافين منه..و أنتي هنا؟

أسيل: عشاني خفت أول..اللحين ما أقدر اجلس لحالي

نادر: خلاص نامي أنا بأجلس هنا لين تنامين

أسيل بعناد: و اذا نمت تروح؟

نادر: ايه

أسيل: و إن صحيت؟

نادر يتنهد: خلاص ماراح اتحرك إلا الفجر..ما اعتقد ذاك الوقت بتخافين

أسيل: بروومس

نادر يضحك: بروومس

نامت أسيل و هي مبتسمه..و دفنت وجهها بجاكيته..و ريحة عطره تغطيها..ما تدري ليه تسوي اللي تسويه..أول كانت خايفه صدق..بس بعدين صارت تتدلع عليه..تبي تشوف وش ردة فعله..و إلى أي حد بيطيعها..مع انها ما اعترفت لنفسها..بس حبت جلستها معه..و حاولت ما تنام..تبي تكلمه أكثر..لكنها كانت نعسانه و تعبانه..و غلبها النوم..

نادر كان جالس في مكانه ما تحرك..خاف يزعجها..التفت بعد وقت لها..و شافها نايمه و تنفسها انتظم..استغرب من نفسه..و من الشعور اللي يحسه وهو يطالعها..

و لأول مره تخيل كيف بتكون حياته معها..و تفاجأ إن هالشي ريحه..إنها تكون له..تكلمه هو..تشوفه هو..تهتم فيه هو..

بس طرأ عليه فيصل..و هالشي خلاه يتنهد بحزن..و يلف عنها يطالع الظلام قدامه..

غفى شوي..و بعدين حس في نفسه..شاف النور الأزرق بدأ ينتشر في السماء..طلع من السياره بهدؤ عشان ما يزعجها..و رجع للخيمه..قبل يصحون الحريم وهو قريب من خيمتهم

في خيمة الحريم-صحت أم العنود تصلي الفجر و صحتهم..

جوري تتلفت: وين أسيل؟

حلا تضحك: صح..لا يكون انخطفت

رغد: يمكن طلعت تتوضأ

لبسوا البنات أكواتهم..و لفوا الشالات عليهم..و طلعوا..أول ما شافت جوري الجو..

جوري: واااو الجو روعه

رغد: بس برررد

طلعت وراهم مساهير و ياسمين و لينا..

مساهير تركض لبرا: يا سلام على الروااق

لينا انتبهت: وش السياره اللي هنا؟!

رغد: هاذي سيارة نادر

حلا تضحك: ما لقى لها موقف على وسع هالبر

راحت لها رغد..و شافت أسيل..

رغد تلتفت للبنات: أسيل نايمه فيها

ياسمين تضحك: يا عيني على غرفة النوم

مساهير تعلق: المهم لا يكون نادر معها

ضحكوا البنات و راحوا يتوضون..بعد ما خلصوا صلاتهم..راحت رغد لأسيل..فتحت الباب..

رغد: أسوله..أسوله قومي

صحت أسيل..و هي مو مستوعبه وين هي..لكن ريحة عطره ذكرتها..قامت و هي مبتسمه..

أسيل: صباح الخير

رغد: صباح العسل يا رايقه..وش جاب سيارة نادر هنا؟

أسيل: خفت أمس...(تذكرت) صح وين رنا و شوق والله لأذبحهم

رغد بإستغراب: وش فيك أنتي؟

جت حلا و جوري عندهم..

ح يله الأميره النائمه الصلااااة

طلعت أسيل من السياره و لبست جاكيت نادر..

رغد: ما قلتي وش صار؟

أسيل تروح: اصلي و أقول لك

ح وش القصه؟

رغد: مادري أبي اعرف كيف جت سيارة نادر هنا؟

ح يا شين اللقافه

رغد: يعني ما تبين تدرين؟

ح طبعا

رغد: اجل اسكتي

ح بس يا شين اللقافه

رغد تدفها و تروح: انقلعي

جوري تضحك: تعالي نروح لا تفوتنا السالفه

حلا تشهق: حتى أنتي يا جوري صرتي ملقوفه!

راحت حلا..و كانت بتمشي معها جوري لكن ما تدري ليه التفتت لخيمة الرجال..و كأنها حست بوجوده..شافته من بعيد..واقف عند سيارته..كان لابس بدله سوداء..و شكله مو رايق وهو توه صاحي..التفت ناحيتها..و هي ركضت لداخل الخيمه..

شافها فارس..بس من بعيد ما قدر يعرف هي مين..

في الخيمه-خلصت أسيل صلاتها..و أول ما لتفتت شافت رنا و شوق..و عصبت و قامت لهم بسرعه..صرخوا و كانوا بيطلعون..بس مسكتهم..و صارت تضرب فيهم..و تضربهم في بعض..

ح وش فيها قلبت جاكي شان على هالصبح!!

رنا: أسوله والله نمزح

شوق: تراها فكرة رنا

أسيل ترميهم: مالت عليكم كلكم

جلست أسيل عند البنات و قالت لهم اللي صار..بس طبعا مع بعض الحذف..

جوري تضحك: و كيف قدرتي تطلعين من الخيمه؟

رغد: صح ما توقعت تسوينها!

أسيل: مادري من الخوف جتني لحظة غباء...أو يمكن أنا قويه و أنا مادري

حلا تضحك: ايه هين قويه..روحي روحي بس لغرفة النوم الخاصه

أخذت أسيل لها غطاء و راحت لسيارة نادر..و رجعوا البنات ينامون..

و بعد ساعه..حست لينا بأحد يهزها..صحت و شافت شوق..

لينا: شوق! وش تبين؟

شوق: أبي اروح الحمام

لينا تضحك: زين روحي

شوق: خايفه

لينا: وش يخوفك حنا اللحين الصبح

شوق: أمس رنا قالت لي قصه تخوف

لينا قامت معها و طلعوا..كانت لينا تتمشى..و تشوف السماء الزرقاء صافيه..(خساره شكلها ماراح تمطر اليوم)

طلعت شوق..و مرت من عندها..و قالت لها تدخل..لكن لينا كانت تطالع في خيمة الرجال..و لا راحت معها..شافته..طلع من الخيمه..و راح يرقى على التل المرتفع اللي كان قريب منهم..بتردد..مشت وراه..ما تدري ليه..

كان يمشي..و هي تمشي وراه و تدوس على نفس خطواته..وصل لأعلى التل و وقف..يتأمل بالمساحات الواسعه اللي قدامه..يتذكر كلامها اللي قالته له آخر مره..و يفكر لأي درجه تعنيه..يحس إنه مو مستوعب اللي صار..مع إنه ياما حلم فيه..

لينا كانت تطالعه..تبي تعرف وش تحس فيه..غير شعورها بالذنب اتجاهه..غير شعورها بأنانيتها و هي مخبيه اللي تعرفه عنه..غير شعور إنها ما تستاهله..