نادر: ايه حلو
راح عنها..وهو يضحك على نفسه...من يوم سمعها وهو مو على بعضه..حتى ما قدر يتعشى..و آخرتها تطلع تلعب..(يعني وش كنت مفكر يا نادر؟...مادري وش فيني صاير اتأثر بأي شي عنها)
تذكر يوم يشوفها في بيت خواله..من يومها وهو مو قادر يطلعها من باله..و يشتاق يشوفها..أو يسمع عنها أي شي..و اللحين صوتها مو راضي يفارق سمعه..(اتركيني في حالي يا أسيل أنا مو ناقص)
راح عند العيال و سهر معهم..و حاول ينسى..بيحاول لين يقدر ينسى..يبي يحدد علاقته معها..و لا يبيها تتعدى الحدود..
فيصل بعد العشاء دخل ينام..وهو يسمع أصواتهم سهرانين..لكنه ما جلس معهم..لأنه يدري لو جلس بيقوم سيف..دق على سهى..يبيها تنسيه..لازم تنسيه مثل ما نسته أول مره..لكنه كان يسمعها..وهو مو يمها..مايبي يتأكد من هالشي..لكنه كل يوم يتأكد أكثر..حبها له و اهتمامها..ما صار يعني له أي شي..لدرجة انه اعتذر عن الجيه لها بكره..هاليومين..فرصته عشان يشوف أسيل..و ماراح يفرط فيهن..حتى لو كان يشوفها من بعيد..حتى لو كانت ملك غيره..
بعد ساعات-ناموا البنات إلا أسيل..اللي كان جالسه..تراقب و تتسمع..كل ما نامت تحس بشي يمشي عليها..تفز و تقوم..و اللحين صارت تسمع أصوات غريبه..(أوووف أبي أعرف وش لاقين في هالبر..حشى مرجعينا مية سنه ورا..نايمين بهالصحراء لحالنا! الله يسامحك يا خالي على هالفكره)
كانت كل ما يمر الوقت تخاف زياده..قربت من عند رغد تهزها..
أسيل بهمس: رغد..رغد..رغـــــــد
رغد: .....
راحت تزحف لجوري..
أسيل: جوري..جوري
جوري تمتمت: هممم
أسيل: خايفه اسمع أصوات غريبه و احس شي يمشي علي....جوري
لكنها شافتها تغطي وجهها و غرقانه في النوم..(أبي افهم كيف ينامون؟ قلوبهم ميته...لا أنا إن جلست كذا ماراح أنام بأدق على سيف و أقوله أنام في سيارته)
حاولت تدق عليه..بس ما كان فيه شبكه..انقهرت و طالعتهم وهم نايمين بقهر..جمعت اللي بقى من شجاعتها..و طلعت من الخيمه..كانت تتلفت بخوف..مشت شوي..و حاولت تدق مره ثانيه بس كان سيف مقفل جواله..و دقت على فارس و نفس الشي..
تجمعت الدموع بعيونها و هي لحالها فهالمكان..و مع خوفها خافت أكثر ترجع للخيمه..(أكيد السياره مفتوحه..يعني ليه بيقفلونها هنا)
بخطوات مرتجفه تقدمت عند خيمة الرجال..و كانت بتروح من عند السيارات..لكن خطواتها جمدت..و قلبها وقف من الخوف..و هي تحس بالشي اللي طار و ضرب ظهرها..وقفت في مكانها..ما قدرت تتحرك و لا حتى تتنفس..
رنا و شوق اللي كانوا يراقبونها من أول ما صحت و يضحكون عليها..وقفوا خايفين و هم يشوفونها كيف تخشبت بعد ما رموا عليها الجاكيت اللي كانوا ناوين يخوفونها فيه..
ركضت لها رنا..
رنا: أسيل هذا حنا..لا تخافين
شوق: كنا نمزح
لكنها ما تحركت..كانت جامده بمكانها و مغمضه عيونها بقوه..شافت رنا أحد يطلع من خيمة الرجال و ركضت له..فرحت يوم شافته نادر..
نادر بإستغراب: رنا وش مطلعك هالوقت؟؟
رنا بخوف: نادر تعال بسرعه أسيل مادري وش فيها؟؟
راح نادر معها بسرعه..وهو ما يعرف وش فيهم..بس أول ما سمع اسم أسيل راح معها يركض..شافها واقفه قريب من السيارات جامده ما تتحرك..
ركض لها و وقف قدامها..يطالعها بقلق..
نادر: أسيل وش فيك؟
بدت ترتجف..وهو حس إن وضعها مو طبيعي..ضمها له يهديها..لحظات..و تعلقت فيه بقوه..و بدت تصيح و ترتجف..ضمها له أكثر..وهو يحاول يهديها..لكنه كان يحس بقلبها اللي يدق بكل قوه..رفع نظره لرنا و شوق اللي حسوا بخوف..
نادر: وش فيها؟ وش صار؟
رنا: كنا نمزح معها لحقناها و هي ما تشوفنا رمينا عليها الجاكيت و خافت
نادر عصب: هذا مزح!
خافت شوق و ركضت للخيمه..و لحقتها رنا اللي ما حبت تتهزأ لحالها..
رجع نادر يطالع أسيل اللي بين يديه..هدت شوي..بس للحين ترتجف..بعدها عنها شوي و مسح دموعها..و حط يديه على أكتافها..وهو يطالعها بحنان و قلق..الدموع و الخوف اللي بعيونها..شعرها المربوط بإهمال..و بجامتها البيضاء و الرسمات الناعمه اللي فيها..خلته يحس كأنها بنته مو زوجته..
نادر بهدؤ: خلاص يا أسيل هدي نفسك..لا تخافين أنا معك
أسيل تحاول تنظم نفسها و تهدأ: ......
نادر: ليش كنتي جايه هنا؟
أسيل بصوت مرتجف: خفت في الخيمه أبي أنام بسيارة سيف
نادر يبتسم بسخريه: خفتي!!
أسيل انقهرت: ايه لا تضحك..مادري كيف نايميين براحتهم..كل ما نمت احس شي يمشي علي و اسمع أصوات غريبه
نادر: خلاص ماراح اضحك..بس وش تبين اللحين؟
أسيل: أبي أنام في السياره
نادر: خلاص أنا بأقرب سيارتي لخيمة الحريم و نامي فيها..وش رايك؟
أسيل بفرح: ايه
طالعها للحظه بتأمل..يبي يحفظ صورتها في باله..تركها بيروح..لكنها مسكته..و التفت عليها..
أسيل: وين؟
نادر: بأروح اجيب مفاتيحي
أسيل بفزع: و تتركني هنا لحالي!!
نادر: وش اسوي يعني؟
أسيل: مادري؟ بس خايفه اجلس هنا لحالي
نادر: بأروح و ارجع بسرعه
أسيل تتلفت تشوف المكان المظلم..كانت بعيده عن خيمة الرجال..و بعيده أكثر عن خيمة الحريم..و فكرت بغبائها..كيف قدرت تجي إلى هنا..
أسيل: بأروح معك
نادر يتنهد: تعالي
مشت بجنبه..أو لا زقه فيه..و هي تتلفت حواليها..وهو كان متوتر من قربها له..
قربوا من خيمة الرجال و وقف..
نادر: انتظري هنا
أسيل: بسرعه
نادر: زين
دخل و جاب مفاتيحه..و طلع لها..و رجعوا للسيارات..ركب سيارته و شغلها..و ركبت جنبه..قربها عند خيمة الحريم..و وقف..
نادر يلتفت لها: كذا زين؟
أسيل: ايه
نادر: تبين افتحلك الشباك شوي
أسيل بخوف: لا
نادر: زين روحي جيبي لك غطاء
أسيل: لا خايفه ادخل
نادر بإستغراب: وش يخوف بالخيمه؟!
أسيل: مادري بس في هالبر كل شي يخوف..حتى أشكال البنات و هم نايمين صارت تخوف
نادر يضحك: مادريت إنك خوافه لهالدرجه!
أسيل بقهر: طالع حواليك بالله هالرعب اللي حنا فيه ما يخوف
نادر يتنهد و يطالع قدام: بالعكس الجو هادي و حلو...روحي ورا نامي على راحتك
|