منتديات قصايد ليل - عرض مشاركة واحدة

07-05-2011

فارس بقهر: هذا آخر شي لك عندي يا جوري..أنتي اخترتي
تركها و راح و جوري بدت تصيح..تطالعه و مو مصدقه اللي سواه..أكيد كان مقهور منها حيل لدرجة يفكر يسوي كذا..كيف فارس الثابت يهتز قدامها كذا..قدامها هي..طالعت الدبله اللي حطها بيدها..و كتمت شهقتها..ما تدري ليه تحبه كل هالحب..عمره ما صار بينهم شي..لكن هي تحس و كأنه جزء منها لا يمكن تتخلص منه..فكرت بالدبله اللي بأصبعها..(ليه شراها؟ كان ناوي من جد يخطبني؟ ليه ما عذرته؟ فارس مو سهل عليه اللي قاله لي...بس وش كنت أقدر اسوي؟ لا ناصر و لا مازن كانوا يستاهلون احرجهم قدام الناس...مو ذنبي و لا ذنبك يا فارس..هذا حظي بالدنيا..عمرها ما كملت فرحتي)
طلعت الدبله من أصبعها..و مسحت دموعها عشان تدور دبلة مازن..شافتها طايحه في التراب..أخذتها و مسحتها..صارت تطالع في الدبلتين..و وقفت تتنفس بقوه..تحاول تهدي نفسها..لبست دبلة مازن..و حطت دبلة فارس بجيبها..
و راحت للبنات..استغربت من القوه اللي صارت عندها..قبل أشياء تافهه تاخذ منها وقت بالحزن..لكن اللحين كل صدمه أقوى من الثانيه..و تقدر تتمالك نفسها بهالسرعه..(الألم و القهر قواني..جروحي منك قوتني..مشكور يا فارس..مشكور على الألم و الجرح)
عند الرجال-جاء فارس و القهر يملأ ملامحه..ليه هي من بين الناس تذله هالذل..ليه هي اللي يبيها و لا يطولها..ليه تسوي فيه كل هذا..و ما يقدر ينساها..
شاف مازن من بعيد..كان يمشي مع خاله ناصر..كان قريب للباب و طلع بسرعه..مع انه سمع خاله ناصر يناديه..لكن ما قدر يروح..ما كان طايق يشوف أحد..كيف بيشوفه هو..ما ضمن لو كلمه وش بيقول له..(وش جابه هنا؟ و أنا ناقصه!...أكيد بيشوفها)
و هالشي خلى الدم يغلي بعروقه..و ركب سيارته و راح..
بين الشجر..كانت جوري تمشي و هي ما تدري وين رايحه..تبي تقوي نفسها..تبي تنساه..تتمنى هالشي لو تدفع نص عمرها..شافت أسيل جالسه لحالها..و حالها غريب..راحت لها و جلست عندها..ما حست فيها لين لمست كتفها..
جوري بصوت مبحوح: أسيل ليش جالسه لحالك؟
أسيل تلتفت لها: وش فيه صوتك؟
جوري: .....
أسيل بحزن: جوري أبي اصيح
جوري بحزن أكبر: و أنا بعد
أسيل: ليه؟
جوري: مادري
أسيل: خلاص خلينا نصيح و لا وحده تسأل الثانيه ليه؟
و ما صدقت جوري..ذرفت الدموع اللي حاولت تمسكهن..قد ما تحاول تشوف ظلم فارس لها و قسوته..قد ما يتمسك قلبها فيه أكثر..و أسيل بدت تصيح معها..انصدمت بنادر و طريقة كلامه معها..تدري انه يعرف بحبها لفيصل..لكن وهو يواجهها بهالشي حست نفسها صغيره قدامه..كرهت تكون هاذي صورتها بعينه..
جلسوا فتره بهالحال..ما يدرون كم الوقت..سكتت أسيل..و بعد لحظات سكتت جوري..مسحوا دموعهم..و كل وحده تطالع في مكان..
أسيل: ارتحتي؟
جوري: ايه
أسيل تلتفت تشوفها: باين إني صايحه؟
جوري تطالعها: إيه
أسيل: و أنتي بعد
جوري: وش نسوي؟
أسيل: تعالي نتخبى منهم و نروح نغسل وجيهنا و نحط ميك أب يمكن ما يبين
جوري تضحك: يله
أسيل ضحكت معها و راحوا..كانت ضحكه انرسمت على شفايفهم..بس ما وصلت ـبدا لقلوبهم المجروحه..

في سيارة فارس/
كان يمشي وهو يفكر فيها..يحس إنها بتجننه..فكر باللي سواه قبل شوي..كيف يفقد أعصابه كذا..كيف يذل نفسه لها أكثر..ليه ما يقرر ينساها و خلاص..يخطب وحده أحسن منها بألف مره..يخليها تذوق قهره لأنه يعرف انها تحبه..تشوف انه أخذ وحده من مستواه..
دق جواله و طلعه من أفكاره..شاف رقم خاله ناصر..
فارس: مرحبا
ناصر: هلا فارس..وش فيك طلعت بسرعه كنت أناديك
فارس: آسف خالي ما سمعتك..بس دقوا علي من الشركه فيه شغل مستعجل
ناصر: كنت أبي تتعرف على مازن..أنت حتى ما باركت له
فارس بقهر: مره ثانيه..معليش خالي لازم أسكر ما معي شحن مع السلامه
ناصر بإستغراب: مع السلامه
رجع يفكر بقهر..(أبارك له!! جعلك ما تتهنى يا مازن)

في المزرعه/
طلعت جوري و أسيل..للبنات بعد ما عدلوا نفسهم و رسموا الضحكه على وجيههم..و سلموا على أم راكان..و مرام كانت تراقب أسيل..(مو باين عليها شي؟ شكله للحين ما كلمها..أكيد مو طايق يشوفها بعد اللي عرفه...يا خبر بفلوس بكره يصير ببلاش)
ياسمين: جوري..خالي ناصر دق و يقول مازن بالمجلس يبي يسلم عليك
ح يا عيني يا عيني..معليش أجي اتفرج
رغد: الله يصير جوري؟
جوري انحرجت: .....
لينا: بس حرام عليكم احرجتوها..عاد ما لقيتوا إلا جوري تستقوون عليها
قامت جوري من عندهم و هي مبتسمه..لكن أول ما راحت عنهم اختفت ابتسمتها..تحس بالذنب اتجاه مازن..ما يستاهل اللي تسويه فيه..و تحس بالذنب على اللي سوته بفارس..ما تصدق إنها هي صارت تظلم..لكن مازن ماله ذنب..هو أكثر واحد ماله ذنب..لو بس فارس يطلع من بالها..(ليه قبل ما أشوفك لازم يطلع لي قبلك فارس..ليه يأخذ مني كل إحساس و شعور في قلبي..لين ما يبقى شي أعطيه لك)
هزت راسها بقوه..تبي تطلع فارس من أفكارها..مازن زوجها..وهو الوحيد اللي له الحق تفكر فيه..تخلص له..و تحبه..
دخلت المجلس..و شافته..تمنت عيونها تعكس الفرحه اللي تشوفها بعيونه..ابتسمت غصب..قام لها و مد يده..صافحته..لكنه ما ترك يدها..
مازن: حمدالله على سلامتك
جوري: الله يسلمك
مازن يجلس و يجلسها معه: توها نورت الرياض
جوري بحياء: مشكور
مازن: ليه كل هالحياء أنا قلت خلاص تعودتي علي!
جوري تبتسم: وش أخبار خالتي و البنات؟
مازن: بخير و يسلمون عليك
جوري: الله يسلمهم
جلس مازن يسولف معها..و هي تحاول قد ما تقدر تركز معه..و ما تسرح بفارس أبدا..من اليوم بتعلم نفسها كيف تحب مازن..لازم تحبه..لأنه يستاهل..بتتذكر صوته كل لحظه..لين يطلع صوت فارس من مسامعها..
رجعت من أفكارها تسمعه..وهو يسولف لها عن العيال..و أكثر شي اعجبها فيه..انه يقول عيال خالتك..و خالك ناصر..عمره ما حسسها انه معتبرهم مو أهلها الحقيقيين..لكنه سألها سؤال صدمها..
مازن: تصدقين تعرفت على كل العيال إلا فارس من يوم خطبتك ما عمري كلمته..حتى يوم ملكتنا كان مسافر
جوري بارتباك: يمكن عشانه دائما مشغول
مازن: يمكن
غيرت جوري السالفه..أي شي ممكن تتكلم فيه مع مازن..الا فارس..ما تبي تتكلم عنه..

في سيارة نادر/
كان راجع من المزرعه..اللي ياله قدر يجلس فيها بعد ما كلمها..للحين يحس داخله..وجع..و قهر..اللي سمعه جرحه و كرهه فيها..لكن نظرتها المصدومه..العاتبه..بعد أثرت فيه..(ليه اتأثر فيها؟ لأنها صادقه..أو أنا اللي اتمنى هالشي....يمكن اللي فهمته خطأ؟ يمكن سهى تبالغ؟ أو المسج ما كان من أسيل؟......لو بترسل له ليه ما أرسلت من زمان؟ ليه ما أرسلت يوم كانت تحبه و عرفت إنها ما يبيها؟)
احتار باللي سمعه..و قهره اللي يحسه..(ليه مو راضي أصدق عنها هالشي؟؟)

*يوم السبت*
في بيت طلال=الصبح/
طلع طلال من غرفته..و شاف الفطور على طاولة الأكل..تلفت يدورها..و سمع صوت في المطبخ..كان بيروح لها بس طلعت له..ابتسم وهو يشوفها بلبس الجامعه..و نظرة الحماس بعيونها..
طلال ابتسم: صباح الإجتهاد
لينا: صباح النور
طلال: ليه تعبتي نفسك..ما كان ضروري الفطور
لينا: لا عادي
طلال يجلس: متحمسه؟
لينا تتنهد: والله خايفه..من زمان ما اختلطت بالناس
طلال: بتتعودين
لينا: دام مساهير معي أنا مرتاحه..بتجلس لحالك في البيت؟
طلال يضحك: ايه اللحين عاطل عن العمل
لينا: أخاف تحتاج شي
طلال: لا إن احتجت شي أدق على أمي
سكت طلال وهو يفكر..(هالخوف من قلبك؟ أو..أو بس مجرد اهتمام انساني)
جلسوا يفطرون بصمت..و بعدين شالت الصحون و راحت للمطبخ..
دق جوالها..و ناداها طلال..شافت رقم مساهير..
لينا توقف: هاذي مساهير وصلت بأطلع لها
طلال: زين بالتوفيق
لينا: مع السلامه
طلال: الله يسلمك
طلعت و ركبت مع مساهير..
لينا: صباح الخير
مساهير: صباح الورد
لينا: وش أخبارك؟
مساهير: تمام التمام...ياااه يا لينا احس إننا رايحين للثانويه
لينا تبتسم: احس مر علي وقت طويل من ذيك الأيام
مساهير: وش أخبار طلال؟
لينا تتنهد: الحمدلله صار يمشي شوي بالعكازات
مساهير: و أخبارك معه؟
لينا: عادي
مساهير تلتفت عليها: كيف عادي؟
لينا: يعني ما فيه شي ينقال

مساهير: آها يعني أسرار
لينا تضحك: و أخبارك مع عمر؟ رضيتي عليه؟ اذكرك تبين تتطلقين
مساهير تبتسم: والله ما يبيني يطلقني هو
لينا: يعني أنتي تبينه؟؟
مساهير: عادي
لينا: كيف عادي
مساهير: مثل العادي اللي بينك و بين طلال
لينا: يعني وحده بوحده؟
مساهير: ايه نعم
سكتت لينا..(آآه يا لينا ما تدرين إني نفسي اتكلم مع أحد باللي حابسته في صدري..بس مو قادره اخلي أحد يعرف اللي سويته فيه..حتى هو..أخاف اصارحه..أعرف إني ما أهمه بشي غير هالوصيه اللي الزمه فيها يوسف..)

في كلية الحاسب الآلي/
كانوا البنات جالسين بوقت البريك..و يسولفون..و لما تطالع جوري بكره..و تطالع الدبله اللي في أصبعها بحقد..

ساره: لما وش فيك؟ كأنك متضايقه؟
لما(بدري توك تنتبهين): لا ما فيني شي..بس أبي اقوم اتمشى
خلود: أنا جايه معك
ساره بعد ما راحوا: مادري وش فيها لما متغيره؟
أفنان: يمكن صاير عندهم شي
ساره: يمكن..بس احسها صارت ترتاح تجلس مع بنات قسمها أكثر مننا
من بعيد-
لما: مالت عليها..و على فرحتها كل ما أطرت مازن احس ودي اذبحها
خلود تتنهد من هالسالفه اللي دائما تعيدها: خلاص يا لما انسي
لما: تحلم اتركه لها
خلود بإستغراب: يعني؟
لما بقهر و تحدي: يعني الشرع حلل أربع
خلود تشهق: أنتي صاحيه؟!
لما: لو ما آخذه إلا بعد مية سنه..بس بآخذه و ساعتها والله أخليه يطلقها
خلود بقلق: لما وش ناويه عليه؟
لما: بيحبني غصب عليه بيحبني
سكتت خلود و هي تدعي إن لما تقول هالكلام بس من قهرها..و مو ناويه عليه فعلا..