طلع عمر..لكن باله كان مع لينا..ردة فعلها غريبه..و الكلام اللي قالته أول ما شافته أغرب..حتى حادث طلال كان غريب..و كأنه كان معصب أو متضايق عشان كذا ما انتبه للعامود اللي صدم فيه..(شكلهم متهاوشين)
كان يفكر بشي و بعد تردد..دق عليها..
مساهير شافت رقمه و طنشته..للحين مقهوره منه و معصبه و ما تبي تسمع صوته..وهو كان حاس بهالشي..و عرف انها ماراح ترد عليه..مع انها قهرته لكن عشان لينا ارسل لها..[كنت داق بأقول لك إن طلال سوى حادث و لينا في بيتنا..أنا خايف عليها من يوم عرفت و هي ساكته ما تتكلم كنت أبيك تروحين لها يمكن تتكلم معك]
أول ما قرت مساهير المسج..خافت على لينا..و بسرعه لبست عبايتها و راحت لها..
في سيارة نادر/
كان راجع مع رغد من المستشفى..و هو طول الطريق يحاول يهديها..لكنها كانت تصيح و ما تسمعه..شاف جوالها اللي كان بحضنها و على الصامت يدق..
نادر: رغد جوالك يدق ردي عليه
رغد تصيح: .....
نادر: رغد ردي
رغد: مابي
اخذه نادر و شاف اسم أسيل مكتوب على الشاشه..
نادر: هاذي أسيل
رغد تصيح و مو يمه: ......
كانت أسيل تدق و تدق..تبي تتطمن على رغد..و مع إصرارها رد عليها نادر..
أسيل بقلق: رغد خوفتيني عليك ليه ما تردين
نادر: أنا نادر
أسيل تشهق: رغد فيها شي؟؟
نادر: لا بس مو قادره تكلم اللحين
أسيل: أنتم في الطريق؟
نادر: ايه
أسيل: زين ممكن تجيبها عندي
نادر يشوف حالة رغد..و حس انها لو تروح عند أسيل أحسن..يمكن تهديها..لو رجعت للبيت و شافت أمها كيف حالتها كل وحده بتزيد على الثانيه..
نادر: خلاص أنا بأجيبها عندك
أسيل:مشكور..و ما تشوفون شر
نادر: الشر ما يجيك
سكر منها نادر..وهو يفكر..هذا أول حوار طويل بينهم..يمكن ما يسمى حوار بين اثنين متزوجين..لكنهم كانوا أول مره يتكلمون مع بعض من ملكتهم..
في بيت أم عمر/
دخلت مساهير..سلمت عليهم و راحت بسرعه لغرفة لينا..دخلت و شافتها جالسه على سريرها..أول ما شافتها لينا صدت للجهه الثانيه..قربت مساهير و جلست على طرف السرير..و مسكت يدها..
مساهير: لينا وش فيك؟
لينا تعترف: مو حاسه إني زعلانه..مو حاسه إني خايفه عليه..و لا مهتمه...(تلتفت لها)مساهير خايفه أكون فرحانه باللي صار فيه
مساهير بصدمه: لينا! أنتي وش تقولين؟
لينا: مابي ارجع له..مستحيل اعيش معه..كنت أظن إني بأقدر انتقم منه..اطلع كل قهري و حزني فيه..لكن شوفته تفقدني كل قوتي شوفته تذكرني بيوم وفاة يوسف
مساهير سكتت ما تدري وش ترد عليها فيه..صدمها اللي قالته لينا..و صدمها السبب اللي خلاها توافق عليه..
مساهير بقلق: لينا وش صار بينكم؟
لينا تتنهد بتعب: ما صار شي..أمس أول ما وصلنا تركته و قفلت على نفسي الغرفه..جلست اصيح لين تعبت و نمت...قمت على صوته يطق الباب و أول ما قال لي إن أمي حجزت لنا و تبينا نسافر..فقدت أعصابي ما تخيل أبدا هالشي..صرخت في وجهه قلت له مابي أسافر معه....
مساهير: وش قال؟
لينا: تركني و طلع
مساهير: تدرين وش حالته اللحين؟
لينا: لا
مساهير: و ما تبين تعرفين؟
لينا تصيح: مادري..مادري يا مساهير..مابي أفكر و اتأكد إني فرحانه باللي صار له
مساهير تتنهد: إن شاء الله يقوم بالسلامه
لينا: ......
مساهير: لينا وش ناويه تسوين اذا صحى طلال؟
لينا: بأطلب الطلاق..ما أقدر استحمل..حاولت عشان أمي بس...بس ما قدرت
مساهير: ما كان المفروض توافقين على طلال لو غيره كان...
لينا: هو أو غيره..أنا مابيهم مو قادره انساه مو قادره انساه..اليوم شكل عمر ذكرني بوفاته..آه يا يوسف ليتني مت معك و ارتحت بعدك ما شفت إلا العذاب
مساهير: استغفري ربك يا لينا..و قومي صلي لك ركعتين تهدي نفسك
جلست معها مساهير لين هدت..و خلتها تنام و طلعت..
في بيت أم فارس/
وقف نادر..و رغد توها تنتبه للبيت..و طالعته بإستغراب..
نادر: أسيل طلبت مني اجيبك عندها
رغد: ماراح تنزل؟
نادر: لا
نزلت رغد..و نادر وقف لين دخلت للبيت و بعدين مشى..جت في باله أسيل..مع انها ما كانت تطري عليه أبدا..أم هو اللي يحاول يتناسى انها اللحين زوجته..تذكرها بملكتهم..شكلها بجد صدمه و كان غير المتوقع..تخيلها بنت صغيره و الحزن ماليها..لكنه شافها أنثى كلها غرور..كان سرحان فيها و يتذكر كل كلمه قالتها..كل نظره..لكن أول ما تذكر كلامها اللي بالصدفه سمعه عن ملكة فيصل..طرد أي فكره عنها في باله..(مجرد صوره يا أسيل..ماراح أفكر فيك أكثر من كذا)
*بعد أيام*
صحى طلال..و الكل زاره يتطمن عليه إلا لينا..ما قدرت تروح..و ما كانت تبي تروح..الكل فسر برودها و هدؤها على إنه صدمه و خوف بعد اللي قد مرت فيه..هي و مساهير الوحيدين اللي يعرفون الحقيقه..
طلال كانت حالته الصحيه سيئه..رجله كانت فيها كسور معقده جبسوها له هي و رقبته بعد..و الأهم من كذا نفسيته اللي كانت عدم..كانوا يحسبون اللي فيه تعب..لكن تعب روحه كان أكبر..
في بيت أم العنود/
كانت ياسمين في غرفتها..و دق جوالها..شافت رقم ورد..و ترددت ترد أو لا..انقطعت عنها أيام..و توقعت انها خلاص ماراح تدق..و استغربت و هي تشوفها رجعت تدق مره ثانيه..تذكرت فرحتها و هي تكلمها و كسرت خاطرها..(كله من عمك..الله يعينك على هالعم و يرحم حالك معه)
ما تدري كيف ردت عليها..يمكن حتى هي اشتاقت تسمع صوتها..
ياسمين: مرحبا
ورد بخوف: هلا ياسمين
ياسمين بجفاء: أهلين ورد
ورد تصيح: ياسمين..لا تزعلين مني
ياسمين رحمتها: مو زعلانه منك يا ورد و عارفه انك مو قاصده هالشي
ورد: أنا آسفه
ياسمين: خلاص حبيبتي لا تضايقين نفسك أنا مو زعلانه منك أبدا
ورد: يعني تسامحيني؟
ياسمين: ايه..بس حبيبتي اعذريني ما أقدر اكلمك بعد اليوم
ورد تصيح: ......
ياسمين بحزن: ورد لا تصيحين
ورد برجاء: ياسمين أنا ما عندي صديقه غيرك..أنا ما أحب أحد غيرك و لا أحد يحبني
ياسمين تتنهد: خلاص أنا و أنتي بنتم صديقات بس أنا اللي بأكلمك أنتي لا تدقين خلاص؟
ورد فرحت: ايه
كلمتها ياسمين شوي و بعدين سكرت..و هي تلوم نفسها على اللي سوته..(كان المفروض ما أرد..بس والله كسرت خاطري..مرتاح اللحين على اللي سواه فيها)
في بيت أم عمر/
كان عمر بيروح لطلال المستشفى..حاول بلينا تروح معه لكنها رفضت..حس انه صاير بينهم شي..بس ما قدر يسأل..خاف يكلم لينا و هي بهالحال..تثور و تنهار..حتى طلال كان مو قادر يسأله عن شي وهو يشوفه حالته صعبه..فكر بمساهير يمكن تعرف شي..و دق عليها..
مساهير شافت رقمه و لا ردت..و هالشي قهر عمر..لأنه كان يدق و يدق و هي مطنشته..لين ارسله لها..[بأتكلم معك في شي يخص لينا]
بعده دق عليها و ردت..
مساهير: نعم
عمر بقهر: ما بغيتي؟!
مساهير: وش فيها لينا؟
عمر: أنا اللي أبي اسألك وش فيها؟ ما قالت لك شي؟
مساهير: عن ايش؟
عمر: عن طلال..أنا حاس انه صاير بينهم شي..حتى انها للحين ما زارته
مساهير: لا بس يمكن مصدومه من اللي صار له..و خايفه
عمر: هي قالت لك كذا؟
مساهير تكذب: هذا اللي فهمته من كلامها
عمر: زين ممكن تجين تقنعينها تزوره..أمي مو عاجبها اللي يصير و أخاف تجبرها تروح..أبيك أنتي تقنعينها أحسن
مساهير: خلاص أنا اكلمها
عمر: متى؟
مساهير: أنت في البيت اللحين؟
عمر: ايه
مساهير: خلاص اذا طلعت أنا اروح لها
عمر بقهر: وش افهم من هذا؟!
مساهير: اعتقد واضح..مابي اشوفك ولو ما لينا كان ما رديت عليك
عمر عصب: ارتاحي أنا طالع للمستشفى و ماراح ارجع بدري..تطمني ماراح تشوفين وجهي
سكر وهو للحين مقهور منها..(و بعدين معك يا مساهير؟ حتى مو هاين عليك تواسيني بهالحال اللي أنا فيه..بدال ما تزيدين همي هم)
لكنه تذكر هو وش قال لها..و كيف فكر فيها..صدمها بتفكيره..و أكيد ماراح تنسى هالشي بسهوله.
|