في بيت أم راكان/
كانت مرام بتطلع لغرفتها وهي مرتاحه..بعد اللي خلت أمها تسويه..كانت متأكده إن جدة نادر ماراح ترضى عليه هالشي..و نادر أكيد ماراح يزعلها..إن كان يحب أبوه فهو يحب جدته أكيد أكثر..
شافت راكان ينزل بسرعه من الدرج..و كان بيضرب فيها..
مرام بقرف: هيه أنت ما تشوف قدامك يالمتخلف
راكان بقهر: ليه أنا اللي امشي و عيوني طايره فوق
مرام بملل: اقول اذلف عن وجهي للشارع اللي أنت ساكن فيه أنا مو رايقه لك
راكان: لا عاد أنا اللي ميت عليك..روحي روحي كملي مؤمراتك أنتي ما يبسطك الا الشر
مرام انقهرت من طول لسانه..و هي متعديه من جنبه وهو نازل..دفته مع ظهره و طاح ثلاث درجات ورى بعض..طالعها راكان بقهر..و هي وقفت تطالعه بغرور و تضحك..
مرام: خير عندك اعتراض يالمعقد
طالعها بكره و راح..وهو مقهور منها..كان يتمنى يضربها لكنه يعرف ان أمه بتوقف معها و تصدقها هي..و هي ما يحتاج بالكذب و التمثيل..و طلع من البيت عشان يرتاح..
دخلت مرام غرفتها..و رمت نفسها على السرير بفرح..و دقت على سهى..
سهى: هلا مرام
مرام: هلا فيك..وش أخبارك؟
سهى: الحمدلله أنتي وشلونك؟
مرام: اللحين بس ارتحت
سهى: خير وش صار؟
مرام: قريب جدا بتسمعين خبر فسخ خطبة أسيلوه و نادر
سهى بإستغراب: كيف؟؟!
مرام: خليت أمي تقول لجدته عن كل شي..و أكيد جدته ماراح ترضى له بهالوضع
سهى: متأكده؟
مرام:أكيد أنتي ما تعرفين هي كيف متعلقه في نادر و تتمنى له الأحسن
سهى: ان شاء الله يارب
كملوا سوالفهم..و سهى على قد ما كانت فرحانه لمرام..الا انها كانت خايفه من تأثير فسخ الخطبه على علاقتها بفيصل..يمكن يجبرونه يرجع لأسيل..خاصه انه للحين ما خطبها و لا شي..
في الشرقيه/
كانت أسماء و إياد كالعاده جالسين لحالهم في البيت..إياد يتفرج على أفلام الكرتون و هي جالسه تفكر..صح كانت تطلع لجيرانها اللي تعرفت عليهم..بس هي تستحي تروح دائما لان بناتهم مشغولين بدراستهم..كانت تحس بملل كبير..خاصه ان الوقت اللي تقضيه مع تركي ما يتعدى ساعات في اليوم..(الله يرحم أيام الرياض..كنا نطلع و نتمشى و نتكلم بكل شي مع بعض..مو اللحين ياله ألقى وقت اكلمه بالشي الضروري و المهم..و اللي يقهرني هو كأنه تعود على هالشي و لا صارت تفرق معه! يا خوفي تتغير يا تركي و تبدأ تمل مني و من البيت)
دق جوالها و شافت رقم أسيل..فرحت انها لقت أحد يسولف معها..
أسماء: هلا أسوله
أسيل: هلا و غلا فيك يالنسايه
أسماء: أنا!!
إياد أول ما سمع إسم أسيل ترك التلفزيون و ركض عند أمه يحاول يسحب منها الجوال..
إياد: أبي اكلم أثوووله
أسماء:انتظر حبيبي أكلمها أول بعدين أنت
إياد بعناد: لااا مااابي أنا أول
أسماء تكلم أسيل: ماراح اخلص منه اخذي كلميه
أسيل تضحك: هلا أيود حبيبي
إياد: أثوووله تعالي عندنا ماما ما تلعب معي ذيك
أسيل: خلاص حبيبي قول لبابا يجيبك عندي
إياد: ايه ماما أبي اروح عندها
أسماء: لو حاصل لي رحت أنا..عطني يله اكلمها عشان اقول لبابا نروح
إياد صدق: خلاث بث بأقولها ثي...أثوله أنا احبك بعد القمر و كبر البحر
سرحت أسيل و هي تسمع هالجمله..من كانوا صغار و فيصل يقولها لها..لين حفظتها و حفظتها لإياد..
أسماء: أسيل وينك؟
أسيل: هاه لا معك..ما قلتي وش أخبارك؟
أسماء: الحمد لله..أنتم وش أخباركم أمي و أبوي وفارس و سيف و خالي ناصر وخالاتي و البنات؟
أسيل تضحك: اعوذ بالله جامعتهم كلهم..مره وحده شكيتيهم يا حبك للاختصار!
أسماء: و الله مشتاقه لكم بالحيل
أسيل: ما مداك الخميس كنتي عندنا
أسماء: صح وش أخبار لينا ما شفتها زين بملكتها؟
أسيل: يعني..تقول حلا انها بس في غرفتها ما تطلع منها من يوم الملكه
أسماء: كان باين انها مو مقتنعه
أسيل: صح..بس أنا عندي أمل في طلال يطلعها من هالحزن اللي هي فيه
أسماء: يارب و الله حرام عليها اللي هي مسويته في عمرها..و أنتي وش أخبارك؟
أسيل: تمام
أسماء: أنا اقصد سالفة خطبتك
أسيل: ما تغير شي الوضع كما هو..و أنا مو قادره استوعب اللي أنا فيه و رافضه حتى أفكر بهالشي
أسماء: بس هذا موحل
أسيل: بس أنا كذا مرتاحه وش يفيد التفكير و أنا ما بيدي شي الا أقهر عمري على الفاضي..قلتلك أنا خلاص بانسى قلبي و أبدأ اتعامل بعقلي
أسماء: الله يعينك و يحلها ان شاء الله
أسيل: ان شاء الله..ما قلتيلي وش أخبار تركي أمي تقول لحق فارس و خالي بكثرة الشغل؟
أسماء: و هي صادقه ما صرت اشوفه الا كم ساعه في اليوم
أسيل تضحك: و كيف صابره؟
أسماء: غصب عني ليت هالسنه تعدي على خير ونرجع للرياض و الله مو حاله اللي أنا فيها
أسيل: احمدي ربك عندك إياد يسليك وش أقول أنا اللي كل وقتي لحالي
أسماء: يا عمري عليك والله كان المفروض ما اتزوج و اتركك
أسيل تتريق: لا بدري توك تتحسفين
أسماء تضحك: يوم حسيت بشعورك
سمعت صوت الباب..
أسماء: يله أسوله اخليك هذا تركي وصل
أسيل: زين مع السلامه وسلمي عليه
أسماء: يبلغ مع السلامه
سكرت و التفتت تشوف إياد اللي غفى على الكنب و هي ما نتبهت..راحت عدلته.. ويوم التفتت شافت تركي داخل الصاله..و كالعاده شكله نعسان ومرهق..
تركي يبوس خدها: هلا أسومي
أسماء: أهلين
راح يطالع إياد للحظه..ثم رمى نفسه على الكنب..التفتت عليه..
أسماء: بأروح أشيل إياد لغرفته توه نايم أخاف يصحى اللحين و يتنكد
هز راسه انه سمعها بدون يتكلم..وهي أخذت إياد و راحت تنومه في سريره..و هي تفكر تكلمه في حالتهم..و البرود اللي صار يدخل بحياتهم..صح هذا شغله..بس بعد هي و إياد لهم حق عليه..طلعت من غرفة إياد..و التفتت على المرايه اللي كانت على الجدار تطالع نفسها..مثل ما كانت دائما أنيقه و مرتبه بكل وقت..بس الفرق إن تركي ما صار يلاحظ هالأشياء ومن زمان ما علق على لبسها..أو شعرها مثل ما كان..أول ما يفوته أي شي فيها..لكن اللحين..
تنهدت و دخلت للصاله..راحت جنبه..لكنها شافته نايم..جلست وماحس فيها..صارت تتأمل ملامح وجهه بشوق..و حب..
أسماء بهمس: مهما سويت أنا بأظل أحبك دائما
كانت بتقوم تجهز له العشاء عشان تصحيه..لكنه مسكها و جلسها..التفتت عليه لقته للحين مغمض عيونه..لكنه ضمها لصدره..
تركي: زعلانه؟
أسماء: لا
تركي: أجل ليه هالكلام؟
أسماء: تركي صرت ما أشوفك كثير من زمان ما تكلمنا مع بعض براحتنا....و الله صرت اشتاق لك
تركي يضمها أكثر: حبيبتي عارف اني مقصر بس اتحمليني شوي..ما أبي أبوي يقول انه لو أخوي اللي كان ماسك الشركه بيكون احسن مني
سكتت أسماء..ما كانت تبي تقول ان شوفته أهم من الشركه بكبرها..بس دام هالشي مهم عنده هي بتساعده يحققه..و بتصبر..قامت معه و تعشوا مع بعض و تكلموا..كان هاليوم أحسن بكثير من الأيام اللي راحت..
*يوم الخميس*
في بيت أم فارس/
كانت أم فارس مسويه عشاء في بيتها..
وصلت أم طلال و رنا بدري..و دخلوا للصاله و هناك شافوا أسيل و أمها..
أسيل: وينها رغد؟
أم طلال: ما صدقت طلال يوافق يوديها السوق تجيب الأفلام اللي تبيها راحت و بتجي بعد ساعه
أسيل عصبت: زين أوريها ضاقت السوق اليوم!
أم فارس: روحي جيبي القهوه يا أسيل بدال هالصرخ..اللي يشوفك ما يقول تدرس معك و تشوفينها كل يوم
أسيل: لا هاذي زياره عائليه يعني غير
أم طلال: الله يخليكم لبعض
راحت أسيل و أم طلال تطالعها..طول عمرها كانت متخيله انها لفيصل..كانت تحبها و تعزها مثل بنتها..لكن فيصل بغى سهى وهي ماراح تعارضه..خاصة انها تحب سهى بعد..بس حز في خاطرها حال أسيل..و دعت ان نادر ينسيها فيصل..
راحت أسيل المطبخ و بدت ترتب الصياني و القهوه و الحلا..و رنا معها..
رنا: أسيل
|