منتديات قصايد ليل - عرض مشاركة واحدة

06-30-2011

أنا على المقناص قلبي يرّفي

أنـا علـى المقنـاص قلبـي يرفّـي

فتـره ونرجـع يـمّ أهلنـا مناكيـف

بديـار لفـروق الحـبـارى تلـفّـي

جنوب من حزم الجلاميـد وطريـف

الطير هـو غايـة غرامـي وشفّـي

اقـدره تقديـر الأجـواد للضـيـف

من كبر قـدره شايلـه فـوق كفّـي

وأرعاه تسع شهور بالقيظ والصيـف

وأدللـ.ـه لشفـت ريشـه مصفّـي

على الدعو واخفف النسـر تخفيـف

نقلـه يشرفنـي وشـوفـه يكـفّـي

عن شوف ناس ما تعرف المعاريـف

لـ. شفت لـي نّـوٍ بروقـه ترفّـي

نويـت أجهـز موتـري للتكالـيـف

القيـظ كـلـه جـالـسٍ ومتعـفّـي

وبرد المكيف نشـف الـدم تنشيـف

متـى سمـوم القيـظ عنّـا تقـفّـي

وسهيل قبل يعمّد الفجـر قـد شيـف

والنـار يصلـح شبـهـا للتـدفّـي

والبرد نوجس من نسيمـه هفاهيـف

وقمنـا لعزبتنـا نشيـل ونضـفّـي

ونكمل الناقـص ونمـلأ المطاريـف

واللي نشيـل مـن اللـوازم مكفّـي

ومكتفيـن العفـش بالحبـل تكتيـف

ويمكـن اليـا جينـا البقالـة نوفّـي

حاجات نشريهـا كمالـة مصاريـف

والصبح مـن حـزم أبرقيـه مقفّـي

صوب المعظم والهضـاب المقاييـف

بديار جعـل أشجارهـا مـا تجفّـي

تعلهـا غـرّ المـزون المـراديـف

في رفقة اللـي نارهـم مـا تطفّـي

على الشرف والجود ربـعٍ مواليـف

مجلاس طلقيـن الشـوارب بصفّـي

على الدلال اللي بهن ساخن الكيـف

خويّهـم مـا أوجـس كـلامٍ يحفّـي

غير المـزوح الطيبـه والسواليـف

عقـال وزن عقولهـم مـا يخـفّـي

و لا هم على الفاضي خفاف وملاقيف