منتديات قصايد ليل - عرض مشاركة واحدة

06-26-2011

واعذابي يوم هب الهوى صلـفٍ شمـال
ثم تعزّل عود من مرّني وصفـه غريـب
ضافي لبسه يحب الستـر عقـل وجمـال
والهوى بيّن وصـوفٍ غريبـه للحبيـب
شفت شيٍّ صابني واشتعل قلبي اشتعـال
قدرة الله جابته حـط فـي قلبـي لهيـب
عود موز كل ما ذعـذع النسنـاس مـال
ويتثنّى من الهـوى ليّـنٍ عـوده رطيـب
نـادرٍ فالبيـض جنسـه حلـيٍّ للغـزال
لا حشى ما شفت مثله بعيـد ولا قريـب
الحلى والملـح والحسـن كلـه والـدلال
من صفات اللي جرحني وانا منّه صويب
جوهرٍ غالي ثميـن اشهدانـه راس مـال
كامل بالزين مافيـه ابـد مثلـه رهيـب
الخطر بعيونه اللـي هدبهـا لـه ظـلال
سحرها ما ينقضـه لا مطـوع لا طبيـب
واتصبر ماقدرت الصبّـر والدمـع سـال
والضلوع الحدب لجّت وقمت أنحب نحيب
مثل ذيبٍ اصبح الصبـح ماجالـه مجـال
ثم عوى بالجال يبغى العشا وسط الشّعيب
حدّته سحم الضّواري على روس الجبـال
ثم تزايد بالعوى قـام يقنـب لـه قنيـب
كلها من سبّة اللـي عسـى رب الجـلال
يجمع بشملي مع اللي خيالـه مـا يغيـب
سعد من يمسك يمينه على السنّـه حـلال
والله انّه كاسبٍ مـن يجيلـه ذا نصيـب
واهني منهو رشف مـن ثنايـاه الـزلال
رشفةٍ من مبسمه تبري الجـرح العطيـب
والله ان يطري علي كل ما هب الشمـال
كيف أبنسى صاحبٍ مرّني وصفه غريـب