وش فيه لو حبيت من زود وش فيه
الحب نعمه كل نفس ٍ وصلها
أقلوب خلق ذاقت الحب تشكيه
مر ٍ يميل ابها ومر ٍ عدلها
أحدٍ عماه الحظ وأحد ٍٍ يقديه
الله خلق هالخلق والله كفلها
لو أسعد الأيام ينباع نشريه
بغلى ثمن والبايره نعتدلها
الجود مايبنى سوى بيت راعيه
والمكرمه بالحب قلبي حملها
الحب مثل النبت محتاج نسقيه
بعض الجفا يفسد محاصيل اهلها
واللي فقد شي ترى كيف يعطيه
يعطي هروج ولايتمم عملها
الحب لاجل الحب تسمى معانيه
ومن حب نفس ٍ كيف يقوى زعلها
ان كان تبحث بي من عيوب ياهيه
ان شفت شي من العذاريب قلها
وان كان تسمعني ترى الهرج تاليه
كل ٍ يطفي ناره اللي شعلها
أصويحبي لا صرت احبه ومغليه
تموت عذال الهوى في مهلها
والله احبه حب ماني بمخفيه
حب ٍ سكن بوسط الضماير دخلها
|