منتديات قصايد ليل - عرض مشاركة واحدة - اذا غرورك يمنعك تعتذر لي تعال جمبي وابتسم لي واسامح

06-16-2011

نورة : الوو

..: اهلين .. الاخت نورة ..

نورة: اي نعم من معي ..؟؟

: مو مهم من انا .. بس ابيك تعرفين بان ثامر واحد لعاب ومنافق .. وكمان صايع ..

نورة: من معي ؟؟

: انتبهي يانورة .. تراه راعي بنات .. وخاين .. خاين ... خاين

سكرت نورة الخط بوجهها بسرعه .. وهي متوتره ..

" من هذي وش تبي .. ومعقوله ثامر يطلع راعي بنات وصايع "

ووش عرفها فيني .. والسؤال الاصح وش عرفها بثامر .. ياربي لا لايكون بعد ماحبيته يطلع صايع وراعي بنات وخاين ..

يمه الله يستر والله .. اوف لا ثامر حبيبي وانا واثقه فيه ?

.................................................. ................................

بعد فترة ..

طلع لها بالصالة وجلس جنبها .. هي بعدت شوي .. ماغاب عنه حركتها .. ولكن ماهتم وقرب اكثر

اندق الباب وقام فتح .. كان الروم سيرفز جايب الفطور ...

جلس هو وياها قدام الصحون يطالعونها .. ولا واحد فيهم تملك الجراءه وطالع الثاني

كان في سحابة من المشاعر المختلطه.. تغيم فوق سفرت الطعام .. مشاعر ندم وحب ولهفه .. من نواف .. ومشاعر حقد والم وكثير من الحب اللي اعمى قلبها للاسف من ناحيه عبير ..

تجرء نواف ورفع عينه وقال : كلي ..

عبير من غير ما تطالعه .. اخذت كرواسون بالجبنه وحطتها في صحنها وبدت تقطع فيها وتلعب

كان نواف يطالع حركاتها وهو مستمتع .. وكانه يشاهد مسلسل مثير جدا ومايبي يفوت عليه اي لقطه ..

كان نواف يتمنى يصرخ باعلى صوت ويقول لها اســــــــف ..

بس للاسف غروره منعه من كذا ..

كأن عبير في هاللحظه حست عليه .. ماراح تتوه عن نظراته هذي .. هي اللي عشقت فيه كل شئ .. همساته .. تصرفاته .. وحتى نظراته

كان بالنسبه لها كالكتاب المفتوح ..

ابتسمت له .. وهو ارتبك ماعرف وش يسوي .. شرق وبدا يكحكح ..

ناظرها بعيون تعرفها زيين عبير .. هالنظرات كانت دايم تلحقها كلمه احبك ..

عبير وبصوت مجروح وحزين : إذا غرورك يمنعك تعتذر لي .. تعال جنبي وابتسم واسامح

قام من مكانه نواف وراح لها وقف وراها وحظنها من ظهرها وباس على راسها وهمس باذنها: آســـف

عبير والدموع بعيونها : ليــه .. سويت فيني كذا .. انا غلطت معك بشئ

لفها نواف لجهته وطالع بوجهها .. : طيش .. هبل .. غباوة .. حيونه .. اللي تبين قوليه .. نذل .. كلب .. حمار .. اللي تبين سويه فيني ..

قرب منها وباس على خدها مكان الورم : آســف

باس على شفتها المنتفخه بكل لطف وخفه على شان ما يعورها : آسف

مسك يدها وباسها : اسف

باس على كتفها مكان الورم: اسف

طاحت دموع عبير وانهارت

حظنها نواف بصدره وطبطب على ظهرها وهو يقول لها بهمس وحب: اووووووووش .. خلاص ... احبك والله .. اسف .. آآسف

..................................................

ام نواف : لا ..لا ...لا

ابو نواف : وش اللي لا ..

ام نواف : ريم لــ ريان وبس ..

ابو نواف : هذا نصيب يابنت الحلال .. وبنتك ما تبيه ..

ام نواف : موب بكيفها غصب عليها

ابو نواف : انهبلتي انتي .. هاااا .. تبينها تاخذه بالغصب ..

ام نواف : بالغصب .. بالرضى .. من اللحين اقولك .. ترى مو راضيه على هالزواجه ..

ابو نواف : موب لازم رضاك ..

طلع من الغرفه وتركها ...

طق طق طق >> دق على باب ريم

فتحت الباب وشافت ابوها ..

ريم: حياك يبه .. آمر

ابو نواف : سلامتك يابنتي .. بس بغيتك بموضوع ..

ريم: تفضل يبه

ابو نواف دخل وجلس على الكرسي

: شلونك ..

ريم فهمت وش يقصد بسؤاله : بخيير وعال العال

ابو نواف ابتسم: دوم .. بغيتك بسالفه ..

ريم: امر يبه..

ابو نواف : يابنتي انتي عارفه بان الزواج قسمة ونصيب .. ومافي شخص بهالدنيا الا وبياخذ نصيبه ..

اليوم اتصل علي ابو راشد صديقي وخطبك لولده الكبير راشد .. ونعم الولد .. اخلاق ..التزام ..ادب .. الكل يمدح فيه .. اهله شافوك امس بالزواج .. واعجبتيهم .. شوفي يابنتي مابي منك رد اللحين .. فكري زين .. هل قادرة تعيشي مع شخص غير ... وسكت .. ثم كمل .. فكري يابنتي زين .. ترى الرجال ما يتعوض .. وثم رديلي خبر .. الناس موب مستعجلين .. فكري يابنتي زين .. ولا يهمك احد .. لامك ولا عمك ولا اي احد ثاني .. لا تفكرين غير بنفسك .. انتي وبس ..

ناظرت ريم رجلها ومسكتها ..

ابوها شافها وقال: يعرف انك عرجا .. ويبيك .. يبيــك بكل عيووووبك

قام ابوها وهو تاركها بوسط صدمه يبيني بعيوبي .. الحين صرت معيوبه .. اه ياريان ماحافظ علي يوم كنت بصحتي ومو ناقصني شئ .. واللحين صرت معيوبه وكله بسببك انت وسديم .. اه بس .. صح اني مابي ريان .. ولكن مابي غيره ... اهـ ياراسي .. وش اسوي اللحين

دمعت عيونها غصب عليها .. يعني خلاص اللحين .. مافي ريان .. بس انا مابي ريان ولا ابي غيره .. مابي اتزوج مابي ولا رجال بحياتي .. كل الرجال خونه .. كلهم خـــــــــــــــــــــاينيــــــــــن

ورمت نفسها على السرير تبكي كل شئ .. تبكي حبها .. تبكي ريان .. تبكي رجلها .. تبكي حالها اللي وصلت له ..

.............................................

ياربي هذا وش فيه .. للدرجه هذي يتغلى ..

مسكت جوالها وفتحت على اسمه ... " منصــور "

" ادق ولا مادق ... ادق ولا مادق .. قطع عليها افكارها الجوال .. "

منصور .. يتصل بك

تهاني تبي تسوي ثقل جلست تعد لين 5 على شان ترد .. ماتبي على طول ترد

تهاني : الووو

منصور : بدري .. كان مارديتي احسن ..

تهاني بصراخ: خير بسم الله علي .. اكلتني بقشوري ..

منصور: لا تصارخين لا اجي واسطرك على وجهك خل تتادبين

تهاني : تخسى ..

منصور بزعاق يخوف: وشووووو

تهاني من الخوف سكتت ........

منصور وعلى فمة ابتسامه : اسمعي انتي .. جهزي نفسك بعد شوي بمرك

تهاني : ويــن

منصور : مووب شغلك

وطب ... سكر بوجهها المسكينه

تهاني جواها .. اوريك اجل انا تسكر بوجهي طييييب

وقامت ركض على الدولاب وطلعته كله تبي تلاقي لها لبس زين .. وبدت تجرب هذا وتفصخ هذا

لين ما رست على جينز ازرق نيلي .. سكيني ..مع حزام عريض على الخصر ..

ولبست فوقه .. قميص اسود شفاف مفتوح من الصدر على شكل () وتحته بدي اسود حرير

ورفعت شعرها شنيون ونزلت الغره من جنب وكان نازل من ورى بعض الخصل طالع شكلها مرة حلووو.. ولبست حلق طويل اسود ناعم ..

وكحلت عيونها وحطت بلشر وردي مع روج احمر فاقع ..طالع اللون مرة على بشرتها خيااااااااااااااااااااال

توها بتطلع جزمتها ( وانتوا بكرامه ) .. دق عليها بالجوال .. ردت على طول >> تادبت بعد التهزيئه خخخخخ

تهاني : الووو

منصور : هلا .. يلا انزلي انا تحت بالمجلس مع ابوك

تهاني : ان شاء الله ثواني

وسكرت منه بسرعه تكمل لبسها.. فرح منصور مرة .. اول مرة تقول له ان شاء الله .. هذا تطور مرة كبيير ... كان جالس مع ابوها ويحكي له وش بيسوي وايش سوا ووش التطورات بينه وبين تهاني .. ابوها مرة فرحان لتحسن تهاني وانها صارت على الاقل تميل لمنصور .. وهو متاكد لو يقول لها اللحين ابطلقك منه ومابي اغصبك على الزواج هي اللي بتحب يده على شان ما يفرقهم ..

.

اعذروني لو البارت قصير ولكن كان فيه مواقف حلوة صح ولا لا *_^

وش تتوقعون ..؟؟

هل علاقه وليد وسارة بتستمر بهالجمال والهدوء
وش ممكن يصير مع نواف وعبير بالمستقبل هل تتوقعون ان المشاكل خلاص انتهت ولا هل بيطلع شئ جديد يعكر صفو هالعلاقه
وش برايكم ممكن نوف تسوي شئ على شان توصل لبدر ولا استسلمت لما عرفت بسفره
وش اخرت هالزعل بين ريم وريان وهل معقول ريم تواقف على راشد
من اللي جالس يتصل على نورة هالاتصالات .. ويشوه لها صورة ثامر ؟؟ وهل معقول تصدقه
وش برايكم وين راح ياخذ منصور تهاني .. وهل هالليله بتمر من غير هواش ولا كالعاده لازم تقلب نكد بالاخير ...