06-12-2011
|
|
|
|
الشوق ماله عمر..!!!
الشـوق مالـه عمـر , يفنـى وينعـاد
له في الضلوع أن عاد وأن غاب رجفـه
.
مع كل فرقا , لـه ورى الجفـن ميـلاد
وأن ماتت الفرقا لقـى الشـوق حتفـه
.
جيت أقتل الفرقا مـن بـلاد لـبـلاد
مـلّ الطريـق يشيلنـي فـوق كتفـه
.
وأنا بعد مليت مـن كثـر مـا أرتـاد
هالشارع اللي كان لـك فيـه شرفـه
.
تظمأ عيوني شوفـك , وتشبـع سهـاد
عيّا الزمـن يقطـع ظماهـا بـرشفـه
.
لاوجهك أسقاهـا , ولا ذاقـت رقـاد
ماغير طيفـك , طيفـك اللـي أعرفـه
.
كنّه ظبـي , وعيونـي ظـلال صيـاد
يجفـل قبـل يرتـد للجفـن طـرفـه
.
مشكلته أنه كـل مـا أشتقـت يـزداد
حتـى مـلا جـدران وقتـي وسقفـه
.
وأصبحت أشوفه فـأول الغيم لاجـاد
وفـأقصى الشفق لاطاحت الشمس خلفه
.
وفي الأرض لانامت عقب صوت رعـاد
وفي كل شبـاك ٍ صحـت منـه درفـه
.
أتعبت طيفـك لـوم , واللـوم مافـاد
ويوم الأمل في شوفتـك مـات نصفـه
.
نويت أسافـر عنـك بجـروح ٍ جـداد
وعمر ٍ من أوراق الزمـن حـان قطفـه
.
نويت , لكـن جابنـي الشـوق منقـاد
وجابك حنينك , والزمن سـال عطفـه
.
شفتك تبسّم لي خجـل مـدري عنـاد
وفي نظرتك شوق ٍ من الظلـم وصفـه
.
حسيت كني طفـل , وعيونـك أعيـاد
ياعيدي اللي لـه ورى الصـدر رجفـه
.
سـمّ اللقـا صدفـة , وأسمّيـه ميعـاد
أنا أنتظرتك , وأنـت مريـت صدفـه
|