منتديات قصايد ليل - عرض مشاركة واحدة

06-11-2011

(13)

في غرفته يتـأمل بقهر ...

يرى انعكاسات اضواء الحديقة من خلال الشباك الكبير الذي يطل

على واجهة الحديقة

" رفضت ....تقول صغيرهـ .... هين يا الهنوف ان ماكسرت لك راسك

منيب حجرف "

غرس يدينه الثنتين بخصلات شعرهـ

وهو تحت تأثير الهم الجديد

" تتحدى و بقوة وجه "

عض على شفته بقهر فظيع

و تنهد بحسرة

ضرب يده بقهر على زجاج الشباك

دق جواله ...

و بنظرة ثقيلة جدا القى نظرة ....

" وشذالقرف انتهي من حثالة تطلع لي حثالة غيرها "

سحب الجوال و قفله وهو يدقـ ...

مسك الثابت و طلب رقم خالد بالشركة

حجرف : مرحبا خالد

خالد : هلا والله

حجرف : معليش ادري انك مشغول ولانتب فاضي بس

خالد : وش دعوة وش فيناا جديين هيك هههه

حجرف : لا جديين ولا شيء بس بقولك تراي مازلت عند طلبي و متشبث فيه للغاية

خالد : يا ابو ابراهيم ولا عليك امر شوي و نكمل الاجراءت .... هلا حجرف والله مقدر موقفك يا رجال

بس عاد قلت لك البنت صغيرة

حجرف بإصرار " متى تطيح بيديني " : لا صغيره ولا شيء وانا لو منيب شاريها ما كان اصريت للحين

عليها مع انو نواف بلغني انها رفضت

خالد : خير إن شاء الله اوعدك بقنعها

حجرف : ان اخوها الكبير و ااذا قلت لها اخذي حجرف ماراح تكسر كلمتك و تقول لا لو ايش

خالد : اكيد مهيب كاسرة كلمتي بس عاد انا خبرك بعد منيب صاحب قرارات تعسفية ولانيب بجبر احد

فما بالك عاد خواتي

حجرف : اختك بقلبي و بعيني و الله يشهد على هالشيء وانا ترا مازلت مصر بقوة عليها

خالد : الله يكتب لكم الخير وانا اقول بعد الزم شيء انا بناتنا عند عيالنا

حجرف : ايه ذالحكي اللي يشرح الصدر ياخوك اذا كذا اجل خلاص اقنعها

خالد : تدري انا واثق انو مصلحتها معك انت

حجرف : اجل عادي وش فيكم وجلين

خالد : لا وجلين ولا شيء بس مدري مااحب اغصبها و اجبرها

حجرف ابتسم بخبث : افا يعني و من يومنا صغار وانى واهي لبعضنا كيف تجبرها

خالد : خير بإذن الله عموما دق علي وقت ثاني الحين مرة منزق معي واحد الحين بس

ناشب لي بيناسبنا

حجرف بخوف : بمين لا تكون هههههه

خالد : لا خبل انا اطلع خواتي برا ههههههههه لا بيناسب بدر و سلطان

حجرف : بياخذ زينة ههه

خالد : ايه اظن

حجرف : نواف يدري هههههه

خالد : وش يدري ايه يدري وش خلاص عاد الرجال خطب و خلصنا

حجرف : اه يالدنيا بس ههههه المهم تكفى تصرف بموضوعي

خالد : ابشر ولا يهمك يالله الحين عندي ميتنق meeting

حجرف قفل منه وشات جواله

حجرف يدينه على خصره و يناظر الارضية : متى تجين بيديني بس ...

( تنهد بحرارة )

و فتح باب الغرفة و نزل تحتـ

-

-

-

>>> من زواية آخرى <<<<

حيث يحدق الخطر بعينين كبريتين

في ألمانيا حيث تكتظ زحمة الوجوه

في تلك الشقة الهادئة

نايف : العملية بعد بكرة

بندر : الله الله

نايف : يالله عسى خير الله يعديها على خير

بندر : وش فيك خايف هههههههه

نايف : لا والله منيب خايف خايف عليك

بندر : لا تخاف علي انا بإذن الله بحفظ الإله

نايف : الله يستر يارب والله اني زمل بالحيل

بندر : المهم دق على امي تراها تقول نايف ماسمعت صوته

نايف : والله دق على ذالملحوس حجرف يقول انو بيتزوجـ موب صاحي ابد

بندر : اوووما حجرف بيعرس مين بياخذ

نايف : الهنوف

بندر : مين بنته

نايف : اختنا قصدي اخت حرمنا ههههههه

بندر ابتسم : الله يسعدكمـ

-

-

بعد مرور يومين

في المستشفى بندر ينام على سرير العمليات و نايف ايضا

كلاهما يقرأون الاذكار و الأيات القرآنية

بدأت العملية و استغرقت 3 ساعات تقريبا

" لن استزيد في سرد تفاصيل الموقف "

بعد 4 ساعات

نايف ينقل إلى غرفة التنويم

بندر ينقل إلى غرفة الريكفري " العناية المشددة "

نايف في غرفة التنويم

بعد ربع ساعة

صحى نايف و يحس بقشعريرة بجسمه

نايف : بندر

الدكتور المناوب كان حوله و طمنه انو بندر بخير

نايف تطمن نوعا ما و ازداد ارتياحه بوجود دكتور بريطاني من اصل اردني يحكي عربي

الدكتور تامر : كيفك يا نايف بخير ياعمي

نايف يسحب نفسه : بندر وش صار عليه

الدكتور تامر : تحت الملاحظة ادع له يااعم

نايف بأسى : وش صار معه

الدكتور : والله مابعرف شو بقولك بس انو وضعه غير مستتب ابد

نايف بقهر : العينة واكبته

الدكتور : اهي ركبت و واكبتووه اكيد بس ماعم بنعرف اذا الدم عندوه استجاب

للكريات اللي بالخلية الجديدة او لا سو تحت الملاحظة للحين

نايف : بروح له بليز

الدكتور : استنى حتى تتحسن ياعمي وبعدين بتروح

نايف : لا بروح له عشان اتطمن

الدكتور جلس يسولف معه لحد ما طمنه و بعد مرور ساعه

استتب وضع نايف تقريبا

و ها هو يجتاح الخطوات ليتطمن على بندر

بندر قابع في سماء الاجهزة

و حالته غائبة تماما عن إحساس الواقع

نايف اول ماشافه انصدم : أي خير يا دكتور تامر

الدكتور : ياعمي احمد الله اللي مسوي مثل عمليته و نجى قليل ترا

نايف بقلق : طيب سبق وان نجحت

الدكتور : نادرا والله يمكن من بين كل 5 عمليات تضبط 3 كااقصى تقدير

نايف يدعي الله و يستغفر كثير

الدكتور : شو ياخي يالله ارتاح وانتا بعد تعبان

نايف رفض و جلس امام الريكفري يدعو الله يشفي بندر و ينتشله من غيبوبة المرض

يارب تعود له يارب تشفيه يارب انه طيب و حبيب يارب تساعده يا كريم

جلس نايف وهو يحس بألم فظيع براسه ...

جلس نايف يقرأ قرآن و يستغفر كثير كثير ....

بعد مرور 3 ساعات

الدكتور تامر اجبر نايف بالزور يرتاح شوي لانه طالع من عملية بعد

بندر لا يزال على حالته من الغيبوبة الدامية

و يغيب في غياهب اللا وجود

نايف بعد ما اخذ مسكن نـــام بهدوء ....

" و وضع بندر لا يزال على حالته لم يصحَ بعد من العملية "

-

-

-

-

تركي من الطرف الآخر مره قلق

و حالته جدا صعبه ولذا نام بالإستراحة عشان محد يحس بالحالة

و معه بدر و سلطان ....

بدر : ياخي طول بالك لا تفاول عليهم كذا

تركي بتوتر : الدكتور يقولي بندر مابعد صحى تدري كيف يعني من عقب العملية ماصحى

انا خلاص بكرة بسافر

سلطان يهديه : يارجال اذكر الله ان شاءالله انهم بخير شيء طبيعي عقب العملية

بينامون و يرتاحون ترا عمليتهم صعبه

تركي بخوف فظيع : ذا اللي بيحط عقلي بكفي اقولك توني محاكي الدكتور المشرف على حالتهم

يقولي بندر تضاءل و تراجع عرفت شلون يعني خلااااااااص

سلطان : اذكر الله و مافيه إلا كل خير

وسط توتر و مشاحنات النفوسـ

لا يزال بندر تحت اثار تلك العملية فلم يصحَ ..........

-

-

-

" في مكان أخر "

زينة : اقول فطوم

فاطمة : سمي

زينة : مدري بس تحسين الدواء بيجيب معي نتيجة

فاطمة : ترا اشغلتيني حتى يوم عزمتني بـ " ميوز " كل وقتك تحكين بذالدواء

زينة : مرة متحمسه اشوف عيالي هههه

فاطمة : انتِ جيبي ابوهم اول هههههه

زينة بألم : هههههه تدرين فكرت بشكل جدي بموضوع اللي حاكني عنه سلطان

فاطمة : أي ماشاءالله تراه رجال و مشهود له بالطيب

زينة : بس احس قوية علي انو زوجته توفت بالحادث يمكن مابعد نساها

فاطمة : هههه ياحبيلك تفكرين بامر وحده ميته ياقلبي خلاص زوجته يحبها اوكي كثر

خيره ان دل على شيء دل على طيب معدنه بس عاد ماتت و الحي ابقى من الميت

زينة : مرة خايفه والله بفكر اكثر و اكثر

فاطمة : يقولي سلطان انو مايبي يحاكي ابوك واعمامك لين توافقين

زينة تنهدت : ايه حلو كذا

فاطمة : الله يحلي لك حياتك يارب

زينة " تذكرت المجافي اللي تركها و راح ...سافر و تركها ....."

فاطمة : اقو لترا منتشرة اشاعه مدري وصلتك او تتصميخين عنها

زينة تنهدت : لا تكون سالفة بندر بس

فاطمة : أي سالفة بندر

زينة بعصبية : الناس من جد تافهين ولا عندهم شيء يحكون فيه غيري

فاطمة : اسكتي ياختي المدرسات بالمدرسة يقولون اكيد بيرجعها عاد يوم عرفوا انك اختي

نشبوا لي نشبة ميب طبيعيه يقولون صدق انها بترجع لبندر

زينة : ياذا الناس وش دخل اهلهم بالسالفه بس لا ومع ذا حكي فاضي و خرط ليته صدق

فاطمة : من جد مسخرة عشان كذا انصحك توافقين تأخذين ماجد عشان تحطين حد لحكيهم

زينة توترت : بفكر انا والله صدقيني بفكر اكثر

فاطمة : الله يكتب لك اللي فيه خير يارب

زينة بحزن : آمين يارب