منتديات قصايد ليل - عرض مشاركة واحدة - رواية سلمتة نفسي بإحسـآس واليومِ يضربني برصآص كامله

06-01-2011

طلعت وقعدت بالصالة…أخذت الريمونت وصرت أطقق في القنوات…ما فيه شي متابعته ولا برنامج شدني… لفيت وجهي على باب المطبخ المفتوح.. عليت صوتي عشان يسمعني سطام وقلت:بروح بيت أهلي اليوم…

سطام[بصوت عالي]: قلتي لآدم؟..

سارة: وش دخل آدم؟..

سطام: كيف وش دخله؟..استأذني منه بالأول..

يعني يتعمد يقهرني بأي طريقة.. أكيد هم متفقين مع بعض..

سارة: انت ودني بالأول وأنا أكلمه بعدين..

سطام[طل علي من باب المطبخ]: أخاف إذا وديتك تسحبين وما تكلمينه..

سارة: أف منك..خلاص دق عليه وقول له..

سطام: وليش ما تدقين عليه إنتي؟..

سارة: لأن…[كذبت كذبه مو طبيعية]..لأن جوالي ما يدق دولي..

سطام[ناظرني بنص عين]: ما يدق دولي!.. ماشي.. الكذبة هذي بعديها وبخليك تكلمين من جوالي بس يا وليك إن كذبتي مرة ثانية علي..

ابتسمت ابتسامة مسطنعة وقلت: وشلون عرفت إني أقدر أكلم من خارج المملكة..

سطام: دفعت فاتورة جوالك آخر مرة وشفتك مكلمة عبدالرحمن..

سألته: إنت اللي تدفع الفواتير..

سطام: لا..بس هالمرة دفعتها عشان آدم مو موجود.. وبعدين خلاص آدم هو المسؤول عن الدفع..

عصبت: نعم؟!..و ب يقعد يباشر علي بعد..

سطام: شي طبيعي..خلاص إنتي زوجته ومسؤوليته..

سارة: لا والله.. ما أبغى يصرف علي..

دخل سطام المطبخ وما عجبه كلامي…وأنا كتفت يديني وجلست على الكنبة متضايقة…يعني وشلون؟..خلاص…ب يشيلون مسؤولياتهم عني.. جا سطام وجلس جنبي…

سطام: ممكن أفهم إنتي وش صاير لعقلك..

سارة: ولا شي.. يعني مو معقول أنا أبي أتطلق منه وهو يصرف علي..

سطام: رجعنا على سالفة الطلاق مرة ثانية…إنتي ليش ما تفهمين؟..

سارة: ما أبغى أفهم… وما أبغى أحد يصرف علي..خلاص أنا بصرف على نفسي من أرباحي في الشركة..

سطام: إنتي أكيد انهبلتي…تبين تصرفين على نفسك من فلوس الشركة…

سارة: ولا أذل نفسي وآخذ فلوس من آدم..

سطام: أي ذل اللي تتكلمين عنه..هذا زوجك يا سارة..

سارة: لا لا لا…لأني مو مقتنعه إلى الآن إنه زوجي..

سطام[عصب]: مو مقتنعه!…أجل متى بتقتنعين يا طويلة العمر..

حطيت يدي على جبهتي وتنفست بهدوء… ما أبي أكمل خلاص… ناظرت سطام وحطيت عيوني في عيونه… من عيونه عرفت إنه عصب علي..

قلت[بهدوء]: أبي أروح لأهلي..

سطام: مو قبل ما تكلمين آدم وتستأذنين منه..

سارة: خلاص بكلمة… يالله دق عليه…

طلع سطام جواله ودق على آدم.. قعد شوي يرن بعدين قال: السلام عليكم…………. وشلونك؟……………..أنا الحمد الله بخير الله يسلمك………..[ابتسم وناظرني]……. ………سارة بخير الحمد الله ………………………هههههههههههه……………لا لا تخاف……….غريبة قايم ألحين..[ناظرت الساعة ولقيتها ثلاث العصر..هم عندهم تصير الساعة كم] ……………….أهاااا………….طب أنا داق عشان عندي هنا وحده مشتاقة لك..[شهقت وطيرت عيوني فيه]……ميتة وتبي تسمع صوتك………………. ….[الله يقلع ابليسك يا سطام..ألحين ب يصدق نفسه الثاني]………..خذها..

عطاني سطام الجوال وقال: ضبطته لك..

أنا رصيت على عيوني وحركت يدي بمعنى أهدده بعد المكالمة… أول ما شافني حركت يدي قال: بروح أشوف المكرونة لا تحترق…

راح وأنا مسكت الجوال وبلعت ريقي… ألحين وش بقول له هذا؟..حطيت السماعة على إذني وما سمعت صوت…قلت: ألو..

ونفس الشي ما فيه صوت..وخرت الجوال ولقيته موجود معي والخط ما انقطع بس آدم ما له حس…حطيت السماعة في إذني مرة ثانية وقلت: ألو… آدم تسمعني..

آدم:……………………………………..[ما يرد..لدرجة حسيت إنه مسكر السماعة ومو مسكرها مدري وشلون.. أو إنه حاط تعليق]..

سارة: آدم إذا تسمعني رد…وإلا ترى بسكر..

قال بسرعة: لا …لا تسكرين..

طيرت عيوني..كيف طلع الصوت مرة ثانية؟..بللت شفايفي بلساني وقلت: كنت أحسبك سكرت!..

آدم: لا ما سكرت..[بعدين سكتنا شوي وقال]..وشلونك؟..

سارة: طيبة..

آدم: ليش ما دقيتي علي من جوالك؟..

سارة[من وين أطلع له عذر هذا]: جوالي بعيد وما كان لي خلق أروح آخذه..

آدم:آهاااا..وكيف الأحوال عندك؟..

سارة: زفت..

آدم: أفااا..ليش؟..

سارة: لأني بعيدة عن هلي..

آدم: تبين تروحين لهم؟.[وصلنا]..

سارة: بروح لهم أنا أصلا..

آدم[يسوي نفسه ما سمعني]: نعم؟!..

سارة: إيه بروح لهم اليوم…

آدم: وانتي داقة عشان تستأذنين مني؟..

سارة: لا..

آدم: …………………………………….[ما تكلم]..

بللت شفايفي وقلت: أنا داقة عشان أعطيك خبر إني بروح لهم وبنوم عندهم بعد..

آدم: خلاص أوكيه..روحي لهم بس لا تنومين..

سارة: من قال لك إني أشاورك؟..أنا أعطيك خبر وبس..

آدم: أهااا..وقولي لي بالمرة إنك بتروحين بيت خالك..

ابتسمت ابتسامة مكر وقلت خن ألعب بأعصابه شوي: يمكن أمر عليه كذا يعني..لأني مشتاقة لخالي..

آدم[يهدد]: إن سمعت إنك مشيتي على حدود بيت خالك هذا.. والله لأرجع ألحين..[قام يحلف]..

سألته[أنرفزه زيادة]: كم ساعة بين أمريكا والرياض؟..

آدم:…………………[أخمن ألحين إنه لو كان يسوق ب يصدم و لو كان بالحمام ب يزلق ولو كان يشرب ب يشرق]..

كملت: في الوقت اللي بتكون فيه بالطيارة وراجع…أقدر أسوي اللي أنا أبيه..

سمعت صوت تسكيرة الجوال:طوط … طوط … طوط … طوط …طوط…طوط..

الله لا يعافيك…ولا مرة قد قلت لي مع السلامة…تذكرت كلامي… حسيت إني نرفزته بزيادة… حرام أكيد هو في أمريكا مطرطع… خله أحسن لما يطلقني… ضحكت على اللي سويته…وصرت أضحك بصوت عالي وحسيت إني شريرة…. جاني سطام وبيده الملاس…

سطام: وش كنتوا تقولون؟..

سارة: أبد… قالي نكته وفطست عليها من الضحك..

سطام: وش النكتة؟.

قلت[ب أقهره شوي]: ما تصلح إلا للمتزوجين..

سطام: يا ألله…حتى النكت..

هزيت راسي إيه بعدين شفت الساعة صارت ثلاث ونص..سألته: وشذا الغدا اللي ما خلص؟..

سطام: اصبري شوي..

سارة: عساه يطلع زين مب زي أمس..

سطام: لا بيطلع حلو..وبدون فلفل..

سارة: أحسن بعد..

تركني وراح المطبخ…أنا ما عمري شفت رجال يحب المطبخ والطبخ كثره… ب يريح مرته ب يقعد هو اللي يطبخ لها… قمت من مكاني ورحت عشان أصلي العصر.. وبعد ما خلصت لقيت سطام حاط الغدا على الطاولة…قعدت جنبه وسميت بالله وأكلت…بصراحة المكرونة كانت لذيـــــــــــــذة.. عبيت بطني منها… ولما خلصت غسلت ورقيت غرفتي..فتحت الدولاب وطلعت لي شيال لونه كحلي مع تيشيرت أبيض… و فكيت شعري ونفشته..خليته كله كيرلي.. وأخذت بندانة لونها كحلي ومزخرفة أبيض وربطتها على شعري… طلعت لي حلق دوائر كبار ولبستها ولبست جزمة رياضية بيضا… وقفت قدام المراية…رحت لتسريحتي وطلعت لي كحل وتكحلت وحطيت قلوس شفاف.. ولما خلصت شلت عبايتي و شنطتي اللي حطيت فيها العطر والجوال وشوي من مستحضرات التجميل… طلعت من الغرفة ونزلت..كان سطام قاعد في الصالة ولما شافني وقف وقال:بتروحين كذا؟؟؟!!..

سارة: ليش وين بروح أنا؟..

سطام: مو كأنه…[ناظرته]..لبس مـ مـ ..[عقدت حواجبي]..مجاري..

سارة: وش الألفاظ الدنيئة هذي؟..

سطام: مب قصدي.. بس هذا اللي طلع معي من تعبير..

سارة: لا تعبر مرة ثانية الله يعافيك.. ويكفي تعبيرك اللي عبرته عند آدم..

سطام: وش قلت؟..

سارة: أبدا..ما قلت شي..يالله بس خن نمشي..

لبست عبايتي وتعطرت…طلعت وركبت السيارة مع سطام وأنا طايرة من الفرحة..وقلت له يوديني عند أبوي شوي… عصب في البداية وقال إنه كان مخطط يوديني مشوار واحد…بس أنا لزمت عليه وقلت:إن ما وديتني لأبوي ترى بوافق إني أعيش مع آدم..

سطام: إنتي تعيشين مع آدم.. إنتي ما تواطنين سيرته حتى..

سارة: تراي مجنونة وأسويها..

ناظرني وناظرته بتحدي بعدين وافق وما قال شي… رحت لأبوي وجلست معه…لما أكون عنده أحس إني أرجع طفله صغيرة تحب الدنيا وما يهمها شي… طفله ما عندها هموم ومشاكل… طفله أملها الوحيد لعبة متمسكه فيها ومعين اللي حولها حرموها منها …أحبه وأموت فيه…ما في أحد يساويه بالغلاة في قلبي كثره… الإنسان اللي كنت أكلمه وأحب أسمع صوته… وأنصت لإحساسه..إلى الآن هو شاغل فكري وبالي… متى أرجع وأكلمه مثل أول…

قمت من عند أبوي وسلمت على الدكتورة غادة اللي كانت تسولف وكأنها صديقة مقربة لي… فضلها كبير وما رح أنساه… يكفي إنها مع أبوي دايم وملبية احتياجاته… كان ودي أقعد أكثر بس ما بي أتأخر على أهلي… طلعت من المصحة ورحت لبيت أبوي… أول ما وصلت رنيت الجرس… لأني ناسية وين حطيت مفتاحي.. وقفت ووقف سطام معي…

سطام: شكله ما فيه أحد..

سارة: وين ب يروحون يعني؟..

سطام: ما أدري.. بس إذا فيه أحد أكيد ب يفتحون..

ولما فتح الباب فرحت يعني أكيد فيه أحد بالبيت.. دخلت بسرعة وأول ما شفت اللي فتحلي الباب ضميته…كانت فهده اللي فاتحه الباب..

فهده: سارة..وين رحتي؟..أمي جوا في الغرفة وتصيح عشانك رحتي..

عورني قلبي: تصيح..

هزت فهده راسها وقال:إيه..وحتى روان مسكرة عليها الغرفة وما تبي تشوف أحد..

سمعت صوت سطام: هااه..خلاص؟!..أروح؟..

طليت عليه من الباب: إنت إلى الآن فيه؟.

سطام: يعني أروح؟..

سارة: إيه خلاص رح..

سطام: سلام..

سارة: مع السلامة..

فهده: مين هذا؟..

سارة: هذا عمي..

فهده: هذا اللي أخذك مننا..

يا حبيبتي يا فهده… وش أسوي؟..غصب عني.. سامحوني.. دخلت البيت وأنا أحس برجول ترتجف.. كان هادي وما فيه صوت.. الدنيا كلها صمت.. بلعت ريقي وبللت شفايفي.. أول مرة يكون البيت كذا… لمحت جوري في وسط الصالة فمشيت بشوي شوي ورحت وراها.. كانت تلعب وتركب.. وفهده جنبي..حطيت إصبعي على فمي عشان تسكت.. وفهده مشت معي على الخط.. راحت فهده قدام جوري وأنا جيت من وراها.. رفعت جوري راسها وناظرت فهده بعدين قالت:وش تبين؟..

وفهده مبتسمة وما تكلمت.. أنا ما قدرت..لما سمعت صوتها ضميته بقوة من وراها… وخرتني ولفت عشان تشوف مين أنا..ولما شافتني..صرخت: آآآآآآآآآآآآآآآآآآآآآآآآه.. ماما …ماما سارة جت..

ووقفت جنب فهده وقامت تصارخ وتنادي أمي: مااااااااااااامااااااااااااااااااا…مااااااااااااام اااااااااااااااا. سارة جت..سارة جت…سارة جت..سارة جت.. سارة جت.. سارة جت..سارة جت.. سارة جت..

سكرت على إذني..كان صوتهم عالي..ومع صدى الصالة طالع الله لا يوريكم.. كانوا ثنتينهم يصارخون وينادون أمي.. وسمعت صوت دخل من بينهم..وخرت يدي من إذني وركزت في الصوت.. هالصوت الناعم..أحبه.. لفيت بسرعة وطاحت عيوني عليها وهي واقفة جنب الدرج… وتناظرني بعيونها اللي مليانه دموع.. ما أعرف كيف أوصف احساسي لما شفتها.. يوم واحد.. وكأني غبت عنها دهر.. أحبها.. أحبها.. مشيت لها وأنا أسابق خطواتي أبي أوصل لها بسرعه وأضمها… كنت أحس بالسعادة وأنا في حضنها.. وهي تضمني حسيت إني رجعت لبيتي… رجعت لمكاني الأصلي… ما كان ودي أوخر منها أبدا.. بس باقي روان ما شفتها.. اشتقت لها… بعدت عن أمي وقلت: يمه أنا آسفة..

وجدان: زعلت كثير لما رحتي.. تدرين ليش؟..[مسحت دموعها]..

سارة: ليش؟..

وجدان: لأنك ما سلمتي علي قبل ما تروحين.. رحتي ومحد كان يدري عنك..

سارة: والله آسفة… بس ما أدري وشلون صار هذا كله..

وجدان: مب لازم تبررين يمه..مكانتك في قلبي ما رح تتغير.. إنتي الغالية..بنت الغالية.. بنتي..