منتديات قصايد ليل - عرض مشاركة واحدة

05-10-2011

أهلين وسهلين بالحلوين ..

مبارك عليكم العشر والله يجعلنا ممن أحسن القول والعمل فيهن..

بحمد لله تيسرت لنا سفرة إلى الدمام حيث الاسترخاء على الرمال الذهبية، ومشاهدة شروق الشمس على الشواطئ الناعمة والمرمرية، وممارسة رياضة المشي في الهواء الطلق العليل!

وبالفعل حزمنا حقائبنا متجهين إلى المنطقة الشرقية محملين بالآمال العظام لإجازة رائعة بكل ما تحمله الكلمة، وصلنا إلى الدمام مع غروب الشمس وذهبنا نبحث عن شقة، ومن هنا بدأت رحلة العذاب!!

السيارة تغص بطبقات اللحم، والعظم (اللي هو أنا) وأنواع النفسيات الشينة والمهاوش والغثا، وزاد الطين بلة أن الشقق محجوزة فل!!، ما أصدق هذولا كلهم أهل الرياض وما جاورها؟!! ولا يهونون أهل القصيم وما حولها؟!

في البداية كنا نبحث عن شقق خمس نجوم، بعدين تنازلنا شوي أربع نجيمات أو ثلاث، والحين استوت الأمور لو عشة في السطوح أو خيمة في البر،
أنا أبي حمااااام يا جماااااااعة!!
ولم نجد أيا مما سبق! فجلسنا نتباحث في الأمر ماذا نعمل؟!!
قلت: الحين تكره الصلاة والإنسان يبي حمام، خلينا نخلص أولاً من هذي المشكلة حتى نقدر نفكر صح.

رحنا حمامات المسجد، والحمد لله خلصنا بعد انتظار طويل لدورنا كدت خلاله أتهاوش مع اللي قدامي، الأخت ماسكة الدور وفي النهاية اكتشفت أنها تبي تحط مكياج بس!! وأنا لولا الحالة اللي أنا فيها كان عرفت أمسح مكياجها بالبلاط!! أعجبكم أنا في الأزمات!

عدنا إلى السيارة وجلسنا نتباحث أين نذهب؟! أنا اقترحت ننام في إحدى السفن الراسية أو في سطح مسجد، طبعاً من الحسد كلهم رفضوا أفكاري الخرافية!!

قالت هيا الدافورة المدارس الحين في إجازة ليه ما ننام فيها!!! قلت والله لو على رقبتي أنام في الشارع ولا أنام في المدرسة!!
الحين بالعافية يا الله عطلنا نرجعلها مرة ثانية؟!!

قال سعيدان ننام في الأستاد، مكان نظيف وواسع ومسطحات خضرااااء يتغنى فيها الشعراء!!

الساعة الآن تجاوزت الثانية عشرة وبدا النعاس يداعب أجفاننا أين نذهب؟!
وفجأة! دوى صوت قوي قائلاً: وجدتها،
احم إنه صوتي أنا فقد وجدت الحل!
إنه حل رهيب ومما يزيد روعته أنه مجاني، كما أن الأكل والشرب والخدمة مجانية، وفوق ذلك عناية خاصة بكل فرد....
ليه ما نسوي حادث وننام في المستشفى!!!!!!!

وأخيراً وبشق الأنفس لقينا شقة في أطراف المدينة ومستواها يمشي الحال، المهم بسرعة خلينا نفرغ الحمولة ونذهب إلى الشاطئ.....
بسرعة دهنت وجهي بكريم الوقاية من الشمس ولبست نظاراتي الشمسية – مع أن الوقت ليل بس لزوم الكشخة- وأخذت معي كيساً لجمع القواقع واتجهنا إلى البحر، يا سلااااام!

وبدأنا المعاناة الأخرى للبحث عن مكان نجلس فيه، ما أصدق!! الظاهر إن أهل المملكة كلهم رايحين على الكورنيش!

طبعاً سعيدان ارتع مستوى هرمون الدرابيل اللي عنده وزعل وشق كيس جمع القواقع حقي وطلع رأسه من الشباك وصرخ بالمتزاحمين عند الشاطئ:
يا ناااااس!
ترى هذا مو زمزم هذا بحر على هالزحمة!!

عدنا إلى الشقة ومعانا عشانا ولا شفنا بحر ولا قواقع ولا حاجة!! والعتب على سعيدان اللي شق كيس القواقع!! –الله من كثر القواقع بس!-