ام علي " بتكبر .. وبعصبية " : حمدوا ربكم جايبت لكم اياهم ابلاش .. ترفسون النعمة .. اتكشخوا اشوي .. اخذوا لكم من الغاليين . والله خلاص اتعودتون على الأشياء الي بريالين او بثلاثة
علياء " عصبت من طريقة كلام عمتها " : اي لأن احنا متعودين على الي بريالين .. من جذي ما نبي الغالي ... فلا اتعبين عمرج .. وبعدين من قال لج ان احنا نبي نتكشخ وقاعدين انطر .. علشان انصير مثل الناس ... احنا بكيفنا .. الي نبي انسوي .. ولو نبي نشتري الشي .. حتى لو كان بمليون راح ناخذ ..
سكينة " بتطنز " : هههههاي بمليون ... خلى يحصل لكم 100 اول .. بس حلو الواحد ان يحلم .. يشتري لي اشياء بهاي الأثمان ..
روعة " عصبت " : لا عادت زودتينها واايد ... اقول احترمي نفسج .. وثمني الفاظج ... ورا احنا طارين من عندكم اجيبون لنا افلوس ... والشي الي راح ايجي من عندكم ما نبيه .
فاطمة : وحتى هاي العطر .. وانه اشمه علبالي ريحة مجاري ... ما ابي يودوا " وتمده تعطيهم " ..
ام علي : طول عمركم اعيال فقر .. ولا راح تتطورون .. حتى اسلوبكم في الكلام ... مال قديم
علياء " فقدت اعصابها ... ورفعت من حدة صوتها " : تكفييييين .. عاد انتي يام التطور ... انتو الأنترنت ما تعرفون تستخدمونه حتى الأسم ما تعرفون اتقولونه .... والله جوفي لبسكم .. الي كله من المجمعات ما اجوف شي حلو او متناسق .. احمر على وردي الحمدلله والشكر ... والله الجناط .. الي يقول مال السفر مو مال ايد ....... اقول سكتي سكتي والي يعافيج .. لحد يسمعكم .. علباله انتو قوم عنتر ..
ام علي " عصبت " : احترمي نفسج ... علبالج انه اصغر اعيالج .. ترفعين صوتج عليي ... صج انج قليلة ادب ... " وترفع ام علي ايدها على علياء تبي تصفعها ... لكن علياء مسكت ايد ام علي بقوة ونزلتها بكل قوتها .. "
علياء : انتي اخر وحدة اتفكرين ترفعين ايدج عليي ... لحشها لج حش .. فاهمتني ...
ام محمد مو مصدقة الي تجوف .. كانت بس ساكتة واتجوف الهواش الي صاير ... وما عرفت شنو اتقول او شنو اتسوي ...
اما بشار ومحسن فكانوا حاضرين على كل شي وجافوا ... وهنا يدخلون
بشار " والدمعة في عينه ": بس كافي .. خلاص .... كافي نجرة .. كافي الي تسونه ... دوم متهاوشين ... ياناس انتو موب غرب واجانب .. انتو اهل .. بدل مو كل واحد ايساعد الثاني .. كل واحد ايفكر اشلون يؤذي الثاني .. او شلون ايذله وايهينه ... طالعوا من حولكم ... جوفوا الناس شلون عايشة وانتو شلون .. جوف الدنيا اشلون تمشي .. وانتو تمشوا عكسها ... واتقولوا الدنيا تظلمنا .. ومحد قاعد يظلم غيركم انتو
محسن " متأثر من الوضع " : اربع وعشرين ساعة تتهاوشون ... جوفوا عائلتنا اي كبر كانت والحين جوفوها اشلون صارت ... وين كنا وين صرنا ... خوالي وتهاوشتون معاهم وافترقنا معاهم .. لمن انجوفهم ما انكلمهم .. حتى اعيالهم ما صرنا نعرفهم .. ليش كل هذا فيكم ... ليش تكرهون بعض .. ليش ما احد ايداني الثاني ... انتو يالكبار الي لازم اتعلمون اشلون انحب اهلنا ... صرنا احنا انعلمكم ... ليش ؟ ليش ؟
وتدخل زينب وتكمل على الكلام : انه طول عمري ما جفت اهل جذي .. اتحسر يوم اني اجوف رفيقتي كل اهلها صوبها .. وما اتحس بالنقص .. مو احنا .. شلي فيكم غير عن الناس ... شلي فيكم ... ليش اقلوبكم اتغيرت .. ليش الدنيا اتغيرت وغيرتكم معاها ... ها القد احنا مو مهمين عندكم .. اتعلمونا من صغرنا على الكره .. والحقد ... اتعلمونا على اشياء احنا ما نبيها ... وغير هذا تجبرون على اشياء من دون ما تشوفون راينا .. اذا كنا احنا موافقين او لا
هنا سكينة رجعت لشخصيتها الطيبة وكملت على الكلام : صج احنا اغنيا . بس جوفوا حياتنا .. مو بالسعادة الي عايشينها خالي عبدالله ... وين اخوي وين اختي .. كلهم ابعاد عنا .. كل واحد بديرة ايعيش ابروحه .. ولا يفكر حتى ان يسئل عنا ... ليش يا يمه .. تبعدينا عن بعض ... ليش ما اتحبين ان نكون ايد وحدة وقلب واحد .. كل واحد ايحب الثاني ... كل واحد ايشيل هم الثاني ... والله عاجبتكم العيشة الي عايشينها .... انتو الكبار تتهاوشون .. واحنا الصغار شذنبنا ... ذنبنا ان عايشين معاكم ... ذنبنا ان احنا من اهلكم .. الدنيا عمرها ما ظلمتنا .. بس انتو ظلمتوها وخليتوها تظلمنا .. وصار كل شئ من فعل ظلم الدنيا ...
علياء كانت تبجي بهدؤ وتتذكر كل شي مر بحياتها ...
كفاية
كفاية انتو ظلمتونا
وحرمتونا .. وذليتونا
حرمتونا من عم جنبنا
ايظمنا ويمسح دمعنا
حرمتونا من السعادة
والوفا والحب والصداقة
خليتونا في دنيا تظلمنا
ما تفكر فينا او ترحمنا
كفاية ما عملتوا فينا
كفاية ما جرحتو فينا
وين حبكم لبعض
وين قربكم لبعض
اتفرقتوا وفرقتونا معاكم
وخليتونا في غربة
انتو السبب فيها

في بيت ام ناصر
ام ناصر : قلت لا يعني لا ... اليوم خالتج في بيت يدتج ... وبنروح العصر اهناك ما في طلعه
زهرة : يما يما ... انه المتى قعدت ويا خالتي .. او ويا عيالها .. انه كلهم ما اواطنهم
ام ناصر : استحي على ويهج هاي خالتج .. وبعدين بسج كل يوم و الثاني قلتي بتطلعي ويا رفيجاتج .. ابوج ما راح يرضى
زهرة : بلى يمه رضا وقال لي اقول لج
ام ناصر " بحزم " : ماكووو
زهرة " تحوس عند امها .. وتتلوس عليها " : يما ... اخر مرة عاد ... ها المرة غير بنتسوق ... غير عن كل مرة بس نطلع ناكل ... وبعدين يما توه الصبح بنروح نتسوق ونتغدى وبعدين يمديني ارجع واروح وياكم حق الخالة العزيزة .
ام ناصر " بتفكير " : ومن الي بيوديج وبيجيبج ... انه مو متفرغة لج ... بقعد بطبخ .
زهرة : نصور ما راح ايقصر
ام ناصر " اتمللت من حنة زهرة ... تبي تنهي السالفة " : روحي سئلي اذا رضا .. بعدين فارجي .. و لاتتأخرين الساعة اربع انتي منرزعة في البيت فاهمة
زهرة " تحضن امها واتحببها " : مشكورة يا احلى ام في الدنيا ... الله لا يحرمني منج
ام ناصر " تبعدها عنها " : روحي بس روحي ... ذبحتيني حق المصلحة الله لا يحرمني منج ..
زهرة : لا يما افا عليج ... اصلن انه اكثر وحدة في ها البيت احبج .. بس انتي ما تعطيني ويه .. كل شي حق الريم ..
ام ناصر " تذهب عنها " : زين انتي ما حصلتي الي تبين ... يالله فارجي لأخوج ..
زهرة : افا عليج ... طيراان اروح له
وتروح زهرة لأخوها ناصر ... تدق باب الحجرة ... وتفتحه واتطل براسها وتدخل ..
زهرة : نصوري .... نصوور
ناصر " يترك تلفونه " : نصور بعينج ... اصغر اعيالج انا علشان نصور .
زهرة " تقعد بجنبه " : من حبي لك من جدي ادلعك
ناصر " يدري حركات اخته هاذي كلها بس علشان تبي شي منه " : خلصيني قولي شتبين ما يحتاج ها الف والدوران اضلين ليي ساعة .
زهرة : اوكي حبيبي .. قصرت علي المسافة .. اسمع ابيك عقب الصلاة اتوديني المول ... علشان اهناك رفيقاتي مسوين جمعة .. راح نتسوق شوي وبنتغدى وبرجع البيت ... شرايك ؟ شقلت ؟
ناصر " عارف السالفة " : انزين انزين ... بس ولي الحين ... وعقب الصلاة 12 اتكونين بارزة ما برزتي ... دوري ربعج ذيك الحزة
زهرة " تستانس " : 12 إلا خمس بتلاقيني في السيارة انطرك
ناصر : انزين ... ما كملتي .. بس ذلفي شعندج قاعده
زهرة " تطالع اخوها ... وتغني " : خيالك خيال ... مش عايدي
ناصر " يمسك المخدة ": ذلفي برع ... لا باهذي على ويهج الحين
زهرة ... تتضحك وتركض بره الحجرة ..
في حين مريم كانت قاعده تنتظر في الحديقة دقت الباب ... علشان تطلع لرفيقتها وحبيبتها فاتن ...
زهرة جافتها وراحت له ..
زهرة : شتسوين اهني في الشمس ... دخلي داخل
مريم " تتلعثم " : ها .... لا ولا شي ... اشم هوا طبيعي .. احس روحي مختنقة .
زهرة : لالا .. حلفي بس ... يالله داخل جدامي ... بسرعة
مريم " في نفسها " : هاي وقتج يا العقربة ... وتكلمها : انزين .. انزين
وتوها مريم بتدخل داخل الا يدق الباب
زهرة : وين رايحة
مريم : بفتح الباب
زهرة : لا انه بروح
مريم : انتي ما عليج شيلتج انه عليي
زهرة : انزين ... اجوف فتحيه قدامي
وتفتح مريم الباب بأبتسامة مشرقة ...
فاتن : هلا مريوم " وتبتسم لها "
مريم : هلا
ويحضنون بعض
فاتن : اشتقت لج يالسبالة
مريم : وانه بعد
" زهرة تطالع المشهد ... وتقول في نفسها : والله انهم سالفة ذيلين .. بس لالا المشهد مؤثر ... اروح اتجهز احسن لي من احبج وتحبيني ... وتذهب زهرة داخل "
فاتن : المهم ما اقدر اطول اكثر ... ابوي ينطرني في السيارة .. هاج يودي هاي علشان تتذكريني
مريم "تاخذه " : ماراح انسااج ...
فاتن : المهم طيارتي اليوم الساعة 7 ... برجع عقب سبوع وشي ... اهتمي بروحج ... ولا تصيحين واايد ... اوكي حبيبتي
مريم " والدمعة في عينها " : إن شاء الله ... انتبهي على روحج ... واكلي عدل ... مو تنسين عمرج
فاتن " والدموع بدت تنزل " : ما ادري اشلون بقدر اعيش ها السبوع من دونج ..
مريم : اوكي خلاص خلاص ... روحي الحين لاابوج يعصب عليج
فاتن : اوكي
ويحضنون بعض مرة ثانية وسمحوا للدموع تنزل بكل هدؤ ...
فاتن : اوكي " وهي تمسح دموعها " : يالله باي
مريم : بااي
وتدخل مريم وهي حاملة الي عطتها اياه فاتن .. وكان عبارة عن قلب حليو محاوطة الريش والفرو . وداخله صورتها ... ومعاها كانت رسالة ...
زهرة وهي تشور شعرها : شعطتج العاشقة الولهانة
مريم : صورتها ... وبعدين شخصج
زهرة : تكفييين .. خرعتيني
مريم : اوف