ام محمد : انزين
وبعد فترة تعود ام ناصر وتتكلم
ام ناصر : ماعليه ... ما عنده ابو ناصر شي ... متى بيجي ؟
ام محمد : مادري اهو قال العصر ... الحين بتصل ليه وبقول ليه متى الوقت ... وبخبرج
ام ناصر : تمام ... بعد في شي
ام محمد " تحس بالأحراج " : لا ولا شي ... ما تقصرين بنعذبج معانا
ام ناصر : لا ولا عذاب ولا شي
ام محمد : انزين ... يالله ما اطول عليج .. مع السلامة
ام ناصر : الله يسلمج
وتمسك السماعة ام محمد بحزن واهي اتفكر : لو انك اهني يا بو محمد ما ااحتجنا للغير ... وتتصل ...
ابو حميد : آلو
ام محمد : آلو ... سلام
ابو حميد " يبتسم ... وفي نفسه حقق مطلبه " : عليكم السلام .... ها بشري
ام محمد : خلاص ما عليه تقدر اجي .... بس العصر الساعة جم بتجي
ابو حميد " ينظر إلى الساعة " : الساعة 4 ونص تقريبا
ام محمد : صار ... يالله ما اطول .... سلام
ابو حميد : سلام
ويقوم ابو حميد من مكانه وينطط كا الأطفال ويصرخ بأعلى صوته
: هيييييييييييييييييييييييييييييييييييييييييه ..... بحصل على فلووووسي بعد طول انتظاار
وام محمد حست بملل من كثرة الأتصالات الي سوتها .... وتدخل فاطمة الغرفة
فاطمة : يمه .. من مساعة وانتي في التلفون
ام محمد : شاسوي بعد ... اشغال الدنيا .... تعالي ابيج اتسوي شغلة
فاطمة : نعم يمه " وتذهب وتجلس بالقرب من امها "
ام محمد : ابيج تتصلين بيت عمتج ام ناصر ... وقولي لها الريال بيجي الساعة 4 ونص
فاطمة " تستغرب " : اي ريال هذا
ام محمد " تبي تنهي الموضوع " : انتي اتصلي وبس ما عليج
فاطمة : إن شاء الله .... انزين دقي الرقم موب حافظته
ام محمد : يبي
وتدق الرقم ام محمد ... وتتكلم فاطمة
فاطمة : آلو
ام ناصر " تتسغرب " : هلا فاطمة
فاطمة : اتقول لج امي الريال راح ايجي البيت الساعة 4 ونص
ام ناصر : اها خلاص قولي لها ... احنا اربع في البيت
فاطمة : يبي وياج زهرة من زمان ما جفناها
ام ناصر " تبتسم " : إن شاء الله .... ما تبون زين نصور مسكين يقعد ابروحه يعني " تمزح "
فاطمة : لالا يبي يقعد ويا محمد
ام ناصر : انزين .... يالله سلمي على الكل
فاطمة : الله يسلمج .... يالله مع السلامة
ام ناصر : الله يسلمج
في السعودية
بيت ابو علي
ام علي جالسة بالقرب من ابو علي ... ... ام علي تعطي ابو علي فنجان الشاي .... وتأخذ لها ايضا اهي فنجان وتكلمه
ام علي : شرايك في ها العطلة ننزل البحرين
ابو علي " يشرب الشاي " : وليش
ام علي : تعرف الحين اخوي ابو محمد في السجن ... ومرته مسكينة ابروحها في البيت ... من بيصرف عليها ما عندها ريال ... وعيالها كلهم يهال ... انروح انجوف اخبارهم ومرة وحدة نشتري لي جم حاجة
ابو علي : يمكن ما تقبل
ام علي : ليه ما تقبل ... احنا اهل ... مو احد غريب
ابو علي : خلاص الي تشوفينه .... المتى تبين انروح
ام علي : بكره زين ... علشان اجهز الأشياء واليوم العصر انروح السوق
ابو علي :براحتك
نرجع إلى البحرين
في بيت ابو محمد
تصل ام ناصر وابو ناصر وعيالها لمنزل ابو محمد ... ويدخلون المنزل ...
ام ناصر تكلم ابو ناصر : لحظة انطر ... بسوي لك درب
ابو ناصر : انزين
وتدخل المنزل ام ناصر والعيال
ام ناصر تكلم ام محمد : يالله البسي عباتج ... علشان يدخل ابو ناصر
ام محمد : إن شاء الله
وبعد فترة
ام محمد : يالله قولي له يدخل
ام ناصر تتذهب لباب المنزل لتنادي ابو ناصر
ام ناصر : تفضل حياك
ابو ناصر : زاد فضلج
ويجلس في المجلس كل من ام ناصر وابو ناصر وام محمد ... في حين العيال في الصالة يتسامرون ويسولفون ...
في المجلس
ابو ناصر يبداء الحديث : من هذا الريال الي بيجي شنو اسمه " يوجه حديثة لأم محمد "
ام محمد : اسمه ابو حميد .. اهو اتصل من قبل . يوم الي انحبس ابو محمد وكان متردد وسئل عن المتى الحكم .... واليوم اتصل قال يبي ايقول موضوع ايخص ابو محمد ...ما يقدر اقوله على التلفون
ابو ناصر : اها
وبعد فترة يطرق باب المنزل ... ويذهب محمد لفتح الباب
محمد : من
ابو حميد : انا ابوحميد ... وين امك
محمد " يستغرب " : لحظة اشوي
يذهب محمد للمجلس : يمه في ريال ايقول يبيج ... اسمه ابو حميد
ام محمد : خلاص انت روح الصالة .... ويذهب محمد .... في حين قام ابو ناصر ليأتي بي ابو حميد إلى المجلس
ابو ناصر يكلم ابو حميد : تفضل اخوي ..... حيا الله من يانا
ابو حميد : الله يحيك
ويدخّل ابو ناصر ، ابو حميد المجلس .... ويجلس ابو حميد ... وبعد فترة يبداء بالحديث
ابو حميد " متلبك قليلا ً" : انا ابو حميد ... ويا عبدالله في الشغل ... وانتو تعرفون شغلا ً تجارة ...فيوم ربح ويوم خسارة ....يمكن هذا الوقت مو المناسب .. بس انا ما جيت اكلمكم إلا وانا محتاج لمساعدتكم
ابو ناصر " مستغرب " : حاضرين احنا .... بشنو نقدر نخدمك
ابو حميد : في يوم خسر ابو محمد .. وكان ذاك اليوم محتاج للفلوس ومو مستعد للخسارة فاظطر ان يتسلف من عندي فلوس
ابو ناصر " عرف السالفة .... فأراد ينهيها " : انزين .... وش كثر اتسلف من عندك ؟
ابو حميد : 1000 دينار
ابو ناصر " يرفع حاجباه " : 1000 دينار .... وليش
ابو حميد : ماادري ... بس اهو قال محتاج وجذي .. واهو صديقي واخوي ماخليته بحاجته سلفته
ابو ناصر : انزين والحين انته محتاج لهم ضروري ؟
ابو حميد " ماخله ابو ناصر ايكمل كلامه " : اييي
ابو ناصر " يفكر " : ما علي ما يصير خاطرك الا طيب ....عطنا مهلة يومين .... والفلوس عندك
ابو حميد : ما تقصر اخوي .... والله لو بس مو الحاج
يقطعه ابو ناصر : لا شدعوه .... هاذي فلوسك ولك حق فيها ... على العموم عندنا رقمك ... واول ما ايكون عندي الفلوس بعطيك اياهم
ابو حميد " يقوم من مكانه " : ما تقصر اخوي
ابو ناصر : واجبنا " وايضاً يقف ابو ناصر "
ابو حميد : يالله اخليكم ... مع السلامة
ابو ناصر يذهب ليوصله ...... وام محمد اتكلم ام ناصر
ام محمد : معقولة ابو محمد يتسلف من عند هذا 1000 دينار .... ولا يقول ليي ؟!
ام ناصر " مستغربة " : اي والله .... غريبة حتى انه ما قال لي
ام محمد : انزين والحين ... من وين انه اجيب ليه 1000 دينار ما عندي
ام ناصر : اي من وين حتى احنا ما عندنا لو قال 100 ... 200 ما عليه مو 1000 دينار .. من وين
ام محمد " بحيرة " : ما يندرى ... واخاف اذا ما عطينا ... ايسوي لينا سوالف في الشرطة والمحاكم ... واحنا مالينا شدة .
ام ناصر : والحل ؟
ام محمد " بعد تفكير " : مافي الا ان انبيع سيارة ابو محمد ... لا نستخدمها ولا شي ...بس محطوطه في الكراج ... بتخترب
ابو ناصر يدخل المجلس وسمع كلام ام محمد
ابو ناصر : وانتي اتقولي هذا الحل
ام محمد : مافي الا جذي ... واذا على ابو محمد ما اظن راح ايقول شي ... اهو باجر زيارته بقول ليه واذا رضه خلاص .. وانته جوف جان اتحصل مشتري
ابو ناصر " يفكر " : ما عليه .... بجوف انا ..... " ويوجه بحديثه إلى ام ناصر " : يالله قومي خلى اوصلج البيت ... عندي شغل
ام ناصر : ان شاء الله .... انه بروح انادي العيال ... وانته روح جيب السيارة
ام محمد " توجه حديث إلى ابو ناصر " : مسامحة عطلناك
ابو ناصر : لا عاادي ..... يالله عن اذنج
ام محمد : اذنك معاك ......
وتخرج ام محمد وراء ام ناصر بناحية الصالة الي فيها العيال .......
وفي اليوم التالي :
في شغل ابو ناصر
سعيد : اتصدق ياخوي رحت ادور لي سيارة .... ما حصلت ماكو الا 2000 او 2050 .... وانه ما عندي الا 1000 ... ومحتاج للسيارة
ابو ناصر " وكأنه حصل الشي الي يدور عليه " : وشنو مواصفات السيارة الي تبيها ؟
سعيد : انته تدري ... عيالي 5 ... يعني ابي سيارة جيب كبيرة
ابو ناصر : طلبك موجود
سعيد : شلوون ؟
ابو ناصر : اخو مرتي بيبيع سيارته ... وسيارته جيب ... والسعر مناسبك
سعيد : بجم اتبيعني
ابو ناصر : 1000 دينار .... على قد فلوسك
سعيد "يبتسم " : صاار .... والمتى بتعطيني السيارة .... ترة الفلوس جاهزة
ابو ناصر : ما عليه .... اكلم اخو مرتي واقول لك ... يمكن العصر انته كون زاهب
سعيد : اكيييد
وبعد فترة يعود ابو ناصر المنزل .... ويدخل وراء ان ام ناصر تتحدث في التلفون
ام ناصر : يعني قبل خلاص
ام محمد : اي واافق ... قال المهم ما انعطل الريال ... علشان ما يسوي لنا سالفة
ام ناصر : اها ... ما عليه ... انه بجوف ابو ناصر جان حصل احد يشتريها .. والمبلغ بنعطيه اياه .. انتي لا تشيلي هم
ام محمد : مشكورة ما تقصرين