الصوت : اها ... انا ابوحميد زميل عبدالله في الشغل ... سمعت ان عبدالله مسكته الشرطة البارحة
ام محمد " بحزن " : اي مسكوه ..... خير تبي شي منه
ابو حميد " يفكر في الكلام الي يبي ايقوله " : ها ...... لا بس كنت " ويحك راسه " : كنت ابي اسئل متى حكمه ..... اي الحكم ...اكيد قالوا لكم المتى ؟
ام محمد " ترفع حاجب " : اي امبله باجر الساعة 1 الظهر
ابو حميد : اها ... خير إن شاء الله .... يالله مع السلامة
ام محمد : الله يسلمك
ابو حميد يضرب رأسه بغباء ويكلم نفسه بصوت مسموع : الحين ضروري يا غبي تتصل خليت المرة تهداء بعدين .... مالت علي اي والله الحكم
العامل يستغرب : كلت شي بابا
ابو حميد ينبته : ها ولاشي حط القهوة وروح لشغلك ... بسرعة
العامل : إن .... إن شاء الله بابا
شخصية ابو حميد " ابو حميد صاحب عبدالله ( بو محمد ) في الشغل واهو يطالب ابومحمد مبلغ 1000 دينار . وابو محمد ما عطاه .. ف اهو اتصل علشان ايقول لمرته ( ام محمد ) ولكن اتفشل لأنه استعجل ... فقال بينطر اشوي .
في طرف آخر ام محمد تكّلم نفسها : علامه هذا ... كلمتين على بعض مو قادر ايصّفهم ... الحمدلله والشكر ..... خلني بس اروح اكمل الغدة وبعدين اجيب اعيالي .
اهني علياء تطل براسها للحجرة الي ام محمد قاعدة فيها وكشت شعرها كانت كشه
ام محمد تنتبه ليها : بسم الله الرحمن الرحيم .... خرعتيني ... علامج جذي معفسة شعرج
علياء تدخل وتجلس مقابلة امها : يمه بعد توني قاعده من النوم ... انزين وين اخواني ما جو للحين
ام محمد تقوم من مكانها : لا ما جو بكمّل الغذة وبروح اجيبهم " وتذهب ام محمد للمطبخ ... وعلياء تلحقها
علياء : شنو الغذة ؟
ام محمد تدخل الدجاجة الفرن : دياي ( دجاج )
علياء بملل : اففففف كل يوم دياي دياي
ام محمد تصك الفرن : هذا الموجود تبين اكلي ما تبين كيفج
علياء تخرج من المطبخ وتتحلطم : بس هاذي الي عندها كل ما قلنا لها شي .. " تقلد على نبرة صوت امها " : تبون حيا الله ما تبون فمان الله ... " وترجع لصوتها الطبيعي " : غريبة غيرت الحين الكلام .... اففففف والله حالة ...اروح اجوف التلفزيون احسن ليي
تفتح هنا علياء التلفزيون وتشاهد .... وفجأة يأتي صراخ امها ..
ام محمد بصوت عالي : آآآآآآآآآآآآآآآآآآآآآآآآآآآآآآآآآآآآآآآي
تخاف علياء وتركض نحو المطبخ : يمه يمه شفيج
ام محمد : مسرعة ييبي القفاز اهني وفتحي الفرن انصك على ايدي بسرعة هكو اهناك " وتأشر لها "
علياء بخوف قليل : يمه حطي ايدج في ماي بارد اول ( تنظر إلى يد امها )
ام محمد تبتسم لها : إن شاء الله ماما " علياء ترد الأبتسامة وتخرج من المطبخ وتتكلم بصوت عالي : بسرعة عاد يمه ... لازم اتروحين اجيبين روعة وفاطمة من المدرسة .
ام محمد تتضحك : هههههههه وي صدقت عمرها اهي امي ... خلاص الحين بروح " وهنا يدخل محمد البيت "
محمد يبتسم : السلام
علياء وام محمد : عليكم السلام ...
ام محمد : خلاص عيل ما يحتاج آخذ علياء معاي اقعد وياها محمد ... انه بروح اجيب اخواتك
محمد ينظر إلى علياء : إن شاء الله يمه
تلبس ام محمد العباءة وتخرج من البيت ... يذهب محمد بجانب علياء ويكّلمها : إن شاء الله ما يننتين امي بسوالفج الفاضية
علياء اطالعه من فوق : تطمن ما اذيتها ... اصلن انقذتها
محمد يرفع حاجبه بأستغراب : شلون انقذتينها
علياء بأبتسامة فخر : دخلت امك ايدها في الفرن وانصك عليها ... وانه لبست القفاز وفتحت الفرن وقدرت اطلع ايدها .. تغمز بعيونها لمحمد
محمد ايجاريها : ما شاء الله عمل كبير تستاهلين تصفيق " ويصفق محمد "
علياء اتبوز : ما ابي تصفيق ... ابيك اتوديني البرادة
محمد يذهب عنها : بعدين ... بعدين ... عقب الغذة
علياء تستانس : انزين
" ذهب محمد إلى الحجرة وبّدل ثيابه ... وكمل اثناء ماذهب لرمي ثيابه للغسيل دخلت امه ومعها اخواته
روعة : يالله انه رايحة ابدل هدومي ما اابي انزل إلا الغذة زاهب
محمد ينظر لها بملل : جم مرة اقول لج الناس ايسلمون اول ... ايقولون السلام
روعة تعطيه ظهرها وتذهب عنه : كل يوم بس انه كيفي
محمد يتأفف على طريقة روعة في كلامها .... تذهب له فاطمة وتكلمه : ما عليك منها لا تكلمها ... ذي مخها غيرعنا ... خلها ابروحها
محمد يهدأ نفسه : انزين روحي انتين بدلي اثيابج مسرعة ..... تراني يوعان
فاطمة :انزين يا اخي العزيز
يبتسم محمد ..... وام محمد تبتسم على عيالها الي كل واحد يحب الثاني وشايل هم الثاني ... بدّل الجميع الثياب وجلسوا لتناول الغذاء وبعد ما كملوا وغسلوا ايدهم
ام محمد : ابي الكل ايجي اهني يقعد بقول لكم موضوع
الكل قعد وينتظرون كلام الأم ... ولكن روعة بدت الكلام
روعة : اي يمه يالله قولي ليش البيت مخّرب
ام محمد : جايتنكم بالكلام .... بتّكلم وماابي احد يقطعني
الجميع : إن شاء الله
ام محمد : ادري انكم ماراح تفهمون كل الكلام الي بقوله ... لأنكم بعدكم يهال ...بس الدنيا احيانا اتخلي الواحد يكبر اكبر عن عمره من الظروف الي تحطيه ... مو يكبر يعني يكبر بسرعة ايصير عمره 20 لالا تكبر نفسه ... كلامه ... بس الشكل والعمر يظل ... المهم امس باليل وللأسف قلت لأبوكم لا تروح المسيرة ... اهو عاندني وراح ومارجع البيت إلا والشرطة وراه اهو دخل واتغيب .. اهم كسروا الباب .. دخلوا وضربو بالرصاص وكانوا بياخذون محمد بدل ابوكم ... بس اهو طلع وسلم نفسه ليهم ... و بعدين العصر نقدر انروح ليه ... وباجر الظهر بيصدر الحكم
روعة : حكم شنو
ام محمد تكمل كلامها : الحكم يعني المدة الي راح ابوكم يقعد فيها في السجن .. بعيد عنكم
فاطمة : وكم احتمال اتصير ؟ المدة بالشهور ؟
ام محمد تصحح المعلومة : لا بالسنوات وما يكون اقل من 3 سنوات
الجميع : شنو ؟ من صجج
ام محمد بحزن عميق : اي من صجي ... ويالله روحوا درسوا علشان ما تصير الساعة 4 إلا واحنا في الشرطة انزور ابوكم
الجميع : انزين
وفي جهة اخرى بيت ابو ناصر
ابو ناصر يكلّم ام ناصر امام ناصر وزهرة : اي صح ... بقيت اسئل اخوج عن الأرض الي قلت ليه عنها حق رفيقي
ام ناصر تترك فنجان القهوة وتتلعثم : اخوي ؟ .... اي ارض
ابو ناصر يستغرب : اشفيج ؟ اي اخوج انا قلت ليه يشتري ارض حق رفيقي وعطيته المواصفات ... انزين انا ضيعت رقمه اعطيني اياه
ام ناصر تفكر في روحها : انه لازم اقول ليه الحقيقة ... ولا اعور راسي من الف والدوران " وترفع صوتها تكلم العيال " : ناصر وزهرة يالله روحو غرفكم خلوني اكلم ابوكم في موضوع
ناصر يمسك ايد اخته ويروحون
ابو ناصر : شفيج اليوم ؟ مو طبيعية ؟ شصاير ؟ وشنو الموضوع الي بتكلميني فيه
ام ناصر تبلع ريجها : اهدء انت واقول لك كل شي
ابو ناصريتسند للوراء على الكرسي : انزين قولي
ام ناصر تحرك ايدها بطريقة اتدل على التوتر : اخوي البارحة مسكوه الشرطة وحبسوه
ابو ناصر يرفع حواجبه بدهشة : وليش عاد مسكوه ؟ شسوه اهو ؟
ام ناصر تتنهد : لأن راح المسيرة ... وبعدين طبّوا عليه في البيت ومسكوه
ابو ناصر يحرك راسه يمين يسار : لاحول ولا قوة إلا بالله .. وليش اهو ايروح المسيرة وايخاطر بحياته ما يدري ان الكل يحبسونه لا كبير ولا صغير
ام ناصر توقف : طول عمره اهو جذي ... ايمشي الي في راسه ولا يحاسب خطاء او صح او شنو راح يترتب على الي يسويه
ابو ناصر يوقف بجانبها : الله يهديه إن شاء الله .. ويتعلم من ها القضية الي سواها
ام ناصر تقابل ابو ناصر : على العموم ... اهو محكمته باجر الساعة 1 الظهر ... وفي اليوم ليه زيارة من الساعة 4 إلى 6 .... ها تقدر اتوديني ؟
ابو ناصر : اكيد .... اهو اخوج ولازم نوقف معاه ... وانجوف شنو يحتاج
ام ناصر تبتسم ليه ابتسامة عذبة مليئة بالحب والأمتنان . ثم قامت ام ناصر لتتصل ب ام محمد ..... التلفون يرن في بيت ام محمد ... ترفع السماعة
ام ناصر : آلو ... سلام
ام محمد : هلا ... عليكم السلام
ام ناصر تدخل في الموضوع على طول : آآ ... عندج احد يوصلج اليوم حق الزيارة ؟
ام محمد : لا ... بس قلت بجوف رفيقه ابو فراس لأن اتصل لي وقال اي شي ابي اقول له
ام ناصر تعظ شفاتها وتفكر : لالا ما يحتاج لا تكلفين عليه ... انه ابو ناصر قال بيوديني بنمر عليكم وبنروح له
ام محمد : خلاص اوكي .... إلا بسئل قلتين بعد لعيالج ؟
ام ناصر : لا ما قلت إذا سئلو بقول ما سئلو خلاص هم مردهم بيعروفون .
ام محمد : اي عدل
اما ناصر : خلاص جهزي روحج وجهزي اثياب لأبو محمد علشان انوديهم ... وعيالج بعد ... عقب نص ساعة بنكون عندكم
ام محمد : صار ... وعيالج وين بتودينهم ؟
ام ناصر : بيت جيرانا .... يالله مع السلامة
ام محمد : الله يسلمج
وتذهب ام محمد إلى عيالها ... كانت علياء ترسم
علياء : يمه جوفي رسمتي
ام محمد تنظر إلى الرسمة وتبتسم : حلوة وايد طالعة على الي راسمتها
علياء : صج يمه حلوة الرسمة
ام محمد : اي حلوة
علياء : خلاص بوديها لأبوي يجوفها
ام محمد تبتسم بحنان : كيفج
محمد : يمه انا كملت واجباتي بروح الحين اتسبح
ام محمد : شاطر عفيه عليك .... اوكي اخذ ثياب حلوة ها
محمد وهو يذهب لخزانة ملابسه : إن شاء الله يمه
فاطمة اتعدل شعرها في المرآة وتكلم امها : ها يمه شعري عدل مرتب ؟
ام محمد : اي عدل ........ ها روعة ما كملتين دراسة
روعة بملل : لا للحين عاطينا وايد اليوم ... بس ما باقي إلا شوي
ام محمد : يالله خلصي ... وتنظر إلى الساعة : عندج ربع ساعة
روعة : انزين
وتذهب ام محمد إلى غرفتها وترتب ملابس لأبو محمد في حقيبة صغيرة واشياء اخرى ... وهي تفكر في الحكم ماذا سوف يكون .... وبعد وقت جهز الجميع ... وجلسوا بالصالة ... وبعدها تدخل ام ناصر
ام ناصر : يالله قومو بسرعة ركبوا السيارة ورانا سيد وش طوله