علياء تهمس في اذن امها : يمه انا ادري ....ابوي ماراح يرجع إلا عقب سنين ...بس انتي لازم تعرفين ان هاذي غلطته واحنا ماراح نتحملها ..يمه لا تنسينا .. احنا عيالج
ام محمد " مندهشة من كلام علياء وكأنها كبيرة ... فأرتفعت حواجبها بشدة للأعلى " : وانتي من وين لج ها الحجي ... وشدراج ؟
علياء : انه بروح ارقد الحين ... عن اذنج
ام محمد : يارب استر علي وعلى اعيالي ... لاتحرمنا من رحمتك علينا .......مافي بعد إلا انه خلى اروح انام
وفي الصباح
ام محمد " تقّعد اعيالها " : يالله قوموا وراكم مدارس ..فطوم يالله قومي ....روعة ... محمد ...علياء قومي علشان اوديج الروضة يالله
علياء ( وهي مغمضة عينها ) : يمه ما يحتاج اروح اليوم ... ما بيعطونا شي ...عندهم حفلة .
ام محمد " تتذكر " : اي صج ... انزين كيفج والباقي يالله مسرعة
قام الجميع تغسل ... ولبسوا ملابس المدرسة ... و آتو علشان يتفطرون .
روعة ( وهي تجلس على الكرسي ) : يمه وين ابوي للحين ما قعد ؟ المتى يعني انروح المدرسة ... بنتأخر !
ام محمد " تتلعثم ما تعرف وش تقول " : ها ... لا خلاص انه اليوم بوديكم .. ابوج طلع مبجر عنده شغل
فاطمة " وهي تاكل " : غريبة اول مرة !!
اما محمد فكان ساكت لأنه يدري ... ومادام امه ماراح تقول .. فهو بعد راح يسكت ...
محمد " في نفسه يقول " : يمه لاتسكتين .. لازم الكل يدري .. هذا ابوهم مثل ماهو ابوي والكل لازم يدري وش صار
ام محمد وكأنها تدري ما قال محمد ... فتقول في نفسها : ادري يا يمه ادري ... بس لازم اعرف شنو حكمه ولمتي بياخذونه واتكلم ... ما ايصير احكم قبل
يقطع تفكيرها صراخ روعة .......... تركض ام محمد لصراخ بتها
ام محمد : روعة شفيش ..... شفيش تصرخين جذي
روعة( وهي تأشر ) : من الي سو جذي ... شنو هذا ....هاي مثل الرصاص في الجدار " وتوضع يدها عند فمها "
ام محمد ( لا تعلم ماذا تقول ) : ما عليج يمه ... مو مهم ... الحين اوديج المدرسة وبعدين اقو لج
روعة " بحزن " : إن شاء الله
فاطمة " في نفسها تتكلم ... وهي تنظر مرة لروعة ومرة لأمها " : حاسة ان شي صاير لأبوي وامي مغيبة علينا ... بس غريبة محمد ساكت ... اكيد يدري ... خل اروح اسئله .
محمد ( وهو يربط حذائه ) : لا ماادري .... وبعدين ليش اعور راسي ... امي مادام ما قالت شي .... خلاص يعني ما راح اتقول
فاطمة ( تعدل احجابها ) : بس امي قالت انها بتفّهم روعة سبب الرصاص الي في الجدار لمن ترجع من المدرسة
محمد " وهو يفكر ..... يعني راح اتقول امي " : اوكي خلاص عيل لمن بتفّهمها على قولتج ...قعدي فهمي وياها
فاطمة ( في نفسها ) : اكيد يعرف .... والله ليش قال اقعد ويا روعة ... ماقال حتى اهو ... وتكلمه : زين انته ما تبي تعرف
محمد " حس ان اخته راح تكشفه ... فقام ايغير الموضوع " : يالله انا رايح قبل ما يطق الجرس واتوهق ... مع السلامة
فاطمة : الله يسلمك ... خل اروح انادي امي .... هكو برزت واهي للحين " تنادي امها " : يمه يمه ..... يالله انه خلصت وينج
ام محمد ( وبجانبها روعة ايجون لفاطمة ) : يالله عيل امشو
وتوصّل ام محمد ابنتيها للمدرسة ..... وتعود إلى البيت وهي تفكر : انا الحين لازم اتصل للشرطة واعرف سالفتهم ... وبعدين اعلم اخواته بالي صاير .
دخلت ام محمد البيت إلا كانت علياء جالسة على الكرسي وتتفطر ... ام محمد تذهب لها : شمقعدنش الحين مو كنتين تبين اتنامين ؟
علياء : بلى .... بس غيرت راي
ام محمد : حيرة معاج انتي ... اقول لا تسوين فوضة لأني ابي اتصل
علياء : اتصلي للشرطة جوفي شصار على ابوي
ام محمد " حاجبيها مرفوعين " : انتي ابي اعرف من وين تعرفين كل ها الأشياء .... انتي الحين في الروضة وجدي ... عيل اشلون لمن بتكبرين ؟
علياء ( بفكاهة ) : افا عليج يمه ...بصير لج فيلسوفة او متحرية شرايج
ام محمد " تضرب بخفة على ظهرها ... كدُعابة " : وي عليج .... سكتي بس سكتي ... لحد يسمعج قالت متحرية هههههههه
وتذهب ام محمد وتمسك السماعة وتتصل للشرطة
ام محمد : آلو ... السلام عليكم
الشرطي : وعليكم السلام ... اي خدمة
ام محمد : بغيت اسئل عن عبدالله العالي امس جودتونه شصار عليه
الشرطي : لحظة بدور على اسمه ...... كا لقيته اي نعم الحكم راح يصدر باجر الساعة 1 الظهر تقدرين اجين اتزورينا اليوم
ام محمد ( تقطع كلام الشرطي ) : الساعة جم
الشرطي ( يبتسم ) : موعد الزيارة يبداء من الساعة 4 إلى 6 فقط
ام محمد : اقدر اجيب العيال معاي لو لا
الشرطي : على راحتج بس اهو مسموح اجيبين
ام محمد : اوكي ... شكرا ً ... مع السلامة
الشرطي : مع السلامة
اول ما صكت ام محمد السماعة ..... علياء تركض وتجلس بجانبها ..
علياء : ها يمه وش قال على ابوي
ام محمد : باجر حكمه .... بس اليوم نقدر انجوفه ( ام محمد تنتبه ) يالله قومي نامي ما نمتي شي ... وبسج اسئلة ما تعنيج ... للحين صغيره على ها الأمور
علياء : انزين انزين ماله داعي ها الحجي كله ... انه رايحة ارقد تبين شي
ام محمد " بعصبية " : لاااااا
علياء : ههههههههههه انزين
ام محمد " تكلم نفسها بصوت مسموع " : ياخي ما يصير جدي توها اربع مادري خمس ... صف الأول ما دخلته ... باقي سنة وتعرف كل شي ... لا وبعد تأمر وتسوي ... مادري شلون خلقتها دي بعد !! كلام اكبر منها بمليون تقوله ! الله يستر منها بس ... خلى اتصل ل ام ناصر اقول لها . وتمسك السماعة مرة اخرى وتتصل
ام محمد : آلو .... هلا
ام ناصر : اهلييين
ام محمد : شخبارج ؟
ام ناصر : بخير الحمدلله ... نسئل عنكم
ام محمد " تبداء ملامح وجها تتغير " : بغيت والله اكلمج بموضوع ... مشغولة
ام ناصر ( بدأت دقات قلبها تزداد ) : ها شصاير قولي مو مشغولة ... لاتخوفيني
ام محمد : اخوج ...
ام ناصر ( تقطعها ) : شفيه اخوي عبدالله قولي ؟
ام محمد : اخوج امس .. يت الشرطة البيت ومسكوه ... وايقولون باجر الحكم
ام ناصر ( ترفع حاجبيها بأستغراب ) : شلون ؟ وليش ؟ شلي صار امس قولي بالتفصيل
ام محمد ( تتنهد ) : قلت له لا تروح المسيرات ما طاعني وامس باليل راح وياهم ..لحقوهم الشرطة بالمسدسات .. دخل البيت وممدى قعدنا ...إلا طبّو علينا كسروا الباب وقالو يبّونا ... اهو تغيب وقالوا بياخذون محمد بدّاله ... انه رفضت بعدين طلع اخوج وسلّم روحه ... بعد شنو ؟ بعد ما خوفّو علياء ومحمد وخّربوا البيت من طلقات الرصاص الي سووها ... الله يستر بس من ها السالفة
ام ناصر " مو مصدقة ما تسمع .... تحرك راسها بالنفي " : لالا مستحيل ...هذا إذا اخذوه تدرين إن ...
تقطعها ام محمد : ادري إن ما بيرجع .... بس هذا الي الله كتبه
ام ناصر ( بعصبية قليلة ) : يعني اهو ما يفهم ... ايروح ويااهم .. مايدري ان راح يمسكونه وايغربلونه .... مو بس اهو . عيالك من الي يربيهم ..يتيمون واهم يهال ... اهلك ... اخوانك ... كلهم نساهم .. لا اكيد اهو ين إلا وراح سو جذي .
ام محمد : الحين انتي لا تقررين قبل ما يصير شي ... باجر الحكم الساعة 1 لازم انروح
ام ناصر : اكييييد
ام محمد : واليوم إذا تبين يسمحون زيارة من الساعة 4 إلى 6
ام ناصر : بحاول إذا قدرت بس باجر اكيد ... بمر عليج وانروح مع بعض
ام محمد : صار ... تبين شي ؟
ام ناصر : لا سلامتج
ام محمد : انزين .... يالله مع السلامة
ام ناصر : الله يسلمج
اغلقت الهاتف ام ناصر عن ام محمد وقالت لازم اهي اتخبر اختها الي في السعودية لازم يدرون فأاتصلت
ام ناصر : هلا
ام علي : اهليين اختي ... كيف الحال
ام ناصر : تمام وانتو ؟
ام علي : ابخير الحمدلله ... ها بشري وش الأخبار الجديدة الي عندكم
ام ناصر : ايي .. علشان جذي اتصلت لج علشان اقول لج
ام علي : اها انزين شصاير
ام ناصر : اخوج عبدالله
ام علي " بدت اتخاف وتقطعها " : شفيه
ام ناصر : انزين كاني بقول لج لا تقطعيني
ام علي " فقدت صبرها " : انزيييين
ام ناصر : اخوج امس باليل مسكته الشرطة وحبسوه الحين اهو عندهم ... وباجر بيصدر الحكم
ام علي " ترفع حواجبها وبعصبية قليلة " : وليش عااد ... اهو شسوه بعد من مشاكل
ام ناصر " تحك جبينها " : ماكو إلا بس شارك في المسيرة وطلع معاهم
ام علي " تريح نفسها قليلا ً " : لا حول ولا قوة إلا بالله .... والحين اعياله يدرون ؟
ام ناصر " تبتسم ابتسامة ساخرة " : اكيد ... مادام هجموا على البيت مثل الوحوش ودمّروا البيت من الرصاص الي سووه ... وكانو بياخدون محمد بدّاله .. وخوفوا الباقي .... اشلون ما راح يدرون !
ام علي تنصدم بقوة على ها الكلام : وصلت المواصيل ان يدشوا البيت ولا يهددون بعد ! وين عايشين احنا ؟ ليكون في غابة واحنا ما ندري .
ام ناصر تقول في نفسها : الحين هاذي شيسكتها ويصك بوزها ... اتحن اكثر حتى من العجايز " وتكلمها " : الله كريم ... بس انه قلت بقول لج قبل ما تسمعين من احد غريب .... المهم انه إذا صدر الحكم باجر اقول لج ...انزين يالله مع السلامة
ام علي : الله يسلمج
ام علي ترمي السماعة بقوة وتتكلم بعصبية شديدة : يعني ضروري اتروح معاهم ... واتسوي لينا مشاكل احنا في غنا عنها ... ابروحك انت في مشكلة كبيرة ... انه مادري ايش انسوي معاه عساس ايصير عاقل ويفهم ... اوفففففف .... يارب استر .... الحين شقول للناس ولريلي .... الله يهديك بس ياخوي
في طرف اخر كانت ام محمد في المطبخ اتقطع الخضروات للغذاء ويرن التلفون ... تترك ام محمد السكين وتسحب فوطة وتمسح ايدها بالسريع وتذهب للسماعة وترد : آلو
الصوت : آلو ... السلام عليكم .... معاي ام محمد
ام محمد تستغرب وترد : عليكم السلام ... اي نعم انه ام محمد