كم ليلةٍ في راس مرقاب عدّيت
وأقول توّ العمر والوقت توّه

وأنا بشر يا كثر ما صبت وأخطيت
ما أحتاج عن بعض الدّعاوي أنوّه

وفيّت يا واقع حياتي وكفّيت
جاريتني وأنا كسبت الجروّه

على جروحك يا زماني تساميت
والرجل تعرف هيبته من سموّه

أنا أشهد إني يوم خاويت خاويت
الصبر في طيش الزمان وهدوّه

جحدة رفيق الدرب مثل الديناميت
إليا انفجر يحدث على الوصل هوّه

يا صاحبي وليا دلهت وتناسيت
دربك خضر واللي على البال سوّه

ماني بـ تابع خطوتك كان صدّيت
إليا احتميت أنا كبير الحموّه

إليا تغشّاك الغرور وتغشّيت
بيت الخيال إكسر عموده وطوّه

لا تاخذك نعرة كبرت وتقوّيت
ما توخذ الدنيا مكابر وقوّه

عيب الفتى اللي يذبح الطيب والصيت
لا باع ربعه لأجل يرضي عدوّه

وإعرف ترى طبع الرجال العناتيت
ليت نوتْ تلجم لسان المفوّه

لا رحت ماني ناشدك ليه ما جيت
وإن جيت تبشر بـ النقا والمروّه