منتديات قصايد ليل - عرض مشاركة واحدة

04-12-2011

تـــــــــــــــــابع

قام من النوم ولبس وطلع ووصل للمحكمه وظل يستنى وشافها جايه مع أختها روئ مع تاكسي
جاته وحس انه مشتاق لها العيون ويحس انه من سنين مو شايفها
حنين:تأخرت
فيصل:لا ابد يله
حنين:يله
ودخلوا وخلصوا الإجراءات والتواقيع وبدوا في رفع القضيه وهم طالعين
حنين:الحين ايش راح يصير
فيصل:راح توصل لعساف ورقه من المحكمه بعد يومين تقريبا
حنين:زين .. يله عن إذنك
فيصل:إذنك معاك
مشت ووقفت تبغى تاكسي وما شافت ولا تاكسي وظلت تستنى وهو بعد ظل ينتظرها تلقى تاكسي علشان يشوفها تركب و يتطمن عليها وبعد ربع ساعه وهي لحد الحين ما حصلت تاكسي
فيصل من وراها:ها لحد الحين ما رحتوا
حنين بخوف:لا ما لقيت ولا تاكسي ولازم ارجع البيت بسرعه قبل لا يدري عساف إني طلعت
فيصل:طيب ممكن أوصلك
حنين بعصبيه وهجوم:ليه وش شايفني صايعه قدامك ولا بايعه عمرها
فيصل بعصبيه:وش هالكلام لا طبعا بس أحسن من الوقفه وفي هالوقت ما راح تلاقين تكاسي وعلشان ما يروح عليك الوقت ويرجع عساف وما يلاقيك وبعدين مو انا اللي ما عنده ضمير ولا نخوه علشان أسوي في احد شي ولا أخون ثقة خالتي أم حنان
حنين سكتت وما تدري تصدق ولا لا ورجعت تطالع الساعه وشافت الوقت وخافت تتأخر
روئ:هنين تعبت خلاث حلينا نلوح
حنين:زين..... والتفتت على فيصل:طيب موافقه
فيصل:الحقوني ...ومشوا لحد السياره وركبت وراء هي و روئ وشغل فيصل السياره وتحركوا وهم في الطريق حنين كل شوي تطالع الساعه
روئ:هنين ابعى ثوكلاته
حنين بهمس:بعدين حبيبتي مو وقته
روئ بصوت عالي:لا ابعى أحين
حنين:اششششششش
روئ بصوت صياح:ابعى سوبل مالكت أحين اهئ ...اهئئئئئئ
حنين:يارب
فيصل:في شي
حنين:لا
روئ:ابعى سوبل مالكت ..ابعى ثوكلاته
فيصل:خلاص حبيبتي الحين نروح سوبر ماركت
وغير اتجاه السياره
حنين بخوف:وين رايحين
فيصل اللي تضايق من نبرة الخوف في صوتها:للسوبر ماركت
حنين:وصلنا بيتنا لو سمحت وهالبزر ما عليك منها ما عندها سالفه
روئ:لا ابعى ألوح سوبل مالكت
حنين :أف عيب حبيبتي انا بعدين اوديك
روئ:لا ابعى أحين
حنين سكتت لما لاحظت انهم وقفوا قدام السوبر ماركت
فيصل وهو ينزل :يله وصلنا تعالي يا حلوه
روئ جات قدام وفيصل نزلها ولف على حنين:بتنزلين ولا بتقعدين لحالك
حنين وهي مجبوره:لا بنزل بس بسرعه
روئ وهي تمسح دموعها:هيه..هيه...سوبل مالكت
دخل فيصل وهو شايل روئ وحنين وراهم
فيصل وهم داخلين قسم الحلويات:يله قولي لي وش تبغين أمري وتدللي
حنين:لا تعطيها وجه ترى هذي خبله
فيصل بابتسامه:لا عادي خليها على راحتها
روئ :انا مو حبله أنتي حبله
حنين:اسكتي يا أم لسان
روئ وهي قاطه الميانه:ثوفها تدول عني أم لسان انا حلوه أثلا صح
فيصل:أنتي أحلى بنت في هالدنيا ويله اختاري اللي تبغينه وما عليك من احد....وهو يطالع حنين
حنين تأففت وما ردت
صاروا يمشون و روئ ما قصرت ما خلت شي ما خذته ولما جاو عن المحاسب وفيصل طلع بوكه
حنين:وش تسوي
فيصل:أحاسب
حنين :لا انا بحاسب
فيصل عصب :نعم أقول خلي فلوسك معك وما في احد بيحاسب غيري
حنين:بس الأغراض لأختي
فيصل:انا شريتها لها من طيب خاطر وما ابغى اسمع هالكلام البايخ مره ثانيه
حنين بعناد:طيب حاسب بس الأغراض خذها معاك بيتكم
فيصل وهو يلتفت علشان يتأكد ان محد سامعهم:وش هالكلام تركي عنك الحركات اللي مالها داعي وبعدين تقدرين تدفعين 150 ريال
حنيني نزلت راسها وعرفت انه ما تقدر :لا...ورفعت راسها بسرعه:بس بيكونون دين برقبتي ولا والله ماراح نأخذ أي من هالأغراض
فيصل باستسلام:طيب خلاص مثل ما تبغين
حنين:زين
ورجع حاسب وخذا الأغراض ورجعوا السياره و روئ ركبت قدام وصارت تاكل من الحلويات اللي شرتهم
روئ وهي تمد يدها بجالكسي:هنين احدي (حنين اخذي)
حنين:لا ما ابغى حبيبتي
روئ بفرحه:احدي من يديني....وهي فرحانه بكل هالحلويات والجالكسيات والبسكويت
خذت حنين الجالكسي:شكرا حبيبتي
وفيصل انرسمت على وجهه ابتسامه خفيفه لأنه يدري انها ما تبغى تأخذ لأنها من فلوسه وهو اللي دفع الحساب
وصلو ونزلوا وهم قريبين من الباب انفتح الباب بقوه وهم وقفوا مذهولين

&&&&&&&&&&&&&&

في الحديقه
عبدالمجيد:حبيبتي هدي وان شاء الله كل شي بيتحسن
عبير:أمي تركت البيت وأبوي طرد خالد وما ظنتي بنرجع مثل أول
عبدالمجيد: حبيبتي أنتي اذكري الله
عبير:لا اله إلا الله محمد رسول الله
عبدالمجيد: أنتي قاعده لحالك
عبير: لامعاي سحر
عبدالمجيد:زين لا تقعدين لحالك ماشي ياروحي
عبير:طيب
عبدالمجيد:ياليتني جنبك الحين
عبير:من قال انك مو معاي الله لا يحرمني منك
عبدالمجيد ابتسم:ولا منك يله سمعيني صوت ضحكتك اللي أحبها
عبير:كيف اضحك والدنيا خربت وبيتنا أنهدم
عبدالمجيد:ان شاء الله ما أنهدم ولا شي وعمي بيعرف انه غلط بها الزواج ويرجع كل شي مثل ما كان
عبير:تظن
عبدالمجيد: ان شاء الله
عبير:ان شاء الله عبدالمجيد انا لازم أروح سحر تناديني
عبدالمجيد:طيب حياتي بس أنتي ارتاحي وإذا حبيتي تقولين أي شي ان شاء الله لو الساعه3 الفجر اتصلي اوكي
عبير:اوكي مشكور
عبدالمجيد:العفو هو انا لي غيرك أو عندي أغلى منك
عبير:احبك مع السلامه ..وصكت الخط بسرعه
عبدالمجيد وهو يضحك على خجلها:يا لبى قلبك ...وتنهد على حالها
جاه صوت من وراه :وش فيك وش هالتنهيده
عبدالمجيد:ابد بس كاسره خاطري عبير
الجوهره وهي تجلس:وش أخبارها
عبدالمجيد:متاثره كثير وزعلانه ومتضايقه
الجوهره:عاد عبير حساسه الله يعين
عبدالمجيد:ياليت الظروف غير كان انا الحين متزوجها
الجوهره:الله يهدي عمي ويجي يوم وهالحقد اللي في قلبه يزول
عبدالمجيد وهو مبين عليه الضيقه:أمين
الجوهره وهي تمسك يده:الله يجمعكم
عبدالمجيد:ان شاء الله إلا وين خالتي أم دلال
الجوهره:راحت من نص ساعه على بيتهم
وتذكرت :ايه صح ترى خلينا ملكت دلول وماجد بعد أسبوع معاي
عبدالمجيد بفرحه:هههه يعني ماجد ملكته الأسبوع الجاي
الجوهره:ايه
عبدالمجيد:الله يوفقه هالمرجوج
الجوهره :ههههه
سمعت صوت جوالها يعلن عن مسج فتحته((كل طلباتك أوامر وراح تتنفذ مهما كانت ))
الجوهره ابتسمت بسخريه وسألت عبدالمجيد:انت بلغت طلال إني ابغى الملكه مختصره وعائليه مره
عبدالمجيد:ايه قلت له
الجوهره:زين
وسكتوا وكل واحد فكره شارد

&&&&&&&&&&&&&

الساعه 7 مساء
للحين تتصل وما يرد عليها
سحر:يا ربي هذا ليه ما يرد
وأخيرا رد عليها
سحر بسرعه:خالد وش فيك ما ترد عليه من الصبح وآنا اتصل عليك
خالد بعصبيه وصوت الموسيقى عالي من عنده:خير وش تبين
سحر :وش أبغى يعني ابغاك تجي نشوف حل
خالد :بعدين بعدين مو فاضي لك
سحر:وشو اللي بعدين يا خالد انا لازم اشوفك
خالد: ماله داعي تشوفيني قولي وش تبين
سحر:أفكر اننا نطلع انت وآنا وعبير في شقه بروحنا ها وش قلت
خالد:وتبغيني أتحمل مسؤوليتكم ان شاء الله
سحر:ليه مو أخونا
خالد:وإذا أخوكم شوفي عاد تراني مو ناقص قلق
سحر:شلون الحين يعني
خالد:يعني خليكم في مكانكم وآنا عندي أشغال إذا خلصتها ذيك الساعه نشوف وش نسوي
سحر:وش أشغاله يا حسره لا تقول لي موضوع الجوهره
خالد:أقول سحر باااي
سحر :استنى ......
وصك الخط وما خلاها تكمل كلامها
جاتها عبير:ها رد عليك
سحر بعصبيه:ايه رد ويا ليته ما رد
عبير:وش قال
سحر:اغسلي ايدك منه ما وراه منفعه امحق اخو
عبير:وش راح نسوي الحين
سحر:البسي عبايتك
عبير:ليه
سحر:انا ميته جوع خلينا نروح مطعم نتعشى وبعدها نفكر لاني إذا جعت يتعطل التفكير عندي
عبير ابتسمت:طيب...وراحت
رن جوالها شافت الرقم ما عرفته وما ردت عليه وظل يرن ويرن لحد ما عصبت من اللي مصر على الاتصال وردت:خير وش هالازعاج يعني ما ردينا خلاص لا تتصلون
تركي:أسف ما قصدت أزعجك
سحر سكتت لأنها عرفت الصوت وهي ما توقعت ابد تسمع صوته
تركي:أنتي معاي ولا انقطع الخط
سحر:من تركي
تركي بابتسامه:ايه وأتمنى إني ما أزعجتك
سحر بهدوء:لا لا ابد أسفه على طريقه ردي
تركي:لا عادي بس حبيت اتطمن عليك يعني أنتي طلعتي بسرعه واسمحي لي خذيت رقمك من شوون الموظفين وقلت اتصل اسأل عسى ماشر
سحر تذكرت مصيبتها وتنهدت:خلها على الله
تركي تنهيدتها خوفته:سحر فيك شي الأهل فيهم شي
سحر :لا الحمد لله ما فينا إلا العافيه
جات عبير:انا جاهزه يله
سحر وهي ترد على عبير:استني شوي
عبير: طيب بس سحر احنا لازم نمر على أمي أكيد هي الحين زعلانه بعد اللي سواه أبوي فيها
سحر:أكيد حبيبتي
عبير:يله خلصي انا بستناك
سحر:طيب ...ورجعت للجوال :أسفه خليتك على الخط
تركي:لا ابد بس بغيت اتطمن وتطمنت واكرر اعتذاري على إزعاجك
سحر:لا تقول كذا بالعكس....وسكتت
تركي ابتسم:طيب مع السلامه
سحر:مع السلامه ومشكور على الاتصال
تركي:العفو
صكرت الخط وهي تفكر
سحر:معقوله القى الحل عنده والله اتصاله جاء في وقته هو يعرف السالفه كلها ويمكن يقدر يساعدني بس لا لا يا سحر أنتي بروحك طايحه من عينه لا تنكرين انك دائما تشوفين نظرات الاحتقار بعيونه بس هو اتصل فيني يعني مهتم
قطعت أفكارها صوت عبير:وين سرحتي
سحر:لا ولا شي يله نروح
وراحت تلبس عبايتها وهم نازلين لقوا ميساء في الصاله
قامت من مكانها ووقفت قدامهم:على وين ان شاء الله ها بدت الهياته
سحر التفتت علي عبير وقالت بسخريه:تدرين أختي في ناس يصدقون نفسهم أكثر من اللازم ويظنون ان الشي إذا توسخ ممكن ينظف بس ما يدرون ان الوسخ يظل وسخ
ميساء :وش قصدك
سحر رفعت يدها ودفة ميساء من كتفها بقوه لحد ما طاحت على الكرسي اللي وراها
سحر بغرور وكبرياء وكان شخصية سحر القديمه الخبيثه رجعت:حبيبتي عبوره خلينا نروح الطريق صارت نظيفه وأنتي رحتي فوق ولا رحتي تحت تظلين أنتي والجزمه شي واحد
ومشوا وطلعوا وركبوا السياره وتحركت
عبير وهي تطالع سحر
سحر باستغراب:وش فيك تطالعيني كذا
عبير على طول حضنتها:ههههه ههههههههه يالله والله بردتي شوي من حرتي والله ان أختي طلعت قويه
سحر:افا عليك انا سحر مو حيا الله أي حدا
عبير:الحين فهمت لما قالت أمي سحر قدها وقدود
سحر ابتسمت صحيح هي وأمها على خلاف دائما بس مع كذا تحس ان كل وحده فاهمه الثانيه أكثر من نفسها
سرحت بأفكارها وعبير ما حبت تخرب عليها ترتيب أفكارها فالتزمت السكوت

&&&&&&&&&&&&&&&

رجع البيت وهو يفكر قابلته شهد على الدرج:هلا والله بفصفص
كمل صعوده الدرج ولا رد عليها
شهد:وش فيه هذا
دخل غرفته ورمى نفسه على السرير وهو يحط يديه على عيونه ويضغط عليهم بقوه اليوم كان بالنسبه له يوم لا يمكن ينساه
قام وجلس ونزل غترته عن كتفه وصار يقول لنفسه معقوله اللي صار
قام يأخذ له شور وهو تحت الدش والماء الدافي رجع بذاكرته
وصلو ونزلوا وهم قريبين من الباب انفتح الباب بقوه وهم وقفوا مذهولين

&&&&&&&&&&&&&&&&&

وانتهى البارت لحد هنا
ادري هذي حركت نذاله بس ابغاكم تتحمسون وتقولون لي توقعاتكم
يا ترى سحر راح تطلب من تركي يساعدها ولا لا ؟
خالد راح ينفذ تهديده؟وهل طلال راح يقدر على خالد ويملك على الجوهره؟
ميساء وش ناويه عليه؟
فيصل وحنين تتوقعون من فتح الباب وايش صار؟
انتظر تعليقاتكم حبايبي

&&&&&&&&&&&&&&&&&&