منتديات قصايد ليل - عرض مشاركة واحدة

03-24-2011

الجزء السادس عشر ..

أحمد
اجتمعنا انا وخواني وفكرنا كيف نقول لأمي عن أمر الزواج .. خصوصا بعد ماوافقوا ..
سعود : نجتمع ونقولها ولازم ترضى بالأمر الواقع ..
قلت بخوف : واذا رفضت وحلفت يمين اني ما آخذها ..
سعود : اذكر الله ياأحمد .. لاتخاف .. ماراح نقوم منها الا الين توافق ..
اصريت على كلامي : طيب واذا ماوافقت ..
بندر عصب مني : انت تجهز الربطه قبل الفلعه .. خلاص قالك بيقنعها غصب ..
رفعت يديني لفوق وانا ادعي : يارب توافق وتقتنع يارب ..
سعود : انا بروح الحين وبعد صلاة العشاء راح اجي والقاك فيه .. اوكي ..
احمد : اوكي ..
طلع سعود وبقينا انا وبندر ..
ظليت انا ساكت انتظر بندر يتكلم ...لكن الظاهر كلنا راح نظل ساكتين الين نقول لأمي الموضوع ...
بعد صلاة العشاء رجعت للبيت وجلست في الملحق انتظر سعود ..
شوي الا يدخل ..
سعود : هلا أحمد .. هاه أخبار النفسيه ..؟؟
تنهدت بضيق واضح على وجهي : يارجال خلها على الله .. امش امش بس خلنا نشوف وش آخرتها ؟؟
دخلت انا وياه للصالة ..
سعود : السلام عليكم ..
مرام : وعليكم السلام ..
سعود : وين أمي ؟؟
مرام : فوق ..
التفت علي سعود وغمز لي يعني نرقى فوق لها ..
هزيت له راسي يعني يالله ..
رقيت انا وياه .. وانا الى الآن ماسك اعصابي وواثق من نفسي ومن اللي بقوله وماعندي أي مشكله ..
دق سعود الباب ودخلنا ..
سلمنا عليها وحبينا راسها ..
جلس سعود على السرير وجلست جنبه وانا احس برجفه يوم شفت امي وتواجهت وياها وجه لوجه ..
سعود : يمه بكلمك بموضوع بسسس .. ابيك تفهمين وتسمعين للأخير بعدين قولي اللي تقولينه .. اوكي ؟؟
أمي وهي تناظرنا بخووووف : وش فيكم ؟؟ وش صاير عليكم ؟؟ تكلموا ..
سعود يطمنها بعد ماشاف الخوف بعيونها : تطمني يمه مافيه شي .. بس موضوع صغير بنقوله لك ..
امي وكأنها هدت شوي : انزين قول وش الموضوع ؟؟
سعود : أحمد خطب ..
أمي : ادري قالي ..
التفت علي سعود : متى قلت لها ؟؟ وليش ماعلمتني ؟؟
عصبت على سعود : هذا وقته الحين .. خلص قل الموضوع ( بصوت واطي ) قلبي طاح ببطني من برودك ..
ناظرني بنظرات قويه بعدين صد عني ..
سعود : حلو انك تدرين انه خاطب .. بس ماتدرين من هي ؟؟
أمي : يقول انها اخت صديقه ..
سعود : وانتي تعرفين من هو صديقه ؟؟
أمي : لا من هو ؟؟
سعود : هذا صديقه فواز ...
عقدت امي حواجبها وهي مستغربه من الاسم .. تعرف فواز اخو رنا بس شالته من بالها .. لانه بنظرها مايعتبر صديقي ..
امي بإستنكار : بس ماقد قالي ان عنده صديق اسمه فواز ..
يتكلمون عني وانا موجود .. من جد حاله يرثى لها ..
سعود خبطها مرة وحده ماعنده وقت هالرجال : يمه الله يهديك .. بإختصار بقولها لك .. أحمد خطب رنا مرة مشعل الله يرحمه ..
على طول انا ناظرت امي بشوف ردة فعلها ..
امي اول ماقال سعود هالكلام التفتت علي بعدم تصديق .. وكأنها شاكه باللي قاله ..
أمي وهي تناظرني بنص عين : صحيح اللي قاله اخوك ؟؟
ارتجفت عظامي من الخوف .. وبدى العرق يتصبب من جبيني .. مهما كان تراها امي وماأحب أزعلها .. بس عاد الحب وش نسوي فيه ؟؟
نزلت عيوني للأرض وانا ودي الارض تنشق وتبلعني : ايه صح ..
امي عصبت وقامت تصارخ : وتقولها بعد .. صح .. انت ماتستحي تآخذ مرة أخوك .. وش بيقولون الناس عنا ؟؟ اكيد عاشقها قبل وفاة اخوه .. يافضحيتي قدام الناس ..
غمضت عيوني وانا حاس بصداع يذبحني عقب الكلام اللي قالته امي .. هذا اللي كنت خايف منه وحاسب له الف حساب ..
قام سعود بسرعه وجلس جنب امي ومسك يدها وهو يقول : يايمه مالك دخل بكلام الناس .. خلي الناس تقول اللي تقوله .. اهم شي بهالزواج يايمه هي سدومه بنت ولدك .. والا انتي ماتحبينها ولا تبينها .. يمه سدومه مسكينه ضايعه واذا تزوجت امها بكره البنت وين بتعيش ؟؟ ترضين تعيش عند رجال غريب .. اذا انتي ترضينها ترى حنا عمانها مانرضى .. عشان كذا انا اقنعت أحمد ( احسن شي قاله سعود من الكلام هذا كله .. انه طلعني من السالفه .. لاني عارف امي مستحيل ترضى علي ) انه يتزوجها .. واجبرته بعد .. ولو انا مو متزوج لاخذتها ..
طيرت امي عيونها علي : وحتى انت ياسعود تبيها .. هاذي اكيد ساحرتكم .. اكيد .. انت تبيها واحمد يبيها .. اجل وش يقول بندر ؟؟ اكيد بعد يبيها ..
ابتسمت على كلام امي غصب علي .. وبغيت اضحك بس سعود ناظرني نظرات خلتني ابلع مو ضحكتي بس .. الا خلاني ابلع لساني ..
أمي : والحين انتم جايين تشاوروني بالموضوع والا بس تعلموني انكم خطبتوا وقضيتوا من الموضوع ..
سعود : وش دعوى يمه ؟؟ انت الأصل .. حنا الحين نشاوركم وماراح يمشي الا اللي تقولينه ..
أمي وهي تناظرني بغضب : واذا قلت لا ..
طيرت عيوني وانا الى الآن ماسك اعصابي .. حاولت اتكلم بس سعود كان كلما بغيت اقول شي ناظرني يعني اسكت ..
سعود بهدوء : وليش لا ؟؟؟ فهمينا ..
أمي : انتم صاحيين والا مجانين .. انا بفهم من اللي حط هالفكره بروسكم .. بنت اخوكم ماهيب ضايعه ان شاء الله عندها خوالها يكفون ويوفون ..
سعود : واذا تزوجت امها بكره من رجال ماندري وش اصله واخذت البنت معها .. ساعتها وش راح نسوي ؟؟
أمي عصبت على سعود وصرخت في وجهه : وانت من اللي قالك دخل هالفكره براس أخوك ..والعب بعقله ..
سكت سعود بعد هالكلام .. ناظرني نظرات تموت ..
اما انا جلست اقلب عيوني بين امي وسعود بشوف وش نهايتها ؟؟
الظاهر هالقصه مالها نهايه ..
ضميت يديني لبعضهم وجلست اطقطق فيهم احاول ابعد التوتر ماقدرت ..
لما شفت سكوتهم طول .. حبيت احط نهاية لكل اللي قالوه ..
وقفت بثقل واضح على ملامحي .. قربت من عند امي وجلست عند رجلينها .. بوست رجليها الثنتين .. بعدين رفعت راسي وبوست يدينها ..
قمت وحبيت راسها .. قربت من عند اذنها وقلت : اللي تآمرين فيه .. اذا تبين اتزوجها راح آخذها واجيبها هنا تسكن معنا بنفس البيت ..واذا ماتبين اتزوجها .. ابشري غالي والطلب رخيص ماراح آخذها .. بسسسسسسسسس .. بضف اغراضي وملابسي واطلع من البيت واخلي سعود يجي يسكن معكم .. عشان يآخذ راحته هو وزوجته .. فكري وردي علي ..
طلعت وتركتهم يحتارون ويختارون في اللي قلته ..
نزلت تحت شفت بندر جالس في الصالة وشكله ينتظر ..
اول ماشافني نزلت من الدرج ..
بندر وهو يقوم ويواجهني : هاه بشر ؟؟
غمضت عيوني بألم .. تركته ومارديت عليه..

رنا
ادري الكل بيقولي ليش تتصرفين هالتصرف مع تركي ؟؟؟!!
انا ماقلت اللي قلته الا لان عندي اسبابي ..
لو انتم بمكاني وش راح تسوون ؟؟ ادري راح تسوون مثل ماسويت ..
انا ماحبيت اوضح لتركي اني ابيه بعد ماأخوي اجبرني على أحمد ..
مابيه يعرف اني راح اتزوج أحمد غصب عني ..
كنت ابي تركي يفقد الأمل .. لكن الظاهر ان تركي الى الآن متمسك فيني ويبغاني ..
قهرني لما قالي مصيرك ترجعين لي .. كرهت ثقته بنفسه .. كرهت غروره .. كرهت كل شي فيه .. لاني مجبورة اكرهه ..
خلاص راح اشيله من بالي بالغصب ..
مو حاله هاذي .. انا ابي تركي واهلي يبون الزفت احمد ..
احترت بينهم .. لكن الظاهر ان احمد هو الحل ..
شكلي برضى فيه .. بسسسسس لا .. مو على كيفهم يغصبوني ..
مابي آخذه وانا كارهته .. بحاول اني أعطي نفسي أمل اني راح اتقبله يوم من الايام ..
لاني مابي اعيش بتعاسه اذا اخذته ... ابي اعيش حياتي واحب وانحب واتدلع مثل ماكنت اسوي من قبل .. واجيب اخوان لسدومه ..
ليتني اقدر اتقبلك يا أحمد .. ليتني ..
نزلت تحت وجلست في الصالة ..
ناديت سدومه وجلستها على حضني ..
رنا : ماما حبيبتي .. تحبين عمو أحمد ..
سدومه : ايووووه ..
رنا : وعمو بندر ..
سدومه : ايوووووه ..
رنا : ماما تبغين نروح نعيش عن جده ؟؟
قامت تقلب عيونها علي وهي مو فاهمه وش قلت ؟؟
ضحكت على حركتها : ماما نروح لبيتنا ؟؟؟ ( قصدي شقتي )
فرحت سدوومه : لوووح بابا ( نروح لبابا )
جلست اناظرها .. يووووووووووووووووووووه ياسدومه تذكرين بابا ..
هذا وانتي صغيره اجل اذا كبرتي وش راح تسوين ؟؟
شكلي بوافق على أحمد على الأقل هي تحب أحمد وراح تتقبله أكثر من أي شخص .. واحمد بعد راح يتقبلها كون انها بنت أخوه ..
ماراح اتعب مع سدومه لو اخذت احمد ولا راح أخاف عليها .. وحتى اخوانها راح يكونون نفس عايلتها ونفس الأهل .. ماراح أحد يفرق بينها وبينهم ..
ليش ان افكر بنفسي وبس ..؟؟
ليش ما أفكر ببنتي المسكينه اللي راح تضيع لو اخذت غير احمد ..
ليش ما أفكر فيها لو كبرت كيف راح تتقبل زوج امها .. لازم تتحجب عنه .. والمفروض انها ماتكشف بعد ..
راح اوافق وكله لعيون بنتي ..
بسسسسسسسسس موافقتي مشروطه .. ولازم ينفذون لي كل شروطي .. غصب عليهم ..

أحمد
من بعد ماطلعت من البيت مارجعت ..
الحين الساعه ثلاث الفجر ..
لاتسألوني وش سويت كل الساعات اللي طلعت فيها .؟؟ لاني ماراح اقولكم ..
طول ما أنا برى البيت كان جوالي مايوقف اتصال ..
أمي
سعود
بندر
مرام
الكل كان يدق علي ومصر اني ارد.. لكن انا طنشتهم ولارديت ..
لاني لو رديت راح افرغ كل شحنات الغضب فيني عليهم ..
عشان كذا مارديت مابي اغلط على أي احد منهم ..
قبل آذان الفجر بنص ساعه رجعت للبيت ..
دخلت للصالة وكنت ناوي على طول ارقى لغرفتي ..
لكني شفت امي وبندر ومرام وسارة كلهم جالسين في الصالة وشكلهم ينتظرون احد ..
اكيد ينتظروني ..
اجل من ينتظرون ياغبي ؟؟؟هههههههه.. فاضي صح ؟؟؟!!
اول ماشافتني امي .. على طول قامت وضمتني بقوووووووووة وهي تصيح ..
امي وهي تصيح : وينك ياوليدي خوفتني عليك ...؟؟ الله يهديك لاترد على جوال ولادقيت تطمني عليك ؟؟
ضميته وانا احاول اهديها .. لانها من جد كانت خايفه علي .. خصوصا اني طلعت زعلان ..
أحمد : مافيني الا العافيه وهذاني واقف معك .. الحمد لله مافيني شي ..
فكت حضني ومسكت يدي وجلستني جنبها ..
جلست تبوس خدودي وراسي وكأني طفل صغير .. وهي تصيح والدموع اربع اربع بخدودها ..
ترى اول مرة اسوي هالحركه بأمي ..
أحمد : خلاص يمه هذاني عندك .. مافيني شي ..
امي وهي تمسح دموعها : خفت عليك ياوليدي .. ليتني مازعلتك .. ليتني ماقلت لا ..
حاولت اهديها : انا ماني زعلان .. واذا على الموضوع اللي قلت لك عليه .. خلاص اعتبري الموضوع ماصار ..
أمي : ليش اعتبره ماصار ؟؟ وانت تبيها ..
ابتسمت على تفكير امي .. يعني تدري امي اني ابيها .. اكيد سعود عبى راسها واقنعها غصب توافق ..
قلت لها بثقة واضحه : انا ماابيها .. الا اذا انتي وافقتي ... غير كذا ماعندي شي اقولها ..
امي وبتردد : بسسسسس ..
أحمد : لابس ولاشي .. اذا ماتبيني اخذها خلاص ما أخذها ..
أمي بحزن واضح وكأنها مجبورة : اذا تبيها خذها بس لاتسكنها معنا في البيت ..
استغربت كلام امي ..: وليش ؟؟؟
امي : بس ماابيها تسكن معي .. شف لك شقه وتسكنها فيها ..
احمد : بس هذا مو كلامك لو انها غيرها ؟؟
امي : ايه لو غيرها ابيك تسكنها هنا .. بس هي لا ..
احمد : بس انا مو ناوي اطلع من البيت .. انا بتزوج واسكنها هنا معكم ..
امي : لا مابيها .. واذا انت خايف علينا نقعد لحالنا .. انا بقول لسعود يجي يسكن عندنا ..
احمد : لا يايمه انا اللي بسكن معكم .. واذا انتي ماتبين تشوفينها .. انا راح اصلح شقه فوق واسكرها بباب .. عشان ماتنزل عليكم .. وبكذا تآخذون راحتكم وهي بعد تآخذ راحتها ..
سكتت امي وماعلقت .. وتوقعت من سكوتها .. انها ودها تعترض على اللي قلته بس خوفها اني ازعل واطلع من البيت زي ماسويت قبل .. خلاها ماتعلق ولاتقول شي ...
بيني وبينكم ارتحت راحة نفسية غريبه بعد هالكلام اللي قلناه ..
حبيت راسها : الله لايحرمني منك ..
تركتهم ورقيت لغرفتي ..
انسدحت على السرير من دون مااغير ملابسي وانا افكر كيف اسوي لي شقه ..واضبطها واثثها .. قبل لاتشرف ست الحسن والجمال ..

رنا
الوقت الحين العصر ..
فكرت وقررت بموضوع الزواج .. لكن عندي شروط ..
أخذت جوالي عشان أكلم عبدالرحمن واقوله اللي صار ..
رنا : هلا عبدالرحمن ..
عدالرحمن : اهلـــــــــين ( قالها من دون نفس )
من دون مقدمات : ابي اكلمك بموضوع ؟؟
عبدالرحمن : شوفي رنا لاتوجعين راسي .. اذا بتتكلمين عن زواجك من احمد .. تراي اقولها لك من الحين مالي خلقك ..
ميلت فمي بعصبية وقهر .. من زين وجهه بعد ..
رنا : لا مو عن أحمد .. ابيك بموضوع ثاني ..
عبدالرحمن : خلاص قوليه لي اذا جيت اسلم على امي المغرب .. مع السلامه ..
رنا : انزين .. مع السلامه ..
مالت عليك من أخو .. ماعنده وقت ..
والله لأوريكم كلكم واولكم أحمد .. اما شيبت بشعوركم مااكون انا رنا بنت ابوي ..
ماصدقت أذن المغرب على طول صليت وزينت القهوة وجلست في الصالة انتظره ..
شوي الا جت امي وجلست .. من ذاك اليوم اللي سكتت فيه امي لما كنت اكلمها عن خطبة أحمد واني مابيها .. بعد ماكلمتها ابد .. حتى هي ماتعطيني وجه ..
بعد نص ساعه شرف الاخ القدوة..
عبدالرحمن : السلام عليكم ..
امي بس : وعليكم السلام ..
حب راس امي وجلس ..
عبدالرحمن : هاه وش عندك ؟؟ قولي ؟؟
رنا : فكرت وقررت ..
قاطعني بالكلام : ومن قالك فكري وتعبي عمرك ؟؟
قهرني ورفع ضغطي .. بس هين اوريك ..
رنا : انزين خلني اكمل ..
عبدالرحمن : يالله غردي ..
من زين وجهه ويتطنز ..
رنا : موافقه على الزواج بس .. مو على أحمد .. بس لي شروووووووووط ..
ضحك عبدالرحمن وهويصب له فنجال قهوة :: والله انتي رايقه .. ولك شرووووط بعد ..
هنا انا عصبت ولاقدرت اتحمل تريقته : قسم بالله ياعبدالرحمن لو ماتنفذ شروطي اللي قلته .. ورب البيت لاخربها فوق راسك .. لاهميتني ولاهمني غيرك .. وتراي اسويها ..
كنه خاف عبدالرحمن من انفعالي وعصبيتي : انزين وش هي شروطك ؟؟
ارتحت لما سألني : اولا – ابي يسوي لي عرس وبقصر ..
شفته يناظر امي .. وأمي تناظره . وكلهم مستغربين من شرطي ..
عبدالرحمن بإستغراب : تبين عرس ؟؟ من جد تتكلمين والا تمزحين ..؟؟؟
رنا : لا اتكلم جد ..
عبدالرحمن وهو مو مصدق : بس انتي مو اول مرة تتزوجين عشان تطلبين عرس وطقطقه ؟؟
رنا : مو من حقي ؟؟
عبدالرحمن : الا حقك .. خلاص بقول لأحمد وبشوف وش يقول ؟؟
رنا : قله .. بس والله لو ماسويتوا لي عرس .. ان تشوفون شي ماشفتوه بحياتكم ..
عبدالرحمن : اخلصي وش الشرط الثاني ؟؟
رنا : اسكن لحالي .. شقة بروحي .. مو يسكني عند اهله ..
عبدالرحمن : هاذي بسيطه .. غيره ؟؟!
رنا : دراستي لو بغيت أكملها مايرفض ..
عبدالرحمن : انزين .. وغيره ؟؟
ترددت قبل لا أتكلم .. ادري بيعصبون علي ..
تشجعت وقويت قلبي وقلت له : مايجبرني احمل ...
طيروا عيونهم علي وكأنهم يبون يآكلوني ..
كلهم بصوت واحد : وشووووووووووو ؟؟
تكلمت بثقة : اللي سمعتوه ..
امي بعصبية وودها تكفخني بأقرب شي عنده : انتي صاحية والا مجنونه .. ؟؟ ماتستحين على وجهك تقولين لأخوك مثل هالكلام ؟
رديت بعصبية على امي : لااااااااااااا يايمه مو انا المجنونه .. ولدك هو اللي غصبني .. ليش ماتفهمون علي ؟؟ وافقت عشانكم .. بس مابي بكره اذا صارت بيني وبينه أي شي وعافني .. اجيكم وانا ببطني ولد منه ..
عبدالرحمن وكأنه اقتنع باللي قلته : بس يارنا وشلون اقول للرجال ماتبي تحمل منك .. عيب والله عيب ..
رنا : مو شغلي .. العيب مراح ينفعني بكره اذا حملت منه وطلقني .. عبدالرحمن حط نفسك بموقفي .. وانصفني لو مرة ..
سكت عبد الرحمن وقعد يفكر ..
بعدين قال : عندك غير هالشرط والا خلاص ؟؟
رنا : لا ماعندي ..
عبدالرحمن : اجل ابشري كل شروطك راح تنفذ .. تآمرين شي ثاني ..
ابتسمت وانا مااصدق اللي سمعته ..
رنا : تتكلم جد باعبدالرحمن والا تآخذني على قد عقلي ..
عبدالرحمن : لا والله اتكلم جد ..
كذا انا ارتحت ..
من دون شعور قمت وحبيت راسه يوم بغيت ارجع مسكني مع يدي ..قام بسرعه وحضني ..
اول مادفيت بحضنه .. قعدت اصيح ..
قعد يمسح على شعري ويقول : سامحيني يارنا اذا قسيت عليك مرة .. بس والله كله عشان مصلحتك ..
كنت اهز راسي بحضنه وانا اشاهق من الصياح ..
عبدالرحمن : خلاص وانا اخوك تراك قطعتي قلبي بصياحك ..
ابعدت عنه وعلى طول رحت لأمي وحضنتها بقوة وكلمت صياح بحضنها ..

أحمد
كلمني عبدالرحمن بعد صلاة العشاء وطلب يقابلني ..
بصراحه خفت من هالمكالمة الغريبة ..
ياترى وش يبغى فيني ؟؟ لايكون هونوا ..
لا لا ما أتوقع ..
اجل وش يبي فيني ؟؟ يمكن يبي نتفق ويحدد معي كل شي ...؟؟
يمكن ..
الله يستر ويعدي هاليوم على خير ..
زرته في بيته ..
اول ماشافني ابتسم .. انا بس شفت ابتسامته ارتحت ..
وعرفت انه يبي يكلمني بموضوع الزواج وبس ..
عبدالرحمن : هلا والله بالنسيب ..
أحمد : هلا فيك ..
عبدالرحمن : ادري انك مستغرب من اتصالي ..
أبتسمت كنه داري باللي داخلي : شوي بسس ..
عبدالرحمن : انا ناديتك بقولك شروط رنا ..
رفعت حواجبي بإستنكار : شروطها ؟؟!!
عبدالرحمن وكأنه استغرب علي الحركه : ايه شروطها ليش رفعت حواجبك ؟؟؟ تتوقع اللي نفس حالتها مالها حق تتشرط ..
تفشلت .. وضاع وجهي قدامه ..: الا لها حق ونص .. ورنا تستاهل ..
عبدالرحمن : بس شوف فيه شي انا مااقتنعت منه .. بس هي مشترطه مايتم الزواج الا بهالشروط ..
أحمد : هي تآمر وحنا ننفذ .. اعتبر كل شروطها خالصة حتى من دون ما أسمعهن ..
عبدالرحمن : انا بقولهن لك .. وانت شف عاد ..
أحمد : اسمعك قول ..
عبدالرحمن : اول شرط .. رنا تبي عرس ..
ابتسمت على هالشرط .. والله فاضيه الأخت ..
تبي عرس !!
هزيت راسي لعبدالرحمن وانا اقول : وغيره ؟؟!!
عبدالرحمن : تب تسكن بروحها ..
هنا انا ميلت فمي واعتبس وجهي ..
هذا اللي ماحسبت له حساب .. وش بقول الحين لعبدالرحمن ؟؟
ليتني قايله من زمان قبل لا هو يقولي ..
عبدالرحمن درى اني تضايقت : وش فيك ؟؟ الشرط ماعجبك ..
احمد : مو مسألة عجبني او ماعجبني .. بس انا كنت ناوي افتح معك هالموضوع .. بصراحه ياعبدالرحمن .. انا مقدر اطلع عن اهلي .. يعني انا الحين صرت مسؤول عنهم .. وكنت بكلمك من قبل واقولك ترى مراح اطلع بشقة بس ماجت الفرصه ..
عبدالرحمن : والمعنى ؟؟
احمد : والله ياعبدالرحمن انا مقدر اطلع من اهلي .. انت حاول تقنعها .. خصوصا اني بسوي لها شقه مستقله وتكون بعيده عن اهلي بحيث تآخذ راحتها بالكامل ..
عبدالرحمن : يعني مطبخ وغرف وحمام ..
أحمد : بالضبط .. وراح تسكرها بباب وكأنها بشقه بروحها مالها دخل بأهلي ابدا ..
عبدالرحمن : اذا كذا اوكي .. مافي مشكلة ..
أحمد: ابدا مافيه مشكلة .. فيه شروط غير هذا والا بقى ؟؟
عبدالرحمن : تكمل دراستها اذا بغت ..
والله انها سخيفه هالرنا .. هذا شرط تقوله ..من زين شهادتها وتتكلم بعد ..
احمد : ماعندي مشكله ابد .. لو تبي الماجستير انا موافق ..
ضحك عبدالرحمن من كلامي لكنه مسرع ماعبس وجهه ..
قلت بنفسي اكيد فيه شرط رابع بعد ..: سلامات وش فيك عبست وجهك ؟؟
عبدالرحمن : والله يا أحمد مدري وش اقولك ؟؟ بس هذا شرطها ولازم اقوله لك ..
احمد : قل ولاتستحي .. وزي ماقلت لك هي تشرط وتتأمر بعد ..
عبدالرحمن ويالله يالله تطلع الكلمة منه : مايجبرني اني احمل منه ..
مدري وش صار لي بعد هالكلمتين اللي قالهم ..؟؟
مدري انا ماسمعته زين ؟؟
او اني عجزت استوعب ؟؟
بالضبط بالضبط ما أدري .. بس اللي ادري عنه اني قلت ..
احمد : كذا عاد زودتها كثيييييييييييييييييير ..
كملت وانا معصب : مو بشروط هاذي ياعبدالرحمن هاذي اهانه لي .. وبعدين اذا هي ماتبيني او مغصوبه علي بلاها ياخوك والله يستر علينا وعليها ..
كنت من جد معصب وكرهتها في هاللحظة من قلب ..
عبدالرحمن يحاول يهديني : الله يهديك يا احمد .. انا رفضت شرطها .. بس هي اصرت .. ماعليك منها هي بس عشانها متخوفه شوي من هالتجربه .. وانت بعد يا أحمد اذا تبيها من جد ترفق عليها ألين تعتاد عليك .. ترى صعبة الحرمة تآخذ أخو زوجها ..
صادق عبدالرحمن بكل اللي قاله ... بس المفروض ماتعلن هالشرط على الملأ .. تقولي وانا مستحيل اجبرها على شي هي ماتبغاها ..
بس شكلها مثل ماقال اخوها خايفه ..
بعد ماهديت وحسيت اني اقدر اتكلم : خلاص ياعبدالرحمن كلها شروطها منفذه .. غيره ؟؟
عبدالرحمن : بس هاذي شروطها جعلك سالم ..
أحمد: الله يسلمك ..
عبدالرحمن : اجل اتفقنا على الشروط بقى بس المهر وتحديد الزواج ..
أحمد : المهر ان شاء الله مراح نختلف عليه .. اما تحديد الزواج .. اصبر علي يومين عشان اضبط اجازتي وارد عليك ..
عبدالرحمن : اجل توكلنا على الله .. بعد ماتعطينا المهر ونرتب وضعنا نعطيك خبر عشان تجي تملك ..
أحمد : على خير ان شاء الله ..
قمت بطلع لاني حسيت نفسي مخنوق : تآمرني شي ..
عبدالرحمن : العشاء ؟؟
احمد : تسلم ...
عبدالرحمن : بسلامتك اجل ..
احمد : الله يسلمك ...
طلعت وانا ودي اشق هدومي من هالشروط اللي كلها زي وجهها ..
عرفت تقهرني وتحرق لي اعصابي ..
بس انا ماسويت لها شي عشان تجازيني كذا ..
هين يارنوووووووو تجين ودواك عندي ..

** بعد شهر **

رنا
في البداية حبيت أقولكم اني تصالحت مع امي واخواني .. عقب الموقف الأخير اللي صار لي ....
مر هالشهر بسرعه ماحسيت فيه ابد ..
لاني كنت طول الوقت بالسوق .. اتقضى أغراض الزواج .. جعله مايتم قولوا آمين ...
عطاني مهر 80ألف ..
تشريت لبنتي ملابس جديده وجزم ( وانتوا بكرامه ) واغراض كانت ناقصتها ..
اما أنا ماقصرت بعمري .. الله لايقصر بعمر أحد ..
تشريت لي ألين شبعت .. من كل شي ..
بعدين تفرغت لفستان الزواج .. ابدعت فيه وتعبت عليه .. بس في الأخير طلع جنااااااااااااااااااااااان .. شي من الخيال ..
حطيت حرتي كلها فيه .. فصلته تفصاااااااااااال اتعب واقول انه فستان ..
بس ماتقيسته الى الآن .. مدري أحس اني خايفه موووووووت ..
خوفي اني البسه وعلى طول ادخل عليه ..
عشان كذا شلت فكرة اني اتقيسه الين يوم الزواج ..
انا تقيسته في المشغل وطلع مضبوط .. بس الخوف اني اتقيسه في البيت ..
حتى لو اقفل باب غرفتي مليون قفل .. راح اظل مرعوبه ..
ففضلت اشيل هالفكرة من راسي الين يجي الزواج ..
تحدد يوم الملكه اللي راح تكون بالاسم فقط .. لان الزواج راح يكون كفيل بإعلان الزواج ..
حجزت لي كوفيرة ليوم الزواج .. ومصورة فيديو بعد بس من دون ما أحد يدري ..
لاني عارفه اهلي راح يمنعون التصوير .. ففضلت اني اسوي كل شي سكيتي ..
اهاااااااااااااااا .. صح ماقلت لكم ..
قررت اني انزف .. بصراحه ودي اخربها عليهم ..
كلمت خالتي ام فجر في الموضوع وتحمست ..
خالتي كانت فري وكل شي عندها عادي .. وبالعكس شجعتني على الزفه فرتبت وياها الوضع بسكااااااااااااااااات من دون أمي ماتدري ..
لان امي لو درت راح تلغي الزواج العلني من اصله وراح تخليه سكيتي ..
عشان كذا اتفقنا وكتمنا على الموضوع .. وساعدتني في الحجز وترتيب اوضاعي ..بنت خالتي فجر .. الله يجزاها الف خير .. من جد احس اني تعبتها معي ...

أحمد
دوروني هالشهر .. انا متأكد مراح تلقوني ..
ياني تعبت تعب مو صاحي .. مدري أركض اسوي الشقة وأثثها ..
او اركض احجز لست الحسن والجمال القاعه اللي راح تسوي فيها احتفاليتها ..
من جد ياهي قاهرتني ورافعه ضغطي ..
بس والله للأدبها تأديب عمره ماشافته ..خلوني بس اشوفها بالأول بعدين اعلمها الأدب على أصولها ..
بس رغم هالتعب الا أني الحمد لله اجزت شغلي كله ورتبت وضعي عالي العال ..
ضبطت شقتي .. سويتها في الدور الثاني ..
غرفة النوم مع الحمام .. وغرفة سدومه .. مطبخ وصالة وحمام ..
كذا اتوقع يكفيها .. اذا على ضيوفها مو مشكله تستقبلهم تحت .. المجالس كثيرة .. تختار لها غرفة وتضيفهم فيها ..
أثثت الشقة وتعبت على تأثيها .. كنت احاول اختار افخم الأثاث والديكورات .. لاني اعرفها ذويقه في الأثاث ..
بس اللي ابدعت فيها بجد هي غرفة النوم .. حطيت حيلي كله فيه .. واللي ساعدني اكثر وخلاني ابدع .. هو مساحة الغرفة اللي كانت وسيعه بالمرة .. قسمتها لأقسام متأكد انه راح يعجب رنا ..
مراح اوصف لكم اكثر .. اذا جت رنا راح تقولكم وش رايها وتحكم ؟؟
بعد ماانتهيت من الشقة ..
رحت ادور لي قاعه بس الحمد لله ماتعبت في هالشي لانها كانت متوفرة بالهبل .. تعرفون الحين وقت دراسة والناس لاهيه .. مو وقت عرس الحين ..
حجزت لي قاعه كويسة ومقبولة وسعرها حلو ..
بعد ماانتهيت من كل هذا ..
كلمت عبدالرحمن وحددت وياها موعد الملكه .. وخبرته اني حجزت القاعه اذا حابين يشوفونها او يعدلون فيها تراه جاهزة ..
اتفقت انا وياه .. الملكة راح تكون يوم الخميس وزواجنا راح يكون الأربعاء على طول ..
اووووووووه ماقلت لكم ردة فعل امي على الموضوع ..
امي عصبت يوم قلت لها بسوي عرس ..
وقالت بالحرف : والله انها ماتستحي .. شين وقوي عين .. بتتزوج المرة الثانية وبتسوي عرس وطقطقه .. هاذي شكلها بايعتها ..
ياني ضحكت على هالكلمة ضحك ..
بفهم امي منين جابت هالكلمة ؟؟
اما يوم قالت بايعتها .. ماني مصدق ان هاذي امي ..
امي تغيرت كثير على رنا .. ليش ؟؟ ما أدري ..
كانت تحبها وتبغيها والدليل لما كانت رنا بتروح لأهلها وتقضي العدة .. كانت تصيح وتجي تشتكي لي ..
بس الحين تبي فراقها وبعادها .. وانا بنفسي قربت البنزين عند الحطب ..
بس اتوقع رنا راح تكون هادية مثل ماعرفتها .. وماهي راعية مشاكل ..
اتمنى توقعي يكون في محله ..

رنا
اليوم يوم خميس ..
قمت من فجر الله .. لان عبدالرحمن عازم رجال عمتي على الملكه ..
ويبي عشى سنع ..
على طول صليت الفجر ونزلت ..
اول شي بديت بالسلطات .. سويت ثلاث انواع .. بعدين حلى القهوة وحلى العشاء ..
القهوة ثلاث انواع .. وحلى العشاء نوعين ..
لما خلصت .. رحت للمقلط وفرشت السماط ورتبت الصحون والملاعق والكاسات ..
اذن الظهر .. صليت ورجعت مرة ثانية للمطبخ ..
جلست الف سمبوسه وسبرينغ رول .. الين اذن العصر ..
بعدها صليت ورجعت مرة ثانية وانا حاسه ان ضهري انكسر ..
سويت الجريش ومرقة الخضار ..
وقبل لا يأذن المغرب سويت القهوة والشاهي وجهزتهم لان الضيوف راح يجون بعد صلاة المغرب ..
على طول اول ما أذن رقيت فوق وتسبحت وانا حاسه بدوخه .. فيني نوووووووووووم .. بس لو نمت من راح يكمل الشغل ..
تأففت وانا اتذكر مافيه غيري بهالبيت ..
نسيت اقولكم الرز واللحم من المطعم .. اشوي اني افتكيت منه ..
المهم لبست تنورة قصيرة الى نص الساق لونها بني محروق مع لمعه خفيفة .. مع بلوزة كم قصير مرة لونها لحمي على وردي ساده .. وفتحة الصدر كانت دائرية على حد الرقبة ..
لبست شبب وردي سخيف مرة ..
لميت شعري الرطب بعشوائية وحطيت قلوس وردي خفيف .. بدون كحل او حتى اتعطر ..
صليت ونزلت ..
بديت اجهز الفناجيل والتمر ..
دخل علي فواز : ياسلام ياسلام وش هالزين ؟؟ وراه توه يطلع .. والا يوم بغى يجي احمد طلع ..
ناظرته بنص عين وانا مالي خلق مزحه الثقيل لاني تعبانه موووووووووووت ..
فواز وهو ينغزني من خصري : اموووووووووووووت على اللي يستحون ومو معطيني وجه ..
وقفت قباله : فواز ياتسكت ياتطلع برى .. تعبانه حدي .. وانت قاعد تتمسخر علي ..
فواز وهو يضيع الموضوع : انزين وين القهوة يالله الرجال جو ..
مديت له الدلال : روح ودهن بعدين تعال شيل الصينيه ..
اخذهن وطلع ..
ماصدقت طلع الا اجدع نفسي على الكرسي من الدوخه اللي ذبحتني ..

أحمد
خايف ومتوتر ..واحس نفسي ثقيله حيل ..
صلينا المغرب انا وسعود وبندر .. وعلى طول على بيتهم ..
قبل لا أنزل عدلت تشخيصتي بالشماغ الأحمر وانا احس روحي طايره ماادري من الفرح هاو من الخوف ..
الله يستر ويعدي هالليلة على خير ..
دخلنا البيت اللي كانت ريحة البخور واصلة آخر الحي من قوتها ..
سلمنا على الضيوف اللي كانوا موجودين وعرفنا عبدالرحمن عليهم انهم رجال عماته .. مفروض اني اعرفهم .. بي لان مافيه علاقة خاصه تربطني فيهم ماعرفتهم .. مو مثل مشعل الله يرحمه كان يعرفهم ..
جلست انا واخواني جنب بعض ..
وكنت طول الوقت ساكت .. لكن سعود ماشاء الله عليه سلك مع الرجال وصار يآخذ ويعطي معهم ..
كنت اقلب عيوني بينهم .. متوتر حدي ولاني عارف وش اسوي او وش اقول ؟؟ جاني خووووووووووووف غير طبيعي ..
كنت خايف انه الزواج مايتم .. وفكرة اني اطلع من بيتهم وانا ما أخذت اللي ابيه .. كانت مرعبة بالنسبة لي ..
طول الوقت وانا اتعوذ من ابليس واقرأ المعوذات .. بس احس نفسي كل مالها واردى من قبل ..
لما جابوا القهوة .. وصب لي فواز فنجال .. وقربها من يدي ..
همس لي : من قدك بتآخذ شيخة البنات .. والله لو تشوفها كيف كاشخة ان تذبح عمرك قدامها ..
تنفست بأقوى ماعندي وانا احس ان الفنجال بيطيح مني ..
حطيت على الطاولة بيد مرتجفه .. وانا ادعي ان محد ينتبه لي ..
انا ما أدري الحين وين المملك ماجى الى الآن انا مواعده بعد الصلاة .. ليتني منتظره برى كان احسن لي ..
كنت بدق عليه جوال .. بس خفت يقولون وش فيها مستعجل .. ؟؟ شكله ماصدق .. فسكت وخليت سعود هو اللي يتصرف ..
حاولت اشرب شوي من القهوة .. وان شاء الله انها تريح اعصابي ..
لكن يدي عيت تمسك الفنجال .. تقل في مسلسل بدوي ..

يتـــــــــــــــــــــــــــــــــــــــــــبع