الجزء الرابع ..
احمد
بعد ماصليت .. رجعت للبيت ..
جلست في الصاله بما ان رنا مو موجوده استغلها واتقهوى مع امي ..
بس كنت مرة متضايق ..
انا مو متضايق من تصرف رنا معي ..
لا .. انا متضايق لاني قاعد افكر فيها ..
متضايق لاني حطيتها ببالي .. وشلون مدري ؟؟
متضايق لاني قاعد اتعب نفسي على الفاضي ..
لاني مستحيل آخذها .. وحتى لو انا بغيت آخذها مستحيل اهلها يوافقون ..
ليش نروح لبعيد .. اصلا اهلي مستحيل يوافقوا ..
يعني كذا والا كذا يااحمد .. الدعوه خربانه .. فلا تخربها زياده ..
شوي الا دخل بندر ووراه سارة اللي على طول فسخت النقاب .. اما ست الحسن والجمال على طول رقت لفوق ..
على ايش شايفه نفسها يانااااااااس .. انا مدري ؟؟..
مدري هو غرور اللي فيها؟؟ .. والا ثقة زيادة عن حدها؟؟ .. والا تكبر وتعالي ؟؟..
والله مدري وش اللي مخليني احوس مع هالبنت ؟؟ ..
بندر : يمه صبي لي قهوة ..
امي : ان شاء الله .. هاه وش قالوا ؟؟
بندر وهو يستعبط تقل انا فاضي لحركاته : من هم ؟؟
امي : وش قالوا عن رنا ؟؟ وش فيها ؟؟
بندر وهو يرفع كتوفه بغبااااااااء واضح عليه : مدري عنها .. ماسألتها ؟؟..
عصبت منه : يعني انت رايح منظر .. وش اللي ماتدري عنه ؟؟ يالله محد مجنني بالهبيت غيرك من غباءك وبرودك ..
بندر وهو يرفع اصبعه ويوجهه علي : هيه انت لاتكلمني كني اصغر عيالك .. وبعدين مااخذت الغباء الا منك .. يعني وراثه من اخ الى اخ .. ههههههههههه
قهرني وهو يضحك .. وانا قاعد احترق بشوف وش سالفتها هاذي هي وبطنها ..
سكت ولاقلت شي .. حتى امي ماسألت بندر مرة ثانيه ..
لما جت سارة اللي راحت تفسخ عباتها سألتها امي على طول : اكيد انتي عندك الخبر .. وش قالوا في رنا ؟؟ وش اللي متعبها ؟؟.
سارة وهي تنهد : والله يايمه اول ماشفت رنا طالعه من الغرفه .. اشرت لي ولحقتها .. ويوم بغيت اكلمها .. ماش تراجعت .. حسيت مو وقته اسألها هالسؤال .. لانها كانت ماسكه بطنها وترص عليه .. قلت يمكن يوجعها مابي ازيد اوجاعها بكثرة حكي ..
الحين عصبت وبقوة بعد : انا بفهم شي واحد .. انتم وش عندكم رزاين وجوهكم ورايحين معها وانتم كأنكم صم بكم عمي ؟؟ ..
بندر وهو يبي يحرق دمي زيادة ماهو محروق : والله ياحبيبي لو هي تهمك ويهمك امرها .. ورى ماقمت من نومتك ووديتها عشان تتطمن عليها بنفسك .. صاير تخاف عليها هالايام اكثر من نفسك ..
وقفت وانا معصب ومن العصبيه انكب فنجال القهوة على ثوبي وانا اقول : على تبن ياحمااااااااااار .. انا قايل لك اكثرمن مرة لا تكلمني بهالاسلوب .. والا والله يابندر ان تشوف شي ماشفته !!..
وطلعت فوق لغرفتي اغير ثوبي وابطلع .. لاني خلاص احس اني بختنق ..
رنا
ياربي ساعدني ..
يارب ساعدني ..
ماني مصدقه ياناس ..
ولدي ميت .. لا .. تكفون قولوا غير هالكلام ..
يارب الطف بي .. يارب أرأف بحالي .. يارب ارحمني ..
دمعت عيوني .. وانا احاول اني امسحها كلما نزلت ..
تجرحت خدودي من كثر المسح فما قدرت اقاوم .. وانفجرت اصيح باقوى ماعندي ..
وماهمني احد يسمع صياحي او مايسمع !!!..
اهم شي اطلع اللي بقلبي ..
احمد
طلعت من غرفتي ..
وانا اصك الباب بأقوى ماعندي من العصبيه اللي ملازمتني هالايام ..
مريت في طريقي على كل الغرف ..
بس !!
وقفني صوت صياح .. وصياح عالي بعد ..
من الي قاعد يصيح ؟؟ .. لاتكون مرام ؟؟..
التفت لغرفه مرام .. شفت النور طافي ..
لا مو مرام اللي تصيح !!..
هاذي اكيد .....؟؟؟
التفت بأشوف نور غرفه رنا ..
مفتوووووووح النور!! ..
بس معقوله رنا تصيح ؟؟..
ليش طيب ؟؟
قربت من غرفتها .. والصوت كلما له ويقرب ..
من دون شعور او وعي مني ..
دقيت على الباب ..
الصوت ماتغير على حاله ..
اكيد ماسمعت الباب ..
دقيت الباب بأقوى شوي عشان تسمع ..
فجأة سكت الصوت .. وتغير الى أنين ..
ناديتها بصوت عالي عشان تسمعني : رنــــاااا !!..
رنا
لما سمعت صوت يناديني خفت .. مدري ليش ؟؟
يمكن دروا ان اللي ببطني ميت وجايين عشان يودوني غصب انزله ..
لا .. لا ..
بس انا ماقلت لاحد ..
اجل من اللي قاعد يصوت بأسمي ..
قمت وانا اصلب طولي .. وهاذي عادتي كلما بغيت اقوم ..
قربت من عند الباب ..
قلت بصوت يالله يالله طلع مني : من ؟؟؟
.......: انا احمد .. رنا فيك شي ؟؟!!
قسم بالله اني بغيت افتح الباب واحضنه بقووووووووووة ..
تدورن ليش ؟؟
لانه نفس النغمة اللي كنت اسمعها من مشعل الله يرحمه ..
نفس الصوت ونفس النغمه ..
مسكت اعصابي وانا خلاص على ادنى شي راح انفجر من الصياح ..
رديت عليه بكل برود عشان مايحس ان فيه شي وحاولت اخلي صوتي طبيعي : بغيت شي ؟؟
احمد
قهرتني ببرودها ( بغيت شي ..)
انا الحين خايف عليها ..
وهي ترد علي بهالكلمه ..
معليش يااحمد .. استحملها وكمل معها للنهايه وشوف وش آخرتها معها؟؟ ..
ماسألتها عن صياحها لاني عارف راح تنكر ..
لكني سألتها : وش قالت الدكتورة عن بطنك ؟؟
انتظرت الجواب لكنها طولت ..
قلت بأعيد عليها السؤال مرة ثانيه ..
بس قلت لا .. اصبر وش انا مستعجل عليه ؟؟
شوي ويجي صوتها :تقول ... ان الجنين امم يعني هو منقلب .. وشي طبيعي تحسين بالالم .. لان موعد الولاده قرب ..
فهمتوا شي ؟؟ ..
انا بصراحه مافهمت ولا كلمه ..
بس هين يارنا ..
مصيري انا وياك نتواجه ..
وفي الساعه اللي بنتواجه فيها راح اكسر خشمك اللي رافعته علي .. وعلي انا بالذات !! ..
نزلت تحت من دون ماارد عليها ..
وطلعت من البيت وانا احس اني مخنووووووووووووووووق ..
رنا
مسكت راسي وانا خايفه اني اطيح ..
يالله وشلون كذبت هالكذبه؟؟ ..
ليش مدري ؟؟ .. بس كان لازم اكذب ..
حسيت بخطوات رجلين تبعد .. وبعدين سمعت خطواته تنزل من الدرج بقوة ..
دريت انه راح .. بس احس انه عصب ..
على طول رحت وانسدحت على السرير وانا احس ان الدنيا تلف وتدور فيني ..
ياربي وش الحل ؟؟
وش اسوي ؟؟
غفت عيني من دون شعور من التعب والصياح اللي صحته ..
احمد
دقيت على امي بجيب انا العشاء اليوم من المطعم ..
فدقيت اعلمهم انهم لايسوون ..
على الساعه عشر ..
رجعت للبيت معي العشاء ..
وكالعاده رنا فوق .. فأخذت راحتي ودخلت المطبخ وحطيت العشاء فيه ..
احمد : يالله مرام حطي العشاء لي بالملحق .. برقى فوق شوي وبرجع ..
دخلت غرفتي فسخت ثوبي ولبست قميصي ..
اخذت الاب توب ونزلت ..
لما دخلت الملحق .. لقيت سديم عند التلفزيون ..
يالله على هالبنت ماتمل من الافلام كرتون .. بتروح عيونها وهي مابعد دخلت المدرسة ..
جلست وبحضني الاب توب ..
احمد : سدومه تعالي اجلسي جنبي ..
سديم : مابي ..
تقهرني ماعندها الا هالكلمه ( مابي ) حافظتها وازعجتنا فيها ..
صاير زي امها .. ماتسوي الا اللي براسها ..
حاولت اعصب عليها علشان تخاف مني : تعااااااااااااالي ..
قامت من عند التلفزيون ووقفت عند الباب وهي تحط اصبعها عند مخها : مابي ..
وطلعت تركض ..
حمااااااااااااااااااارة
انا اوريك ياسدومه ..
قمت ولحقتها وهي تصارخ وتركض : مااااااااااااااااااااامااااااااااااااااامااااااااا اااااااااماااااااااااااااااااااااا ..
وانا الحقها وهي تضحك ومابلسانها غير مامااااااااااااااااا ..
رنا
رن جوالي على الساعه تسع ونص ..
رديت وانا صوتي كله نووووووووم : هلا يمه ..
امي : هلا بنيتي وشلونك ؟؟
رنا : الحمد لله انتي وشلونك ؟؟
امي : بخير .. وراه صوتك كذا ؟؟
رنا : مامي انا نايمه ..
امي : يعني قومتك من النوم .. خلاص اجل كملي نومك .. انا دقيت بس بشوف وشلونك ؟؟ وبسألك انتي رحتي والا لا .. يالله اجل مع السلامه اكلمك مرة ثانيه ..
رنا : مامي خلاص طار النوم .. رحت اليوم .. وسويت اشعه قالت تطلع بكره ..
ليه كذبت على امي .. مدري ؟؟
هاذي الكذبه الثانيه بعد كذبتي على احمد ..
احمد ماعلي منه خليه يولي ..
بس اكذب على امي لا .. حتى لو بقولها الحقيقة مستحيل اقولها ..
بس كذبه عن كذبه تفرق .. والا ؟؟
سكرت من امي بعد ماطمنتها علي .. ووعدتني تزورني خلال هالاسبوع ..
قمت وانا احس بكسل ..
فقررت اتسبح عشان اتنشط ..
بعد ماخلصت لابسه لفيت شعري بشباصه .. ولفيت جلالي على راسي ونزلت تحت ..
اول مادخلت الصالة ..
سمعت صوت سديم وهي تقول مااااااااااااااااااااماااااااااااااا ..
قربت من الصوت بحركه سريعه .. كان الصوت جاي من جهة الرجال ..
اول مابغيت ادخل مع الباب الفاصل بين الصاله ومغاسل الرجال شفت سديم تركض وجايه اتجاهي ..
لكني حمدت ربي وشكرته اني كنت مغطيه وجهي بالجلال ..
احمد
وانا الحق سديم ..
ماتوقعت انها تقول ماااااااااااااامااااااااااا وتعني امها الواقفه عند الباب .. اول ماقربت امسكها شفت يدينها تلف ورى رجلين احد من هو ؟؟ مدري ؟؟
رفعت راسي بشوف من هو الشخص اللي ضمته سديم ..
على طول من شعور ..
ابتسمت ..
وياليتني ماابتسمت !!! ..
لانها شالت بنتها وطلعت .. وصكت الباب وراها ..
والله كأنها صكت على قلبي ..
رجعت وانا اميّل فمي يمين ويسار ..
تنهدت انا اقول في نفسي .. الله يعيني عليك يارنا ؟؟
رجعت للملحق وفتحت الاب توب وجلست اتصفح ايملي وانا بالي مو معي ..
بالي مع .......... !!!
انتم تعرفونها ؟؟
رنا
قايله لكم ماينعطى وجه ..
بس ماصدقتوني ..
شفتوا بعيونكم وش صار ؟؟
من زين خشته يبتسم ..
على ايش ؟؟ مدري ؟؟
اول ماسكرت الباب .. نزلت سديم على الارض ..
احسها كسرت ظهري بهالدقيقة اللي شلتها فيها ..
جلست في الصاله وانا الهث .. واحس بالالم يرجع مرة ثانيه ..
حاولت انساه لكن ماقدرت ..
قمت ودخلت المطبخ عشان اشغل نفسي .. ومااتذكر الالم ..
شفت اكيااااااااس على الطاوله من المطعم ..
وش السالفه ؟؟
وش صاير ؟؟
رنا : مرام وش فيه ؟؟ من اللي جايب هالاكياس ؟؟
مرام : احمد قال اليوم بعشيكم ..
فتحت خشتي وانا اقول : أهاااااااااااااااااااا ..
بعذره ابتسم لي قبل شوي .. اثره جايب العشاء من بره ..
يجي منك يا أحمد اشياء حلوة ..
رنا : مرام تبين اساعدك بشي ؟؟
مرام : لا سلامتك روحي ارتاحي شكلك مرة تعبانه ..
تضايقت لان شكلي باين عليه التعب ..
فسألتها أبتأكد : صدق شكلي باين عليه انه تعبان ؟؟
مرام : أي والله .. شوفي عيونك وشلون منفخه ووجهك اصفر ..
طلعت من المطبخ وانا اقول لمرام : انا بجلس في الصاله اذا تبين شي ناديني ..
جلست افكر .. يالله لازم بكره اروح اسوي اشعه ثانيه عشان اتأكد ..
بس من يبي يوديني ؟؟..
فايز اللي راح يوديني .. بس ؟؟
اوووووووووف ..
المشكلة ابي مستشفى خاص اكشف فيه ..
تصدقون عاد مامعي ولا ريااااااااااااااااااال واحد ..
واكيد فايز مامعه فلوس ..
حتى لو معه ماراح اخليه يدفع ..
واذا قلت لامي تعطيني بتقول وش عندك بتروحين مستشفى خاص .. واكيد تبي تقعد تهوجس وتوسوس ..
ياربي وشالحل ؟؟
وش اسوي ؟؟
انا لو معي فلوس كان انحلت .. بس مامعي ..
منين ادبر لي فلووووووووس ..
ايه جبتها ..
اتسلف من مرام او سارة ..
طيب لو سألوني ؟؟
ليش يسألون اصلا هم مالهم دخل يسألوني يبون يعطون يعطوني .. مايبون كيفهم ..
احمد
توي داخل البيت .. جاي من الدوام تعباااااااااااااان ودايخ .. بس ابي انام ..
على طول رقيت فوق .. دخلت غرفتي .. غيرت ملابسي شغلت المكيف وانسدحت على السرير ..
يا سلااااااااااااام يازين البراد ..
اندق الباب ..
احمد : من ؟؟
........ : انا مرام .. ادخل ؟؟
احمد : ادخلي ..
دخلت مرام وجلست على طرف السرير ..
سألتها على السريع لاني بنام : بغيتي شي ؟؟
ضمت فمها وشكلها محتاره تقول اللي عندها : مرام خلصيني اذا عندك شي قولي لي .. لاني بنام ..
تنهدت وشكلها مو طبيعي ودها تقول وماودها باين عليه التردد : يالله مرام انجزي علي ..
مرام بعد تردد كبير وبعد مابلعت ريقها : ابي فلوس ..
احمد : اووووووووووف وساعه عشان تقولينها .. كم تبين ؟؟
مرام وبتردد اكبر من الاول : ابي األف ..
طيرت عيوني : ألف مرة وحده !!! وش عندك ؟؟ وين بتروحين ؟؟
مرام وشكلها طفشت وهي تتكلم بالقطارة : شوف احمد بقولك كل شي بس اوعدني انك ماتسوي شي ؟؟
احمد : تراك طفشتيني قولي وخلصيني ..
مرام : اول شي اوعدني ؟؟
ولاني أبي افتك منها عشان انام قلتها : يالله اوعدك ..
مرام : مو انا اللي ابيهن .. رنا هي تبيهن .. ولاني مامعي كلهن بالبنك قلت اتسلف منك .. بعدين ارجعهن لك ..
آآآآآآآآآآآآآآآآه .. رنا تبيهن .. اصلا رنا لو تبي روحي اعطيها .. فمابالك بألف ريال اللي ماتسوي ولاشي عندي ..
بس سألتها وانا شاك بالموضوع وشلون رنا تبيهن وهي ماتطلع من البيت اكيد السالفه فيها انا : ليش تبيهن ؟؟ وش عندها ؟؟
مرام وهي تهز كتوفها يعني مدري ؟؟
احمد : طيب هي بتطلع بتروح مكان ؟؟..
مرام : وشلون تطلع وهي بالعده ؟؟
احمد : مدري عنك .. اجل وش تبي بالألف ؟؟
مرام : مدري عنها .. تبي تعطيني والا ادق على سعود ..
احمد : لا خلاص بعطيك ..
قمت من على فراشي وطلعت لها من جيب ثوبي الف وعطيتها اياها ..
اخذت الالف وطلعت ..
اما انا لبست قميصي ونزلت ..
ابي اعرف وش السالفة ؟؟
يستهبلون هم والا وش قصتهم ؟؟
رنا
طلبت من مرام فلوس .. قالت ايه معي ..
بس ماكنت ادري وش اللي راح يصير لي من ورى هالمرام الغبيه ..
كنت جالسه في غرفتي بعد مادقيت على فايز وأكدت له يجيني بعد المغرب ضروري ..
اندق الباب .. ودخلت مرام وهي تعد الفلوس اللي بيدها ..
سألتها ابي أتأكد : منين جبتيهن ؟؟
مرام : من درجي .. يعني منين ابجيبهن ؟؟ تتوقعين اروح اتسلف من احمد .. وانتي محذرتني ..
مسكينه ماتدري انها انكشفت وان فيه سالفه راح تصير ..
خذت منها الفلوس وحطيتهم بشنطتي : الله يعطيك العافيه يامرام ..ان شاء الله اردهم لك قريب ..
مرام وهي تطلع : لا عادي خوذي راحتك متى ماصار معك عطيني اياهم لا تستعجلين لاني مو مستعجله عليهم ..
ماتدري ان احمد هو اللي مستعجل عليهم مو هي ؟؟ ..
رن جوالي ..
رقم خالتي ..
رديت : هلا خاله ..
خالتي : انزلي يابنيتي ابيك .. بس تغطي لان احمد بالصاله ..
رنا : ان شاء الله ..
سكرت من خالتي .. وانا حاسه ان السالفه فيها انّا ..
لاتكون السالفه عن الفلوس ؟؟..
لا لا مااتوقع ..
لان مرام وعدتني محد يدري بالموضوع ..
لبست جلالي ونزلت ..
وقفت في طرف الصاله .. وانا اشوف احمد جالس جنب خالتي ..
قلت بصوت واطي ويالله ينسمع : سمي خاله بغيتي شي ؟؟..
اللي رد على سؤالي مو خالتي ؟؟ ..
لا !! ..
اللي رد هو ......
احمد
ترددت اكلمها في الموضوع او لا ..
بس في الاخير عزمت اني اكلمها ..
ابي افهم وش سالفتها هي ؟؟..
كل يوم طالعه لي بقصه ؟؟
بعرف وش تبي بالالف ..
يوووووووووه ياأحمد عطيتها الألف وذليتها فيها ..
لا انا ماذليتها .. بس انا لازم اعرف .. مو اصير مثل الاطرش في الزفه ..
لما شفتها تنزل مع الدرج قويّت قلبي ..
لازم اكلمها .. لازم انهي هالمهزله اللي قاعده تصير ..
لازم اعلمها اني موجود ..
وانها تحترم وجودي على الاقل ..
احمد : تعالي اجلسي ابي اتكلم معك شوي ..
جلست على اقرب كرسي شافته ..
احمد: رنا .. ممكن اعرف وش فيك ؟؟ ادري ان محد سألك لا امي ولا خواتي ولا حتى بندر اللي وداك للمستشفى .. بس انا قاعد اسألك وش فيك ؟؟ وش قالت الدكتورة ؟؟
رنا
بتكلم معه وبآخذ وبعطي عشان يشيلني من باله ..
لاني من جد مليت منه ..
كل يوم طالع لي بسالفه عشان بس يتكلم معي ..
خليني اتكلم معه عشان يسكت عني ..
رديت عليه بكل برود وقلت له نفس الكلام اللي قلته له البارح : تقول انه مقتلب قبل وقته عشان كذا تحسين بآلآلآم نفس آلآلآم الولاده .. بس هذا اللي فيني !!..
ناظرني وهو شاك فيني وفي السبب اللي قلته له ..
سألني سؤال ماتوقعت ابدا انه يسألني اياه : وش تبين بالألف اللي عطتكياها مرام ؟؟
انصدمت .. يعني مناديتني خالتي عشان احمد كان يبي يسـألني عن الألف ؟؟ ..
وانا محذره مرام ومتوعده فيها لا يدري احد خصوصا احمد!!! ...
أنا في هالوقت ارتفع ضغطي ولو قدامي مرام الحين كان ذبحتها وشربت من دمها ..
جاوبته وانا متنرفزة يعني لازم يدخل عصه بشي مايخصه : مالك حق تسألني هالسؤال .. اذا كانت الفلوس من حضرتك ذيك الساعه تعال تكلم معي ..
ليتني ماقلت له كذا ليتني انطرمت ذيك الساعه .. اووووووووف ..
انا وش قلت ياربي ؟؟ من جد انذليت يوم قلت هالكلمه ..
رد علي وهو مبتسم : لا والله .. وتتوقعين مرام منين لها الالف ..
شكيت في الموضوع .. لا يكون ..........؟؟؟
لااااااااااااااااااااااااااااااااا يامرام .. ياويلك مني لو كنتي متسلفه من احمد .. ياويلك .. مراح احد يفكك مني ..
ماودي اسمع كلام اكثر من كذا .. قمت وانا اقول : لو سمحت لا عاد تتدخل في حياتي .. ممكن ؟؟
وقف مع وقفتي وهو شكله يعاندني : لا مو ممكن يارنا ؟؟ ويكون في علمك .. الالف اللي معك حقتي .. انا سلفتها مرام عشان تعطيك اياه ..
كنت برد عليه .. بس لما شفته قرب من عندي سكت ..
قرب الين ماصار بيني وبينه متر واحد بس ..
قالي بصوت ماتسمع خالتي : اما الجنين مقتلب وآلآلآم منه .. فهاذي تقولينها لأمي .. لانه مايمشي معي هالكلام .. شوفي يارنا بعد صلاة العصر تكونين جاهزة .. لاني راح اوديك للمستشفى واشوف وش فيك ؟؟ اوكي ..
قهرني اسلوبه رديت عليه وانا متنرفزه : واذا ماجهزت بتضربني ..
رد علي وهو متنرفز اكثر مني وقال وهو يرص على اسنانه : بكسر راسك ..
ضحكت بإستهزاء وانا ارد عليه بكل برود : ان كنت ولد لابوك اكسر راسي ..
بعدت عنه ووقفت عند خالتي ..
رنا : خاله احمد يقول بيوديني للمستشفى وانا مابي اروح .. وانتي وعدتيني ان مااحد يمس شعره مني .. قولي له ياخالة اني مابي ..
خالتي واول مرة تبرد حرتي : خلاص يارنا ارقي لغرفتك واللي تبينه بيصير ..
على طول اول ماقالت خالتي هالكلمه رقيت لغرفتي وانا فرحانه ..
واخيرا يااحمد لقيت احد يوقفك بمكانك ..
هههههههههههههههههه .. ضحكت بأعلى صوتي وانا مبسوطه وفرحااااااااااااانه .. لكني مقهورة واهدد واتوعد هالمرااااااااام باللي سوته فيني ...
احمد
من دون ماانطق ولا حرف ..
رقيت لغرفتي بعد ماقالت لي أمي : احمد على شان خاطري خلها بحالها ..
انسدحت على السرير وانا اقول بنفسي : من اليوم ورايح مالي شغل فيك يارنا ؟؟ وانا رجال وعند كلمتي ..
ونمت وانا مرتاااااااااااااح نفسيا لاني نوعا ما شلتها من بالي ..
بصراحه هي عنيده وتسوي االلي تبيه وانا مالي خلق اجاكر حريم وخصوصا رنا !! ...
رنا
بعد ماصليت المغرب .. لبست عباتي ونزلت تحت ..
لقيت خالتي في الصالة ومعها مرام وسارة ..
رنا : خالة بروح مع اخوي عندي موعد ..
خالتي : مو امس رايحه !!..
والله الوهقه ..
رنا : لا خالة هي قالت تعالي عشان تسوي لي اشعه ثانية عشان تحدد لي موعد الولاده ..
خالتي : براحتك يابنيتي روحي للي تبينه ..
لبست نقابي وطلعت: مع السلامه ..
ركبت السيارة ..
فايز : اهلين ..
رديت وانا الهث ماصدقت اني اطلع سالمه : هلا فيك ..
فايز : أي مستشفى تبين ؟؟
رنا : مستشفى (............) الاهلي ..
فايز : وليش اهلي ؟؟
رنا : انا ابي اهلي ..
فايز : خلاص لاتعصبين علينا اهلي اهلي ..
وكمل وهو يستخف دمه : الا أقول تبين اهلي والا اتحاد .. ههههههه
رديت عليه وانا مالي خلق : هه هه هه باااااااااااااااايخ ...
بعد نص ساعه وصلت للمستشفى وبعد الاشعه دخلت على الدكتورة ..
الدكتورة : تفضلي .. اسمك رنا ؟؟
رنا : ايه ..
الدكتورة : انزين قولي لي وش مشكلتك قبل لا أشوف الاشعه ؟؟
قلت لها السالفه من طق طق الى السلام عليكم ..
والدكتورة متعجبه من كل الكلام اللي قلته ..
الدكتورة وباين عليها الاستغراب : يعني تبيني اشوف الاشعه اذا هو فعلا الجنين ميت او لا ؟؟
رنا : ياليت يادكتورة تعجلين علي لان اعصابي خلال تلفت .. ماعاد فيني صبر ..
طلعت الدكتورة الاشعه من الملف بكل برووووود ..
ورفعتها عشان تشوفها وانا خلاص ماعاد فيني اعصاب ..
نزلت الاشعه وقرت الاوراق اللي مع الاشعه ..
ماقدرت اصبر فسألتها : هاه دكتورة تكفين بشريني ..
الدكتورة : شوفي انا ماراح اكذب عليك .. اللي قلتيه قبل شوي كله صدقته .. وانك تحسين بحركه الجنين اللي ببطنك .. ومستحيل ام تكذب بطنها .. بس اللي عندي يقول لي ان الجنين ميت .. وميت له تقريبا شهر وشوي ..
انتظرت الين الدكتورة تخلص كلامها .. لاني خلاص ماعاد فيني عقل ..
اقولهم يتحرك تقولي ميت ..
والله ماميت غيرهم ..
قلت لها بكل برود : شكرا دكتوره ..
الدكتورة : العفو .. بس ضروري تنزلين اللي ببطنك ..
هزيت راسي يعني ايه وطلعت ..
اشرت لفايز ..
لحقني فايز وهو يسألني : هاه وش صار ؟؟
رنا : اقولك بالسيارة ..
نهاية الجزء الرابع
|