وفي احد الأيام كنت نورة بالسوق مع امها يقضون للعيد وكان محمد مع امه بالسوق من لمحها وهو مو على بعضه ما ارتاح الا لما سأل امه عن نورة وعاد امه قالت له ميين هذي محمد ذاك اليوم من عرف بيتهم واسمهم وعايلتهم ما ارتاح إلا لما فاتح امه يموضوع نورة وانه يبيها زوجة له امه تعرف نورة واهلها تعرف معدنهم عشان كذا ما اعترضت لكنها قالت له ان اهله اولا فيه لو ياخذ من بنت عمه ولا خاله احسن هو رفض كلم ابوه وابوه هم قال له كلام امه لكنه اصر على رايه راحوا لبيت اهل نورة ليلة العيد عشان يخطبونها وفعلا اخطبوها بس نورة ما تدري وش صاير جات لها امها وخبرتها ان محمد الي متعلم جاي من الهند ويبي يتزوجك نورة ما صدقت تبي تعرف محمد من وين عرفها وكيف يبي يناسبنا وأهله عندهم خير واحنا على قد حالنا نورة ما اقدرت اتعارض الولد زين والكل يمدح فيه وجاء يوم زواجهم الي تمناه محمد ولما اختلى فيها نورة كان كل مناه انها تعرف مين محمد اول ما كنوا يخلون البنت تشوف زوجها الا عند ليلة العرس تدرون وش صار لما شافته نورة خافت من محمد خافت انه يبي ينتقم منها على الي سوته فيه نورة اتكلمه : انت الي ذاك اليوم صارخت عليك والحين تبي تعاقبني وتذلني كان قلت لي قبل وصارخت علي محمد كان ساكت ولا تكلم بكلمة ونورة كانت خايفة محمد رفع ايده كأنه بيضرب نورة كف وهي غطت وجها بيدها ما تقدر تشوف شي الحين مالقت الا ذيك اليد على راسها تمسح عليه نورة انتي ما تدرين وش سويتي فيني من ذاك اليوم وانا ادور عليك زهقت انطرك بالبحر فقدت الأمل تدرين خلاص كرهت كل شي بالدنيا وفقدت كل حماسي بالشغل لكن في يوم وانا بالسوق مع امي شفتك تخيلي حسيت ان روحي ارجعت لي اتريها كانت معك فاقدها انا سألت امي وخبرتني عنك وعن اهلك ومن بعدها اصريت اتزوجك وكاني هنا مع الي خشت قلبي من دون اذن وخذت روحي من دون أي استأذان حب محمد نورة على جبينها ولما شافته سوى كذا شالت يدها عن وجها وكانت الأبتسامة على شفاته امبينة عاشت نورة مع محمد سنين حلوة لكن كان يعكر على صفو هالسنين شي واحد انهم ساكنين مع عمام محمد ببيت واحد وفي يوم اتهمت نورة بالسرقة لأنها هي الفقيرة في البيت وهي الجديدة محمد حزن ان نورة هي الي سوت كذا الكل كان ضدها حتى هي صدقت هذا لكن ربك يحب الي يستاهل محبته محمد كشف السارق بالغلط لما سمع بنات عمه يضحكون في الليل على الي صار لنورة بسببهم هنا محمد عصب ولما جا اليوم الثاني جمع الكل وعلمهم مين الي سرق وقال لهم ان زوجته بريئة وشهد بنات عمه انهم هم السارقين وطلع الذهب المبيوق من غرفهم هنا نورة ارجعت لها كرامتها لكن لازال في قلبها جرح ماراح يندمل انها فقيرة والفقر مو عيب لكن الكل شك فيها حتى زوجها بسبب فقرها نورة تمت مع محمد الكل يشكر فيها ويمدح تفرقت العوايل وفتح محمد بيت وصار تاجر معروف والكل يمدح فيه ونورة كانت كريمة بطبعها ما يجب حد الا تعطيه ما تخلي حد في خاطره شي حتى الحرمة ان جاتها وامدحت ذهبها عطتها اياه بعد عمر اتعبت نورة وجاها القلب ولا اقدرت اتكمل مسيرتها مع محمد لأنها ماتت بسببب قلبها نورة ماتت صح لكن اعمالها حية الكل يذكرها بالخير والطيبة رغم ان الفلوس مو فلوسها الفلوس لزوجها لكن الكل يعرف انها تقدر تمنع الخير عن الناس محمد عانى كثير بحياته لين تزوج وحدة ثانية تعينه لين مماته لكنه بقوله مالقى مثل نورة ولا راح يلقى الا في الجنة بيشوفها.
هيبة كانت تصيح ونورة معاها تصيح
الجوهرة : ها اعجبتكم ولا لا
نورة قات حبة راس جدتها : جديدة ادعي لي اكون مثل نورة ابي صير زيها الناس تذكرني بالخير ابي لما اموت الكل يدعي لي ابي ربي يحبني اكيد ربي يحب نورة ابي اكون مثلها
هيبة : لا جدتي انا ادعي لي اكون مثلها
نورة : لا انا
هيبة : لا انا عفية جدتي انا
الجوهرة : يا رب اجعل نورة قدوة لبناتي نورة وهيبة وخلهم مثلها الناس تحبهم وانت تحبها
نورة + هيبة : امين امين
كملوا البنات جلستهم مع جدتهم إلين ناموا معها
في بيت ابراهيم الساعة 12 ليلا
كان الوضع مثل ما هو تعاسة وحزن لفقد احباب ولفقد ثقة كانت بينهم
ياسمين : العنود مو معقولة مافيه حل
العنود : صدقيني مو انا الي عندي الحل عند ابوي وامي
ياسمين : احس العالم كله تغير احس اني لوحدي العنود وينك عني
العنود : سامحيني ان جفيتك ولا ما رديت على اتصالاتك لكن الحال الي حنا فيها ما تسر لا عدو ولا حبيب
ياسمين : انزين طلعي من البيت معي غيري جو
العنود : لو بطلع بروح لناصر وهاجر
ياسمين : والله يسألون عنك دايم بس وانا اتعذر لهم بس كل شي له حد لازم تروحين لهم تدرين عنود تذكرت شي تذكرين الي كانت تتكلم عنه هاجر الرجال الي يجيهم ويساعدهم شفته امس عندهم توني جاية بجيب لهم عزبة الشهر الا هو كان داخل تبين الصدق ما قصر طلع ودخلت بس يا عنود لو تشوفينه ماشاء الله تبارك الله وسيم بمعنى كلمة وسيم
العنود : جاك شي بمخك انا في حال وانتي في حال
ياسمين : هذا جزاتي ابي اغير الجو عندك اشوي شكلك ما تبين اكلمك قولي
العنود : ايه ما ابيك اتكلميني فيك شي......
سكرت ياسمين الخط
العنود : وش فيك انتي انا ما ابيك اتكلميني انا ودي حد يخفف عني الي انا فيه وانتي تفقولين ياسمين ياسمين وينك اوففففففففففففففففف
ما تدري العنود ان ياسمين ازعلت وسكرت
شيماء كانت تمشي في ارض خضراء مروج وسهول خضراء كانت الشمس في احلا حلتها وكان الجو عليل كان المكان جنة الله في ارضه
اثناء سيرها كانت تسمع صوت كل ما تتقدم يزيد كان حس اطفال يلعبون ويمرحون فرحانين مع بعض
شيماء بخاطرها : وش حلو لعبهم ليتني العب وياهم ارجع ايام اول ودي اقرب زيادة
قربت شيماء والأطفال ما انتبهوا لها إلى الحين
شيماء تحط ايدها على صدرها وتنادي بصوت عالي : يمه جمانة ... جمانة ... جمانة انا امك
جمانة تلتفت لأمها وكانت فرحانة لكن من شافت امها عبس وجها وانحاشت مع الأطفال
شيماء : لا لا جمانة وقفي رجعي لي جمانة انا امك
الحقتهم شيماء في كل مكان روحون له ومن يشوفونها ينحاشون وهي صابرة تلحقهم إلى ان فاض كيل الأطفال
طفل من الأطفال : جمانة ترا تعبنة شوفي حل مع امك
جمانة : وش اسوي لها هي الي تلحقني ما تدري اني زعلانة منها
شيماء بخاطرها : وش سويت يا بنيتي عشان تزعلين مني انا الي فرحانة لشوفتك كذا اتقابليني
جمانة تبتعد عن الأطفال وتجلس لحالها في مرتفع جنبهم
شيماء اتقرب لها ولما كانت بجانبها قبلة راسها واجلست جنبها : يمه جمانة ما اشتقتي لي
جمانة : .......................
شيماء : وش في حبيبتي تغيرتي علي
جمانة : أسألي روحك من الي تغير
شيماء: اكييد انتي
جمانة : لا يمه انتي الي تغيرتي يمه ما خبرت انك ما تنفذين وصيتي صحيح هي على قدي بس ليه ما نفذتيه هذي حالتي كل يوم اجلس لحالي بس اليوم هو الي لعبت معهم ما ادري ليه لكن يمه انتي سبب توحدي لحالي
شيماء : يمه انا افديك بعمري قولي وش تبين قولي أي شي انفذه لك
جمانة تمسك ايد امها وتحطها على قلبها : اتعاهديني يمه اتعاهديني انك اتسوين الي اقوله لك
شيماء : ان ما نفذت لك انتي وصيتك لمين بنفذ
جمانة : يمه قلت لك قبل لا اموت رجعي مثل اول ابي بيتنا يكون مثل ما كان ابيه فرح وسرور الكل يتمنى يدخله ويستانس معنا يمه ابوي تعبان لحاله(( شيما تغير جهة وجها لضد جمانة ما تبيها اتشوف وجها )) يمكن هو غلط عليك لكن والله و يحبك ويتمنى رضاك انا متأكدة هو ينتظرك الحين ينتظر تفتحين الباب عليه يمه هذي وصيتي وان نفذتيها بفرح وبستانس مع الي كبري والحين ((قامت جمانة وقبلت راس امها )) يمه مع السلامة لا تنسين الي وصيتك ولا تنسين سلمي على ابوي واخواني انا احبكم كلكم صح خليل يمه خليل سلمي عليه كثير وقولي له اني احبه موت وانتظره يجيني هنا في الجنة
راحت جمانة وكل ماله تبتعد شيماء ما حست ببنتها انها تبتعد كانت اتفكر انها اتنفذ وصية بنتها
شيماء تلتفت تبي تكلم جمانة لقتها بعدت وتشوفها رافعة ايدها وهي تبتسم لها
جمانة بصوت عالي : يمه لا تنسين ابوي
شيماء : لا حبيبتي مو ناسيته اهم شي انتي ترتاحين يمه البيت ظلم بدونك انا ابكيك ليل ونهار يمه خلاص روحي بصالح ابوك ان هذا بيفرحك من لي غيرك .
قامت شيماء من النوم وجها كله نضارة وحيوية كانها بتدخل معركة مع نفسها والكرامة الي تدعيها تنفسها انها ضاعت
شيماء : لا بروح له وصالحه هذا زوجي بو عيالي حتى اني ما عزيته
في الغالية ....
كان ابراهيم بالفعل صاحي ما نام منسدح على السرير يقرا كتاب ويفكر في نفس الوقت يمكن ان عقله الباطن هو الي متحكم فيه حاليا
شيماء تطق الباب
ابراهيم : تفضل
ادخلت شيماء وكانت باهية الجمال تسبحت والبست احلى الثياب عندها بعدها تعطرت بأطيب العطور
ابراهيم لما شافها انبهر من جمالها الأخاذ
استعدل ابراهيم في جلسته وغير جهة وجه عكس جهة شيماء
شيماء واقفة وتتأمل المكان وبخاطرها : عادي صد عني بس لازم اصالحك انت لي وانا لك مهما يصير وجمانة وصتني وصيتها الي مستحيل اخلفها شيماء هذا زوجك يجبك لا يغرك صده تذكري كم هو ساعدك وعاونك وحبك و صار لك كل اهلك وناسك
شيماء تجمعت الدموع في عينها ولا اقدرت تصبر انطلقت لأبراهيم وهي تصيح واجلست جنب ارجوله الي كان ابراهيم يحاول يشيلها لكن شيماء ما سكتهم وتبكي جنبهم
شيماء بصوت حزن : ابراهيم سو الي تبي بس لا تهجرني ابراهيم اضربني شنع فيني سو أي شي يخطر ببالك تزوج علي خلاص تزوج بس ارضى علي وحن تراني من دونك ما اسوى انا جسد من دون روح وروحي عندك تحرسك من كل شر ابراهيم هذي العصا خذها طقني فيها خلاص انا ابي اراضيك تعبت من الفراق اعيالي اتعبوا الكل تعب بس لا تتركني
مدت شيماء العصا لأبراهيم الي خذها منها
شيماء بخاطرها : عاي خله يطقني اهم شي زوجي يرجع لي
رمى ابراهيم العصا بعيد وقام من مكانه ومسك شيماء من زنديها ورفعها يبي يشوف وجها
ابراهيم كانت الدموع بعينه كان يبكي رجل يبكي سبحان الله :شيماء كيف قدرتي اتسوين كذا فيني كيف قدرتي تبعدين عني كل هذي الفترة انا ظلمتك صح بس تعالي عاتبيني قولي لي أي شي هاوشيني طلبي الطلاق بس ليه سكتي سكوتك عذبني خلاني ما انام من ذاك اليوم صرت والليل خلان كل واحد يشكي للثاني همومه والليل ما قصر وياي سامرني مع انه جمادسمعي هذي اخر مرة تخاصميني وتخاصمين البيت وان قلتي مرة ثانية اتزوج عليك جد بضربك هالمرة ليت يدي انقصت لما مديت يدي عليك ليتها انمدت على غيرك أي وشك بينك وبيني عرفت اني كنت في خدعة من خدع زوجة اخوي خديجة قالت لي كل شي قالت انها هي أي قالت لها وانتي ماقلتي لها تدرين كنت غبي كيف اتوقع ان الماي يجلس جنب النار كنت غبي صق مو بس كذا تهورت واهدرت كرامتك شيماء
شيماء ترفع وجها لزوجها : نعم
ابراهيم يمسك ايد شيماء : شيماء لو تعزيني طقيني كف
شيماء : لا مو انا ال تضرب زوجها
ابراهيم : حياتي ان كنتي تعزيني طقيني ابيك تطقيني ابي اشعر بهدر كرامة ودي تطقيني قدام الكل ابي اكون متعادل معك شيماء لو تحبيني طقيني
شيماء اتنزل راسها بالأرض
عصب ابراهيم ومسك يدها وجلس يضرب روحه اكفوف بيدها إلا ان جفا على الأرض بين ارجولها : شيماء سامحيني شيماء اسف غلطت عليك وكنت ما استاهل الحياة بعد ذاك اليوم مافيه يوم شفت منك أي شر كل يوم اشوف فيك الخير وتكبرين بعيني حتى جيتك هنا كبرتي فيها كثير بعيني قولي سامحتك قولي ما اقدر اغفر لروحي
شيماء تمسح الدموع من عينه وخدها وتستنشق هواء جديد : حبيبي تدري مين قال لي اجي لك
ابراهيم يطالع شيماء والدموع بعينه : ....................
شيماء تخلي اصابعها تتخلل بين شعر ابراهيم : تدري مين الي خلاني اجيك
ابراهيم : لا من ..؟؟
شيماء : بنتنا جمانة شفتها بالنوم
ابراهيم : جمانة!!
شيماء : اول شي عظم الله اجرك ربي يخلف لك غيرها
ابراهيم : تو الناس شيماء
شيماء: لا عتاب على مامضى صح