.....((تابع الجزء السابع عشر)).....
بالشرقيه...وبالتحديد في بيت خالد ولد ابومحمد...
مها:اقول خالد...
خالد:هلا...
مها:مادريت إن اختي منال انخطبت...
خالد اللي فرح من جد لمنال:من جدك تتكلمين؟؟؟...
مها بفرح:إيه والله...
خالد:متى وكيف؟؟؟....ومين اللي خطبها؟؟؟...
مها تضحك:هههههه شوي شوي علي من هالأسئلة...
خالد يضحك وضربها بخفه على كتفها:طيب يله تكلمي...
مها تبتسم:توها انخطبت الأسبوع اللي طاف...ويمكن على الأسبوع الجاي تكون شوفتها...واللي خطبها واحد من طرف خوالي يصير لنا من بعيد بس مو مره نعرفهم...
خالد:طيب أكيد أختك موافقه...ولاااا كعادتها بعد الشوفه ترفض هي قد سوتها من قبل مرتين...
مها تبتسم:لاااا إنشالله أكيد...لأنها حتى هي مقتنعه فيه مره...
خالد:الله يوفقها...والله فرحت لها مثل ما فرحت لأختي شذى...
مها:صدق يا خالد؟؟؟...
خالد يبتسم بحنيه:إيه والله يا مهاوي...يكفي إنها اختك وبنت عمي...
مها حست بالدموع بعيونها... وش كثر تحب بخالد...وش كثر تحب فيه حنيته وصبره عليها...وش كثر تحب فيه حلمه وعقله... للحين هو عايش معها ولا مكدر صفو حياتها معه أي شي غير تأخر إنجابها لسنين طوااال وهو صابر راضي...
تذكرت لمن كلمت أختها اليوم الصباح...وقالت لها عن الخطبه... وإنها موافقه علي التقدم لها...لأنها غسلت يدها من سعود...أو بمعني أصح انزاح حبه من قلبها...لأنه لا تقدم لها أو لمح بشي بكذا...فحست على كرامتها إنه بتنهان...فقررت إنها تستأنف حياتها اللي كانت بتضيع في حب سعود الواهم
سعود:ياربي وش كثر كلامك...خلاص قاموس اللغه العربيه خلص وإنتي كلامك ماخلص...
شذى بفشيله:اقلب وجهك...وعطني أمي...
سعود يستهبل:على أي صفحه؟؟؟...
شذى:على الفهرس...
سعود:تكفين لا تنكتين...لأني احس بغثيان...
شذى:طيب عطني أمي...
سعود:اسمعي قبل...سلمي لي على بشاير...
شذى:والله اللي مايستحي...طيب عطني أمي...
سعود:قبل ما تقولين ليش قلتي كذا؟؟؟...
شذى بجدية:من جدك تتكلم يا سعود...
سعود:إي والله...
شذى:سعود إنساها...أحسن لك إنساها...
سعود بحزن:مستحيل انساها...
وراح عطى أمه الجوال وكانت في المطبخ وراح لغرفته على طول...
أم محمد بإستغراب:ألو؟؟؟؟....
شذى:هلا بام محمد...هلا بأحلى أم...
أم محمد بفرح:هلا والله بأم فيصل بقلبي...
شذى:شخبارك؟؟؟...
أم محمد:بخير والحمدلله...بس وشفيه أخوك عطني السماعه وراح وكأنه زعلان...
شذى واللي كانت تعرف السبب:تعرفين سعود..في كل ساعه له ألف حالة..
أم محمد:الله يصلحه بس...
شذى قعدت تسولف مع أمها....
.
.
أما سعود هل كان من الممكن أن يمر كلام شذى مرور الكرام...طبعا مستحيل...أن ينسى حبه لبشاير...اللي اغتاله بكل وحشيه في لحظة غياب عقله...أن ينسى تأملات هذا الحب ووجده...أن ينسى بشاير واحلامها الطاهره معه...أن ينسى حبه الذي جاء على طبق من ذهب... أن ينسى نفسه...فهي نفسه...يريد العودة...يريد التوبة...يريد السماح... فقد اقترف غلطة قد يندم عليها طوال حياته...

***

أبو بندر اللي كان هذا ثاني مره يكلمها....
أبوبندر: بشاير حرام عليك اللي تسوينه فينا؟؟؟...
بشاير باكتئاب:وش سويت يباه؟؟؟...
أبو بندر:شوفي نفسك...ماعاد صرتي مثل أول...ماعاد صرتي تجيني مثل اول...ماعاد يأثر فيك شي...ليه كذا؟؟؟...انا مقصر معك بشي؟؟؟...
بشاير تهز راسها بالنفي...
أبو بندر بحزن:بشورتي...تكلمي...ليه كذا صايره حزينه...قد صرتي أحسن من كذا وش فيك انتكستي ورجعتي؟؟؟...
بشاير:يباه انا بخير...بس انتوا لمن تشوفوني مشغولة بالجامعه... تقولون زعلانه وغيره...
أبوبندر بمثل الدمعه تلمع بعيونه:أحس بالقهر عليك كذا يا بنيتي.. كله من هالسعود حسبي الله عليه...من اليوم باكلمه وأخليه يطلقك...والله لأجرجره في المحاكم وبين الناس...إن ماخليته يتأدب وتحسف على يوم جيته بالدنيا..
كان أول مره أبو بندر يقول كلام مثل كذا..كان يقول بغيظ..غيظ وغضب الأسد الجريح....كان أبوبندر عنده بشاير غير..يمكن لأنها اصغر عياله.. ويمكن لأنها انهانت بالصميم...ويمكن لأنها لاتزال طفلته اللعوب...
بشاير برجاء:لا تكفي يباه ما ابي فضايح أكثر...
أبو بندر بعصبيه:إحنا صبرنا ولصبرنا حدود...
بشاير برجاء والدموع باقي بعيونها:تكفى يباه...ابوس يدك لااا...
أبوبندر بعصبيه حاده جدا:إنتي مالك دخل...هذا شي بين الرجال....
بشاير بدت دموعها تنزل:يباه لأ...الله يخليك...تكفي لأ...هذا بس طلبي الوحيد...
زعل أبوبندر بزيادة حس بالإهانه خصوصا لمن حس إن بشاير لا تزال تحب سعود...
أبوبندر بعصبيته ويرفع صوته:إنتي مالك دخل فاهمه...
ويقوم من عند بنته ويطلع من غرفتها...كان متعب وام بندر واقفين يسولفون بالدرج...لمن سمعوا صوت ابو بندر معصب...راحوا له بسرعه عرف السالفه متعب من أبوه لمن سمعه يصرخ ومعصب لمن يقعد يقول سعود وبشاير...ويقعد يدعي على الساعه اللي عرف سعود فيها...
راح متعب بسرعه لبشاير شافها تبكي بصمت وهي تناظر فيه...
متعب:ممكن أعرف وش السالفه؟؟؟...
بشاير تصيح:ما فيه شي...
حاول يعرف السبب بس ماقدر منها...لأنها ياهي ساكته...ياهي تصيح.. او تقعد تطلبه إن تخلي أبوه يصبر شوي بدل العجله على سعود...
بعدها طلع متعب من عندها متأسف على حالها...بس بعد ماشاف حال أخته وحال أبوه واهله..أصر إلا لزم إنه لازم سعود يطلق بشاير باقرب فرصه..

بعد ما طلعوا من عند بشاير قعدت تصيح...صح هي تعبت مره أول ماتركها سعود وانجرحت جرح غائر من الصعب ان يلتئم.. بس بعدها تحسنت حالتها...بس لها تقريبا ثلاث أسابيع رجعت لبكائها..لحزنها.. لشوقها...لحبها...لقلبها...رجعت مشاعرها تتجدد...لم يكن من السهل أن تنسى سعود...ولم يكن من السهل أيضا أن تعود تحب نفس الشخص الذي جرحها وادماها حتى النخاع...
راحت بشاير وفتحت جوالها وهي تمسح دموعها..راحت للرسائل للحافظات كانت موجوده حافظه بإسم: (حبي)...

قرت بعض الرسايل اللي كان مغرقها سعود فيها...
(يسري لك الهاجس من الوجدان مدفوع
وترتاح لك نفسي وتنسى عناها
واشرب حنانك من جفا الوقت ينبوع
وتشتاق لك عين بشوفك هناها
عين سقت ورد الهوى عشق ودموع
يوم المشاعر أرسلت لك غلاها)
وكان فيه مسج ثاني منه
(القلوب الوفيه ماتنسى ساكنيها
وقلبي بالمحبة يمسي على اغلى من سكن فيها)
قعدت تصيح وانسدحت على جنبها..
(ودي المس كل جرح يتعبك...
ودي اداويه وألمك واجمعك...
ودي اضمك لصدري وتغرق أنفاسي معك..
ودي دوم جنبك مثل ظلك اتبعك..
ودي ابكي فوق صدرك واقول آآآه
وينك يا مخفف أوجاعي اشتقت لك)
قعدت تصيح بقهر...وقعدت تقرى آخر مسج وصلها منه...
(تصدق بسمتك والله تفرح خاطري الولهان..
يطير من الفرح قلبي واصير بعالم ثاني...
والى من شفتك بضيقه احس إني انا الغلطان..
أعاتب نفسي بنفسي ولو ماكنت أنا الجاني...
حبك بداخل عروقي ولا يوصل لحبك إنسان..
يمر الوقت وبثبت لك حبي لك إن الله أحياني...)



وصل هذا المسج في هذاك اليوم الشؤوم...قعدت تصيح..تحس بالجرح وبالحب وبالشوق...الذي حاولت تقتله..بس للأسف كان اقوى منها بكثير..
وبالفعل أثبت لها سعود حبه العظيم لها؟؟؟...
وبعدها ضمت جوالها لصدرها...ولمت نفسها بطريقه مكورة وهي منسدحه تحاول تجمع كيانها المبعثر...تحاول تكتم على حبها لا يفضحها أكثر... تحاول تحس بالحب والحنان اللي فقدتهم من شهور طوال