تابع الجزء العاشر.....

عايشه كانت قاعده مع أمها ام عبدالكريم...
ام عبد الكريم:لا يا عايشه ما راح أبني سعادة بنتي على تعاسة غيرها....
عايشه:يا يمه...أجل تبين بنتك تعيش تعيسه...
ام عبدالكريم:لا مافي أم تبي بنتها تعيش تعيسه..بس سعادة سلمى بعيده عن تركي...
عايشه:بس هي بنت عمه وأولى فيه من الغريبه...
ام عبدالكريم:الزواج ما يعرف بنت عم ولا خال..
عايشه:يمه بس هم كانوا يحبون بعض...بينهم حب حرام يضيع...
ام عبدالكريم:لو كان يحبها كان جا خطبها...وإحنا مارح نقول لأ...بس إني أعرض بنتي فهذي صعبه...وجهي وين أوديه قدام أم بندر...
عايشه:السالفه يمه ما راح أحد يدري فيها...راح تكون بين عمي وأبوي بس...
ام عبدالكريم:ما أقدر يا أم فارس سامحيني...
عايشه:إنتي بس اقنعيه معنا...والله بيوافق خاصه إن خاطره بتركي... يمه سلمى مصلحتها مع تركي...وشذى هذي والله داخله على طمع...
ام عبدالكريم:نفسي أعرف ليش تكرهينها مع إنها حبيبه...
عايشه:يمه لا تصيرين طيبه بزياده عن اللزوم...ياما تحت السواهي دواهي...
ام عبدالكريم:طيب سلمى وش تقول؟؟؟...تبيه هي ولا لأ؟؟؟...
عايشه:موتها وحياتها بين يد تركي تبيه...فلا توقفين بطريقها و صدقيني إن تركي نفسه يبيها بس هو مهوب داري إنها للحين تبيه...
ام عبد الكريم:عايشه...إنتي تطلبين مني الصعب...
عايشه وهي تشد يدها على يد أمها:صدقيني لأنها خطوة جريئه شوي..بس يمه لا تخلين سلمى كذا تكتوي بنارها...حرام والله حرام...
ام عبدالكريم سكتت قعدت تفكر...
أما سلمى فكانت تناظرهم من الدرج...تنتظر رد أمها....
عايشه وعيونها معلقه بوجه أمها:هاه يا أم عبد الكريم وش قلتي؟؟...
ام عبدالكريم بعد أن اطلقت زفره طويله:بأكلمه يا عايشه مع إنها صعبه والله صعبه...
عايشه بابتسامة نصر:الله يبارك فيك يمه..إنتي كلمي أبوي..وأنا بأساندك..


***


تركي اللي كان متضايق مره ما عرف وين يروح...وبالأخير راح لبيت خويه طلال يفرفرش عن عمره شوي لأنه مستحيل يقوله وش صار من شذى لأنه يشوف هالشي من أدق الخصوصيات اللي تجمعه بشذى...
طلال:ممكن أعرف وش سبب مدة هالبوز؟؟؟...
تركي يناظر طلال وبدون نفس:زهقان قلت أجيك ياخوي...
طلال:ليه قالولك فاتحين ملاهي...ولا نعرض مسرحيه...
عصب تركي وقام:أجل استئذن أنا الغلطان اللي أجيك...
طلال اللي جره مع يده ورجع قعده:تركي...وش فيك الله يهداك أنا كنت أمزح معك...صاير كبريت ماتتحمل كلمه...
تركي بعصبيه:إنت اللي صاير دمك ثقيل...
طلال:أنا دمي ثقيل...الله يسامحك...
تركي وهو يحاول يخفف التوتر اللي فيه حس إنه زودها شوي:طلال لا تكون زعلان...
طلال:ماني بزعلان..بس وش فيك اليوم بالدوام يا حلاتك...وش اللي غيرك...
تركي بخاطره(وش أقولك يا طلال)..
تركي:لااا بس مصدع شوي...وقلت من زمان مامريت على طلال ببيته...
طلال:الله يحييك....البيت بيتك..
تركي بابتسامه يحاول يتناسى:أدري إنه بيتي ولا كيف جيت بدون موعد..
طلال يضحك:إنت ما أحد يعطيك وجه ولا على طول تصدق وماخذ بعمرك مقلب...
تركي يمزح:تعرف هذي مشكله أزليه فيني...مالها علاج..
طلال:ما أقول إلا الله يعين حرمتك عليك من جد لو إنت زوجتي كان إنتحرت من زماااااااااااان....
تذكر تركي شذى وعصب من حركتها...وقال لطلال:من زين خشتك ألحين تقعد تتميلح علي...
طلال:أقول تركي...والله إنك مهوب طبيعي فيك شي؟؟؟...
تركي يحاول يبان إنه طبيعي:لا مافيني شي...بس شوية صداع...