01-11-2011
|
#7
|
طيّر لي فلاي كيس
استحيييييييييت شو هذا قليل أدب والله
صدق ماربّوه
خل نعرّس وأنا بربيه
بس أخاف يسويني قليلة أدب شراته
وايد فرحانه بروحي أونّي محترمه عاد هع
رحت حجرتيه استحيت أروح صوب الأهل هع هع
حدرت نور الامارات شفت يتومه
طرشت لها رساله انّي ملجت
وااااااااااااايد استانست
فديتها
وعقب رقدت
ويومياً أروح السوق أتزهب
خلال أسبوعين خلّصت من الزهبة
واتجهزت
هيونه ساعدتني يوم أروح حق الفستان
والعرس بيكون فـ دبي هذا طلبيه لأنه ربيعاتي من دبي ومال العين بييون دبي عادي
مرت الأيام بسرعه
وياه يوم العرس
وااااااااااااااء بصيح خلاص من اليوم ورايح تصرفاتي محسوبه أونّي كبرت
لاااااااااااااااع بعدني بيبي اهئ اهئ
سرنا الصالون هيونه وسلامة
سوو لي الميكب والتسريحه
عقب رحنا القاعة اهناكي لبست الفستان
وعاد طلعت غاويه
اللي بيشوفني يقول يا أرض احفظي ما عليكي
جني ملاك
لا لا أنا مها هب ملاك هع
خسارة سمعت صوت الأغاني بس ما اقدر أرقص
والاكل وااااااااااو لذيذ هع بس ميكبي بيخترب
ع طاري الاكل صح
مره سوسو ياه بيتنا
شو سوسو بعد جنه قطو خخخخ سعود
المهم
تغدا عقب الغدا انا سويت له جاي حمر بالغلط حطيت فيه بدال الشكر ملح
ههههههههه والله بالغلط لانه العلبه متشابهه
تم يضحك عليه هههههههههههه
وما اقدر أخرط عالعيايز
اهئ اهئ
عقب زفونّي
عاد أميره أنا لا لا مها
المهم أطالعهم جني شيخه
جم مرة أقول مها
عاد قعدت يو سلمّو علي وايد منهم ما عرفتهم
عقب عاد زفو
سعود
باباتيه وباباته وعمامي دشو
وياه
كان قمر ومبتسم
فـ خاطري اقول له البنات بيحسدونك هع
ياه وباسني على يبهتي
وسلمت على عمامي وبابا وعمي اللي هو ابو ريلي
وجان يطلعون تم سعود بس
جان يقولون عيال عمي وخواني بييون يسلمون علّيه
لبسوني الطرحة هييج اللي تستر
ويو باركو لي
بس اللي سمعته
ذياب يا وقال بدون نفس
مبروك يا عروس
وعقب صوت شهاب
مبروك يا عروس
اثنينهم بدون نفس شو ها والله حاله
فخاطري ارفع الغشوه واكفّخ كل واحد
تخيلو عاد بالفستان هع هع
أما خواني وعيال عمّي الباجين باركو لي عدل
وطلعو
عاد طلّعو ها اللي شوي وبختنق منّه
وشفت سعود يعني لمحته عالسريع
ما يستحي والله هع
شربنا العصير أونّه
عقب قطعنا الكيك
ووكلته ووكلاني
يت الكريمة علي
كان بيمسحه جان سلامي تسبقه
أحسن أحسن
قفطة ههههههههه
عقب رحنا الحجرة
جان أطرد سعود ههههههه
ما طردته بس قالو له يطلع عسب أبدل
عاد هيونه وسلامي ساعدوني طلعنا هالعله
الفستان أعوذ بالله جني شايلة فيل
ويوم خلصنا دش سعود ورحنا الفندق
عاد أنا على طول رحت أفتح التسريحة
سعود ياه أونه يساعدني
جان يسحب بين
وعورني
جان أضربه على ايده هههههههه
سعود : أعوذ بالله شريرة
أنا : زين روحك عرفت
سعود : من زمان أعرف
استغربت منّه
كيف يعرفني ومتى شافني شو هالانسان
عاد اليوم الثاني الصبح نشّيت تسبحت ولبست تجهزت بس باقي الميكب
جان أروح صوب جنطة الميكب بفتحها
سحبت الزرار ما فتح
جان أشده ما يفتح
شديته بكل قواي البدنية والعقلية ههههههههه
ما رضى يفتح
جان أعصب وأعطي الشنطة بكس
أنا : غبية حيوانه أووووووف
رحت صوب المنظرة أعدل قصتي
خلاص صارت قصتي ما صارت كشتي
لأني عرّست ههههههههه
وأنا أعدلها شفت سعود من المنظرة يطالعني مبتسم وماسك ضحكته
صديت ورا
أنا : متى نشّيت
سعود : الناس يقولون صح النوم
أنا : صح النوم متى نشيت
سعود نقع من الضحك : ههههههههههههه جيه تضربين الجنطة مسكينة مالها ذنب لا وتسبينها بعد
أنا كنت يمب القنفة
جان أسحب الفروحة
وأفرها عليه وضحكت وياه
رحت قعدت عالسرير
أنا : هههههههه مادري عنها ما تفتح وياي
سعود : أحسن
أنا : جيه انشالله
سعود : عسب أشوف جمالج الطبيعي
أنا : خسفة أنا لاااه ..؟
سعود : جب لافرج الحين من الدريشة ..
أنا : جيه انشالله رمست عن روحي أنا انت شيخصك
سعود : لانج روحي
أنا : تراني مب متعوده عالمدح
سعود : بعودج خلاص وبعدين اذا سمعت هالرمسة مرة ثانيه يا ويلج
أنا : جيه انشالله
سعود : لأني مت لما حصّلتج
استغربت شكله استخف الولد
أنا : تعال افتح الشنطة دخيلك تعال
وعقب رحنا صوب بيتنا بيتي سابقا سلمت على أهلي وماماتيه تصيح واااااااء فديتها
عقب رحت سلمّت على بيت عمّي شفت ذياب وشهاب كانو برا شهاب فالسيارة وذياب ساند عالباب ما سلمّت عليهم مالت عليهم زعلوني
عقب اتجهنا لدار الزين
واااااااااااااااااااااو بعيش هناك خلاص
ربّي استجاب دعائي لما دعيت انّي أسكن فـ دار الزين
عاد ركبنا السيارة والعين بعيدة كلّه سعود يسولف
أوننه يقول أنا البربرجيه ما يشوف روحه
أنا : أونك تقول أنا البربرجيه ما تشوف روحك
سعود : أهون عنج أرمّس حرمتيه العبيطة هب أسب الناس وأنا ماشي
أنا : امممم اش دراك اني أسب الناس
سعود : أختي خبرتني عن طبعج
أنا : أعوذ بالله هاي ما قالت تخبرك الا عن بلاويه
سعود : وأحلى بلاوي فالدنيا
أنا : سوق سوق عن ندعم
سعود : بتستانسين فالعين وايد
أنا : أدري أكيد
سعود : انتي شفتيني قبل ..؟
أنا : اممم لا ليش ..
سعود : أوقات كنت أمر خواتي قلت يمكن شفتيني ..
أنا : الحين أنا لما أتريا حد أشوف خوان البنات عبالك... ما أقول الا مالت
سعود : ههههههه
وصلنا العين
بصراحه بيتهم يسكّت رووووووووووعــــــــــهـ
أحلى عن بيتنا وايــــــــــــــــد
بيتنا صح انه فله
بس هاييل قصر
هع بنت فقر
سلمت على عمي وعمتيه وسلامي وسارونه
وسيفووووووه
حليوه اخوهم الصغير عمره 5 سنوات
عمي وايد طيب امبين عليه
حتى سلامي وساروه
عمتيه مبين عليها طيبه بس فيها حبة غرور
يحق لها والله مع هالجمال والمال
بس بعد من تواضع لله رفعه
أما سيفاني خييييييييييييييال يسكّت
أحلى عن سعود لو يسمعني بيذبحني هع
قعدنا أول شي وياهم فالصالة
جاان سيفاني يروح صوب الطاولة وزين ما كسر المزهرية
عمتي أم سعود : سيف قر مكانك
سيف خاف شوي ويصيح
سيف : ماما ما حبس
عمتي أم سعود : فاضحني هالولد
سيف ياه صوبي حضنني
سعود تم يطالع صوبي مستغرب
سيف : انتي اثتوي ماماتيييه انزين
عــــــــــاد أنا قفطت ويهي احمر
بصيح خلاص
سعود كان يطالع وفيه الضحكة
عموه ام سعود : بشرى بشرى تعالي شيلي سيفاني
يت بشرى وخذته
عموه أم سعود : اسمحي لنا دوم جذا سواف
أنا ما عرفت شو ارد
أنا : لا عادي عمّوه
رن تلفون سعود وظهر
جان ساروه وسلامي ييون يلصقون فيني وتمّو يسولفون وياي
رد سعود
سعود : خوزو عن حرمتيه بتاكلونها حشى
انا استحيييييييييت
ساره : حشى نحن ما ناكل لحوم بشريه
سلامي : هههههه ترا بخبرها عن بلاويك
جان اسكت عسب اسمع سلامي شو بتقول
سعود وقف : يلا مهاوي تعالي نسير الحجرة
جان اطالع صوب عموه وعمي والبنات
أنا : عن اذنكم
ورحنا
سعود دش قبلي وكان مبين عليه معصّب تخرعت
هذا أول يوم لنا بعد الزواج وهذا جذا معصب
بس اذا قال لي شي برد هب متعوده اسكت
دش تسبح وكان معصب
عقب أنا رحت غيّرت عسب نتغدا
يابو الغدا تغدينا
رحت لبست وكشخت لأنه أكيد العصر بييون ناس صوبهم
سعود كان قاعد يراقبني وحاط ايدينه صوب ويهه
أنا توترت عقب ما خلّصت
سعود : بلاج ..؟
أنا : ما بلاني شي
سعود : بلاج ساكته ما ترمسين
أنا : قلت لك ما بلاني شي انت اللي راد من بره معصب
سعود وقف وياه صوبي
سعود : مهاوي تبينا نسافر
أنا : اللي يريحك
سعود : آسف والله حجزت لنا اليوم بليل بغيت أسويها مفاجأه بس للأسف طلعت لي شغيلة وما قدرت
أنا : عشان جييييييه معصب الحين
سعود : شو يعني ما تبيني أعصب
أنا : يا ريال خل عنك عشان سفره زعلان جنك بنية أقول اجلب ويهك خلني أكمل ميكبي
سعود ضحك على تعليقي
سعود : يعني راضية أوعدج أول ما أحصل فجة شهر كامل بسفّرج
أنا : واذا ما سفرتني تراني بزعل ها
سعود ابتسم وقعد
شفته حسيته مب مقتنع فكلامي عباله اني شرات كل هالبنات اذا ما سافرت شهر عسل أزعل على طول
مر أسبوع على زواجنا
وأهلي زاروني هالأسبوع كانو عمي وعمتيه مسووين عزيمة عوده
وعقب ما راحو دشيت الحجرة هلكانة تسبحت ييت أبا أرقد
شفت سعود داش دخل يتسبح
حاولت ارقد ما ياني رقاد قلت اتريا سعود لما يظهر ونسولف
طلع سعود ياه قعد يمبي سولفنا شوي عن اليوم
أنا : سعود ممكن سؤال
سعود : أووووووووف بعدنا على ممكن اسألي
أنا : أحم أحم جم عمرك
سعود طالعني مستغرب
سعود : هاه
أنا : جم عمرك
سعود : 25 جيه
أنا : أويــــــــــــــــه وايد كبير
سعود ضحك
سعود : جيه لو تعرفين عمري ما بتاخذيني
أنا : لا لا بس عبالي عمرك 23 شي جذا
والله لو تدري اني حتى اسمك ما كنت أعرفه جااااااااان علوم
سعود : مهاوي انتي ما جد شفتيني فـ مكان
أنا أطالعه : لا
سعود : ركزي
أنا : لا مول
سعود : ولا فـ محل شي جذا
بحلقت زيادة
أنا : اممم شرات
سعود : واحة أدنوك
أنا دقيت راسي : هيييييييييييييييييييييييييييييييه تذكرت انت اللي قلت لك ولد شيوخ
سعود : هههههههه وأخيراً
أنا : أويه أنا ماخذه واحد مغازلجي
سعود : لا حشى والله القلب ما هوى غيرج
أنا : أحم أحم ما نروم نحن عالغزل خخخخ
سعود : هههه
أنا : سعود بتخليني أكمل
سعود : امم بشوف
أنا : لااااااا حرام الله يخليك الا دراستي
سعود : بخليج بس بغيّر سستمج وبنقلج
أنا : المهم أكمّل
سعود : بتكملين بتكملين
أنا : سعود انته شو تشتغل
سعود : بعد 3 أسابيع بتعرفين
أنا : يلا ارمس
سعود : اتريي انزين بتعرفين
أنا : أوكي
بعد مرور 3 اسابيع
أنا : احلف
سعود : والله ما اتمصخر
أنا : يااااااااااااي بنسير الغربيه عند قوم عمي
سعود : هيه
تجهزت وعدلت جنطتي سلمّت على أهل سعودي
سلمو علي سلام حااااااااار وايد جني بفارقهم
ركبنا السيارة وقبضنا خط الغربية
رقدت فالدرب
يوم وصلنا رحنا صوب قوم عمي تعشينا عندهم
عقب سعود اتصل بي قال لي يلا نطلع
استغربت
الغربية بعيدة وايد فيه حد يظهر منها نفس اليوم اللي يا
حتى عمّي ما قال لنا لا تظهرون هالحزة
بغيت أسأله ما رد علي
ركبنا السيارة
هيونه اتصلت بي و تمينا نرمس
عقب وقفنا يدام بيت
أنا : سعود وين يينا
سعود : انزلي ولا ترمسين
أنا خفت : سعود ما بنزل مادري يايبنا بيت منو بهالليل كنا نبات بيت عمي أحسن
سعود : انزلي وانتي ساكته
طالعت برا انتفضت من الخوف
ظلام وفيه شير
يخوف وااااااااااااااااايد
البيت ولا ليت منه شغال غير اللي عند باب الحوي
أنا صحت : سعود مابا يخوّف اهني
سعود معصب : مها مب ناقصنج يايين هالدرب كله وآخر شي تصيحين
أنا : سعود قلت لك ما بنزل
سعود : عاد تمي انا نازل نزل وراح داخل البيت
عاد أنا زغت زيادة
نزلت من السيارة ورحت أربع صوبه تمسّكت به عدل
لوا علي وفتح باب البيت
سعود : دشي بريلج اليمين
أنا أصيح : هي مب ناقصة وحش يي ياكلني
سعود شوي ويضحك دشينا شغّل الليتات
البيت روعــــــــــــــــه من داخل
سعود وداني الصالة وقعدنا
سعود : حبيبي مها سوري خوفتج
أنا لاصقه فيه خايفة
سعود : بلاج ها بيتي
أنا مستغربة : شووووووه
سعود : اقول لج بيتي
أنا : كيف هالمنطقة ما يعطون بيوت الا للي يشتغلون اهني
سعود : انزين وأنا أشتغل اهني
طالعت سعود مستغربة بس آخر شي استوعبت
مديت بوزي
سعود : عن يطيح البوز
أنا : ليش خرطت علّي خوفتني
سعود : يالجبانه
أنا : انته
سعود : هههههه ارقدي يلا بس ارقدي احسن لج
أنا : تعال وياي الحجرة اخاف لا تسير تييب الاغراض الا باجر الصبح
سعود : اوكي هههههه
عقب مرور ايام معدوده
سعود رن البيجر ماله عنده شفت اليوم
ياربييييييييه البيت يخوّف بليل
سعود قال يوديني بيت عمّي بس المشكله هم نازلين دبي
جان اقعد فالبيت روحي
جريب الساعة 4 الفير زاد خوفي ميته رعب
اتصلت فـ سعود ما رد علي خفت زياده
شفت فوني ياني مسج
شفت الرقم
آه
هالرقم اللي كان يطرش لي زمان مسجات بغيت أفتح المسج بس أنا خايفة
يمكن يهدد شي جيه
حاولت أتم متماسكه وأتريا سعود
اتصل به ما يرد
آخر شي ربي ستر ورقدت
ما حسيت بروحي الا عالساعة هنتين الظهر سعود يوعيني
سعود : حبيبي نشّي
أنا : سعود ييت
سعود : من زمان بس انتي راقده
أنا قعدت ولويت على سعود تميت أصيح
أنا : سعود لا تودرني
سعود : انشالله حبيبتي بس ظرف طارئ كان أمسات
نشيت لبست عقب تغدينا
ورحنا البحر عالعصر
سعود : مهاوي بحرنا ما يذكرج بشي
أنا : اممم عيال عمي والأهل
سعود : شي طيب بعد
أنا : لاأ
سعود : اوكي بروح بشتري أغراض تيين
أنا : لا بتم قاعده
رووح سعود تذكرت المسج
قلت افتحه عقب قلت لا بمسحه
وجييييييه و أنا أفكر وصل سعود
قعدنا نسولف سعود انسان خياااااااااااال روعه
درنا تذكرت كل موقف صار لي اهني
مع ذياب مع شهاب مع هييونه
حلوه حياة العزوبية
بس حياتي مع سعود أحلى
عقب ردينا البيت
سوييت عشا أونني عالسريع اللي أعرفه
تعشينا ورقدنا لأنه سعود وراه دوام الصبح
اليوم الثاني بعد ما رووح سعود الدوام عالساعة 7 حدرت نور الامارات
دشيت المحادثات شفت حلاتي بندرة وجودي ويتيمة زايد يسولفون
حلاتي بندرة وجودي : لا لا قالو بييون اليوم
يتيمة زايد : لأ باجر
حلاتي بندرة وجودي : أقول لج اليوم
يتيمة زايد : ما علينا المهم يلا سيري أوقفي يدام باب بيتكم
حلاتي بندرة وجودي : باص النادي ييي عالساعة 8
يتيمة زايد : احترقي عالشمس هههههه
حلاتي بندرة وجودي : يا حافظ
يتيمة زايد : المهم تراني بمركم اليوم
حلاتي بندرة وجودي : زين تسويين ترا عمّة سلامي وجالكسي والدنيا عكسي وشوق المشاعر وسوار بييونا
يتيمة زايد : ماشالله العايلة الكريمة كلها متيمعة اليوم
أنا دشيت عرض
أنا : هايو قايز
يتيمة زايد : هاياتو
أنا : اشحالكم
حلاتي بندرة وجودي : تمام
يتيمة زايد : مبروووووووك حبيبتي
أنا : الله يبارج فـ حياتج
حلاتي بندرة وجودي : ها حلوه دار الزين عمة سلامي وايد تمدحها
أنا : الله يخليج ييت الغربيه
يتيمة زايد : وااااااااااااو خبال الغربية أموت عليها
أنا : هههههههههه
حلاتي بندرة وجودي : أنا بظهر بروح بتجهز حق النادي
يتيمة زايد : تيييييييت
أنا : شو مسجلين فالنادي
يتيمة زايد : عنّا غيره فالصيفية هههههه
أنا : ههههههه
يتيمة زايد : عاد أنا بعد بظهر بروح بتجهز شكلي بشوف الغويلي اليوم
أنا : ربي يحفظج
يتيمة زايد : باي
أنا : بايات
...........
يوم ظهرو ظهرت كنت ملانه رحت صوب فوني
تذكرت المسج
قلت بفتحه
وتوني بفتحه من يوم ما قريته
الا وسعود يدش
عاد انشغلت وياه جهّزت الغدا
تغدينا وقلنا اليوم بنرد العين
جهزت أغراضي وأغراض سعود
قبضنا الخط
كالعادة
رقدـــــــــــــــــــــ ت هع
وصلنا صوب دار الزين
دشينا سلمت على عمي وعموه
البنات جنهم راحو العين مول
شفت سيفاني
يااااه يربع صوبي
شلته وبسته
تعود علي الفترة الأخيرة
عمو أم سعود : حبيبتي لا تشلينه ثجيل
أنا : عادي عموه متعوده
عموه تلمح لي : أول غير والحين غير
استحييييييت فهمت قصدها
سعود تم يطالعني
قعدنا شوي
عمي بو سعود : خلاص سعود خلها صوبنا انت أيام دوامك تم فالغربية والأيام العادية تعال صوبنا
سعود : هي مفكر جذا
ما علقت تميت أسمع سوالف عمي وسعود
الظاهر عمي بو سعود بعد فالغربية
يشتغل اهناكي
بس رتبته عاليه وايد لانه سنوات صار له
خلاف دشينا انا وسعود الحجرة
سعود : بلاج
أنا : ما بتم اهني بيي وياك
سعود : جيه
أنا : ما أحب أتم بدونك
سعود ياه صوبي
ولوى علي
سعود : فديتج أنا بس أنا دوامي شفتات وغير جذا بعاد عن الأهل لا سمح الله صار شي
أنا : مابا
سعود حاول وحاول لما أقنعني
وقال لو تميت فالغربية ماشي دراسة
لأنه ماشي جامعات الا داخل بوظبي
أما فالغربية مدارس وبس
ولو حملت الدرب خطر علّي
اقتنعت
عقب رقد سعود
رحت صوب ساروه وسلامي
شفتهن يقايسن البدل اللي شرنها
أنا : ماشالله شريتو السوق
سلامي : ههههههه تعالي اختاري لج
أنا : جيه مزاد هههه لا لا توني مع زهبتي شريت بدل العالم
ساره : هههههههه
سلامي : مافي شي فالدرب
أنا استحيت : لا
سلامي : اش دراج
سارونه : عن اللقافة سلامي
أنا : هههههه لا عادي بس أنا اجازة
سلامي : أشوف المناكير عمت عيوني هههههههه
أنا : ههههههه ساروه سلامي انتن هب مخطوبات
سلامي : جيه بتخطبينا حق حد ههههههههه
أنا : لا ما ببلش عيال الناس بج ههههه
سارونه : أنا مالجه
أنا : أهاا شي طيب
سلامي : وأنا عانس أتريا الفارس ايي مع الخيل ماله ويشلني هههههه
أنا : ههههههههه لو على سيكل صدقنا
سلامي : جييييييييييييه انشالله
أنا : بابو مال الدكان وايد زين هع
وعقب السوالف رحت صوب الحجرة شفت سعود راقد هلكان
رحت صوب الفون
بغيت افتح الرسالة
وبالفعل فتحتها
يا ترى شو مخبي لي هالرقم
من سنة تقريبا يطرش مسجات فترة وقّف والحين مرة ثانية يطرّش
فتحت الرسالة
انصدمت
*_*
///
حبّي بتأخر أنا لا تتصلين بي لأني ناسي فوني أوكي
///
استغربت هالمسج ياني يوم سعود متأخر
أكيد هو مطرشنه بس
بس
بس
يا ربييييييييه
كيييييييييف
وها رقم منوه مطرش لي منّه هالمسج
رقدت وأنا حاطّه فبالي باجر بنش وبسأل سعود
نشينا اليوم الثاني نزلنا نتريق
سعود : تجهزو ترا بنروح عقب الغدا جبل حفيت
ساره : لا نبا بوادي مول
سلامه : لا حديقة الجاهلي أحلى
سيفاني : العاب هيلي انتو اثكتو
سلامه : شو العابه انت بعد
سيفاني : خلاث خلاث مها تقول دبل حفيت زين
أنا ابتسمت له
عمتيه أم سعود : تعود عليج بسرعه
أنا : هي فديته
عمتيه بمزح : عاد ييبي له ربيع
استحيت
وسعود تم يطالع صوبي
عمي : انتو روحو بوادي مول هيلي المبزرة برايكم بس المهم باجر تتجهزون بنروح دبي
كلنا استغربنا
عمتيه أم سعود : ترا شهاب خطب بنت عمّج هيا
انصدمت واستغربت فنفس الوقت
أنا : أهاا شي طيب وأنا آخر من يعلم براويها هيونه
عمتيه : هههههه لا تزعلين ترا توهم علنو الخطوبة
أنا : حتى ولو لازم أنا أول من يعرف
عمتيه : هههههه خلاص انزين يوم سلامي انتي أول وحدة بتعرفين
سعود : أمايه ترا الحين بتلصق فـ سلامي
عمتيه أم سعود : زين يمكن تعلمها الرزانه شوي
سعود : عز الله الدنيا اختربت
أنا ابتسمت له بانتصار هع
ورحنا صوب جبل حفيت
وااااااااااااو
نحن فالقمة روعه بصراحه
تمينا نسولف وسيفاني كلّه قاعد فحضني يقول برد
فديته انشالله عيالي يطلعون شراته
وسعود اشترا لنا بارد وهالسوالف تمينا نسولف وكلّه نعلق على بعض
سعود راوانا فيديو فـ فونه يضحّك
سلامي قالت يرسل لها اياه
جان يبا يرسله
سعود : انتي بعده بلوتوثج ارسل لاكفخك ^_^
سلامي : أناا ..؟
سعود : لا مهاوي
أنا : امممم هي هههههه
سعود : غيريه ترا هب شي
أنا : بالعكس وايد يعيبني وبعدين اشدراك فبلوتوثي
سعود : استقبلي وبتعرفين
أنا : لحظه لحظه هاي هيا قاعدة تتصل
رحت فصوب تميت أرمسها وكلّه أهزبها
وبعد ما انهيت مكالمتي ياني فضول اعرف سالفة الرسالة
سعود ياه صوبي
وتمينا نسولف
أنا : سعود هاك اليوم بليل انت مطرش لي مسج
سعود : هيه جيه
أنا : من رقم منوه
سعود ضحك : ربيعي
أنا منصدمة : هاااااااه ربيعك
قلت بلحق ع روحي احسن لي
سعود : هي ربيعي
أنا : وتلفونك وين كان
سعود : فالبيت عالسايلنت
أنا : انزين سعود بقول لك شي
سعود : هلا
أنا : ترا كنت أتحرا هالرقم مال هيونه وتلعوزني كنت ارد ع المسجات
سعود حرج : هاه
أنا : والله ما يخصني فـ ربيعك ولا أعرفه و لاجد شفته ...
سعود ضحك : ههههههه لا عادي
أنا : بلاك
سعود : ترا رقميه أنا
أنا : هاااااااااااه
سعود : والله
اتصل بي ظهر لي الرقم
أنا : وقاعد تلعب فأعصابي وأنا أقول منو يعرفني
سعود : ههههه والله اني اباج من أول نظرة
أنا : عن المنكر الزايد بس
سعود : تعالي نروح السياره
أنا : أوكيك
رحنا صوب السياره
سعود : اسمعي ها اهداء لج
وشغّل المسجل
///
آه ياقرب المسافة بين عقلي والهبال
وقولي للعالم تجنن..جنــــنه صادق هواه
وآه يابعد المسافة بين صدق واحتمال
ماأحبك او أحبك والغلا واصــــــــل مداه
أتعب بقربك وبعدك وأسهرك كل الليال
أغرق بعينك بلحظة ولامعي طوق النجاة
انتي يابين الحنايا انتي يابنت الحلال
فيك عالم من مشاعر وجاك شاعر فيك تاه
أملك الدنيا بيمينى بس لاقلتي تعـــال
وغيرك اصلاً لابغاني قلبي اصـــلاً مابغاه
انتي في كفه لحالك وباقي خلق الله لحال
ويكفي إنك لاطلعتــــــي العمــــر عوّد وراه
ياعذاب القلب دونك ياعذاب بلا وصال
يا مكان انتي تـــــجينه تنقلب ارضه سماه
امطريني لين اسافر بين حلمي والخيال
اعشقينـــــــــي قد قلــــــــبك قد ما أعرف وفاه
انتي اتعبتي ورودك وتسألي نفس السؤال
ريـــحي قلبك أحـبــــــــك وانتي لي طعم الحياه
///
أنا : شكراً سعود
سعود ابتسم
أنا : انت وايد طيّب
سعود : أدري
أنا : عاد اجلب ويهك
سعود : محد يعطيج فيس
سعود : تبين نروح الغربية هالاسبوع
أنا : تصدق مرة حزة المغرب دعيت اني أسكن فالغربية والمرة اللي بعدها العين
ويوم رحنا العين حسيت دعائي استجاب ويوم رحنا الغربية بعد قلت دعائي استجاب
سعود : ههههههه
أنا : كنت أدعي لمليار أحسن
سعود : جييييه انا ما اسوا هالعالم كلّه
أنا : لا منو قال
سعود : مالت طول عمرج دفشة
أنا : هع عليك
سعود : والله بغيتي تخبلين بي
أنا : تدري دوم يوم كنت أقرا مسجاتك أقول آه يا قرب المسافة بين عقلي والهبال هههههه
سعود : يعني القلوب عن بعضها
أنا : لا لا بس التفكير غبي شوي ههههه
سعود : مهاوي صخّي عن أفرج من عاليبل
أنا : طرّش لي الفيديو يلا
سعود ابتسم مستانس
سعود : أوكي
أنا طالعت الشاشة مستغربة
أنا : سعود انت ,,,,,,,,,, انــــــــــ ،،،،،،،،، ـــــــــ ،،،،،،،،،ـــــــت انت هوه ..
سعود : هي هوه اللي شفتيه
أنا متخبله : سعود انت الوسمي مال البحر
سعود : أنا سعود أمييييييييه
أنا : هي هي بس اللي شفناك عالبحر
سعود : هي هو نفسه
أنا : وأمير الظلام مال الجمعيه
سعود : هههههههههه هيه بلاج تخبلتي
أنا : والله انّك شي سعود أحبك أحبك
سعود : استحي أعوذ بالله
أنا : هههههههه أونك وطول هالفترة بغيت تخبل بي
سعود : دقت براسي وطلّعتج من تحت الأرض
أنا : والله انّي نسيت السالفة وطول هالأيام ونحن نتلاقى
سعود : هي عند البحر وفالجمعية وفواحة أدنوك ويوم عرس أخوج شفتج طلعتي من باب أهل العرس ودشيتي هههههه
أنا : وطلعت انت راعي المسجات
سعود : هي بلاج
أنا : سعود شكلك تبا تخبلني
سعود : هههههه لا لا .. لازم أنا اللي بتخبل لمّا حصّلتج ارتحت
أنا : هههههه سعود والله انّك أهبل
سعود : محد أهبل غيرج يالهبلة هههههه صخّي خلاص
أنا : جيه ما خبرتني من أول
سعود : شكلج تبيني أفرج من عاليبل ( اخرب مخططاته )
أنا : لا لا خلاص بصخ هههههههه
...................
من بعد ما عرفت انّه سعود هو الشخص اللي مخبل بي
وخلاني أردد جملة
آه يا قرب المسافة بين عقلي والهبال
بغيت أخبل به بس للأسف اول مرة فحياتي حد يخبلني طول عمري وأنا اللي أخبّل الناس
بس هالمرة ياني حد يعرف دواي ههههههه
مرت الأيام والأسابيع والشهور والسنوات
بعد 5 سنوات
ويت ويت
أنا وعدتكم انّي بقول لكم عن أمنيتي
يوم ميلادي
يوم فريت السجينه وسوويت حركة المسيح هع
تمنيت
تمنيت
تمنيت
تمنيت
تمنيت
امممممممم
هع
لا لا خلاص بقول لكم
تمنيت أييب توم ولد وبنيه
أسميهم
فارس والجوري
على أسامي الأبطال فرواية همس صوتك
بس للأسف
أمنيتي ما تحققت
أقول لكم أنا لا تصدقون سوالف المسيح هاااااااع
يبت توم بس ولدين عمرهم الحين أربع سنوات
حملت عقب أربع شهور من سالفتي هههههه
سعود يومياً يلح علي احملي احملي
لمّا حملت ويبت هالتوم
سميتهم
تخيلو شو
ذيـــــــاب وشــــــــهاب
هع هع
طلعو مخبلين شرات ذياب وشهاب بس عن يحرمون وحدة الرقاد شراتي ههههههه
تخرجت هالسنة لأني وقّفت سنة كاملة بسبب هالحشاكل
المفاعيص
شنغل ومنغل
هع
سعود الحين فالغربية بينزل اليوم فديته
وعقب بسكن فاالغربية بس كل اسبوع بننزل العين
هع
دعائي استجاب حزة المغرب
اما
شهاب حرمته هيونه
ربّت يابت بنوتة حلوه
استغربت لأنه شهاب سماها ( مها )
تأكدت هالحزة شهاب كان يباني
بس خلاص كل شي نصيب
ربي يوفقه مع هييونه
وعقب أسبوع من ما ربّت هيونه
سلامي ربّت يابت بنية
وذياب اللي هو ريل سلامه
سمّا بنته ( مها )
اهني ردت شكوكي
وتلخبطت أفكاري ذياب بعد كان يباني
بس الله يوفقه مع سلامه
شهاب وذياب اثنينهم كانو يحبوني
بس أنا أحب سعود فديته
زين ما خذيت لا ذياب ولا شهاب
ولا جان صارت علوم وخلافات
وبعدين سوسو احلاهم
محد يسواااااااااااااه هذا حبّي عالي مستوااااااااااااه
يلا الحمدلله على كل حال
هدى ومهند يابو جييييييييييش عيال
أشك مستقبلها شرات يدوه وديمه
ههههههههه نسيت أقول لكم مرة يت صوبنا العين
يوم دشّت وسلمّت
جان تقول
يدوه وديمه : انتي ناسيه
الكل استغرب
أنا : لا لا أنا مها
يدوه وديمه : هي عبالي هذيج بعدني أدوّر عليها عسب ايوزها لواحد من احفادي بس هب محصلتنها
يتني ضحكة بغيت أنقع من الضحك هههههههه
قطع علي افكاري
...
بسوي مثل ما شوفك تسوي وافعل افعالك
عشان تعرف من فينا الزعول ومن وسيع البال
ابيك تذوق فنجالي وانا بذوق فنجالك
نصيحه واحتفظ فيها قصر معك الزمن او طال
ابي تسمع كلامي زين وتحطه على بالك
اذا حبك هبال اطفال الك عندي هبال اطفال
ولا وابشر بعد بهبال حبٍ ما هو بهبالك
واذا قصدك تهين اسمي عشان تشمت العذال
حشى لا انته ولا غيرك ولا عشره من اشكالك
...
بعدني على هبالي بس الحين احط شعر هع
بس ها للمسجات اما الرنه غيرتها
سويتها رنة اسبيستونات بس ماشالله شهاب وذياب لعنو بو خامس التلفون عسب هالاغنيه
جان اغير الرنه
ياني مسج
من
بــــــلـسم جـــــــــــروحي
///
ياالمها قلبي فيك مغـرم ومذبـوح
قلبي عناوين الغلى لـك وضعهـا
ماتدري أنك ساكن ٍ مهجة الـروح
روحي وروحك رب الأنفس جمعها
///
سعود فديت قلبه
ياربيييييه اشتقت له متى يوصل
فديته ايي يومين فالاسبوع
يلا فرجت خلاص بنكون ويا بعض
خلصت دراسه
حسيت بايد على عيوني
........ : يا حلوه شتسوين
أنا أميز هالصوت من بين كل الأصوات
صديت ورا
أنا : فديتك ييييييت
سعود : هي ييييت
سعود : شتسوين
أنا : خلاص خلّصت الروايه وبنشرها على نور الإمارات
سعود : بعدج على هالمنتدى
أنا : طبعاً بعدني تباني أودّر ربيعاتي
سعود : ههههه خلصتي روايتج
أنا : هيه خلاص بس باجي أدق على أرسل المشاركة
سعود : عن شو روايتج
أنا : عنّي وعنك
سعود تووه بيسحب اللاب
دقيت على ارسال
وانتشرت الروايه
هع
وانفضحت سالفتنا
سعود : زين جيه
أنا : عادي ترا
سعود : بتخبل ويا هالحرمه أنا
أنا : انزين شوف اسم الرواية ( آه يا قرب المسافة بين عقلي والهبال )
سعود : صدق والله ههههههه
شهاب وذياب يو ركض
سعود : هلا والله هلا
شهاب : بابا
ذياب : مالي بابا
سعود طالع صوبي
سعود : زين عندنا بنتين عسب ما يتضاربون عليهن هههههه
أنا : هههههه صدقك مها ذياب ومها شهاب
سعود : مهاوي مالتي أحلى .....لأنها خبلة
.............................
هنا قد جف قلمي وطويت صفحات دفتري نقلت لكم احدى رواياتي الفكاهية
((اقصد اغلقت صفحة الوورد
وانجلعت ازرار الكيبورد
من زود الكتابة والخرط
وسماع أغاني العود))
أتمنى أنها قد نالت على اعجابكم
مزجت بها بين الواقع والخيال
مواقفها الفكاهية واقعية أغلبها حدثت في حياتي وحياة صديقاتي
أما الباقي فهو من خيالي الواسع
ودمتم بــــــــود
تحياتي
يتـيمة زايـــد
00000000000000000000000000000000000000000000000000 0000000000000000000000000000000000000000000000000
000000000000000000000000000000000000000
0000000000000000000000000000000
0000000000000000000000000
0000000000000000000
00000000000000
0000000000
000000
000
0
شو اكثر موقف ضحككم بصراحه ..؟
اذا فيه أي تعليق علقّو
هالشي واااااااايد بيفيدني ويطور كتابتي
..}^
يلا ابي ردود تبيض الوجه ههههه ..
|
|
|
|
|