مشاعل حست بوحده اكبر واعمق من الوحده الي عاشتها في الماضي,,,وحده قاتله,,, حست انها يتيمه مع ان ابوها عايش ومع كذا كانت الوحده صاحبتها من
اول مانولدت ,, بس وحدتها الحين غير ,,, كان عالمها كله سواد ماتشوف اي شي ,,, وعرفت ان العصا راح تكون هي صاحبتها وهي
عينها الي تشوف بها لباقي حياتها ,,, غريبه هالدنيا ,,, فقدت نظري بلحظه,,, حاولت تتأقلم وتتقبل عالمها
الجديد الي كله سواد ,, بكت مره على امها الي موتها كان سبب احساسها بوحده فضيعه,,
وبكت مره على جدتها الي تركتها وهي بامس الحاجه لها ,,, كانت مراهقه ومحتاجه ام
توجها ,,, بس في هالوقت راحت جدتها ,,, وبكت مليون مره على طلال الي بسببه هي عمياء
وياليته يحس فيها حتى لو انها ماتت كانت متاكده انه ماراح يبكي عليها يمكن يحس بالذنب
بس هالشي ماراح يدوم اكثر من يومين,,, حست بغبائها شلون كانت بتخسر دنياها واخرتها
علشان واحد اتفه من انها تفكر فيه,,,, الحين خسرت سعادتها وخسرت الاهم وهو نظرها ,,,
هالشي مو سهل على اي شخص انه يصدقه او يتقبله
مشاعل كانت قويه وحمدت ربها لانه مد في عمرها وانقذها ,, صح انها فقدت شوفها يمكن
تكون عقوبه من الله لانها ماقدرت الحياه والصحه الي ربي عطاها ,,, تذكرت وعسى ان تكرهوا شئ فهو خير لكم
فكرت ايش الخير الي ممكن يجي من عماها ؟؟؟؟
فكرت في الجانب الحسن لعماها يمكن هذي نعمه من ربي علشان ماتشوف الملذات وتغرق
في بحر المعاصي والذنوب ,, يمكن الله خذ منها الشوف علشان ماتنسى القبر وظلمته
قررت انها تغير كل شي بحياتها ,,, وترضى بالي ربي عطاها ,,, وكل شي من الله حياه الله
المريضه الي جنبها: ايش فيش يابنتي ماتسمعي لي ساعه ازهمش
مشاعل: هلا اختي اسفه مانتبهت
المريضه: يابتني ايش فيش,,, ايش يوجعش
مشاعل ابتسمت: عيوني
المريضه: وش فيها تنغزش
مشاعل: لا المشكله انها ماتنغزني المشكله اني ماحس فيها
المريضه مو فاهمه شي: شفيش انتي تكلمي زين ,,, انتي سعوديه؟؟
سكتت لما شافت الضابط دخل عندها
جت الممرضه تقو للمشاعل تتغطى لان فيه ضابط برا يبي يضوفها ولاكلفت نفسها الممرضه
تعطيها اي غطا راحت وتركتها
الضابط: احم احم
بعد ماتغطت مشاعل دخل عليها((مشاعل الفتره الاخيره متعوده ع الغطاء لان طلال مايخليها
تطلع من البيت الا لما تغطي وجهها تذكرته ونزلت دمعه من عينها))
الضابط: السلام عليكم
مشاعل: عليكم السلام,,, مين انت
الضابط: انا الملازم سعد
مشاعل: ونعم ,, بس ايش تبي؟؟؟
الضابط: ماعليك زود,,,, عندي كم سؤال عن الي صار لك
مشاعل: تطمن محد جبرني على هالشئ انا الي سويته ,, ومااتهم احد بانه اجبرني ,, اتوقع
كذا خلصت اسئلتك
الضابط: طيب ليش فكرتي بالانتحار
مشاعل: هذا شي خاص فيني ماتوقع الشرطه لها دخل بنفسيات الناس
الضابط: شلون مالنا دخل ,,, ممكن تكوني خطر ع المجمتع
مشاعل انصدمت من وقاحته: طيب ابشرك انا حاولت انتحر علشان مانجحت بالجامعه,, بترفعون
قضيه ع الدكتوره الله يجزاكم خير
الضابط : لاتاخذين الامور بضحك ومزح ,,, انا موظف حكومي وضابط وجالس اادي وظيفتي ماله داعي الاستهبال
مشاعل : من قال اني استهبل قلت لك اسبابي ع شان الجامعه ماعندي شي ثاني اقوله
الضابط وقعي هنا
تنرفزت مشاعل لانها ماتقدر تشوف وماتدري وين توقعواكتفى بانه يخلي ابوها يوقع ,, بعد طبعا التحقيق مع ابوها واخوانها,,
وام مشعل, حتى ام سلطان حقق معها وكانت خايفه يتهمونها بشي
صالح: يالله ترى الساعه 4 اذا مالقيتك جاهزه بطلع واخليك
فهده: طيب بس ترى بروح للفيصليه
صالح: فيصليه وجعن ياخذتس ,, بدينا ,, تبين المغازل وقله الحيا
فهده: من قال في الفيصليه مغازل ,, وبعدين انت معي من بيغازلني وانت معي
صالح: وش دراتس ان مافيها غزل عسى بس منتيب رايحتن لها ياوسيعت الوجه
فهده خافت: لالا بس اسمع من البنات ,,, طيب فيه محل مو موجود الا في الفيصليه وش اسوي
صالح: الفيصليه غاليه,,, خليني اوديتس لمعيقليه والا وشيقر وش زينها كل المحلات الي في الديره رخيصه
فهده انصدمت: لاوالله وتبيني اروح اشتري ملابسي من الديره؟؟؟
صالح: ايه وش فيها الديره ,,, انا ماشتري ملابسي الا منها
فهده في نفسها علشان كذا انت قروي: طيب طيب خلاص نروح للعليا مول
صالح: عسى مافيه شباب بس
فهده عصبت: لافاضي مافيه لاشباب ولا بنات مافيه الا انا وانت
-----------------------------------------------------------------------------------------
كانت مرهقه وحاسه بالنوم ,, حاولت ترتاح ,, قامت لما سمعت صوت سعود
سعود: هلا والله بقمرنا
مشاعل: هلا سعود
سعود يحاول يكون طبيعي: الحمدلله على سلامتك ,, بلا دلع خلاص اطلعي وحشتينا
مشاعل: الله يسلمك,,, اوكي برجع للبيت بس عندي شرط
سعود: امري
مشاعل: بنام بغرفتك,, وانت دبر عمرك
سعود: هههههههه تفداك الغرفه وصاحبها
مشاعل: لامابي صاحبها ,, سعود ليش تتعب نفسك الدكتور قال بيطلعني بكره
سعود بصدمه: بكره ليش؟؟؟
مشاعل ابتسمت: مو تقول انك اشتقت لي
سعود: ايه بس مو تصدقين علطول
شمت ريحه ورد
مشاعل : حركات وجايب لي ورده
سعود استغرب الي سمعه من اهله انها ماتشوف
سعود: ايه تستاهلي ,,, اكيد اعجبك لانه مني
مشاعل: مع اني ماشوفه بس انا متاكده انه حلو ,,, المهم اخبار الهنوف؟؟؟؟؟؟؟
سعود: بخير تسلم عليك وهي جايه تزورك
مشاعل تضايقت ماكان ودها تشوف احد وهي بهالحاله صح انها تحاول تمثل على اهلها انها
مو مهتمه بس كانت خايفه ماتقدر تطول
مشاعل: لاتجي ماله داعي تتعب نفسها ,,, انا بخير الحمدلله
سعود: لا واجبها كم عندي من اخت ؟؟؟؟؟؟
مشاعل: تسلم ياسعود,, المهم تعال علمني هاه كيف النفسيه بعد ماقرب مشعل يتزوج؟؟؟
سعود استغرب من مشاعل والي كانت تسولف ولا كان شي صاير: عادي تصدقين بفقده
مشاعل: ليش ماراح يسكن معكم
سعود: لا
مشاعل: يالله الله يوفقه
سعود: امين ,, وتطلعين لنا بالسلامه يارب
00000000000000000000000000000000000000000000000000 00000
ام سلطان: بس انتم متاكدين انها خلاص ماراح تشوف
ابو مشعل وكله حزن: ايه الدكتور قال لي اليوم بعد الفحوصات الي سواها يقول الحبوب الي اخذتها
اثرت على العصب البصري الي بعينها وماراح تشوف ,, ام سلطان شوري علي ايش اسوي
بموت من الهم على بنيتي,, انا كنت مقصر معها
ام سلطان: ليش مقصر,, انت كنت موفر لها كل شي ,, وش تبي زود,, بس بنات هاليومين
مايرضيهم شي
ابو مشعل عصب: اسمعي يامره اصحي تزعلين بنتي ولا تضايقينها ,, كل رغباتها مجابه,,
ولااحد يكدر خاطرها مايكفيها الي هي فيه؟؟؟؟؟؟؟؟
ام سلطان في نفسها" اف حتى وهي عمياء ماسلمنا منها ,, ليتها ماتت وريحتنا"
ام سلطان: لاتوصينا على بنتي هي بعيوني
ابو مشعل: كفو
|
|
|
|
|