كلمــة أخيرة :
من اسبوع كامل ختمت قصتي الأولى .. وأنهيت أول تجربة لي مع القلم والرواية الطويلة !
غارقات في دوامة الحب ..
مجموعة مشاعر عشتها معكم لأكثر من عـام .. وكانت طريقي لكم ..
" غارقات في دوامة الحب" .. عنوان من أربع كلمات ، كنت عارفه انه غريب ، وانا بطبعي أحب الغرابة
مثل ما شفتوا القصة احتوت على اربع قصص رئيسية ، ما حبيت أكثر كان هذا الحد الأقصى بالنسبة لي ، تجربة أولى ما حبيت أغامر فيها أكثر من اللازم ، حاولت امحور افكاري واجمعها ضمن دائرة معينة ليست بكبيرة عشان اقدر اسيطر على كل الشخصيات والأبطال ..
فهد ، شوق
أحمد ، ندى
بدر ، نوف
سعود ، نجلاء
كبداية كنت راضية احكي عنهم .. مع أبطال ثانويين كل شي مشى معي تمام من البداية ..
حكاياتهم حبيت اتكلم عنها من البداية للنهاية ، مع اهتمام بالتفاصيل الصغيرة ... وضعت لكل بطل شخصية مختلفة عن الأخرى ولكل منها نقاط ايجابية وسلبية .. بعيـد عن المثالية الزايدة
من البداية ركـزت على مشاعر البطلات ، أكثر منه على الطرف الآخر ... وهذا مأخوذ من العنوان "غارقات" ، مجموعة من البطلات تجمعهم رابطة معينة بالحياة .. عالمـهم الوردي كان قصتي ومواقفهم اليومية هي اللي تصنع وتحيك أحداث هالرواية ^_^
بالنسبة للأبطال الشباب .. ماحبيت أكشف مشاعرهم من البداية .. تعمقت بالبطلات ومع تقدم الاجزاء بديت أميل تدريجيا للأبطال الشباب ..
خذوا على سبيل المثال "فهد" ، كم مرة جاني رد يقول ، شخصية فهد يلفها الغموض والاحظ انك ما تركزين على توضيح مشاعره لما يظهر بأي موقف ..
ما دروا ان هذي الطريقة مقررة اعتمدها من البداية .. والغموض كان مقصود مني لأجلٍ مسمى.. استمريت على هالمنوال لما قررت شوق تروح للشرقية .. وقتها بدت تظهر مشاعره أكثر وضوح للعيان اكثر من قبل .. وأظن وقتها كان البارت 20 أو 21 ... يعني مرت عدة بارتات كان كل تركيزي فيها على مشاعر " الغارقات" ..
ونفس الشي "احمد" ... كان فيها شي من الغموض وعدم الوضوح ناحية ندى ، .. تصرفاته تقول انه يحبها مع اني اشوفها عادية من ولد خالة لبنت خالتها ... لكن بعد هالتصرفات كانت تنبع من اهتمام داخلي خاص من أحمد لـ ندى .. قد لا يكون حب في البداية بالمعنى المعروف .. ولكنه اهتماام من نوع خاص تحول بعدين لـحب أكبر
نجي هالمرة لـ بدر ونوف ( ملح القصة وبهاراتها )
مثل ما قلت من قبل .. أمتع أوقاتي لما أكتب عن هالاثنين .. شخصية بدر مرحة محببة جدا الى قلبي ، وانا اتخيلها أحيانا تجبرني على الضحك ..
نفس الطريقة اتبعتها معه ، ما وضحت في البداية ليش كان يتصرف مع نوف بذيك الطريقة "المزعجة" .. كنت ابيكم تعيشون مثل ما تعيش نوف ما تدرون وش السر ورا تصرفاته .. مشاعره خليتها سر بينه وبين نفسه حتى اني تركتها له لفترة من الوقت وما فضحتها..
نجلاء والبطل " سعود"
هالشخصيتين بعد حبيتهم من كل قلبي ولما أكتب عنهم يكون لهم جوهم الخاص ، .. فكرة موت سعود كانت من البداية في بالي لكني أجلتها ،.. حبيته يستمر للبارت الاخير ويشارك الأبطال كل الأجزاء بما أنه واحد منهم .. وقلت يمكن نهايته في البارت الأخير يعطي طعم خاص له .. مزيج من الحزن والفرح .. والنهاية الرضا
بالنسبة لنجلاء : شخصية أنا أحترمها شخصيـا .. واحس الموقف له طعم لما تكون هي موجودة فيه ..
×
×
رايي بالشخصيــات
أول بطـل ظهر بالقصة .... ( فهد)
شخصية استمتعت كثيرا وانا اكتب عنها .. غروره عزته بنفسه غموضه وتصرفاته اللي احيانا يعجز الواحد عن تفسيره .. كان تحدي بالنسبة لي .. وصفته ووصفت مواقفه بطريقة حذرة ما كنت ابي اطلع من دائرة الغموض اللي ممكن تفسد طعم هالشخصية ،.. وسعادتي الأكبر يوم حسيت اني نجحت فيها وخصوصا اذا وصلتني ردود منكم تقول .." شخصية غامضة نعجز عن فهمها"
أحس اني وصلتها مثل ما ابي وهذا كان هدفي من البداية ..
(أحمد )
شخصية ما تشابه فهد بأي شي ... شخصية واضحة مرحة أخويـة ، ومثل ما قالت وحدة من الردود .. شخصية روتينية كثير منها في البيوت ^_^
( بدر)
شخصيـة تخلصت من كل القيود والاحكام وقوانين الدنيا.. شخصية حلاوتها بغرابتها تصرفاته أحيانا طفولية رغم أول ظهور له بالقصة كان بعمر 25 ،،، طيب قلب حنووون والأهم انه مجنوووون ... عاشق
احيانا كان يجاري نوف في طفولتها العفوية ، ولأن نوف كانت فيها طفولة لم تندثر كانت تعامله مثل الأطفال رغم انه داخلها قلب حاقد كاره
لكنه في النهاية كسبها ،،..
(سعود )
شخصية حاااازمة شديدة صارمة في عمله .. لكن اذا جيت لبيته وحبيبته ، أرق منه مافيه ... شخصيته خذتها من الواقع واللي نعيشه بهالفترة .. رجل أمن شديد يحارب ويدافع عن ارضه ، لكن رغم كل هذا له حياته الخاصة ومشاعره وزوجته وحبيبته اللي كل يوم تنتظر رجعته
نهايته اقتبستها من الواقع ... استشهد وترك وراه يتيم وأرملة... ولو اكمل القصة كان خليت عبدالعزيز ابوه ضابط من اكبر الضباط يمشى على خطاه ... وانا ذكرت هالنقطة بالبارت الأخير ..
××××××××
نجي الحين .. لـ ( الغارقات )..
(شوق ) ..
انسانة محببة الى قلبي .. مشاعرها هي مشاعري .. صنعتها واخذت ظروفها من وحي خيالي .. كنت أظن انها خيالية .. لين جت وحدة من القارءات عزيزة علي واستمتعت بمتابعتها لي .. قالت لي ( ان شخصية شوق هي ) .. ما دريت ان هالشخصية قريبة لناس كثير في الواقع ^_^.. ( فيها مني )
(ندى)
شخصية رومنسية حساسة ومثـال لكثير من البنات ... احلامها وردية عالمها الخيالي يختلف عن واقعها ، بنت عايشة ولها كثير من الأحلام .. ( أيضا فيها مني ^_^)
عاشت قصة حب من طرف واحد ، وهالحب كان امتداد لأحلامها الطفولية
( نوف )
شخصية في البداية كانت بعيدة عن الحب كل البعد .. تخالف ندى وكانت لها الـ ضد ...لكن بدر بالنهاية قدر يكسبها ويطيحها بجبال الهوى
كانت من الشخصيات المفضلة بالنسبة لي .. ( وايضا فيها مني ببعض الاشياء )
( نجلاء )
مثل ما قلت شخصية رائعة احترمها جدا ولها جوها الخاص .. بكل صدق اتمنى التقي بمثلها
بالنسبة للشخصيات الأخرى ،، مثل شذى مها .. نقدر ندرجهم ضمن القائمة تحت اسم " غارقات" .. لكن لا أحبذ هالشي ،.. لأنها شخصيات كريهه وبتظل كريهه ..
شخصية "دلال" بعد ودي أوقف عندها : شخصية حبوبة مرحة دلوووعة أخوها الوحيد .. لكن مثل ما شفتوا طلع شرها في فترة من الفترات رغم انها كانت مع نوف بنت عم وصديقة .. ، خوفها على اخوها وحبها الكبير له غطى ومحى كل هالاعتبارات .. أنا ما ألومها على هالشي رغم انكم كرهتوها ، لكن حبها الاخوي لبدر كان مسيطر عليها ..بس بالنهاية الظفر ما يطلع من اللحم .. رجعوا مع بعض مثل السمن على عسل
آخر شي وفاكهة القصة مثل ما أطلقتوا عليه
" عمر "
حركة البيت وحبيب شوق نمبر ون.. مثل ما حبيتوه أنا بعد حبيته حسيت وجوده اعطى القصة نكهة في بعض المواقف ..
بالآآآخر .. مر أسبوع على النهاية كانت صعبة والله تفكيري فيها وفيكم ،.. معقولة انتهت وانتهيت أنا معها
لنــا لقاء ثاني اذا الله كتب .. يمكن تكون بعد شهرين على الصيف .. ومن الآن إلى الموعد فترة دراسة وراحة ونقاهة بعد "غارقات في دوامة الحب"
إلى هذاك الوقــت ، أتمنى تكونون بصحة وعافية .. ويارب نلتقي على نفس المحبـة والمودة ... واللمـة الحلوة
كل ورودي وكل محبتي مني أبعثها لكم
عيووون
القمر
|