مانشدت الشمس عن حزن الغياب
علمتنا الشمس نرضى بالرحيل
كل يومٍ يغرق الضي فـ عــبــاب
ما سمعنا ناعي ٍ .. مابه عــويل
وما هقيت الموت يجرحني جـــواب
لين شفتك في سما عمري اصيــل
علميـني ياللي كفوفــك سحــاب
وابتسامك غيث واهدابك نخـــيل
وش أسوي لا دخل فصل الضبـاب
وكــفــت عيــوني وضيعــني الدلـــيل
حــاجــتي والشيــــب بهديني الصــــواب
حاجتي لك ما مضى فـــ عمري حصيل
آآآ ه يا سلمى مضى وقــت العتـــاب
والحـديـث اللي بـقوله لك طـــويل
اعــتـذر يمـه حصــل مني غياب
واعـتــذر ازريــت لا ارد الجمـــــيــل
مـن يجــازيــك وعطاياك الشبــــاب
والله العــــالم تـرى مـاني بخـــيـل
يــوم انا عــاري غــديـتي لي ثيـــاب
وان شـــكيــت الـضر شـافيتي العـــليل
ويـــوم كــبر الطـــفل ومـــتي الزهاب
كل مـا في الـكــون مــن طبـــعٍ جمــيل
هي درت حـايل وهــذيــك الهضـاب
عــن غيــابك هـو درى الروض المســيل
بنـت مــن لا ثــوروا فــوق الـركاب
مـا يبــاريهـــم ســوى نصـل وأصـيل
واخـت مــن لا كـسرت سمـر الحـراب
مـــن عـنيـف الـطـعـن ردوا للصـقيـل
وام مــن جـدانهـم مـثـل الشـهـاب
كاســبــين المجــد مــن جـــيـلٍ لجــيل
يالله المـطـلـوب يا جــــزل الـثواب
تجـعــل الجــنــة لـها ظـلٍ ظليـل
|