08-07-2024
|
#194
|
البارت الخامس والثلاثون
:
-
نظرات عيني يم غيرك بلا شوف
وأشوف وجهك وين ماحط عيني
لا ياخذك ظنك ولا يدخلك خوف
أبيك لو كل الخلايق تبيني
:
في دار زايد وتحديدا في بيت بو هزاع .
ظهر سالم مستعيّل وتلاقى ويا اشواق وشعاع سلم عليهن بسرعه وكمل خروجه اللّتفتت لشعاع وهي تقول: ليته بس يحس فيني.
شعاع بهدوء: انجبي واحشمي عمرج واللتفتي لنفسج تراج وايد صايره قليلة ادب من يوم ماعرفتي بصدق وعقب هزاع مابيرّحمج ما بيرّدج عنه غير تايّر السياره ترا الحين اقولج.
اشواق بتنهيده: وش دراني كنت اتحسب نفسي سافله واحب اخوي من الرضاعه صدق ولكن عقب الحقيقه اللي عرفتها ادركت ان قلبي عرف يختار وكأنه كان حاس فييني وانه هذا مب اخوي.
ضحكت شعاع وهي تقول: والله يا سالم انه مالتفت لج ولا درا عنج الحين موضوعه اكبر عنج وعن حياته سالم يدور اخته اللي مايعرف ارضها من سماها.
حطت اشواق يدها على قلبها وتنهدت بصمت تركتها شعاع وكملت دربها سمعت امها وابوها يقولون: بعد موضوع حارب وشعاع بنشوف موضوع سالم يا حرمه اهدي.
ما كان قصدها تتسمع ولكن سمعت امهاًتقول: حلفتك بالله يا بو هزاع تقولي صدق سالم ولد موزه اختيه ولا لقيته عند المسيّد مثل ما قلت.
تنهد بصبر وبطولة بال: اهدي الحين يا حرمه ولا تخربين على بنتج وولد اختج خلي الموضوع يمشي وبخبرج موضوع سالم كامل عقب.
قعدت بكامل حسرتها ماهي مصدقة اللي صار امس ( نرجع لأمس).
كانت قاعده بالحوش مع اشواق وشعاع وريلها وهزاع اللي كان ياي من الدوام ونطق بضيق: سالم وين اتصل به ومايرد فيه شي!؟
ابوه نطق:وانته ياي من بوظبي قاطع كل هالمسافه عشان تنشد عن سالم.
هز راسه بالايجاب: سالم مب عاجبني يسوي اشياء من ورانا وتوني اكتشف.
نطقت امه بخوف على سالم وقالت: بسم الله عليه وليدي شفيه وشو ياه!؟
اللتفت هزاع لها بغرابه: ماتعرفين!؟
هزت راسها بلا ونطق بتنهيده: مادري واقف بيت عمتي العنود ومادري شصار بينهم ولكنه قال لناصر بالحرف الواحد: اذا امك العنود وابوك عمر على الدنيا السلام حرام تكونون ضحيتهم.
بلع ريقه ابو هزاع ونطقت اشواق: ما جذب سالم عموه العنود وريلها يهود …
حرّ ابوها عينه عليها وانطبت ساكته من دون ما تكمل كلامها واسترسل هزاع كلامه بـ: قال شي غريب وكان بيطلّع عنهم ولكنه شاف عمر ريل عمتي العنود وشبك وياه بالكلام تحت أنظار عياله وحرمته من عقب ما قال سالم لريل عمتيه لا انته ابوي ولا انا ولدك لف على ناصر ونطق ابوك هذا اللي مفتخر فيه مضيّعني انا واختي من عقب المرحومه وعباله بنكبر ومابنعرف الحقيقه المره ولكن ابو مثل هذا ما يلزمني ولو يموت ما احضر له جنازه ولا اصلي عليه ابوكم واحد ما يخاف الله وانا خصيمه امام الله هو وامكم اللي خلته يشتتنا انا واختي وضيّعونا والمهم انه اشتبك هو وناصر لين ما تدخل عمر وقال ان كلام سالم صحيح وطلب من سالم يسامحه ولكن سالم نطقها بقلب قاسي وقال لا سامحك الله ولا احلك ولا باحك لا انته ولا اللي تعاون وياك وخلاك تنفي ضناك برى البلاد عند عرب ماتعرفهم ولا تعرف معدنهم بنتك اللي ماخفت عليها من الزمان وقسوته ولكن امثالك ماعليهم شرّها وانا مايشرفني اني اشل اسمك ورى اسمي ولو بيدي نزعت الدم اللي يمشي بعروقي منك يا انذل خلق الله وياللي ما راعى مخافة الله فينا ولا راعية حقوقنا وقاله بعد ان هو واخته مايبون منه شيء ولا يبون يتعرفون على اخوانهم حتى المهم انه يبا يعرف ساره بنت موزه وين وكيف فرقهم عن بعض من دون مايخلهيم في بيت واحد اقل شيء انهم يكونون تحت عيون بعض وكان بيشتكي عليه في شرطة بتهمة خطف اخته ولكن اللي ردّه عن شكوى طاري امه قال ماباهم يقولون ولد موزه شكى ريلها لكن قاله عند الله ما يضيع الحق وانا واختي خصيمينك يوم الحشر والدين وركب سيارته وطلع عنهم ومن وقتها اتصل ما يرد .
تحت شهقة الجميع باللي سمعوه اللتفتوا كلهم على صوت سماعهم لتوقيف السيارة بشكل مسرع ونزول سالم منها بشكل متبهدل والدم المتناثر على كندورته ركضوا له الجميع بلا استثناء ووقفت اشواق بخوف ماتقدر توصل له سالم عادي يزعلهم كلهم ولا يخليهم يقربون صوبه رفع يده يوقفهم ووزع انظاره عليهم ونطق: شكرا لانكم احتويتوني وشكرا انكم فهمتوني من بدري اني ما احل لبناتكن ومافي بينا رضاعه وشكرا على بناء ملحق خاص لي عشان ما احرجكم ولا احرج بناتكم اللي هن خواتي ولكن بسالك بالله رب العالمين يا بويه انك تقول الصدق كنت تدري اني ولد موزه من يوم يبتني عندك ولالا!.
بلع ريقه بورطة بوهزاع وشتت انظاره عليهم ونطقت ام هزاع بخوف: تكلم يا بو هزاع طلبتك تكلم لاتسكت قول كنت تعرف ان سالم ولد موزه ولالا!! .
هز راسه بالايجاب ونطق بغصه: لكن يشهد الله يا سالم اني ما فرقت بمعاملتيه لك ولهزاع وانته تدري…
قاطعه سالم بغصه وهو يقول: ساره اختي وين !!!
نزل عيونه بالارض ونطق: موجوده بالحفظ والصون.
سالم نطق بانهيار وبغصه فجرت اللي بيوف قلبه ودموعه تسبق كلامه وهو يقول لامه( ام هزاع) : تخيلي يمه انج خالتيه واني ولد اختج اللي كنتي تقولينا عنه يوم نحن صغار كنتي تقولين سمته سالم على ابويه لكن ماربط الحدث لان ابويه قال انه لقاني عند المسيد وسماني سالم على ابوج لانه كان في خاطرج تيبين ولد ثاني عشان تسمينه سالم حرام. عليك كنت اقولك ابويه واسميه عمي اللي ما يتسمى عشانه ريل اختك واثاريني طول الوقت مجابل المدعو ابويه وانا مادري ليش نكون ضحاياكم يوم ماتبونا ليش يبتونا ويوم شافنا ثقال عليكهم ولا عليكم ليش ما حطنا. عند خوالنا وقال هذيل عيال اختكم ليش اسير بيت خالتيه ام حامد وانا احسبها غريبه عني لاني ماعرف اني ولد اختها موزه ليش طول عمري قضيته مقابل خالتيه اخت امي وانا احسبها غريبه عليه واناديها امي من باب انها ضفتني من شارع واثاريها من ريحة الغالية كنت استحي لا تضايقت ايي واقولها متضايق يمه كنت انحرج اقول امي بس عليها خواني وهمها اللي فيها انها تلقى ولد اختها اللي من سنين ماتعرف عنه ما كنت اعرف اني انا هو ولا كان اشبعت نفسي بحضنها وغرقت ثيابها بدموعي شوق لأمي بـ هاللحظه جثى على ركبتيه وهو منهار يبكي مب مصدق انه الحقائق كُشفت بوقت متأخر جداً انحنت له خالته وهي تحضنه وتبكي ونطقت بحب: سالم يا بعد طوايف اهلي وخلفهم كلهم سالم يا ولد الغاليه الحمدلله على نعمة وجودك الحمدلله انك ولد موزه وانك ربيت عندي وبوسط بيتي وعند عيالي ولكن ياحسرتي عليك انهم ما خبروني ولا بردوا فوادي ليش يا بو هزاع ليش الله يسامحك كنت تشوفني اتعذب وابكي ليل ونهار على عيال موزه ليش ماقلت لي وبردت يوفي ويوف اختي المسكينه اللي قاعدات مثل المهابيل ندور عليهم ولانعرف لهم شيء لاعرفناهم حيين ولا عرفناهم ميتين كنت تقولي يا حرمه انسيهم وان كان لج نصيب وياهم بتلتقين بهم ليش عاملتني بدم بارد من دون ماتقول لي يا ام هزاع ترا حقيقة سالم هي كيت وكيت ليشششش…
صرخ بهم بقهر: بسسسس يكفي لا تلوموني ماكنت ابا اشعل بيوفج حريقة واقول لج ان عمر تخلى عن عياله بسهوله وفرهم عندنا ماكنت اباج تشوفين عمر بنظره دونيه ماكنت اباج تحزنين على سالم بأنه يربى عندنا وابوه الحقيقي كل يومين مطيّح عندنا في البيت وهو مايعرف عنه شيء قرب من سالم وهو يحضن كفوف ويهه بعد ما جثى على الارض بمستواه ونطق: ماعمري عديتك غريب يا سالم كنت اشوفك ولديه الثاني ما فرقت بينك وبين عيالي كلهم من بنت لين ولد خليت تعامليه معاكم حازم وقت الغلط وليّن وقت الرخى ربيتكم على ما يرضي ربنا لكن مادري ليش ماقدرت انطق الحقيقه رغم اني علمتك من بدري عن حرمتك على خواتك وانهن ما يحلّن لك لا بالرضاعه ولا غيره وانك غريب عليهن ولايجوز انهن يتكشفن عليك وانته احترمت البيت وحرمته لكن عجزت اقول لخواتك انهن مب خواتك وانك مب اخوهن وعجزت اقول لهزاع الحقيقه لاني ادري انه مابيطيع فيك وانه ريله على ريلك فنقلته في الملحق عندك من بعد ما علمتك ولكني تحججتبه عندهم بأنكم شباب ومتبون تاخذون راحتكم وان. سهرتوا قدرتوا تعودون متى مابغيتكم بما انه غرفكم برى والبيت داخلي بيكون مسكر ومقفول عشان حرمة البيت وانه محد يدخل علينا والناس نايمه وانتوا سهرانين برى خذوا بكلامي وصدقوه واقتنعوا ولكنهم ما اقتنعوا بأن سالم مايبا يقعد معانا في سفره وحده صحيح كنت اجنب بناتي انهم يقربون منك لكن مايدرون بصدق لذلك يوم اشوفهن يحضننك ويبوسنك على راسك رغم تغصّبك على فعلتهن واشوف عدم الراحه بعيونك ولكني ماقدرت اقول الصدق مادري ليش والله مادري الكلام يخوني ولا قدر ادور لي عذر او مبرر.
ابتعد سالم عنهم وهو يقوم مغصوب واللتفت على هزاع وضمه وبكى بقهر حاوطه هزاع وهو تحت تاأثير الصدمه والكلام اللي نقال نطق بغبنه وعيونه محمرّه: ابكي ياخوي على كتفي انا عضيدك وانا لك سند وانته الأمان لي في حياتي وانا في ذراك ياخوي لين يفنى عمر اخوك.
شد سالم على حضنه لهزاع ونطق بحشرجه: احرموني منها يا ههزاع 20 سنه وانا ماعرف عنها شيء ولا اعرف ان لي اخت ولا ادري اني ولد خالتك وان امك خالتيه اااااااااااااااااه يا هزااااااااع بأي وجه حق بقابلها وكيف بقولها اني ماعرف عنج وكيف بتصدق ان ابوها المعثور فرّها فرة في بلادين العرب وابعدها عنا وعن دارنا ليشششششش!!!! وعشان منوووووو وعشان شوووو عساه يلقاه في محبينه ونحن سلوم عنه.
غمض عيونه هزاع بحزن وسحب امه باتجاهم ولمهم كلهم في حضنه سالم على اليمين وامه عاليسار وباس روسهم ونطق بغبنه: خلاص استهدوا بالله الحين يا الغاليين وتعالوا ندخل داخل..انتهى الفلاش)
:
الى هنا انتهت الثلاث بارتات كُتبت بكل حب وتعب ومجهود كبير 
اذا تبون الزود ابا اشوف تفاعل يسر الخاطر ومُرضي.   
|
|
|
|
|