على قد الغدر اعذريني 💔
البارت التاسع والعشرون
:
-
:
ماتعبت من السعي بين الشوارع والحواري
أتعبتني عند " بيبان الأمل " لحظة وقوفي
:
-
حمد كان توه واصل البيت وقف سيارته وناظر بحديقة بيتهم وشاف عبدالله قاعد وشكله سرحان وضايق طالع ساعته ورد طالع عبدالله وحس ان هالوقت المناسب اللي يستلم فيه عبدالله ويعرف شو فيه وصل عنده وسلم وقعد عالكرسي رد عبدالله عليه السلام بهدوء قاتل وببرود نطق حمد بهدوء يليّن فيه قلبه: بيعني في السوق ياخويه ولا تتضايق.
نطق عبدالله بتنهيده: اشتريك بالغالي يا الغالي وياليت كل شي غالي علينا نقدر نشتريه بمالنا ولا بحالنا.
نطق حمد من وصل له مربط الفرس: افا ياخوي كل غالي لاجل عينك يا عضيدي يرخص لك انته بس اشر على مطلبك وغاليك وبهاللحظه دق على صدره حمد واسترسل بكلامه واحتزم بي وبتلقاني على يمينك سيفٍ بتار وان خليتني على يسارك تراني عصاك اللي ماتعصاك يا سنديه.
تبسم عبدالله على مواساة اخوه له ليته صدق يا حمد اقدر احتزم بك وتيب غاليّه لين عندي.
نطق حمد بعد ابتسامة عبدالله: شو سر هالابتسامه تبا غاليك ابشر به بس اشر عليه.
ضحك عبدالله ونطق بهدوء: ياليت يا حمد الامور بيدك وياليت الامور سهالات مثل ماتتوقع.
ضحك حمد وبدعابه نطق: جربني انزين.
سكت عبدالله وماقدر ينطق ومن ثم نطق حمد: عبدالله انته امس يوم ييت البيت ورقعت الباب بكل قوتك لدرجة ان صدى صوت الباب ارتد معناتك كنت في قمت غضبك اقدر اعرف شفيك.
تنهد بضيق وبألم نطق: وش يفيد لو عرفت يا حمد مردّه مالي نصيب في اللي اباه.
تنهد حمد وحك لحيته وهو ينطق بغمزة عين: الموضوع فيه حب وانا اخوك.
ضحك عبدالله بتنهيده وعيونه راحت دايركت على فلة عمه ونطق بهمس سمعه حمد: عسى الله يزين ايامها ويمسح كل هم على قلبها معتلّي بسببي وانا اخوك.
شك حمد في عبد الله ونطق بتأكيد للي سمعه: منو من البنات شالعه قلبك اكيد انها مب سلمى لانها رسميًا لك.
طالع حمد وهو يقول: لو يجوز لي شرعاً اجمع بينهن جمعت ولكنها ماتحل لي ياخوي صارت حليلة غيري.
شهق حمد ونطق بعد ما حس انه عرفها ونطق بلا شعور: لا يكون المير اللي خاطرك فيها.
هز راسه بضيق ونطق: هيه ياخوي لكنها راحت مني.
مسح حمد ويهه بيديه ونطق بغصه: يا الله يا عبود دخيلك لا تتهور صارت حليلة اخوك ما يجوز ياخويه اللي تسويه حرام والبنت بتكون قدام ناظرك 24 ساعه لازم تدرك افعالك ونظراتك باتجاهه وحاول تتجاوز الموضوع لو هو صعب عليك ولكن عشان اخوك.
تنهد بضيق وهو مب ويا حمد ولا فكره بكلام حمد الفكر سالي عنه صوب الذي خذت الفواد ولا ردته.
حمد نطق بعد ما شاف نظر عبدالله عند فلة عمه ونطق بهدوء: عبدالله ادري صعب تنجاوز كل شي ولكن انته لازم تتعامل بحذر.
رفع عبدالله تلفونه واتصل على المير ماردت الا بعد ما طوّل يرن وردت بهدوء وارتباك: هلا عبدالله.
انصدم حمد ورفع عيونه لعبدالله اللي كان يناظر حمد ونطق بضيقه: لا تضايقين من اسلوبها تراها عديمة الذوق والمعنى وماتعرف شو تقول.
نطقت بعد ماحست انها استرجعت الهواء: عبدالله طلبتك لا تتصل فيني انا تجاوزت الموقف الله يخليلي المها فديتها( هنيه قلب حمد زادت دقاته واعلنت حالة الطواري في قلبه من طرت المير اسمها وتنهد بحب هو ثاني وانحبس الهوى في قفصه الصدري) ونطقت طلعتني من اعماق ضيقتي لاتخاف عليّ مادام ان المها عندي خاف علي اذا راحت المها من حياتي لحياه ثانيه اما الحين فما عليّه خوف يا عبدالله تكفى لاتتصل والله يوم طلع رقمك وان وسط خواني ان النفس انعدم مني دخيلك عبدالله ماني ناقصه جنون حامد اللي مايخلص يكفينا جنونه اللي نشوفه في المها واسترسلت كلامها بهدوء عبدالله ارجوك للمره الالف انطقها عشان قدر اختيه عندك لا تتصل والله لو مب موضوع الملف جان ما اتصلت بك ( بهاللحظه حمد فج عيونه اكثر وطالع عبدالله اللي غمض عيونه بالم )ونطق بحسره في صوته: وعمر يا مياري شو بتسوين معاه.
تنهدت بضيق ونطقت: ربك كريم ماعرف له اخوك هذا متقلب المزاج والحال ساعه المحب وساعه المكره اللي ما يداني شوفتيه لكن طلبتك عبدالله انسى اني اتصلت بك والله العظيم لو مب ملفي اللي عندك ما اتصلت لكن امنتك الله هالملف لا يطيح في ايد حد من هلك لانه وقتها انته اللي بتنزل من عيونهم وانا مايهون عليه اشوفهم ينظرون لك بنظره دونيه ويلومونك بشيء ما كنت حاس به والحين اعذرني لازم اسكر وفعلا سكرت من دون ماتسمع رده.
حمد اللتفت له بدهشه ونطق لعبدالله: شو اللي سمعته هذا يا عبدالله المير شو تقول وشو تقصد.
رفع كتوفه يدّعي عدم الاهتمام ونطق: علمي علمك حبي لها قام ياثر على مسمعي.
حمد بطرف عينه نطق: عبدالله شو مخبي علينا ترا المستخبي مصيره يبان مابيّتم طول عمره مستخبي.
ابتسم ابتسامه باهته ونطق: ادري والله بس ماقدر اقول اللي بينا محتفظ به في قلبي من سنين عجاف ياخويه مادري متى تهب ريح يوسف وتوصلنا لبر الامان.
احترم حمد هالفضفضه من اخوه واحترم سرّه المخفي وقام من عنده مايبا يسال اكثر اكتفى بمعرفة انه قلب اخوه محتل منذ سنين عجاف ويتريا ريح يوسف تهب عليه لتصلح ما افسدته الايام وراح للبيت وبتحديد لقسمه.
:
انتهى
|