يا اللي كلامك دُر منثور
جميل في نظمه ومعناه

حرَّك بقلبي صادق شعور
عميق في فهمه ومغزاه

خرجت مِنْه ابِّضعة سطور
تِلَخّص الحب ومزاياه

ما كُل من ودَّعْك مذكور
ولا كُل من غادرك تنساه

اللي بِوَسْط القلب محفور
في أي وقت يعود تلقاه

واللي هواه امجرد قشور
أقل هبة ريح تسفاه

حبك قطع بي سبعة بحور
أبعد بي بشوحه ومرماه

أبحر رضا ماني بمجبور
سعيد في حبك وممشاه

راضي كذا والبعض مقهور
أزعجني بكثرة وصاياه

ما باقي الا يقول منظور
ويعدني من ضمن مرضاه

اللي يحب يخالف الشور
مهما يكون الأمر يعصاه

لأن ما في الحب منصور
يا كثر ما شفنا سواياه

ما بين مجنونٍ ومقبور
وثالث شكا ليل المعاناة

يكفيني إني عايش الدور
وراضي أنا بدوري وأبغاه

ما يهمني أكون مشهور
راضي ولو عشت بزواياه

ما هو مهم يقال مغمور
ما دمت عالم في خفاياه

أعيش به راضي ومسرور
ودرب النجاه أعرف خباياه






سُهيل

منقول

مشكوره قلبي ضوى الليل على تصميم مميز ربي يسعدك يارب