:

وهم
يعيش به
منهو فقد معنى الحياه
يسافر بظنه تعب
ويبات في وجه المهب
ماله من احساسه نجاه
مسكين
خانته المواني والبحور
مسكين
سافر به بلا يمه من الخيبه
غرور
ومابين شكه واليقين
يقطع مسافات السنين
وتلعب به امواج الشعور
حد الغرق
ولازلت انا وياه موقفنا هنا
في مفترق
لو أنصحه مانلت ياكود العنا
لو قلت له :
لالاتمر النار يحرقك السنا
ثم تختلف عندك تفاصيل الحقايق والجنا
ولاتهب الريح دربك لاتهبه
ثم ترميك الزوابع في مغبه
لاتهب الريح ويثور العجاج
ومن بعد شرب الصفا من سلسبيل
ومن مسيل
تشرب الدغل الهماج
لو اقول
مايفيد القول منهو عالقٍ فيه الذهول
والسؤال اللي يراود للاجابه
عن وجوه اسفارنا اللي ماتشابه
بين ليت وبين لو
هو متى ليل الشتا يفقد صوابه
ثم يهب الكون عصفه زمهرير
يسلب الراحات من قعر الضمير
ويبرد المعبار ويموت الشجر
والشريد الصب ما يلقى مفر
:
إلى هنا
ياخاطري لاباس
ترى الحقايق صبح
إن جيت للانصاف
ماتستشاب بقبح
أو تستتر بلحاف
أقولها من عِرف
ماهو حكي قالو
مثل الزلال الصرف
لو البشر مالو
مالي ومال الناس
كلٍ على مشهاه
يسقي هواه الكاس
ياخاطري لاباس
نام
واترك احلامك على متن الغمام
لا تساقط صادق احساسك
مع اوراق الخريف
ومابقى للقلب ريف
ولارفيف
إكسر أقلامك على جال الرصيف
ونام
ماعلى الدنيا سلام


:

مُواسي.