منتديات قصايد ليل - عرض مشاركة واحدة

11-05-2010

العنود : ان شاء الله تكمل فرحتي ويقوم عبدالله وندى بالسلامه
الهنوف: امين

شوي الا طلع الدكتور وبشرهم بنجاح العمليه .. الكل حمد الله واستانس
محمد : الحمد لله لك يارب .. وتذكر رجول عبدالله وحز في خاطره
محمد كان يعرف أخوه عبدالله وكان خايف من ردة فعله اذا عرف ان رجوله انشلت .. راح محمد لدورة المياه
عبد الرحمن وعبد العزيز راحو للدكتور يسئلونه عشان عبدالله .. والباقي راح للجده عشان يشوفونها ..
العنود راحت للحمام والهنوف كانت تستناها ولفت انتباهها صراخ حرمه لفت وجهها
الهنوف : ياعمري شكلها بتولد بعمليه الله يكون في عونها وقامت تطالعها وزوجها يهديها يوم دخلت زوجها كان على اعصابه ويدعي .. السيب ماكان فيه الا هي والرجال والممرضات الي رايحين جايين ..
الهنوف في قلبها: شكلها اول ولاده لها ياعمري شكله خايف عليها ةتطالعه وهي مبتسمه ..
الا تحس شي ابيض جنبها وتلف وتشهق
محمد يضحك ..: شفيج تخرعتي
الهنوف متفشله : وساكته
محمد: حمدلله على سلامة ندى وجدتي
الهنوف: الله يسلمك وانت بعد حمد لله على سلامة عبدالله وجدتي
محمد: الله يسلمج .. شخبارج من زمان عنج
الهنوف قلبها واصل حده : حمد لله
الا تجي العنود : السلام عليكم
الأثنينك وعليكم السلام
العنود: وين الباقي
الهنوف: راحو لعند جدتي
العنود: وانتو شتسون هناااااااا
محمد: ننتظرج
العنود: أي صح تنتظروني
محمد يطقها على راسها : أقول امشي وانتي ساكته
في غرفة الجده ..
العنود: السلام عليكم اجمعين
الكل : وعليكم السلام
العنود وهي متجهه لعند جدتها : يابعدهم كلهم جدتي والله البيت مظلم من دونج يالغاليه .. وتبوسها على راسها وتلمها بحضنها
الجده: تسلمين
سلمان: وخري عن امي تعبانه مافيها حيل عليج يالدبه
العنود: انا دبه اسم الله عليك يالضعيف
سلمان: ايوه ضعيف ونص
بدور: امحق ضعييف وين الضعف ياحسره بس أقول سولك رجيم قبل عرسك لاتتفشل قدام حرمتك
سلمان: اولا ادري انج غيرانه وبعطيج على قد عقلج
بدور وهي تعكف في وجهها : ايوه وثانيا
سلمان : ثانيا مرتي عاجبها جسمي
الكل قام يضحك : ههههههههههههههههه
محمد: استح على وجهك حرمه عشان تقول عاجبها جسمي
الجده: والله اشتقت للقعده وياكم ومناقرتكم ..
بدور: يمى لا تخيني أصيح احنا الي كنا ميتين خوف عليج
دلال: ما تتصورين البيت شلون كان من دونج
العنود: انا طبعا ما طبيته ابد لاني عارفه انه يجيب الهم وحس الغاليه مب موجوده فيه ..
الا يدخل الجد وعبد العزيز وعبدالرحمن وعبداللطيف ..: السلام عليكم
الكل: وعليكم السلام
العنود: ها جدي
الجد: وشو انا توني داخل
العنود : شلون البيت بدون جدتي
الجد وهو يطالع الجده : والله يابنتي اذا قلت مر يجيب الهم ومظلم ماوفيت
سلمان: اكشششششخ يمىى
بدور: ما اقدر انااااااااا
العنود: على التغزل
الكل : هههههههههههههههه
الجده: أقول انتو ما تستحون هذا حالكم ..
وتمو يسولفون ربع ساعه عقب طلعو عشان يخلونها ترتاح ..
في بيت عبدالعزيز << أبو العنود>>
بعد الغدا وهم قاعدين
عبدالعزيز : ياعيال بغيت أقولكم شي يخص عبدالله
الكل التفت عليه ومستين الي راح يقوله ..
ام عبدالله: عسى ماشر يابو عبدالله ان شاء الله خير ولدي فيه شي
ابو عبدالله: ان شاء الله كل الخير .. شوفو عبدالله الحادث الي سواه اصابه في كليته بس الحمد لله كل شي عدى على خير ونجى من هالمشكله بس
محمد الي كان عارف وش راح يقول ابوه نزل راسه في الأرض وسكت وكان وجهه متغير
الكل: بس وشو ؟
ام عبدالله: قلبها كان ناغزها على ولدها والدموع في عيونها
ابو عبدالله : عبدالله اصاب في رجله و...
ام عبدالله نزلت دموعها: لا تقول يابو عبدالله لااااا
العنود العبره كانت واقفه في حلقها بس حاولت تمسك نفسها
ريم قامت وقعدت جنب امها : خلاص يمى
ابوعبدالله : استهدي بالله يام عبدالله .. انا ماحبيت اقولكم الا لمن يخلص من عمليته مع ندى وانا رسلت تقاريره بره
محمد رفع راسه: بشر يبى عسى خير
ابو عبدالله: الحمد لله ان شاء الله اول مايقوم بالسلامه هو وندى راح نرسله بره يتعالج
محمد ابتسم: الحمد لله لك يارب
العنود : الحمدلله
ابو عبدالله قام ويا زوجته يرتاحون والعنود طلعت غرفتها انسدحت على ظهرها على السرير وخذت نفس
العنود: الله يفرج المصايب يارب والله ما تستاهل يا عبدالله ولا انتي ياندى
الا يدق جوالها ..
العنود: هلا والله
الهنوف : اهلين
العنود : كيف الحال
الهنوف: تمام وانتي ؟
العنود: الحمد لله ...
الهنوف: دريتي عن عبدالله
العنود: أي ياعمري توه قايل لي ابوي
الهنوف: خذت نفس الله يكون بالعون
العنود : امين
الهنوف: بتجين المستشفى العصر
العنود: أي اكيد عشان اشو عبدالله وندى وجدتي بعد
الهنوف: اوكي ان شاء الله اشوفج العصر
العنود: ان شاء الله يالله مع السلامه
الهنوف : سلام ...
عبدالله كان صاحي العصر واول من دخل عليه هو سلمان ..
سلمان: الحمد لله على سلامتك
عبدالله وهو مبتسم : الله يسلمك هلا بالعم
جا سلمان وسلم عليه : شخبارك ان شاء الله بخير
عبدالله: الحمد لله بخير وعافيه انتو شخباركم وجدتي شخبارها
سلمان : جدتك الحمد لله قامت اليوم وانت في العمليه
عبدالله: الله يبشرك بالخير وعساها بخير
سلمان: والله الحمد لله الحين بروح امر عليها بس قلت امرك اشوف اخبارك اول
عبدالله: تسلم .. سلمان ابي اسالك وجاوبني بصدق
سلمان حس بالسؤال الي راح يسئله عبدالله: امر
عبدالله : توعدني انك تقول
سلمان: قول وش سؤالك
عبدالله يطالعه بنظرات ترجي
سلمان: تبي تسال عن الي متبرع لك
عبدالله: ندى
سلمان هز راسه بالأيجاب
عبدالله حز في خاطره وغمض عيونه وضغط على يده بالقوه : وليش خليتوها
سلمان: ياعبدالله هذا قدر ومكتوب وبعدين هي الي اصرت
عبدالله يقاطعه : بس ولو ..
سلمان : الي صار صار ومابيدنا نرجع شي الحمد لله على سلا متك
عبدالله: وهي شخبارها
سلمان: توني مار عليها عال العال الحمدلله بخير
عبدالله: الحمد لله
سلمان: اوكي انا بروح اشوف الوالده
عبدالله: سلملي عليها وتحمد لها السلامه
سلمان: يوصل يلا شوي واجيك
اول ماطلع سلمان
عبدالله: ليش ياندى ليييش تسوين كذا
العصر الكل كان في المستشفى البنات ماطولو قعدو شوي وعقب رجعو لان الجده غرفتها كانت مليانه حريم جايين يزورونها رفعه وأهلها جاو وعبدالله حتى هو غرفته ما فضت اخوياه كانو جايين يتحمدون له السلامه وحتى ندى فكانت الاماكن زحمه ..
بدور وخلود (ام دلال ) وام عبدالله كانو عند الجده وندى كان معها امها ومنى ..
على الساعه 10 كان بو عبدالله ومحمد وبو فهد (ابو الهنوف) كانو قاعدين عند عبدالله وكانو ناويين يقولون له ...
ندى طبعا عرفت قالت لها امها وقامت تصيح ....
بعد ما راح الكل في الليل عبدالله كان وده يشوف ندى بس بعد ما عرف انه غير قادر على المشي كانت الدنيا ضايقه فيه ماكان وده يشوف ندى وهو بالحال هذا ...
عبدالله ماكان متصور انه مو راح يمشي طبعا ابوه قاله انه رسل تقاريره وراح يسافر اول ما يقوم بالسلامه بس عبدالله رفض في الوقت الحالي ..
كان قاعد طبعا فوق السرير ويدعي ربه .. الا ييسمع صوت الباب انفتح كان متوقع انها الممرضه فما لف وجهه .. الا ينتبه لكرسي متحرك لف وجهه الا ندى على الكرسي
عبدالله وهو متفاجئ : ندى
وتم يطالع فيها وهي تطالع فيه وعيونهم معلقه في بعض وعيون ندى تدمع وهي تصيح بكل هدوء
قربت الكرسي جنب السرير وعبدالله ماكان يطالعها
عبدالله وعيونه ما تطالع ندى : ليش سويتي كذا ياندى
ندى ما تضايقت لانها كانت متوقعه هالشي من عبدالله: انا ما سويت شي
عبدالله : شنو ما سويتي شي وانتي متبرعه لي ب...
ندى وهي تصيح : بس اسكت لا تكمل عبدالله انت لو تبي روحي ما بخلت عليك بها
حاولت ندى بكل هدوء انها تقوم من الكرسي وكانت يدها على جنبها وقعدت جنب عبدالله على طرف السرير
مسكت يد عبدالله
ندى: حبيبي صدقني انا اليوم الي قعدت فيه بدونك والله ماكنت طايقه الدنيا كل شي كنت اشوفه مظلم والله كنت بفديك بروحي لو اقدر بس ترجع لي اذا انت تقوى انا ما اقوى اعيش من دونك .. وقامت تصيح ...
عبدالله خذها وحطها على صدره : لا تصيحين تراج تعورين قلبي وشلون اقوى وانتي قلبي حد يقدر يفارق قلبه والله كان اموت ...
كانت الغرفه هدوء ومافيها الا صوت ندى الي كانت تصيح
عبدالله: بس ماكان ودي اتعبج معي
ندى رفعت راسها: تعبك راحه يالغالي لا تقول كذا
عبدالله: الله يخليج لي ولا يحرمني منج
ندى: ولا اياك ان شاء الله
قامو يطالعون بعض وارتسمت ابتسامه على وجه ندى ..
عبدالله خذ يدها وباسها : أحبج احبج احبج والله اموووووووت فيج
ندى : وانا بعد
عبدالله : وانتي بعد وشو
ندى بصوت هادي : أحبك
عبدالله: الله ياحلو هالكلمه شلون كنت اتمنى اسمعها منج عيديها
ندى : أحبك ..
عبدالله خذ ندى ولمها في حضنه ...
مرت الايام بسرعه والحمد لله طلعت الجده من المستشفى وبعدها بكم يوم طلعوا ندى وعبدالله ..
طبعا اول ماطلعو كان بيتهم ما يفضى من الضيوف الي جايين يتحمدون لهم السلامه ...
وسوو عزيمه كبيره على سلامة الجده ..ذبايح وحاله ..
بعد العزيمه بيوم العنود تكلم الهنوف ...
العنود: تدرين من يوم مارجعنا وانااكلم سهى ماترد لا على جوال ولا بيت