انتبهت له وهو يتحرك قامت له أول ما شافها ابتسم
عبدالله: ندى
ندى: اشششش لا تتكلم مافيك حيل
عبدالله حرك يده يبي يشيل الي على وجهه ندى نزلت يده: لا تشيل شي
عبدالله يترجاهااابعلمات وجهه ندى ابتسمت وانا اقدر أقولك لا .. وشالت الي على وجهه <<حق الاكسجين>>
عبدالله بصوت واطي: كلهم راحو
ندى: أي ما في الا انا الحين الساعه 12 وشوي
عبدالله : ليه مارحتي
ندى: شلون اروح واخلي قلبي
عبدالله ابتسم ومسك يدها
ندى: يالله انت شد حيلك وسو بكره العمليه عشان تقوم بالسلامه
عبدالله في خاطره يبي يعرف منو الي متبرع له وهو كان حاس انها ندى : الله يعين .. تعبتج وياي
ندى غرقت عيونها : حبيبي لاتقول كذا ترى أزعل انت تعبك راحه بالنسبه لي
دخل سلمان على أمه وشاف بدور قاعده على الكرسي ونايمه من التعب راح وجاب غطا وغطاها ..
عقب راح يصلي له ركعتين ودعا فيهم لامه ولعبدالله ...
قعد سلمان في المستشفى لين الفجر عقب راح صلى ...
الجد بعد ماصلى الفجر جا وشاف بدور نايمه قومها عشان تروح تصلي راحت بدور .. وقعد الجد يستغفر عقب قام قدام الجده فوزيه ..
الجد: الله يقومج لنا بالسلامه يالغاليه والله البيت من دونج مايسوى شي حلاتة وحسج موجود فيه حتى وانتي بره البيت ريحج وصورتج في كل زوايه .. طعم الأكل ماله حلاه الا من يدج وبوجودج .. يالله طلبتك انك تقومها لنا سالمه
ورجع وقعد على الكرسي وهو يدعي لها ...
بعد ما طلع سلمان من المسجد راح لبدور وقومها ورجعو للبيت ...
أول ما وصل دخل وخذ له دش وانسدح على سريره الا يدق جواله شاف الا محمد المتصل ..
سلمان بصوت تعبان : هلا
محمد: هلا بك شخبارك
سلمان: والله الحمد لله انت شخبارك
محمد: بخير شكلك دايخ
سلمان: أي والله توني جاي من المستشفى سبحت وهذاني بنام
محمد: زين لا اطول عليك بس بقولك الساعه 8 طيارة عبداللطيف توصل وكلمني عشان نروح له المطار
سلمان : لا زين قلت لي خلاص بس والي يعافيك لاصحيت صحني معك لان مااتوقع الساعه بتقومني
محمد: طيب
سلمان: الا عملية عبدالله متى
محمد: الساعه 9 ان شاء الله
سلمان: الله يعين
محمد: اوكي اخليك الحين
سلمان :يالله مع السلامه
وسكر من هنا وحط راسه من هنا وراح في ساااابع نومه ..
بدور قامت تتقلب بس ماجاها نوم قعدت وقامت تفكر بأمها يوم كانوا في مكه شلون كانت بصحتها وهي تخانقها لما تتناقر مع سلمان وصراخها وضحكتها.... وتصييح يالله قوم امي بالسلامه وكون في عون عبدالله وندى وقامت خذت لها القران وتقرأ ..
الساعه 7ونص دق محمد على سلمان وقعده وقاله انه هو بيمر عليه ..
نزل محمد تحت وراح للمطبخ الا يشوف العنود ..
محمد: صباح الخير
العنود: هلا والله صباح النور
محمد: شتسويين
العنود: نص كافيه تبي اسوي لك
محمد: اذا ماعليج كلافه أي لو سمحتي
العنود وهي تطلع كوب حق محمد : شكلك بتطلع
محمد: أي بروح اجيب عبداللطيف من المطار أنا وسلمان
العنود: بيوصل اليوم
محمد: أي
العنود: ماراح تكون موجود وقت العمليه
محمد: الا انشاء على طول من المطار للمستشفى
العنود وهي تمد له الكوب: تفضل
محمد: مشكوره
العنود: محمد معليه قبل لا تروح تحطني عند جدتي
محمد: شتسويين هناك
العنود: أحسن من القعده هنا وبعدين أخاف امي ماترضى تاخذني معها اذا راحو عشان عملية عبدالله
محمد ابتسم: شف التخطيط
العنود: ههههه
محمد: يالله روحي لبسي عباتج
العنود وهي تطلع من المطبخ : دقايق
محمد: انا استناج في السياره
العنود: خذ كوبي معاك
محمد خذ الكوب وطلع : حشى قعدتي البيت كله بالصراخ .
محمد مر سلمان عقب حط العنود في المستشفى وعلى طول راح للمطار ..
العنود دخلت غرفة جدتها ولقت بدور ودلال موجودين وصوت الشيخ أحمد العجمي مالي المكان بالقراءه
العنود: السلام عليكم
الثنتين بصوت واطي :وعليكم السلام
سلمت العنود عليهم وقعدت ...
بدور : مع منو جيتي
العنود: مع محمد وسلمان
بدور: وينهم
العنود: راحو يجيبون عبداللطيف من المطار
... شوي الا جا عبد العزيز وزوجته وعبد الرحمن وزوجته ومعاهم الهنوف والجد ...
الساعه 9 ...
الكل كان على اعصابه دخلت ندى وعبدالله لغرفة العمليات والكل قاعد ينتظر ويدعي لهم ..
دلال هي الوحيده الي طلعت أول ما دخلوهم الغرفه وبعدين رجعت مره ثانيه لعند جدتها ..
الشباب أول ماطلعو من المطار على طول جاو على المستشفى أول ما دخلو ومعهم عبداللطيف الكل قام وسلم عليه ...
عبداللطيف : ها شخبار ندى وعبدالله
أبوه <<عبدالرحمن>> : توهم داخلين للغرفه لهم خمس دقايق ..
عبداللطيف: انا بروح أشوف جدتي عن اذنكم
سلمان : بجي معك دقيقه
وراح سلمان وعبداللطيف لعند الجده وأول ما وصلو عند الغرفه الا واحد ينادي سلمان
لف سلمان وجهه : هلا والله << وراح يسلم علييه
عبداللطيف كمل طريقه ودخل للغرفه بكل هدوء وسمع صوت الشيخ بس كان الصوت واطي و وحده تتكلم وقف في مكانه وتم يسمع
: جدتي جدتي والي يعافيج قومي البيت مو حلو دونج ومن دون حسج والله اشتقت لج واشتقت للقعده وياج الصباح واشتقت اشرب القهوه معاج واشتقت لحضنج الحنون يابعدهم كلهم روحي فداج بس انتي قومي لنا بالسلامه .. جدي بره يستناج وعمامي كلهم وعيالهم وحريمهم وحتى عبداللطيف راح يجي اليوم عشانج وقامت تصيح ...
عبد اللطيف دخل وشافها مغطيه راسها على السرير ويدها على يد جدتها عبد اللطيف عيونه دمعت
يوم شافها تقدم لين وصل للجهه الثانيه من السرير وحط يده على يدها دلال تخرت وقامت وشافته قدامها وتمت منصدمه وعيونها معلقه فيه ودموعها على خدودها : عبداللطيف
عبداللطيف ابتسم وهز راسه بالإيجاب .. دلال انتبهت وصدت عنه وراحت تعدل حجابها
عبد اللطيف باس يد جدته : يالحنونه الله يقومج لنا بالسلامه وربي الدنيا بلا حسج مره ..وتم يطالع فيها وعيونه غرقانه بالدموع ... شوي الا حس بحركة يدها عبد اللطيف تفاجئ شوي الا فتحت عيونها بس بشكل بسيط
عبد اللطيف ودموع الفرحه في عيونه والابتسامه على وجهه: جدتي
دلال لفت وجهها وراحت تركض لعند جدتها وهي تصيح من الفرحه : أمي الحنونه
الجده وبصوت بالموت ينسمع: ماي... مااا
دلال: تبي ماي وتاخذ الجيك الي جنبها وتصب لها بالكاس
عبد اللطيف سندها على يده وقامت دلال تشربها ..
عبداللطيف: حمد لله على سلامتج يأمي
الجده: عبداللطيف
عبداللطيف : أي يالغاليه انا هنا جيت عشانج
الجده : ابتسمت
دلال وهي تصيح من الفرحه : حمد لله على سلامتج يا أغلى حنونه بالدنيا والله الدنيا مو حلوه من دونج اشتاقنالج
الجده مسكت يد دلال الي كانت جنبها وابتسمت لها .. الا يدخل سلمان
عبداللطيف: سلمان جدتي صحت
سلمان والابتسامه شاقه وجهه : صدق وجا يركض حمد لله على سلامتج يالغاليه
الجده: الله يسلمك
سلمان : انا بروح أبشرهم
وطلع ركض من الغرفه ...
دلال : الحمد لله لك يارب
عبد الطيف راح نادى الممرضه عشان تشوف الوضع ..
سلمان جا يركض لهم والفرحه على وجهه ..
واول من شافه محمد وقف : ها بشر
سلمان وهو يعانق محمد: أمي صحت صحت
محمد : الله يبشرك بالخير حمد لله على سلامتها
سلمان : الله يسلمك
بدور على طول راحت تركض لأمها ودموع الفرحه بعيونها ودخلت الغرفه : يمىى
الممرضه : أششششش
بدور في قلبها تشوشت عيشتج : شخبارها
دلال : الحمد لله
الممرضه : she is sleeping
بدور راحت عندها وباست راسها : نوم العوافي
عبداللطيف : طيب يلا نطلع نخليها ترتاح
طلعو الا العنود ومحمد والهنوف في وجههم ..
العنود: شفيكم طلعتو
بدور: الممرضه تقول خلوها ترتاح ما تبي ازعاج
الهنوف: وي قطع احنا بنسوي ازعاج
بدور: طلعت شوي بس عشان اسكتها شوي وبدخل عليها
عبداللطيف: ههههه والله انج وحده .. ها شخبار ندى وعبدالله
محمد: ننتظر مابعد يطلع الدكتور
دلال: يلا نروح لهم
راحو كلهم لهناك وقالو لهم ان الممرضه قالت ما احد يدخل عليها قعدو ..
العنود تكلم الهنوف: ما تلاحظين شي
الهنوف: وشو
العنود: جدي مو هنا
الهنوف: أي والله وين راح
العنود تغمز لها : راح عند حبيبته
الهنوف مبققه عيونها ..
العنود: عند جدتي لا يروح فكرج بعيد
الهنوف: هههه الله يغربل بليسج
|